AME fene la Wathebo, hnei Iehova hna nue la itre hlue i Nyidrë troa huujëne la itre piny maine itre meketrë. Ame e hnine la Tusi Hmitrötr ke, hna ce qaja palahi la lue waco cili. (Lev. 1:14; 12:8; 14:30) Pine nemen? Pine laka, tha ka hmaloi kö troa öhne la itre piny.

Ame la itre piny ke, itre ej a sesë kowe la itre xaa götran. Itre ej a lapa e Isaraela ngöne la itre ijine hedredrei. Ngo ame e Okotropa, itre ej a sesë kowe la itre nöj ka hedredrei, me bëeke hmaca e thupen. (Ny. i. S. 2:11, 12; Iere. 8:7) Celë hi matre, ame ngöne la ijine hnötr ke, jole kowe la angetre Isaraela troa itö piny.

Ame pena la itre meketrë ke, tha itre ka sesë kö itre ej kowe la itre xaa götran. Celë hi matre, tha jole kö troa öhn me itöne la itre waco cili e Isaraela. Ame itre xan, angatr a thupën la itre meketrë matre si angatr. (Wange ju fe la Ioane 2:14, 16.) Kola qaja ngöne la ketre itus (Bible Plants and Animals) ka hape, “Ame e Palestine, angatr a xome la itre meketrë matre si angatr. Pine laka, isa hetre si angatr matre hnei angatr hna kuje la itre ngöne uma, matre nyi göhnene la itre meketrë.”—Wange ju fe la Isaia 60:8.

Eje hi, hnei Iehova hna aijijëne la itre hlue i Nyidrë troa huujëne la itre waco ka hmaloi troa öhn. Drei la ketre Akötresie ka ihnim me utipin!