1. Nemen la ka amaman ka hape, ka tru koi Iesu la Itre Hna Cinyihan?

 PANE mekune jë laka, epuni a drei Iesu a hamë ini. Anyimua amexej jë kö nyidrë me e gufane la Itre Hna Cinyihan! Hnei Iesu hna amexej la Itre Hna Cinyihan ngöne ju kö lo nyidrëti a ase bapataiso me qëmeken tro nyidrëti a mec.  b (Deu. 8:3; Sal. 31:5; Luka 4:4; 23:46) Ame ngöne la köni macatre nge sine ne cainöje i Iesu, hnei nyidrëti palahi hna e me amexej me qejepengöne la Itre Hna Cinyihan kowe la itre atr.—Mat. 5:17, 18, 21, 22, 27, 28; Luka 4:16-20.

2. Ame lo Iesu a co, nemen la ka xatua nyidrë troa atre hnyawa la Itre Hna Cinyihan? (Wange ju la icetrön.)

² Ame ngöne lo itre macatre qëmeken tro Iesu a cainöj, hnei nyidrëti palahi hna e me dreng la Itre Hna Cinyihan. Tune la nyidrëti a drei Maria me Iosefa a porotrikën lapane la itre hna cinyihan ngöne la hnalapa. c (Deu. 6:6, 7) Nge tune la hnei nyidrëti hna majemin e nöjei Sabath, nyidrëti a ce tro me fami nyidrë kowe la sunago. (Luka 4:16) Ame cili, nyidrëti a drenge hnyawa la kola e la Itre Hna Cinyihan. Nge e thupen, nyidrëti pë hë a ketre e caasine itre ej. Celë hi ka xatua nyidrë troa atre hnyawa la Itre Hna Cinyihan me hnin me trongëne itre ej. Ma mekune hi epun lo ka traqa ngöne la uma ne hmi, lo nyidrëti petre hi a 12 lao macatre. Hnene la  itre ka hamë ini, ka atre hnyawa la Wathebo i Mose hna “haine la inamacane i [Iesu] me aqane sa i” nyidrë.—Luka 2:46, 47, 52.

3. Nemen la hne së hna troa ce wange ngöne la tane mekune celë?

³ Maine tro sa e lapane la Tusi Hmitrötr, tro hë së lai a atre hnyawa la alien me wangatrun ej. Ngo, tune kaa la aqane tro sa kepe thangan qa ngöne la hne së hna e? Hetre ini nyine tro sa xom qa ngöne la hnei Iesu hna qaja kowe la angetre cinyihan, me itre Faresaio, me itre Sadukaio, itre ka atre hnyawa la Wathebo. Ngacama itre ka e lapan angatr la Itre Hna Cinyihan, ngo pëkö thangan hnei angatr hna kapa qa ngön. Hnei Iesu hna qaja la köni ewekë hnei angatr hna tha kuca. Tro la itre hnei Iesu hna qaja koi angatr a xatua së troa (1) trotrohnine hnyawa la itre hne së hna e, (2) öhne la itre mekun ka sisitria, me (3) nue la Tusi Hmitrötr troa saze la mele së.

4. Nemen la ini hne së hna xom qa ngöne Luka 10:25-29 göne la aqane troa e Tusi Hmitrötr?

⁴ Aja i easë troa trotrohnine la hne së hna e ngöne la Tusi Hmitrötr, matre hetre thangane koi së. Tro sa ce wange la hna qaja hnei Iesu kowe lo “thupëtresij ka atrepengöne hnyawa la itre Wathebo.” (E jë la Luka 10:25-29.) Hnei angeic hna hnyingë Iesu la nyine tro angeic a kuca matre kapa la mel ka pë pun. Hnei Iesu hna hnying matre xatua angeic troa ketre öhne ngöne la Tusi Hmitrötr la mekun ka sa la hnyinge i angeic. Öni nyidrë: “Nemene la hna cinyihan ngöne la Trenge Wathebo? Nemene la hnei eö hna trotrohnin?” Hnei angeic hna sa hnyawane koi Iesu me amexej la itre xötr ka qaja la enyipiewekëne troa hnimi Akötresie memine la atr lapa easenyi së. (Lev. 19:18; Deu. 6:5) Ngo, öni angeic hmaca jë hi: “Drei la atre lapa easenyi ni?” Kolo hi lai a amaman laka, tha nyipi trotrohnine kö angeic la alien la hnei angeic hna e. Celë hi matre, thatre kö angeic la aqane troa trongëne itre ej.

5. Tune kaa la aqane tro la thith memine la aqane e a xatua së troa trotrohnine la hne së hna e?

⁵ Ijije hi tro sa trotrohnine hnyawa la Tusi Hmitrötr, e tro sa e lapan ej. Hane hi la nyine tro epuni a kuca. Thithi jë qëmeken troa e. Tro sa atreine trotrohnin la Tusi Hmitrötr e tro sa sipo ixatua koi Iehova. Haawe, sipone jë la uati hmitrötr i Nyidrë matre tha tro kö epuni a meku xaa ewekë la epuni a e Tusi Hmitrötr. Thupene lai, the nyimenyime kö la epuni a e Tusi Hmitrötr. Tro hë epuni lai a trotrohnin hnyawa la hnei epun hna e. Ame itre xan, pi tro kö angatr a e catrën la Tusi Hmitrötr maine pena troa dreng la kola e ngöne tablet. Aqane tro hi epuni lai a trotrohnine la itre ini qa hnine la Tusi Hmitrötr me amë hutin ngöne la mekun me hni epun. (Ios. 1:8) Ame hë la epuni a ase e, thithi hmaca jë. Olene jë koi Iehova la ahnahna celë, ene la Tusi Hmitrötr. Nge sipo Nyidrëti jë troa xatua epun troa trongëne la hnei epuni hna e.

6. Pine nemen matre nyipiewekë troa hnying me sija la itre mekun ngöne la epuni a e Tusi Hmitrötr? (Wange ju fe la iatr.)

⁶ Hane hi la lue xaa mekun ka troa xatua epun troa trotrohnine hnyawane la Tusi Hmitrötr. Hnyinge jë. Ame la epuni a ase e la itre xötr, hnyinge jë ka hape: ‘Kola qeje drei e celë? Drei la ka ithanata? Koi drei, nge pine nemen? Hna traqa ekaa la ewekë  celë, nge eu?’ Tro la itre hnyinge celë a xatua epun troa trotrohnine la itre mekun ka tru me aqane trongene la hne së hna e. Ketre, ame la epuni a e, sija jë la itre mekun ka ketri epun. Ame la easa cinyany, ke kola mama cil la itre mekuna së, nge hmaloi hi troa trotrohnine la itre hne së hna e. Tro fe lai a xatua epun matre tha tro kö a canga thëthëhmin. Sija jë la itre hnying, me itre hnei epun hna ithel me itre mekun ka tru, maine aqane tro epuni a trongën, me itre mekun ka ketri epun. Maine tro epuni a kuca lai, tro hë epuni a öhn laka, ame la Tusi Hmitrötr, ke ketre maca thatraqai easë isa ala cas.

7. Nemen la thiina ka nyipiewekë ngöne la easa e, nge pine nemen? (Mataio 24:15)

⁷ Hnei Iesu hna qaja la ketre thiina ka nyipiewekë matre tro sa atre la aliene la Tusi Hmitrötr, ene la trotrohnin. (E jë la Mataio 24:15.) Nemene la trotrohnin? Kola qaja la troa atreine öhne la ka acasine la lue mekun, maine ka aisapengönë lue ej. Nge celë hi ka xatua së troa öhne la itre mekun ka tha canga mama kö. Ketre, tune la hna qaja hnei Iesu, nyipiewekë tro sa hetrenyi la trotrohnine matre öhne la aqane eatr la itre hna perofetan hnei Tusi Hmitrötr. Ka nyipiewekë la thiina cili matre troa kepe thangane qa ngöne la hne së hna e ngöne la Tusi Hmitrötr.

8. Tune kaa la aqane tro sa e la Tusi Hmitrötr cememine la trotrohnin?

⁸ Iehova a hamëne la trotrohnin kowe la itre hlue i Nyidrë. Haawe, sipone jë koi Nyidrë troa xatua epun troa huliwane la thiina cili. (Ite edomë 2:6) Tune kaa la aqane tro epuni a ujë thenge la thithi epun? Lapa mekune ju la itre ini hnei epun hna e, nge wange ju ka hape, ka ihmeku kö memine la itre hnei epuni hna atre. Maine epuni a aja ixatua, ithele jë ngöne  la itre itus hna kuca nyine ini Tus, tune la Nyine Thele Mekun Ne La Itretre Anyipici Iehova. Tro la itre itusi cili a xatua epun troa trotrohnin la ketre xötr ne la Tusi Hmitrötr, me aqane tro epuni a trongën. (Heb. 5:14) Maine tro epuni a huliwane la trotrohnine ngöne la epuni a e Tusi Hmitrötr, tro hë epuni a atre hnyawa la aliene ej.

9. Nemene la ini ka sisitria ne la Itre Hna Cinyihan hna tha trotrohnin hnene la itre Sadukaio?

⁹ Ngacama atre hnyawa hi la itre Sadukaio la faif lao pane itus ne la Itre Hna Cinyihan qene Heberu, ngo tha trotrohnine kö angatr la itre ini ka nyipiewekë. Ame lo ketre ijin, hnei angatr hna hnying koi Iesu göne la melehmaca matre tra thethi nyidrë. Ngo, öni nyidrë koi angatr: “Tha hane kö nyipunieti e hnine la itusi Mose, lo Akötresie a qaja koi angeic ngöne la sinöe ka ithinyi ka hape: ‘Eni la Akötresi Aberahama, me Akötresi Isaaka, me Akötresi Iakobo’?” (Mar. 12:18, 26) Anyimua e hë la itre Sadukaio la itre xötre cili. Ngo, kösë Iesu hi lai a qaja koi angatr ka hape, tha trotrohnine kö angatr la ketre ini ka sisitria ne la Itre Hna Cinyihan, ene la melehmaca.—Mar. 12:27; Luka 20:38. d

10. Nemen la nyine tro sa thele hnyawan ngöne la easa e?

¹⁰ Nemen la ini koi së? Ame la easa e la Tusi Hmitrötr, nyipiewekë tro sa thele hnyawan la itre ini ngöne la itre xötr maine itre hna melën. Aja së troa trotrohnine la itre ini ka tru ngöne la ketre xötr, ngo memine fe la itre nyipici me itre trepene meköt ka tha canga mama kö.

11. Tro la tusi 2 Timoteo 3:16, 17 a xatua epuni tune kaa troa öhne la itre trengamo qa hnine la Tusi Hmitrötr?

¹¹ Tro sa öhne tune kaa la itre trengamo qa hnine la Tusi Hmitrötr? Tro sa ce wange la hna qaja hnei 2 Timoteo 3:16, 17. (E jë.) Kola hape, ame la “nöjei hna cinyihan asë . . . ka nyipiewekë göi” troa (1) hamë ini, (2) hmekën, (3) xom amekötine la nöjei ewekë, me (4) hajin ngöne la thiina ka meköt. Ka nyipici hi la foa lao eloine celë ngöne la easa e la itre xaa itus ne la Tusi Hmitrötr hne së hna tha xom lapan. Ame la epuni a e, thele jë la itre ini memine la aja i Iehova, maine itre trepene meköt. Thele jë fe la aqane tro itre ej a xatua epun troa hmek. Isa hnyinge jë ka hape, “Hapeu, kolo kö a xatua ni hnene la itre xötre celë troa öhne me nuetrij la itre thiina me itre mekun ka ngazo matre mele nyipici koi Iehova?” Thele jë la aqane tro ej a xom amekötine la ketre mekun hnei epuni hna dreng ngöne la hna cainöj. Ketre kapa hnyawa ju la itre ihaji ka mama ngöne la  itre xötr matre xatua epuni troa ca mekun me Iehova. Maine tro epuni a lapa mekun la foa lao ewekë celë, tro hë epuni a öhne la itre trengamo ka ej e hnine la Tusi Hmitrötr.

12. Hnauën la Iesu a hnyinge kowe la itre Faresaio ka hape “Hapeu, tha hnei nyipunieti kö hna e?”

¹² Hnei Iesu fe hna hnyinge kowe la itre Faresaio ka hape, “Hapeu, tha hnei nyipunieti kö hna e?” matre amaman laka, angatr a huliwane angazon la Itre Hna Cinyihan. (Mat. 12:1-7) e Hnei angatr hna qaja angazone la itretre drei Iesu me hape, itretre ena la wathebo göi Sabath. Ame hnei Iesu hna sa jëne la lue ceitun memine la ketre xötr ne la tusi Hosea, matre amaman laka, tha trotrohnine kö la itre Faresaio la nyipi aliene la Sabath nge pëkö utipine i angatr. Pine nemen matre pëkö thangan la hnei angatr hna e Tusi Hmitrötr? Pine laka, angatr a e ngo ka ngazo la hni angatr, nge ka pi tru. Celë hi lai ka sewe angatr troa trotrohnine hnyawa la hnei angatr hna e.—Mat. 23:23; Ioane 5:39, 40.

13. Tune kaa la aqane troa e la Tusi Hmitrötr, nge pine nemen?

¹³ Kola ini së hnene la itre trengewekë i Iesu la enyipiewekëne troa e la Tusi Hmitrötr cememine la ipië. Loi e tro sa ipië me nue Iehova troa ini së, ngo tha tro kö sa tune la itre Faresaio. Loi e tro sa ‘kapa amenyikene la trengewekë’ hna amë ngöne la isa hni së. (Iako. 1:21) E tro sa menyik, ke tro ha lapa e kuhu hni së la Trengewekë i Akötresie. Troa hetre thangane la itre ini Iesu e tro sa nuetrij la pi tru me iqej.

14. Troa mama tune kaa ka hape, Tusi Hmitrötr a saze së? (Goeëne ju fe la itre iatr.)

 ¹⁴ Tro la aqane ujë së koi itre xan a amamane ka hape, ka hetre thangane la Tusi Hmitrötr ngöne la mele së. Tha hnene kö la itre Faresaio hna nue la Itre Hna Cinyihan troa ketr hna hni angatr. Celë hi ka uku angatr troa “jelengazone la ka pë engazon.” (Mat. 12:7) Ketre tun, tro la aqane ujë së koi itre xan a amamane ka hape, easa nue la Tusi Hmitrötr troa saze la itre thiina së. Hapeu, easë kö a canga goeëne la itre thiina ka lolo thene la itre xan, maine easë pena qaja amamane la itre tria i angatr? Hapeu, easë kö a nue la ngazo itre xan maine lapa fë trenge hni? Tro la itre hnyinge celë a amamane ka hape, easa nue la Tusi Hmitrötr troa saze la itre mekuna së, me itre aliene hni së, me aqane ujë së.—1 Tim. 4:12, 15; Heb. 4:12.

15. Tune kaa la aqane goeëne Iesu la Tusi Hmitrötr?

¹⁵ Ka tru catr koi Iesu la Tusi Hmitrötr. Kola mama lai ngöne la hna qaja ngöne Salamo 40:8, MN: “Akötresieng fe, madrine ni troa kuca la aja i nyipë, nge e kuhu hninge la wathebo i nyipë.” Celë hi matre Iesu a catre nyihlue i Iehova me madrin. Ketre tun, tro fe sa madrine me catre nyihlue i Iehova, e tro sa amë e kuhu hni së la Trengewekë i Akötresie.—Sal. 1:1-3.

16. Tune kaa la aqane tro sa kepe thangane la hna e Tusi Hmitrötr? (Wange ju la hna eköhagen hna hape, “ Itre Trengewekë i Iesu Ka Troa Xatua Epun Troa Trotrohnin La Hnei Epun Hna e.”)

¹⁶ Thenge la itre hnei Iesu hna qaja me kuca, nyipiewekë tro sa atreine e Tusi Hmitrötr hnyawa. Loi e tro sa sipo Iehova troa xatua së troa trotrohnin la hne së hna e, me hnying me fejane la itre mekun ka ketri së, nge tha tro kö a e nyimenyimën. Loi e tro fe sa ithel ngöne la itre itusi së matre trotrohnine la hne së hna e. Maine aja së troa huliwane hnyawane la Tusi Hmitrötr, loi e tro sa sine ajuine la itre xaa xötr hne së hna thatre, matre troa öhne la itre trengamo. Ketre, maine easa ajane tro la Tusi Hmitrötr a saze së, loi e tro sa e cememine la ipië. Ame cili, tro ha hetre thangane la hne së hna e Tusi Hmitrötr, me easenyi së catr koi Iehova.—Sal. 119:17, 18; Iako. 4:8.