Ame pe, Iehova a upi së troa treqene hnyawane la drai tro Nyidrëti a traqa. Hnauëne la Nyidrëti a upi së troa itreqe hnyawa? Nemene la ka troa xatua së troa itreqe cememine la madrin?

HNAUËNE LA NYIDRËTI A UPI SË TROA ITREQE HNYAWA?

Öni Tusi Hmitrötr: “Qa ngöne lai tro Iehova a teqene mate hnimi nyipunie; nge qa ngöne lai tro nyidëti a mejë mate utipi nyipunie; ke Akötesie ka meköti Iehova; manathithi angate asëjëihë angete teqe anganyidë.” (Is. 30:18) Hna qaja la itre trengewekë celë, kowe la angetre Iudra ka catre he. (Is. 30:1) Ngo kolo fe a hamë mejiune kowe la angetre Iudra ka mele nyipici. Ketre, thatraqane fe la itre hlue i Iehova ka mele nyipici enehila.

Matre nyipiewekë tro sa atreine itreqe, ke Iehova fe a itreqe hnyawa. Hnei Nyidrëti hna sa la ijine troa apatrene la fene celë, matre Nyidrëti a treqene hnyawa la drai me hawa hna sa. (Mat. 24:36) Tro ha mama e cili laka, itre trengathoi la hnei Satana hna qaja göi Iehova me itre hlue i Nyidrë. Celë hi matre, tro Iehova a othe me umë Satana me itre sine xöle i angeic, ngo tro kö Nyidrëti a “utipi” së.

Maine jë, tha tro kö Iehova a apatrene la itre akötre së qëmekene tro Nyidrëti a traqa. Ame pe, Nyidrëti a qaja ka hape, ijiji së hi troa treqe Nyidrë, cememine la madrin. Tune la hna qaja hnei Isaia, ijiji së hi troa madrin, ngacama aja i easë troa canga eatre la itre hnei Iehova hna thingehnaean. (Is. 30:18) a Tro sa ce wange la foa lao ewekë ka troa xatua së troa itreqe cememine la madrin.

KA TROA XATUA SË TROA ITREQE CEMEMINE LA MADRIN

Mekune catrëne jë la itre ewekë ka loi. Ame ngöne la mele i Dravita joxu, hnei angeic hna öhne la itre huliwa ne la itre atr ka ngazo. (Sal. 37:35) Ngo öni angeic: “Lapa thaupu pi e Iehova, me teqe nyideti ju; the aköte kö eö ngöne la ate loi xölene la jë i nyën, memine la ate nyinyithina.” (Sal. 37:7) Hnei Dravita hna trongëne la eamo celë, la angeic a mekune lapane la itre hnei Iehova hna qaja, ene la troa amele angeic. Ketre, angeic a olene koi Iehova la itre manathith hnei angeic hna kapa qaathei Nyidrë. (Sal. 40:5) Ketre tu së fe, e tro sa mekune  catrëne la itre ewekë ka loi ngöne la mele së, ngo tha itre jole kö, ke tro lai a hmaloi koi së troa treqe Iehova hnyawa.

Isine jë troa atrunyi Iehova ngöne la nöjei ijin. Hnene la atre cinyihane la Salamo 71, maine jë Dravita, hna qaja koi Iehova ka hape: “Tro pala kö ni a lapaune me atrunyi cilie o drai.” (Sal. 71:14) Tune kaa la aqane atrunyi Iehova hnene la atre cinyihane la Salamo? Angeic a qeje Nyidrë koi itre xan me thinge la itre nyima koi Nyidrë. (Sal. 71:16, 23) Tui Dravita, tro sa öhnyi madrine troa treqe Iehova, ngöne la easa atrunyi Nyidrë. Easa atrunyi Nyidrë la easa cainöj me ngöne la easa porotrikë Nyidrë memine la fami maine itre sinee së, me thinge la itre nyima ne Baselaia. Ame la epuni a thinge la ketre nyima ne Baselaia, lapa mekune jë la itre trengewekë ne ej, memine la madrine hnei epun hna troa kapa.

Xomi trengecatre jë thene la itre trejin. Ame la Dravita a cile kowe la itupath, öni angeic koi Iehova: “Tro ni a lapaune la [ëje] i cilie qëmeke ne la ange ka hmitöte i cilie.” (Sal. 52:9) Ketre tu së fe, troa aegöcatrenyi së hnene la itre trejin, e tro sa ce sine me angatr la itre icasikeu, me ce cainöj, me ce me angatr ngöne la itre ijine madrin.​—Rom. 1:11, 12.

Acatrene jë la mejiune i epun. Kola qaja ngöne Salamo 62:5 ka hape: ‘Eje hi, eni a treqe Akötresie me lapa thaup, ke qaathei nyidrëti la mejiuneng.’ Maine aja së troa catre la mejiune së, loi e xecie koi së laka, tro kö ej a eatr. Ka nyipiewekë catre lai, e tro sa mekune ka hape, troa canga traqa la pune la fen celë. Ngacama nyimu macatre hne së hna troa pane itreqe, matre troa eatre la itre hnei Iehova hna thingehnaean, ngo loi e xecie koi së laka, tro kö itre ej a eatr. Tro sa acatrene la mejiune së la easa inine la Tusi Hmitrötr, tune la itre hna perofetan, me aqane ce tro la itre mekun, me itre hnei Iehova hna amamane göne la pengöi Nyidrë. (Sal. 1:2, 3) Ketre, catre jë së thith “thenge la hna amekötin hnene la ua i Akötresie,” matre acatrene la imelekeu së me Nyidrë. Ketre, treqene jë troa eatr la hnei Nyidrëti hna thingehnaean, ene la troa hamë së la mel ka pë pun.​—Iudra 20, 21.

Tui Dravita joxu, loi e xecie koi së laka, tro kö Iehova a thupëne la itre ka treqe Nyidrë me hnimi angatr. (Sal. 33:18, 22) Haawe, catre jë treqe Iehova hnyawa, ngöne la epuni a mekune catrëne la itre ewekë ka loi ngöne la mele i epun, me atrunyi Nyidrë, me xomi trengecatr thene la itre trejin, me acatrene la mejiune i epun.