Tusi Hmitrötr a qaja la atreine ka ej thei Iehova troa qaja la itre ewekë ka troa traqa elany. (Is. 45:21) Ngo tha hna qaja asë kö hnei Tusi Hmitrötr, la aqane maine ijine tro Nyidrëti a kuca, memine fe la mekun hnei Nyidrëti hna axeciëne kowe la drai elany. Matre thatreine kö së trotrohnine lai. Eloine pe, hetre itre ithuemacany koi së. Tro sa ce wang.

Hetre ifego hnei Iehova hna acile koi Nyidrëti kö. Pëkö sane la inamacane i Nyidrë, matre atreine hi Nyidrëti qaja amë la nöjei ewekë hnei Nyidrëti hna ajan. (Rom. 11:33) Ngo pine laka pëkö ka musinë Nyidrë, matre ijiji hi tro Nyidrëti a iën troa tha atre la itre xaa ewekë ka troa traqa.​—Wange ju fe la Isaia 42:14.

Iehova a aejëne la aja i Nyidrë. Ka ihmeku kö la mekune celë memine la atreine i Nyidrë, troa qaja amë la itre ewekë ka troa traqa elany? Öni Isaia 46:10, NWT: “Qa ngöne la qaan, eni la atre qaja amamane la pun, nge qaan ekö, eni a qaja la itre ewekë hna tha kuca petre kö. Ke eni a qaja ka hape, ‘Ame la hnenge hna mekun, ke tro ha eatr, nge ame la hnenge hna ajan, ke tro ni a kuca.’ ”

Ame la ketre kepin matre atreine hi Iehova qaja amë la itre ka troa traqa elany, ke atreine kö Nyidrë kuca matre eatrëne la nöjei ewekë. Tha nyipiewekë kö koi Iehova troa atre la ewekë ka troa traqa elany, tune la easa e la pun la ketre itus matre canga atre la ka troa traqa. Ngo ame pe, atreine hi Iehova axeciën troa traqa la ketre ewekë ngöne la nyipi ijin, nge tro kö lai a traqa ngöne la ijine hna sa.​—Eso. 9:5, 6; Mat. 24:36; Itre hu. 17:31.

Celë hi matre, ame la kola qaja la atreine Iehova göne la itre ewekë ka troa traqa, Tusi Hmitrötr a qaja la hnaewekë “hnëkën,” maine “kuca,” me “mekun.” (2 Ite jo. 19:25; Is. 46:11) Ame la itre hnaewekë cili hna ujën qa ngöne la ketre qene hlapa ekö, ke kolo hi a ceitu memine la ketre hnaewekë ka hape, la ‘atre huliwa dro ka fedr.’ (Iere. 18:4) Tune la kola xupexupe la dro, matre nyi inege ka mingöming, ketre atreine hi Iehova troa xupexupe maine kuca la itre ewekë, matre eatre pi la aja i Nyidrë.​—Efe. 1:11.

Iehova a metrötrëne la atreine së troa ië ewekë. Tha Iehova kö a musinëne la mele së. Ketre, tha Nyidrëti kö a ukune la itre atr ka meköt troa kuca la itre ewekë ka ngazo, ka tro xomi angatr kowe la mec. Nyidrëti kö a nue së troa isa axeciën mekun, me amamai së la aqane troa ië ewekë hnyawa.

Tro sa wange la lue ceitun. Ame la hnapan, ke angetre Nineve. Hnei Iehova hna qaja amë ka hape, troa apatrenyi angatr hnene la aqane ujë i angatr ka ngazo. Ngo pine laka, hnei angatr hna ietra, matre ‘hnei nyidrëti hna saze mekun. Tha hnei nyidrëti kö hna lepi angatr, tune lo hnei nyidrëti hna mekun troa kuca.’ (Iona 3:1-10) Tha kuca ju kö Iehova lo hnei Nyidrëti hna qaja amë, ke hnene la angetre Nineve hna dreng lo maca ka hmekë angatr. Eje hi, hnei angatr hna sipu iëne la aqane tro angatr a ujë, matre hnei angatr hna ietra.

Tro sa wange la hnaaluene ceitun. Kola qaja la hna perofetan göne la ketre tane isi ka tru, Koreso la ëjen. Angeic la ka troa amelene la angetre Iudra qa ngöne la hna po, me iup troa acile hmaca la uma ne hmi Iehova. (Is. 44:⁠26–45:4) Hna eatrëne la hna perofetane cili hnei Koreso, Joxu ne Peresi. (Ezera 1:1-4) Tha ka nyihlue i Akötresieti kö Koreso. Ngo jëne angeic, hnei Iehova hna aeatrëne la hnei Nyidrëti hna perofetan. Ketre hnei Nyidrëti hna nue Koreso troa sipu iën la hnei angeic hna troa nyihluen.​—Ite edomë 21:1.

Tha ijije kö la itre ewekë celë hne së hna ce wang, troa qejepengöne la atreine Iehova troa qaja amë la itre ewekë ka troa traqa. Nyipici, pëkö atr ka atreine trotrohnine asë la itre aqane huliwa i Iehova. (Is. 55:8, 9) Ngo ame la itre hne së hna atre göi Iehova, ke kola acatrene la mejiune së laka, ka lolo palahi la aqane huliwa i Nyidrë, celë hi ka mama ngöne la itre hnei Nyidrëti hna perofetan.