HNENE la itre ka cinyanyine la Tusi Hmitrötr hna amexej la itre hnaewekë. Pine nemen? Tro sa wange la köni kepin:

Ijine kola cinyanyine ej. Alanyimu thene la angetre Isaraela ekö, ka pë Trenge Wathebo hna cinyanyin. Celë hi matre, nyipiewekë koi angatr troa drenge hnyawa la kola e, ngöne ijine kola icasikeu la nöj e hnine la uma maano. (Deu. 31:10-12) Tha ka hmaloi kö kowe la ketre atre Isaraela ka cile nyipine la ka alanyim, troa dreng la kola e, ke maine jë tru la ka nyi mejen. (Neh. 8:2, 3, 7) Matre, ame la kola amexeje lapane la itre mekune ka tru, ke kolo hi lai a xatua angeic troa lapa xome la Itre Hna Cinyihan, me trongën e thupen. Nge ame la kola amexeje la itre hnaewekë, ke kola xatua angeic troa mekune hmaca la itre mekune ka tru ne la Wathebo. Tune la itre hna amekötine me itre eamo.​—Lev. 18:4-22; Deu. 5:1.

La aqane cinyanyin. Hetreny e hnine la Tusi Hmitrötr la itre nyima, tune la itre Salamo, Nyima i Solomona me Itre treije i Ieremia. Ame ngöne la itre xaa nyima, ke hetre kores. Kola amamane hnene la kores la tane la nyima, me xatuane la itre ka dreng troa xolouth la itre trengewekë. Maine tro sa xome la Salamo 115:9-11, easa e ka hape: ‘Isaraela fe, mejiune jë koi Iehova Nyidrëti la atre xatua angatr me petre i angatr. Lapa i Arona fe, mejiune jë koi Iehova, Nyidrëti la atre xatua angatr me petre i angatr. Angetre xoue Iehova fe, mejiune jë koi Iehova Nyidrëti la atre xatua angatr me petre i angatr.’ Hna amexeje lapane la itre trengewekë cili, matre xatuane la itre ka nyima troa xolouth e kuhu hni me he i angatr, la itre trenge nyipici

Enyipiewekëne troa amamane hnyawane la itre ithuemacany ka nyipiewekë. Hnene la itre ka cinyanyine la Tusi Hmitrötr hna amexeje la itre mekune ka nyipiewekë. Ame la Iehova a amekötine kowe la angetre Isaraela, laka tha tro kö a öni la madra, hnei Nyidrëti hna upi Mose troa amexeje la itre kepin. Aja i Nyidrë troa mama hnyawa lai mekun, laka ame la mel, ke e hnine la madra, kolo lai a hape, ame la madra ke mel. (Lev. 17:11, 14) Thupen, ame la itre aposetolo me itre qatre thup ne Ierusalema a e xötrëne la itre ewekë nyine troa thipetrij, matre amadrinë Akötresie, ke hnei angatr hmaca hna amamane hnyawane la enyipiewekëne troa tha xomi madra.​—Itre hu. 15:20, 29.

Ngacama hetre hna amexeje e hnine la Tusi Hmitrötr, ngo tha kolo kö lai a hape, aja i Iehova tro sa amexeje menune la itre trengewekë e hnine la Tusi Hmitrötr. Eje hi, öni Iesu: “Ame la nyipunie a thith, the qaja lapane kö la itre trengewekë ka cas.” (Mat. 6:7) Hnei nyidrëti fe hna qaja e thupen, la itre ewekë nyine tro sa thithi fë. (Mat. 6:9-13) Celë hi matre, ngacama tha easë kö a qaja lapane la itre trengewekë ka cas ngöne la itre thithi së, ngo tha hna wathebo së kö troa anyimua thithi fë la itre mekune ka cas.​—Mat. 7:7-11.

Haawe, ewekë ka loi hi la kola amexeje la itre hnaewekë e hnine la Tusi Hmitrötr. Celë hi ketre aqane ini së, hnene la Atre Hamë Ini Ka Sisitria, matre tro loi la mele së.​—Is. 48:17, 18.