1-2. Nemene la ka xatua së troa trotrohnine la aliene hni Iehova ngöne la kola adrone la ëje i Nyidrë?

 PANE mekune jë la: Ketre sinee i epuni a qaja angazo epun. Ketre trengathoi pena, ngo hna kapa hnei itre xan. Angatre fe a iqajakeun e cahu, matre alanyimu hë la ka kapa. Tune kaa epuni e cili? Maine epuni a xouen la hna troa qaja hnei itre xan, tro la trengathoi cili a akötrë epun.​—Ite edomë 22:1.

² Tro la ceitune celë a xatua së troa trotrohnine la aliene hni Iehova, la kola adrone la ëje i Nyidrë. Hnene la ketre nekö i Nyidrë e koho hnengödrai hna qaja angazo Nyidrë koi Eva, lo pane föe. Nge hnei Eva hna kapa la trengathoi cili. Celë hi ka ukune la pane kem me thine së troa icilekeu me Iehova. Ame hë la pun, hna traqa la ngazo me mec kowe la itre atr asë. (Gen. 3:1-6; Rom. 5:12) Ame asë hi la itre jol ka traqa enehila, tune la mec, itre isi me itre akötr, ke ka xulu qa ngöne la itre trengathoi Satana. Kolo kö a akötrë Iehova hnene la itre trengathoi cili me itre thangane itre ej? Öö. Ngo, tha Iehova kö a lapa fë trengehni, ke Nyidrëti “la Akötresie ka madrin.”​—1 Tim. 1:11.

3. Nemene la ka thue madrine koi së?

³ Ketre madrine ka tru koi së troa ahmitrötrëne la ëje i Iehova. Celë hi hne së hna kuca ngöne la easa trongëne la hna amekötine celë: “Atrunejë la [ëje] i Iehova.” (Sal. 113:1) Easa atrune la ëje i Iehova ngöne la easa qaja aloine Nyidrëti koi itre xan. Aja i epuni kö troa kuca lai? Tro sa ce  wange la köni kepin ka troa uku së troa atrune la ëje i Iehova.

EASA AMADRINË IEHOVA

4. Pine nemen matre Iehova a madrine la easa atrunyi Nyidrë? Qaja jë la ketre ceitun. (Wange ju fe la iatr.)

⁴ Madrine catre Iehova Keme së, la easa atrun la ëje i Nyidrë. (Sal. 119:108) Kolo kö lai a hape, Nyidrëti a upi së troa atrunyi Nyidrë, ke Nyidrëti a aja ithuecatr? Waea. Hane hi la ketre ceitun. Ketre nekönatr jajiny a haluth la keme i nyën me hape, “Pëkö papa ka tui nyipë!” Madrine catre la kem, nge kola ketri nyidrë la kola drenge lai. Hapeu, nyidrëti kö a ajane tro la nekö i nyidrëti a ithuecatre koi nyidrë? Waea. Nyidrëti pe a madrine laka, nyën a amaman la ihnim me hni ne ole i nyën koi nyidrë. Itre thiina lai ka troa xatua nyën elany. Celë fe hi kepin matre Iehova Keme së, a madrin la easa atrunyi Nyidrë.

5. Ame la easë a atrunyi Iehova, drei la hne së hna jelethoin?

⁵ Ame la easa atrunyi Iehova, easë hi lai a jelethoi Satana. Hnei Satana hna qaja ka hape, pëkö atr ka troa isigöline la ëje i Akötresie qëmekene la itupath. Ame koi angeic, pëkö ala cas the së ka mele nyipici koi Akötresie. Nge maine hace palaha la itre jole së, ke tro hë së lai a nuetriji Nyidrë. (Iobu 1:9-11; 2:4) Ngo hnei Iobu hna mele nyipici ngöne la itre itupath me amaman laka, ka thoi Satana. Ame epuni ke, tro kö epuni a mele nyipici koi Iehova? Ijiji easë asë troa isigöline la ëje i Nyidrë me mele nyipici, matre amadrinë Nyidrë. (Ite edomë 27:11) Ketre madrine ka tru lai koi së.

6. Tune kaa la aqane tro sa nyitipu Dravita me itre nekö i Levi? (Nehemia 9:5)

⁶ Ihnim koi Iehova, la ka ukune la itre hlue i Nyidrë troa atrune la ëje i Nyidrë qa kuhu hni. Öni Dravita joxu: “Ajang troa atrunyi Iehova; ajane la hning troa atrune la ëje i nyidrë ka hmitrötr.” (Sal. 103:1, NWT) Trotrohnine hi Dravita laka, ame la easa atrune la ëje i Iehova, ke easë hi lai a atrunyi Nyidrë. Ame la easa dreng la ëje i Iehova, ke canga mama hi koi së la pengöi Nyidrë, me itre thiina i Nyidrë me itre huliwa ka men i Nyidrë. Atre hi Dravita laka, ka hmitrötr la ëje i Nyidrë, matre aja i angeic troa atrune ej. Celë hi aja ka ej e kuhu ‘hni’ angeic. Celë fe hi hna kuca hnene la itre nekö i Levi. Atre hi angatr ka hape, tha ijije kö la itre trengewekë i angatr troa atrune la ëje ka hmitrötr i Iehova. (E jë la Nehemia 9:5.) Ame pe, hnene la itre trengewekë i angatr ka qa kuhu hni hna amadrinë Iehova.

7. Tune kaa la aqane tro sa atrunyi Iehova ngöne la hna cainöje trootro me e nöjei drai?

 ⁷ Ame enehila, easa amadrinë Iehova la easa qaja koi itre xan la etrune la ihnimi së me hni ne ole së koi Nyidrë. Ame la aja së la easa cainöj, ke troa e la itre atr koi Iehova me xatua angatr troa hnimi Nyidrë, tune la aqane hnimi Nyidrëti hne së. (Iako. 4:8) Ketre madrine ka tru koi së troa amamane koi itre xan la hna qaja hnei Tusi Hmitrötr göi Iehova, tune la ihnim, me meköt, me inamacan me men i Nyidrë, me itre xaa thiina ju kö. Ketre, easa atrunyi Iehova me amadrinë Nyidrë ngöne la easa thele troa nyitipu Nyidrë. (Efe. 5:1) Ame ngöne la fene celë ka ngazo, canga mama hi koi itre xan la pengö së, nge angatre a hnyingëne la kepin, matre tha ceitu së kö me angatr. (Mat. 5:14-16) Ame la easa iöhnyi me angatr e nöjei drai, ijije hi tro sa qaja koi angatr la kepin, matre easa ujë tune lai. Celë hi ka troa thue aja kowe la itre atr ka thele Iehova troa hane easenyi Nyidrë. Ame la easa atrunyi Iehova tune lai, ke easa amadrinëne la hni Nyidrë.​—1 Tim. 2:3, 4.

EASA AMADRINË IESU

8. Pine nemene matre Iesu la tulu göne la aqane atrune la ëje i Iehova?

⁸ Pëkö ketre e hnengödrai me e celë fen, ka atre Iehova hnyawa hui Iesu. (Mat. 11:27) Tru la ihnimi Iesu koi Iehova, nge nyine haine la aqane atrune nyidrë la ëje i Iehova. (Ioane 14:31) Ame lo jidr tixenuë i nyidrëti e celë fen, hnei nyidrëti hna qaja koi Iehova la aliene la huliwa hnei nyidrëti hna kuca e celë fen, me hape: “Hnenge hna qaja amamane la ëje i nyipë koi angatr.” (Ioane 17:26) Kola hapeue lai?

9. Nemene la ceitune hnei Iesu hna xom matre qaja hnyawane la pengöi Iehova?

⁹ Tha hnei Iesu hmekuje kö hna qaja kowe la itre atr ka hape, Iehova la ëje i Akötresie. Atre hi la angetre Iudra ka ithanata me Iesu la ëje i Akötresie. Ngo öni Tusi Hmitrötr, Iesu la ka “qejepengöi Nyidrë.” (Ioane 1:17, 18) Ase hë qaja hnene la Itre Hna Cinyihane Qene Heberu laka, Iehova la Akötresie ka utipin nge ka itrotrohni. (Eso. 34:5-7) Jëne la ceitun hnei Iesu hna hamën göne la nekön ka patr me kem, mama hnyawa koi së la itre thiina cili. Kola qaja la ketre kem ka öhne qa “gaa nany” la nekö i nyidrëti ka ietra me canga nyinyap me haluthi angeic me nue la ngazo i angeic. Ame la easa e la ceitune cili, kola ketri së hnene la aqane utipin me itrotrohni Iehova. (Luka 15:11-32) Eje hi, hnei Iesu hna qaja hnyawane la pengöi Iehova.

10. (a) Easa atre tune kaa laka, hnei Iesu hna qaja la ëje i Iehova nge aja i nyidrë tro fe sa hane tun? (Mareko 5:19) (Wange ju fe la iatr.) (b) Nemene la hnei Iesu hna ajan tro sa kuca enehila?

¹⁰ Aja i Iesu kö tro la itre xan a hane qaja la ëjene la Keme i nyidrë? Öö. Itre xaa he ne hmi a qaja ka hape, hmitrötr troa qaja la ëje i Akötresie. Ngo tha hnei Iesu kö hna nue la itre ini cili, troa sewe nyidrë troa atrune la ëje i Iehova. Ame la ketre drai, hnei nyidrë hna helëne la itre dremoni qaathene la ketr atr e Gadara. Hna xou hnene la itre atr e cili, matre hnei angatr hna upi Iesu qa lai. (Mar. 5:16, 17) Ngo aja Iesu tro la itre atr e cili a atre la ëje i Iehova. Celë hi matre, hnei nyidrë hna upe lai atr hna aloin, troa qaja koi itre xan la hnei Iehova hna kuca, ngo tha Iesu kö. (E jë la Mareko 5:19.) a Ame  fe enehila, aja i Iesu tro sa qaja la ëje i Iehova ngöne la fen asë! (Mat. 24:14; 28:19, 20) Aqane tro hi së lai a amadrinë Iesu, Joxu së.

11. Nemene lo thith hnei Iesu hna inin kowe la itretre drei nyidrë, nge thenge la Ezekiela 36:23 pine nemene matre ka nyipiewekë?

¹¹ Atre hi Iesu laka, tro kö Iehova a ahmitrötrëne la ëje i Nyidrë. Celë hi matre, hnei Iesu hna ini së la thithi celë, hna hape: “Kakati fe e koho hnengödrai, epi hmitrötr la ëje i nyipë.” (Mat. 6:9) Trotrohnine hi Iesu laka, pëkö ketre ewekë ka nyipiewekë catr e celë fen, hune la troa ahmitrötrëne la ëje i Iehova. (E jë la Ezekiela 36:23.) Pëkö ketre ka mel e koho hnengödrai me e celë fen, ka ahmitrötrëne la ëje i Iehova tune la aqane kuca i Iesu. Ngo ame lo kola othi nyidrë, nemene la hna upezö nyidrë hnene la itre ithupëjia? Hna upezö nyidrë ka hape, atre qaja angazone la ëje i Akötresie! Ame koi Iesu, ketre ngazo ka tru la troa qaja angazone maine adrone la ëje ne la Keme i nyidrë. Hna ketri nyidrëti catr la kola upezö nyidrë, pine la ngazo cili. Celë hi matre, itre hawa qëmekene troa othi nyidrë “thatreine hë nyidrëti xomihnine la itre mekun ka ajolëne la hni nyidrë.”​—Luka 22:41-44.

12. Tune kaa la aqane isine Iesu troa ahmitrötrëne la ëje i Iehova?

¹² Hna akötrë Iesu, me qaqa nyidrë me silitrengathoi nyidrë, lo nyidrëti a ahmitrötrëne la ëje i Iehova. Ngo xecie koi nyidrë laka, hnei nyidrë hna drengethenge Iehova, nge pëkö hmahma thei nyidrë. (Heb. 12:2) Ketre, atre hi nyidrë laka, ame ngöne la itre ijine cili ka ngazo, Satana a thele troa akeinyi nyidrë. (Luka 22:2-4; 23:33, 34) Satana a isine troa thë la aqane mele nyipici Iesu. Ngo tha eatre ju kö la aja i angeic! Hnei Iesu hna amamane laka, ka thoi Satana, nge tro kö a hetre hlue i Iehova ka troa mele nyipici ngöne la itre itupath ka tru!

13. Tune kaa la aqane tro epuni a amadrinë Iesu?

¹³ Aja i epuni kö troa amadrinë Iesu, Joxu së? Maine eje hi lai, catre jë atrune la ëje i Iehova, ngöne la epuni a qaja koi itre xan la nyipi pengöi Nyidrë. Epuni hi lai a trongëne la itre thupa ca i Iesu. (1 Pet. 2:21) Tui Iesu, tro hë epuni a amadrinë Iehova me amamane laka, ka thoi Satana, ithupëjia me Nyidrë!

 EASA IXATUA TROA AMELENE LA ITRE ATR

14-15. Nemene la ewekë ka saze thene la itre atr ka nyiqane atre Iehova?

¹⁴ Ame la easa atrune la ëje i Iehova, ke easë hi lai a amelene la itre atr. Kola hapeue lai? The thëthëhmine kö laka, Satana a atimekëne la itre atr “ka tha lapaun.” (2 Kor. 4:4) Celë hi matre, alanyim la ka kapa la itre trengathoi Satana, tune la kola qaja ka hape, pëkö Akötresie, ka nanyi Nyidrë, nge tha Nyidrëti kö a hnehengazone la itre atr. Itre xan a mekun ka hape, ketre Akötresie ka iaxösisi Nyidrë, nge ka dreuthe la itre atr ka ngazo. Itre trengathoi cili a atimekëne la itre atr me adrone la ëje i Iehova, matre tha tro kö angatr a atre Nyidrë. Jëne la huliwa ne cainöj, easë hi lai a sewe Satana troa eatrëne la aja i angeic. Nge ame la easa inine la itre atr la nyipici göi Akötresie, easë fe a atrune la ëje i Iehova. Nemene la thangane lai?

¹⁵ Ka mene catr la itre nyipici qa hnine la Tusi Hmitrötr. Ame la easa xatuane la itre atr troa atre Iehova, hetre ewekë ka saze thei angatr. Tha kolo hmaca kö a atimekë angatre hnene la itre trengathoi Satana, ngo angatr ha nyiqane öhne la itre thiina ka mingöminge i Iehova. Angatr a haine la mene i Iehova. (Is. 40:26) Ketre, angatr ha mejiune koi Nyidrë, ke ka meköti Nyidrë. (Deu. 32:4) Nge angatr ha öhne ngöne la mele i angatr ka hape, ka inamacane Nyidrë. (Is. 55:9; Rom. 11:33) Kola akeukawanyi angatr la troa atre ka hape, Akötresie la ihnim. (1 Ioane 4:8) Nge ame la angatr a catre easenyi Iehova, ke kolo fe a kökötr e kuhu hni angatr la mejiun troa itre nekö i Nyidrë me mele epine palua. Ketre madrine ka tru la troa xatuane la itre atr troa easenyi Iehova! Ame la easa kuca lai, Iehova a goeë së ceitu me “itre ka ce huliwa” me Nyidrë.​—1 Kor. 3:5, 9.

16. Hna saze tune kaa la mele ne la itre xaa atr, la angatr a atre la ëje i Akötresie? Qaja jë la itre ceitun.

¹⁶ Ame lo xötrei, easa pane qaja kowe la itre atr ka hape, Iehova la ëje i Akötresie. Maine jë, tro la ini cili a saze la mele  ne la ketre atr. Celë hi ka traqa koi Aaliyah b ketre föe hna hetrune ngöne la ketre hmi, ka tha mejiune kö kowe la Tusi Hmitrötr. Tha madrine kö angeic kowe la hmi angeic, nge kösë pëkö imelekeu i angeic me Akötresie. Ngo ame hë la angeic a ini Tusi Hmitrötr me itre Temoë Iehova, angeic ha goeë Akötresie ceitu me ketre Sinee i angeic. Nge angeic a sesëkötr, la angeic a atre laka, hna xometrij la ëje i Akötresie ngöne la itre Tusi Hmitrötr, nge hna nyihnan hnei “Joxu” me itre xaa aqane ati ëj. Matre hna saze la mele i angeic la angeic a atre laka, Iehova la ëje i Akötresie. Öni angeic: “Hetre ëjene la Sineeng!” Nemene la thangane lai? Öni angeic: “Ame enehila, tingetinge hë la hning. Nge ketre manathith koi ni troa atre la ëje i Akötresie.” Ame pena Steve, hna hetru angeic ngöne la hmi angetre Iudra, nge ame la huliwa i angeic, ke troa elo miuzik. Xele hë angeic ma hane hmi, ke hnei angeic hna öhne la aqane mele thoi ne la itre atr ka hmi. Ngo thupene la kola mec la thine i angeic, hnei angeic hna kapa troa hane sine la ketre ini Tus Hmitrötr, hna hamëne hnene la ketre Temoë Iehova. Nge hna ketri angeic, la angeic atre la ëje i Akötresie. Öni angeic: “Thatre kö ni ka hape, hetre ëje i Akötresie. Eni petre hi a öhne ka hape, ka mele Nyidrë! Mama cile hë la pengöi Nyidrëti koi ni. Hetre Sineenge hë.”

17. Pine nemene matre xecie koi epun troa catre atrune la ëje i Iehova? (Wange ju fe la iatr.)

¹⁷ Ame la epuni a cainöj me ini Tus kowe la itre atr, epuni kö a qaja amamane la ëje i Iehova ka hmitrötr? Epuni kö a xatua angatr troa atre hnyawa la pengöi Nyidrë? Aqane tro epuni hi lai a atrune la ëje i Iehova. Haawe, catre jë atrune la ëje ka hmitrötre i Iehova, ngöne la epuni a qaja koi itre xan la nyipi pengöi Nyidrë. Ame e cili, tro hë epuni a amelene la itre atr me xötrethenge la tulu i Iesu Keriso, Joxu së. Nge tro fe epuni lai a amadrinë Iehova, Keme i epun ka tru ihnimin. Haawe, catre jë “atrune la [ëje i nyidrë] epin’ epine palua”!​—Sal. 145:2.