1. Nemene la hna kuca hnene la itre hlue i Iehova qane ekö?

 KA TRU kö koi epun la imelekeu i epun me Iehova? Öö! Ketre ka tru fe kowe la itre hlue i Akötresieti ekö, la imelekeu i angatr me Nyidrë. (Sal. 104:33, 34) Alanyim la itre ka nue trengecatr, matre nyihlue i Iehova. Hetreny thei angatre la angetre Isaraela hna hëne ka hape, itre Nazeri. Drei la itre Nazeri, nge nemene la ini hne së hna xom qaathei angatr?

2. (a) Drei la itre Nazeri? (Numera 6:1, 2) (b) Pine nemen matre itre xaa angetre Isaraela a iëne troa Nazeri?

² Ame la hnaewekë “Nazeri” ke, qene Heberu, kola hape “Hna amë acon,” maine “Ka saen.” Kola qaja la atre Isaraela ka iën troa kuca la ketre huliwa i Iehova ka ketrepengön. Kola qaja hnene la Wathebo i Mose laka, ijije hi tro la itre trahmany me föe a saen koi Iehova, me hane Nazeri ngöne la hnepe ijin. a (E jë la Numera 6:1, 2.) Ame la atre Isaraela ka saen troa Nazeri, ke loi e tro angeic a drengethenge la itre hna amekötin laka, tha nyipiewekë kö kowe la nöje troa xötrethenge itre ej. Matre, nemene la ka ukune la ketre atre Isaraela troa saen troa Nazeri? Hnene la ihnim i angeic koi Iehova me hni ne ole i angeic kowe la itre manathith hnei angeic hna kapa.​—Deu. 6:5; 16:17.

3. Pine nemen matre ceitune hi la itre hlue i Iehova enehila me itre Nazeri ekö?

 ³ Qane lo kola nyihnane la Wathebo i Mose hnene la “wathebo i Keriso,” pëhë Nazeri. (Gal. 6:2; Rom. 10:4) Ngo, tune lo itre Nazeri ekö, tru la aja ne la itre hlue i Iehova enehila, troa huliwa i Nyidrë hnene la hni, me mel, me mekun, me trenge catre i angatr ka pexej. (Mar. 12:30) Celë hi hne së hna kuca, qane lo easa nue mele koi Iehova. Easa metrötrëne la hne së hna sisiny ngöne la easa drengethenge Iehova me nue trengecatre troa huliwa i Nyidrë. Tro sa ce wange la aqane eatrëne la itre Nazeri la hnei angatr hna sisiny, me aqane tro sa nyitipu angatr, matre eatrëne la hne së hna sisiny. b (Mat. 16:24)

NUE TRENGECATRE JË KOI IEHOVA

4. Thenge la Numera 6:3, 4, nemene la nyine xen me nyine ij nyine tha tro kö la itre Nazeri a xom?

⁴ E jë la Numera 6:3, 4. Hna wathebone la itre Nazeri troa iji ka haitr maine xeni wene vin. Ngo celë hi xen hna majemine xome hnene la angetre Isaraela, nge pëkö engazon. Tusi Hmitrötr a qaja ka hape, ame la “waina nyine amadine la hni ate” ke ahnahna lai qaathei Iehova. (Sal. 104:14, 15) Ngo ka madrine la itre Nazeri, ngacama tha angatre kö a hane xen la itre xen cili. c

5. Nemene la hnei Madián me Marcela hna isine troa kuca, nge pine nemen?

⁵ Tune la itre Nazeri, easë fe a nue trengecatr troa nyihlue i Iehova. Tro sa wange la hna melëne hnei Madián me Marcela, d lue trefëne ka trenamo. Hnene laka, ka loi la huliwa i Madián, matre nyidroti a lapane la ketre appartement ka tru. Ngo aja i nyidro troa huliwa catre koi Iehova. Matre hnei nyidroti hna saze la aqane mele i nyidro. Öni nyidro, “Hnei nyio hna thupëne matre tha tro kö a itö menu. Hnei nyio hna fek kowe la ketre appartement ka co me salemëne la loto i nyio.” Pëkö ka upi Madián me Marcela troa kuca lai. Aja i nyidro troa akökötrene la huliwa ne cainöj. Nge madrine catre nyidro.

6. Nemen la ka upe la itre hlue i Iehova enehila troa nue trengecatre koi Nyidrë? (Wange ju fe la iatr.)

 ⁶ Madrine catre la itre hlue i Iehova enehila troa nue trengecatr, matre huliwa catre koi Nyidrë. (1 Kor. 9:3-6) Tha Iehova kö a musinë së troa kuca lai, nge tha ka ngazo kö lo itre ewekë hne së hna nu. Ame la itre xan, angatr a iën troa tha itö uma, maine nue la ketre huliwa ka tru koi angatr, maine tha nyi siin la ketre neköi öni. Ame pena itre xan, xele angatr troa canga faipoipo maine hetre nekönatr. Itre xane fe a iëne troa cainöj ngöne la itre götrane ka aja ixatua, ngacama nanyi hë angatr qaathene la fami me itre sinee i angatr. Alanyim thei easë ka hane nue trengecatr tune lai, ke aja i easë troa hamëne la ka sisitria koi Iehova. Ka tru catre koi Iehova la itre trengecatre hnei epuni hna kuca matre nyihlue i Nyidrë, ngacama ka co ju hë maine ka tru.​—Heb. 6:10.

THE XOUE KÖ TROA THA CEITU ME ITRE XAN

7. Nemene la ka ajolën la ketre Nazeri troa mele nyipici kowe la hna sisiny? (Numera 6:5) (Wange ju fe la iatr.)

⁷ E jë la Numera 6:5. Hna wathebone kowe la itre Nazeri troa xötrei he. Angatr a amaman e cili laka, angatr a lapa fene la musi Iehova. Maine ekö hë Nazeri la ketre, troa canga mama koi itre xan, ke ka qea la penehe i angeic. Troa hmaloi kowe la Nazeri troa xome la hnëqa cili, e tro la itre sinee i angeic a metrötrëne la hnei angeic hna sisiny me ithuecatr koi angeic. Ngazo pe, ame ekö e Isaraela, tha hna hnim me metrötrëne kö la itre Nazeri. Ame ngöne lo hneijine i Amosa perofeta, hnene la itre xaa atre Isaraela, itre ka iamenumenu hna ‘thue imene waina la itre Nazeri,’ matre thë la hnei angatr hna sisiny. (Amosa 2:12) Matre tha ka hmaloi kö kowe la itre Nazeri troa mele nyipici kowe la hna sisiny me aisapengönë angatr me itre xan.

8. Kola xatua së tune kaa hnene la tulu i Benjamin?

⁸ Ngacama ka lapa pe hi së, ngo jëne la ixatua i Iehova, ijiji hi tro sa amaman laka, tha ceitu së kö me itre xan. Tro sa ce wange la hna kuca hnei Benjamin, ketre trejin qa Norvége, ka 10 lao macatre. Hna acile la ketre cérémonie ngöne la uma ne ini i angeic, thatraqane la itre hna lepe hnene la isi e Ukraine. Hna upe la itre nekönatr troa heetrëne la han ne la darapo ne Ukraine me nyima. Xele kö Benjamin troa sine la cérémonie cili, matre hnei angeic hna cil ananyi angatr.  Hna öhnyi angeic hnene la ketre porofesör, matre hnei eahlo hna sue ka hape: “Ea ue cili, trohemi, kola treqe eö!” Xou catre Benjamin, ngo hnei angeic kö hna tro troa ithanata koi eahlo. Öni angeic: “Tha ka kuci politik kö ni. Alanyim la itre Temoë Iehova hna akalabusin, ke xele kö angatr ma hane isi.” Trotrohni Benjamin hi hnene la porofesör, matre hnei eahlo hna nue angeic troa tha sine lai cérémonie. Ngo hnene la itre sine ini angeic hna hnyingë angeic la kepin, matre tha sine kö angeic lai cérémonie. Tru la xoue i Benjamin, nge angeic a pi treij. Ngo hnei angeic hna qaja qëmekene la kalas, lo hnei angeice hë hna qaja kowe lo porofesör. Hnei angeic hna qaja e thupen kowe la kem me thine i angeic ka hape, Iehova la ka xatua angeic troa isigöline la lapaune i angeic.

9. Tune kaa la aqane tro sa amadrinëne la hni Iehova?

⁹ Ame la easa iëne troa kuca la aja i Iehova, itre xan a öhne laka, tha ceitu së kö me angatr. Tha ka hmaloi kö troa qaja kowe la itre atr ngöne la hnë huliwa me ngöne la hna ini ka hape, ketre Temoë Iehova së. Pine laka, kola ngazo trootro la aqane ujë me itre mekuna ne la itre atr enehila, matre jole fe koi së troa trongëne la itre trepene meköti Iehova me cainöjëne la maca ka loi. (2 Tim. 1:8; 3:13) The thëthëhmine kö laka, ame la easa amamane ka hape, tha ceitu së kö me angatr, easë hi lai a ‘amadrinëne la hni Iehova.’​—Ite edomë 27:11; Mal. 3:18.

AMË PANË IEHOVA JË NGÖNE LA MELE SË

10. Pine nemen matre jole kowe la itre Nazeri troa trongëne la hna qaja ngöne Numera 6:6, 7?

¹⁰ E jë la Numera 6:6, 7. Hmitrötre kowe la Nazeri troa easenyine la atr ka meci hë. Maine jë tro sa mekune ka hape, tha ka jole kö troa trongëne la hna amekötine cili. Ngo, tha ka hmaloi kö kowe la Nazeri troa metrötrëne la hna amekötine cili, ngöne la kola mec la ketre sinee i angeic. Eje hi, ame ekö thene la angetre Iudra, nyipiewekë troa easenyine la wezipo, matre hnëkë angeic qëmekene troa kelem. (Ioane 19:39, 40; Itre hu. 9:36-40) Matre tha ijije kö kowe la Nazeri troa metrötrëne la itre hna majemine cili. Ame la kola mec la ketre sinee i angeic, ngacama tru catr la akötr, nyipiewekë tro angeic a catre lapaun,  matre mele nyipici kowe la hnei angeic hna sisiny. Xecie koi së laka, Iehova a hamëne koi angatr la trengecatr ka ijij ngöne la itre ijine cili.

11. Nemene la ka nyipiewekë la easa axecië mekun ngöne la fami? (Wange ju fe la iatr.)

¹¹ Ka tru koi së troa kuca la aja Iehova, matre ame itre xaa ijin, easa axecië mekun maine kuca la ketre ewekë ka troa ajolëne la aqane imelekeu së memine la fami së. Nyipici laka, easa eatrëne hnyawa la hnëqa së ngöne la fami. Ngo tha tro kö sa amë panëne la aja i angatr nge pi Iehova pë hë. (Mat. 10:35-37; 1 Tim. 5:8) Ame itre xaa ijin, ame la easa iëne troa amadrinë Iehova, ke kola thë la casi së memine la fami së.

12. Ame la kola traqa la ketre jol ka tru ngöne la fami Alexandru, nemene la hnei nyidrëti hna kuca? Nge nemene la hnei nyidrëti hna tha kuca?

¹² Celë hi hna melën hnei Alexandru. Ca macatre ne ini Tus nyidrë me Dorina, föi nyidrë. E thupen, hnei Dorina hna nue la ini Tusi eahlo me upi Alexandru troa hane tun. Ngo, hnei Alexandru hna sa hnyawan koi eahlo ka hape, tro kö nyidrëti a ini Tus. Wesitre catre Dorina, matre hnei eahlo hna thele jëne troa sewe Alexandru troa ini Tus. Ngacama tha ka hmaloi kö, ngo hnei nyidrë hna thele troa trotrohni eahlo. Ame itre xaa ijin, kola ithanata akökötrene me eetr hnei Dorina, matre nyidrëti ha pi nue la ini Tus. Ngo ame pe, hnei nyidrëti palahi hna amë panë Iehova, me hnim me metrötrëne la föi nyidrë. Hnene la tulu i Alexandru hna uku Dorina troa ini Tusi hmaca me xomi bapataiso.​—Wange ju ngöne jw.org la video hna hape, Alexandru Me Dorina Văcar: “Ame La Ihnim, Tre Ka Xomihni Me Menyik” ngöne la götran “Hna Saze La Mel Hnei Nyipici.”

13. Tune kaa la aqane troa sa amamane la ihnimi së koi Iehova me kowe la fami së?

¹³ Iehova la ka acile la fami, matre aja i Nyidrë tro sa madrine ngöne la fami. (Efe. 3:14, 15) Maine aja së troa madrin, loi e tro sa kuca la hnei Nyidrëti hna upi së troa kuca. The luelue kö laka, madrine catre Iehova kowe la itre trengecatr hnei epun hna kuca, matre thupëne la fami epun ngöne la ihnim me metrötr.​—Rom. 12:10.

XATUANE JË LA ITRE XAN TROA TUNE LA ITRE NAZERI

14. Drei la hne së hna troa ithuecatre kow?

¹⁴ Ame enehila, loi e tro la itre ka iëne troa nyihlue i Iehova, a thele troa nue  trengecatr koi Nyidrë. Ngo tha ka hmaloi kö. Tune kaa la aqane tro sa xatuane la itre xan, troa hetreny la aja cili? Jëne la itre trengewekë ka ithuecatr. (Iobu 16:5) Hetrenyi kö e hnine la ekalesia i epun, la itre trejin ka thele troa ahmaloeëne la mele i angatr, matre catre huliwa i Iehova? Hetre jeune kö hnei epun hna atre, ka isine troa tha ceitu me itre sinee ini angeic? Nge tune kaa fe la itre ka ini Tus maine itre trejin ka catre mele nyipici koi Iehova, ngacama kola icilekeu hnei fami? Amamane jë koi angatr laka, easa hain la itre trengecatre hnei angatr hna kuca. Nge catre jë ithuecatre koi angatr jëne la itre trengewekë ka menyik.​—Filem. 4, 5, 7.

15. Itre xan a xatuane tune kaa la itre ka huliwa i Iehova drai ka pexej?

¹⁵ Ame itre xaa ijin, ijiji easë hi troa xatuane la itre trejin ka huliwa i Iehova drai ka pexej. (Ite edomë 19:17; Heb. 13:16) Celë hi hna ajan hnene la ketre trejin ka qatre föe e Sri Lanka. Pine laka, ase hë aelëne la thupene retraite i eahlo, matre hnei eahlo hna mekune troa xatuane la lue trejine föe ka pionie troa catre cainöj. Matre hnei eahlo hna nyithupene la telefon i nyidro e nöjei treu. Aqane ujë lai ka lolo catr!

16. Nemene la itre ini hne së hna xome qa ngöne la tulu ne la itre Nazeri ekö?

¹⁶ Tru la itre ini nyine tro sa xome qaathene la itre Nazeri ekö! Ngo ijiji fe tro sa xomi ini qa ngöne la hna sisiny hnene la itre Nazeri, göi Iehova. Xecie koi Nyidrë laka, tru la aja së troa amadrinë Nyidrë, me nue trengecatr troa nyihlue i Nyidrë ngöne la mele së. Nge Nyidrëti a wangatrunyi së, la easa iëne troa amamane la ihnimi së koi Nyidrë. (Ite edomë 23:15, 16; Mar. 10:28-30; 1 Ioane 4:19) Ketre, kola ini së hnene la tulu ne la itre Nazeri laka, öhne kö Iehova la trengecatr hne së hna kuca, matre nyihlue i Nyidrë. Nge ewekë lai ka sisitria koi Nyidrë. Haawe, kuca jë la hnei epun hna atrein, matre catre nyihlue i Iehova.