YOMARA me lue xa i angeic Marcelo me Hiver a mele ngöne la ketre traon e Guatemala. Hnei Yomara hna nyiqane ini Tusi Hmitrötr me itre Temoë, nge ame hë thupen, hnene fe la lue xa i angeic hna ini Tus. Ngo, ame la ejolen, ke itre ka timek asë hi angatr ala kön, nge thatreine asë kö angatr e la qene braille. Celë hi matre, hnene la trejin ka ini Tus koi angatr hna e la itre paragaraf me itre xötr koi angatr.

Nge jole catr koi angatr troa sine la itre icasikeu. Ngacama tha nanyi kö la Uma Ne Baselaia, ke 40 hi lao menetr hne tro angatr a tro kow, ngo ame pe, jole koi angatr troa tro cas. Celë hi matre, hnene la itre trejin ne la ekalesia hna xatua angatr troa sine la itre icasikeu. Ame hë la Yomara me lue xa i angeic a nyiqane cile fë hnëqa ngöne la itre ijine icasikeu, hnene la itre trejin hna xatua angatr troa e gufan la nyine tro angatr a qaja.

Ame lo Mei 2019, hna nyiqane acile ngöne la traon i angatr la itre icasikeu. Nge hetre lue trefëne ka pionie ka traqa e cili. Ngacama thatre kö nyidro la qene braille, ngo hnei nyidroti hna mekun troa inine la braille koi Yomara me lue xa i angeic. Matre hnei nyidroti hna tro ngöne bibliothèque göne troa atrepengöne la qene braille me thele la aqane troa inine la itre xan la qene hlapa cili.

Thupene la itre treu, atreine hë e la qene braille hnei Yomara, Marcelo me Hiver, nge celë hi ka acatrene la imelekeu i angatr me Iehova. Ame enehila, itre pionie asë hi angatr ala kön, nge atre ixatua ha Marcelo. Ame ngöne la wiik, angatr a catre huliwa i Iehova, nge celë hi ka ithuecatr koi itre xan troa hane tui angatr.

Tru catre la hni ne ole i Yomara, me Marcelo, me Hiver kowe la ixatua ne la itre trejin. Öni Yomara, “Ame la eahun a xötrei iöhny memine la itre Temoë, ke hnei angatr hna amaman la nyipi ihnim.” Ketre öni Marcelo, “Hetre nyipi sinee eahun e hnine la ekalesia, nge jëne la ihnim, casi hi la fami së e cailo fen.” Yomara me lue xa i angeic a treqene la ijine tro angatr a öhne la kola aparadraisone la fen.—Sal. 37:10, 11; Is. 35:5.