1. Nemene la hnei Iesu hna qaja kowe la itretre drei nyidrë göne la ijine la pun? Nge nemen la hnei nyidrëti hna upi angatr troa kuca?

 QËMEKEN tro Iesu a mec, hnene la foa lao atre drei Iesu hna hnying koi nyidrë, ka hape: “Eu la troa traqa la itre ewekë cili . . . memine la hatrene la pune la fene celë?” (Mat. 24:3) Angatr a ajan troa atre la ijine troa lep apatrenyi Ierusalema. Matre hnei Iesu hna qaja la aqane troa apatrenyi Ierusalema, memine la “pune la fene celë,” ene la hneijine së. Öni Iesu göne la pun la fen celë, ka hape: “Ame göi drai me hawa, pëkö ka atre, thatre kö la itre angela ne hnengödrai, nge goi thatre fe la Nekön, ngo Keme hi.” Celë hi matre hnei Iesu hna upe la itretre drei nyidrë troa ‘catre hmek.’—Mar. 13:32-37.

2. Pine nemen matre nyipiewekë tro la itre pane keresiano a catre hmek?

² Loi e tro la itre pane keresiano a catre hmek, ke emele i angatre hi lai. Hnei Iesu hna qaja kowe la itretre drei nyidrë la itre ewekë ka amamane la ijine kola troa apatrenyi Ierusalema. Öni nyidrë: “E öhne hë nyipunie la itre trongene isi a lapa xötreithe la traon ne Ierusalema, atre hnyawa ju laka, easenyi catre hë matre lep apatrenyi angeice jë.” Nge ame ngöne la ijine cili, loi e tro la itre keresiano a drengethenge la hna amekötine hnei Iesu me “kötre kowe la itre wetr.” (Luka 21:20, 21) Ame hë la angetre Roma a lep apatrenyi Ierusalema, ke mele ju pe hi lo itre keresiano ka idrengethenge.

3. Nemene la hne së hna troa ce wang ngöne la tane mekune celë?

 ³ Easë hnyawa a melëne la pune la fene celë ka ngazo. Celë hi matre loi e tro sa waiewekë hnyawa me catre hmek. Ame ngöne la tane mekune celë, tro sa ce wang la aqane tro sa waiewekë hnyawa ngöne la easa öhne la itre ewekë ka traqa enehila, memine la aqane tro sa hmek me huliwane hnyawane la traeme së.

4. Hnauëne laka easa pi atre la itre ewekë ka traqa enehila?

⁴ Easa pi atre la aqane trongene la fene enehila, ke ej a eatrëne la itre hna perofetane hnei Tusi Hmitrötr. Hnei Iesu hna e wengën la itre ewekë ka troa traqa matre xatua së troa atre la ijine kola troa nyipune la fene i Satana. (Mat. 24:3-14) Hnei Peteru aposetolo mina fe hna ithuecatr koi së troa goeën hnyawane la aqane eatr la itre hna perofetan, matre tro palahi a acatrene la lapaune së. (2 Pet. 1:19-21) Nge kola qaja ngöne la itus tixenuë ne la Tusi Hmitrötr, ka hape: “Hna amaman jëne Iesu Keriso, lo hnei Akötresie hna ahnithe kow troa amamane la itre ewekë ka troa canga traqa koi itre hlue i nyidrë.” (Hna ama. 1:1) Celë hi matre, ka nyipiewekë koi së la itre ewekë ka traqa enehila, nge aja së troa atre ka hape, itre eje kö a eatrën la itre hna perofetan. Ketre, easa ajane troa ce porotrikëne lai memine la itre trejin.

5. Nemene la nyine tro sa thupën, me nyine tro sa kuca? (Goeëne ju la itre iatr.)

⁵ Loi e tro sa thupën tha tro kö sa qaja la sipu mekuna së ngöne la easa porotrikën me itre xan la itre hna perofetan. Pine nemen? Pine laka tha ajane kö së troa qaja la ketre ewekë ka troa thë la cas ne la ekalesia. Maine tro sa drenge la itre hene ne mus a qaja ka hape, tro angatr a nyinyine la ketre jol me acile la tingeting, ke tha tro kö sa canga mekune ka hape, eatre hë lo hna perofetan ngöne 1 Thesalonika 5:3. Ngo loi e tro pe sa treqene la itre ithuemacanyi hna hamën ngöne la itre itusi së. Ame la easa nyitrepene la itre porotrike së hnene la itre itus hna hnëkën hnene la organizasio i Iehova, ke easë hi lai a xatuane la ekalesia troa cas ngöne la “aqane waiewekë.”—1 Kor. 1:10; 4:6.

6. Nemen la itre ini hne së hna xom qa ngöne la tusi 2 Peteru 3:11-13?

⁶ E jë la 2 Peteru 3:11-13. Peteru aposetolo a xatua së troa atreine waiewekë hnyawa ngöne la easa inine la itre hna perofetane hnei Tusi Hmitrötr. Öni nyidrë, “the thëthëhmine kö la ijine hna hape, celë hë la drai Iehova.” Pine nemen? Pine laka aja i easë troa huliwane hnyawane la traeme së troa ‘melëne la thiina ka meköt, me kuca la itre huliwa ka nyipici koi Akötresie.’ Ngo tha hnene kö laka, easa ajan troa atre la “drai me hawa” ne traqa la isi Amagedro. (Mat. 24:36; Luka 12:40) Kolo lai a hape, aja i easë troa kuca la meköt, me huliwa i Iehova qa kuhu hni së. Celë hi matre nyipiewekë tro sa hmek, matre thupëne la mele së.

7. Nemene la ka amamane ka hape ka hmeke së? (Luka 21:34)

⁷ Hnei Iesu hna hmekëne la itretre drei nyidrë göne la itre ewekë ka troa traqa, ngo göne fe la mele i angatr. Celë hi hnei nyidrëti hna qaja ngöne Luka  21:34. (E jë.) Öni nyidrë: “Wange pala kö nyipunie.” Ame la nyipi keresiano ka hmek, ke angeic a neëne me thupën la itre ewekë ka troa thë la imelekeu i angeic me Iehova. E cili, tro hë angeic “a lapa fene la ihnim i nyidrë.”—Ite edomë 22:3; Iudra 20, 21.

8. Nemene la hnei Paulo hna qaja kowe la itre keresiano ne Efeso?

⁸ Hnei Paulo mina fe hna qaja kowe la itre keresiano troa thupëne la mele i angatr. Öni nyidrë kowe la itre keresiano ne Efeso, ka hape: “Wai nyipunieti hnyawa kö, wanga tro nyipunie a tro tune la itre hmo, ngo loi pe troa tro inamacan.” (Efe. 5:15, 16) Pine laka Satana palahi a thele troa thë la imelekeu së me Iehova, Tusi Hmitrötr a ithuecatr koi së tro palahi a “trotrohnine la aja i Iehova” matre thupë së qa ngöne la itre hnö i Satana.—Efe. 5:17.

9. Tro sa atre tune kaa la aja i Iehova koi së?

⁹ Tha Tusi Hmitrötr kö a qaja asë la itre ewekë ka troa thë la aqane imelekeu së me Iehova. Matre jole koi së e itre xaa ijin troa axecië mekun hnyawa, ke pëkö hna qaja hnei Tusi Hmitrötr. Maine easa ajane troa axecië mekune hnyawa, ke loi e tro sa trotrohnin me atre la “aja i Iehova.” Matre nyipiewekë tro sa inine me lapa mekune la Trengewekë i Nyidrë. Maine tro palahi sa thele la aja i Iehova memine la “aqane waiewekë i Keriso,” ke tro hë së lai a ujë tune la itre ka “inamacan,” ngacama pëkö wathebo hna acil. (1 Kor. 2:14-16) Hetre itre hnö ka canga mama hi koi së, ngo ame kö la itre xan, ke tha ka canga mama kö.

10. Nemene la itre huliwa ka ngazo nyine tro sa kötren?

¹⁰ Hane hi la itre xaa huliwa ka ngazo nyine tro sa kötren, ene la troa wesiwes, troa iji me xeni atruny, troa qaja la itre trenge ithanata ka akötr, troa goeë isi maine pornographie, me itre xane ju kö. (Sal. 101:3) Satana palahi a thel troa thë la imelekeu së me Iehova. (1 Pet. 5:8) E tha hmeke kö së, ke tro angeic a jum ngöne la mekun me hni së la itre itin ka ngazo, tune la troa piin, troa huliwa thoi, troa meciun, troa imethinë, troa pi tru me itëkeun. (Gal. 5:19-21) Maine jë, tha tro kö itre ej lai a canga mama the së. Ngo e tha canga fejetrije kö së la itre itine cili, ke tro hë itre ej lai a cia tune la ketre feja poizin ka troa axulune la itre jol.—Iako. 1:14, 15.

11. Nemene la hnö i Satana ka tha canga mama kö, nyine tro sa kötren? Nge pine nemen?

¹¹ Ame la ketre hnö i Satana ka tha canga mama kö, ke ene la itre sinatro ka ngazo. Pane mekune jë ka hape, epuni a ce huliwa memine la ketre atr ka tha nyihlue i Iehova kö. Hnene laka aja i epun tro angeic a qaja aloine la itre Temoë Iehova, matre epuni a loi thiina me xatua angeic. Ame itre xaa ijin, epuni a kapa troa ce xeni me angeic. Ngo ame hë e thupen, epuni ha ce xeni lapa. Ame lo xötrei, ka lolo palakö la itre porotrike i epon utihë la angeic a qaja la itre ewekë ka sis. Maine jë, epuni a acatreihni troa drei angeic. Ngo e thupen, tha ketri epuni hë la itre hnei angeic hna qaja. Nge traqa pi hi la ijin, epuni a kapa troa xomi ver me angeic thupene la huliwa. E cili, epuni ha nyiqane xome la aqane waiewekë i angeic. Tha hmitre pe kö, matre ujë jë fe hë epun tui angeic. Nyipici, easa hnim me metrötrëne la nöjei atr. Ngo the thëthëhmine kö së ka hape, ijije hi tro sa xome la thiina ne la itre atr hne së hna majemine ce  tro memin. (1 Kor. 15:33) Maine tro sa hmek, tune la hna qaja hnei Iesu, ke tro së lai a kötren la itre atr ka tha trongëne la itre trepene meköti Iehova. (2 Kor. 6:15) E cili, tro hë së lai a öhne la hnö me tro ananyin ej.

12. Nemen la huliwa nyine tro la itretre drei Iesu a kuca qëmeken troa traqa la pun?

¹² Aja Iesu tro la itretre drei i nyidrë a catre huliwa qëmeken troa traqa la pun. Hnei nyidrë hna ahnithe koi angatr la ketre huliwa, ene la troa cainöjëne la maca ka loi “e Ierusalema, me ngöne la nöje Iudra asë, me e Samaria, me ngöne la nöjei götrane gaa nany ne la fene hnengödrai.” (Itre hu. 1:6-8) Eje hi, tha huliwa ka co kö! Hnene la itretre dreng hna huliwane hnyawan la traeme i angatr, matre eatrën la huliwa cili.

13. Pine nemen matre nyipiewekë tro sa huliwane hnyawane la traeme së? (Kolose 4:5)

¹³ E jë la Kolose 4:5. Ame la ketre aqane tro sa thupëne la mele së, ke ene la troa mekun hnyawan la aqane tro sa huliwane la traeme së. Ame la “ijine memine la ewekë ka xulu” ke kola traqa koi së asë. (Ate cai. 9:11) Matre ijije hi troa thupatëne la mele së.

14-15. Tune kaa la aqane tro sa huliwane hnyawane la traeme së? (Heberu 6:11, 12) (Wange ju fe la iatr.)

 ¹⁴ Easa huliwane hnyawane la traeme së, la easa catre kuca la aja Iehova me acatrene la aqane imelekeu së me Nyidrë. (Ioane 14:21) Haawe, “catre pi, nge the enienije kö, ngo loi e tro pala hi a tru hnei huliwa i nyipunie koi Joxu.” (1 Kor. 15:58) Maine tro sa mec, nge troa traqa la pun la fene celë ka ngazo, tha hleuhleu kö së, ke hne së hna catre huliwa i Iehova.—Mat. 24:13; Rom. 14:8.

¹⁵ Iesu mina fe enehila a xatuane la itre hlue i Iehova ka cainöjëne la Baselaia e cailo fen. Tune la hnei Iesu hna thingehnaean, nyidrëti a ini së la aqane troa cainöj jëne la organizasio i Iehova, me hamë së la itre jia ne huliwa matre eatrëne hnyawane la huliwa cili. (Mat. 28:18-20) Easa kuca la hnei Iesu hna amekötine koi së, ene la troa catre cainöj me inine la itre atr me hmek, qëmeken tro Iehova a apatrene la fene celë. Loi e tro sa trongëne la hna qaja ngöne Heberu 6:11, 12, matre troa catrecatre la mejiune së “uti hë la pun.”—E jë.

16. Nemene la nyine tro sa kuca?

¹⁶ Ase hë Iehova sa la drai me hawa ne tro Nyidrëti a apatrene la fene i Satana. Ame ngöne la ijine cili, tro Nyidrëti a eatrëne asë la itre hnei Nyidrëti hna perofetan e hnine la Tusi Hmitrötr. Maine jë tro sa mekune ka hape, tha canga traqa palakö la drai cili. Ngo ame pe, “tha tro kö a hmit” la drai Iehova (Hab. 2:3) Haawe, catre jë së “teqe Iehova,” me ‘mejiune kowe la Akötresie atre amele së.’—Mika 7:7.