1. Eu la ijine troa acasine la itre hna iën e koho hnengödrai?

 QANE ekö, kola hnying hnene la itre hlue i Iehova ka hape, ‘Eu la ijine tro la itre hna iën ka mele palakö e celë fen, a elë e koho hnengödrai?’ Easa mekun ekö ka hape, thupene la isi Amagedro, tro kö la itre xan a pane lapa e celë fen, ngöne la paradraiso. Ngo kola amamane hnene la Ita Ne Thup ne 15 Julai 2013 ka hape, troa acasine la itre hna iën e hnengödrai qëmekene troa nyiqane la isi Amagedro.​—Mat. 24:31.

2. Nemene la hna hnyingën hnei itre xan, nge nemene la hne asë hna troa ce wang ngöne la tane mekune celë?

² Ame pe, itre xan a hnying ka hape: Nemene la ka troa traqa kowe la ‘itre xa mamoe’ i Keriso, ka mele nyipici ngöne la ijine “akötr atraqatr”? (Ioane 10:16; Mat. 24:21) Itre xan enehila a hnehengazo, ke thatre kö angatr la nyine tro angatr a kuca, e elë asë hë la itre trejin hna iën e hnengödrai, nge drei pë hë la ka troa xatua angatr. Tro sa ce wange la kepin, matre angatr a mekun tune lai jëne la lue hna melën e hnine la Tusi Hmitrötr. Tro mina fe sa ce wange la itre kepin matre tha tro kö sa hnehengazo.

ITRE EWEKË KA THA TRO KÖ A TRAQA

3-4. Nemene la mekuna ne la itre xan, nge pine nemen?

³ Itre xan a mekun ka hape, e elë hë e hnengödrai la itre trejin ka nyiatrene la Lapa Ne Xomi Meköt, ke tro hë la itre xaa mamoe a trotriji Iehova. Angatre jë a mekune tun, pine la itre xaa hna melën e hnine la Tusi Hmitrötr. Tro sa ce wange la lue hna melën. Ame la hnapan, ke kolo hna melëne hnei Iehoiada, lo Atre Huuj Ka Sisitria. Hnei nyidrë me Ioseba föi nyidrë hna thupë Ioasa, me xatua nyën  troa ketre joxu ka lolo me ka mele nyipici. Ame lo mele palakö Iehoiada, hnei Ioasa hna kuca la itre ewekë ka loi. Ngo thupene la kola mec hnei nyidrë, saze pi hi angeic. Hnei angeic hna keithenge la mekuna ne la itre he ne nöj, me nuetriji Iehova.​—2 A. l. ite jo. 24:2, 15-19.

⁴ Ame la hnaaluen hna melën, ke kolo ijine la itre pane keresiano ekö. Ame lo mele pala kö Ioane aposetolo, hnei angeic hna xatuane la itre keresiano troa cile catr ngöne la huliwa i Iehova. (3 Ioane 4) Tune la itre xaa aposetolo i Iesu, hnei Ioane hna isine troa thupëne la itre ekalesia qëmekene la itre ka iamenumenu. (1 Ioane 2:18; 2 Thes. 2:7.) Ngo thupene la angeic a mec, alanyimu la itre keresiano ka keithenge la itre ini ka thoi ne la itre ka iamenumenu. Thupene la itre macatre, hna löthe la hnënge ekalesia hnene la itre ini ka thoi me aqane ujë ka ngazo.

5. Tro kö a traqa koi së lo itre ewekë hna melëne hnei Ioasa me itre pane keresiano ekö?

⁵ Kolo kö a amamane hnene la lue hna melën laka, thupene la kola elë asë la itre hna iën, ke tro la itre xaa mamoe i Keriso a kei kowe la ngazo, tui Ioasa? Maine tro hmaca a cia la iamenumenu, tune lo ka traqa ekö thupene la kola mec la itre aposetolo? Waea! Xecie koi së laka, ngacama elë asë hë la itre hna iën e hnengödrai, ngo tro palahi la itre xaa mamoe a catre nyihlue i Iehova, nge tro kö Nyidrëti a thupë angatr. Pine nemen matre ka xecie lai koi së?

THA TRO HMACA KÖ A ADRONE LA HMI KA WIË

6. Nemene la köni hneijin hne së hna troa ce wang?

⁶ Pine nemene matre xecie koi së laka, tha tro kö a adrone la hmi ka wië, ngacama jole catr la itre drai ka calemi? Pine laka, atre hi së la hnei Tusi Hmitrötr hna qaja göne la hneijine së. Tha ceitu kö la hneijine së memine la angetre Isaraela me itre keresiano ekö. Celë hi matre, tro sa ce wange la köni hneijine celë: (1) hneijine la angetre Isaraela, (2) thupene la kola mec la itre aposetolo, me (3) “ijine troa ahnyipixene hmaca la nöjei ewekë asë.”​—Itre hu. 3:21.

7. Pine nemene matre kola catr me mejiun hnene la angetre Isaraela ka mele nyipici, la kola tha idrei hnene la nöj me itre joxu?

⁷ Hneijin ne la angetre Isaraela ekö. Qëmeken tro Mose a mec, öni angeic kowe la angetre Isaraela: “Öhnë hë ni laka e meci hë ni tro pë hë nyipunie a nyipi ngazo me ujë qa ngöne la gojenyi lo hnenge hna ahnithe koi nyipunie.” (Deu. 31:29) Hnei Mose hna hmekë angatr ka hape, e tro angatr a tha idrei, ke tro ha othi angatr kowe la ketre nöj trenyiwa. (Deu. 28:35, 36) Hna eatre kö la itre hna qaja hnei Mose? Öö. Thupene la itre macatre, alanyimu la itre joxu ka tha idrei, me hule la nöj kowe la hmi ka thoi. Celë hi matre, hnei Iehova hna nuetrij la nöje Isaraela me apëne la itre joxu e celë fen. (Ezek. 21:25-27) Ngo ame la angetre Isaraela ka mele nyipici a öhne la kola eatr la itre hnei Akötresie hna thingehnaean, hnei angatr hna catr me mejiun.​—Is. 55:10, 11.

8. Tro kö sa sesëkötr laka, hna ajojezine la ekalesia ne la itre pane keresiano ekö? Qejepengöne jë.

⁸ Thupene lo kola mec la itre aposetolo. Tro kö sa sesëkötr laka, hna ajojezine la ekalesia ne la itre pane keresiano ekö? Waea, ase hë Iesu qaja ka hape, troa lö hnine la ekalesia hnene la itre ka iamenumenu. (Mat. 7:21-23; 13:24-30, 36-43) Hnei Paulo, Peteru me Ioane hna qaja ka hape, hna nyiqane eatr la hna  perofetane hnei Iesu ngöne la hneijine i angatr. (2 Thes. 2:3, 7; 2 Pet. 2:1; 1 Ioane 2:18) Thupene la kola mec hnei Ioane aposetolo, hnene la itre keresiano ka iamenumenu hna nyiqane acile la Babulona Atraqatr, kolo itre hmi ka thoi. Kolo fe a eatr e cili la itre hna perofetan hnei Akötresie.

9. Pine nemene matre tha ka ceitu kö la hneijine së memine lo hneijin ne la angetre Isaraela, me itre keresiano ekö?

⁹ “Ijine troa ahnyipixene hmaca la nöjei ewekë asë.” Tha ceitu kö la hneijine së memine lo hneijine la angetre Isaraela ekö, memine lo kola lö hnine la ekalesia ekö hnene la itre ka iamenumenu. Nemene la aqane hëne la hneijine së enehila? Hne së hna majemine qaja ka hape, easa melëne la “itre drai ne la pun” ne la fen ka ngazo. (2 Tim. 3:1) Ngo Tusi Hmitrötre fe a qaja ka hape, ame ngöne lo kola nyiqane la “itre drai ne la pun,” ke kolo fe a nyiqane la ketre hneijine ka qea catre kö, nge ka mingöming. Tro palahi a ej la hneijine cili, uti hë la kola pexej la itre atr me paradraiso la ihnadro, fene la mus ne la Baselaia i Akötresie. Hna hëne la hneijine cili ka hape, “ijine troa ahnyipixene hmaca la nöjei ewekë asë.” (Itre hu. 3:21) Hna nyiqane lo macatre 1914 M.K. Nemene la ewekë ka traqa? Ame ngöne la macatre cili, hna acili Iesu troa joxu e hnengödrai. Hetre ka nyitrengewekë i Iehova ha, kolo ketre matra i Dravita. Ngo tha eje hmekuje kö lai hna kuca ngöne la ijine cili. Itre macatre thupen, hna acile hmaca la hmi ka wië! (Is. 2:2-4; Ezek. 11:17-20) Hapeu, tro hmaca kö a adrone la hmi ka wië?

10. (a) Nemene la hnei Tusi Hmitrötr hna perofetan göne la hmi ka wië enehila? (Isaia 54:17) (b) Pine nemene matre ka ithuecatre koi së la itre hna perofetane cili?

¹⁰ E jë la Isaia 54:17. Pane mekune jë la hna perofetane celë: “Tha tro kö la ketre jia ne isi a lepi eö”! Kola eatre la hna perofetane cili enehila. Kolo fe a eatr la hna perofetane celë, hna hape: “Tro ha inine la ite nekö i nyipo asë hnei Iehova ; nge tro ha tru la tingetinge ne la ite nekö i nyipo. Tro ha acile huti nyipo hnene la meköt, . . . nge tro ha iananyi me nyipo la hmengöhmengön, ke tha tro kö ej’ a traqa koi nyipo.” (Is. 54:13, 14) Göi thatreine fe la “haze ne la fene celë,” ene Satana troa sawa la huliwa ne cainöj ne la itre Temoë Iehova. (2 Kor. 4:4) Hna acile hmaca la hmi ka wië, nge tha tro hmaca kö a adrone ej. Tro hë ej a cile hut, uti hë epine palua. Tha tro kö la ketre jia ne isi a lepi së!

 LA EWEKË KA TROA TRAQA

11. Pine nemene matre xecie koi së ka hape, tro palahi a iujine la ka alanyim atraqatr, ngacama elë asë hë la itre hna iën?

¹¹ Nemene la ka troa traqa elany e itre hna iën asë hë e koho hnengödrai? The thëthëhmine kö laka, Iesu la Atre Thupë Mamoe. Nyidrëti la he ne la ekalesia. Öni nyidrëti lo: “Casi hi la atre Weje Meken, a Keriso.” (Mat. 23:10) Xecie koi së laka, tro palahi nyidrëti a eatrëne hnyawane la hnëqa i nyidrë. Nge pine laka, Keriso la ka mus, tha tro kö la itretre drei nyidrëti e celë fen a xou. Eje hi, thatre kö së la aqane tro Keriso a iujine la nöje i nyidrë ngöne la ijine cili. Celë hi matre, tro sa ce ithanatane la itre hna melën e hnine la Tusi Hmitrötr, ka troa ithuecatre koi së.

12. Hnei Iehova hna thupëne tune kaa la nöje i Nyidrë (a) thupene la kola mec hnei Mose? (b) thupene la kola upi Elia ngöne la ketre götran? (Wange ju fe la iatr.)

¹² Hnei Mose hna mec qëmeken tro la angetre Isaraela a lö kowe la Nöje Hna Thingehnaean. Nemene la ka traqa kowe la nöje i Akötresie? Hapeu pëhë ka iujine la nöj? Nyipici! Pine laka, hnei angatr hna mele nyipici koi Iehova, matre hnei Nyidrëti hna xatua angatr. Qëmeken tro Mose a mec, hnei Iehova hna upi angeic troa acili Iosua troa iujine la nöj. Itre macatre ne ini Iosua hnei Mose. (Eso. 33:11; Deu. 34:9) Ketre hnei Nyidrëti fe hna acile la itre trahmany ka macaj, matre xome la itre hnëqa, kolo itre ka troa mus kowe la ala 1 000, me kowe la ala 100, me kowe la ala 50 me uti fe hë kowe la ala 10. (Deu. 1:15) Matre hna thupëne palahi la itre hlue i Iehova. Ketre tune fe ngöne la hneijine i Elia perofeta. Ame ngöne la itre macatre, hnei Elia hna catre huliwa matre akökötrene la hmi ka wië e Isaraela. Ngo e thupen, hnei Iehova hna upi angeic kowe la Baselaia ne kolojë, e Iudra. (2 Ite jo. 2:1; 2 A. l. ite jo. 21:12) Hapeu, kolo lai a hape, pëhë ka xatuane la itre atrene la 10 lao tribu ne Isaraela? Waea. Itre macatre hnei Elia hna ini Elisaia. Ketre, hetre “itre nekö i perofeta,” kolo itre hna inin ngöne la itre uma ne ini matre troa hane perofeta. (2 Ite jo. 2:7) Haawe, alanyim la itre trahmany hnei Iehova hna iën troa iujine la nöje i Nyidrë. Pëkö ewekë ka atreine troa sewe Iehova troa eatrëne la aja i Nyidrë me thupëne la itre hlue i Nyidrë.

13. Nemene la hnei Iehova hna qaja ngöne Heberu 13:5b? (Wange ju fe la iatr.)

¹³ Matre thenge la hne së hna ce wang, nemene la ka troa traqa thupen la kola elë  asë la itre hna iën e koho hnengödrai? Tusi Hmitrötr a anyipicin laka: tha tro jë kö Iehova a nuaxöj la itre hlue i Nyidrëti e celë fen. (E jë la Heberu 13:5b.) Tui Mose me Elia, atre hi la Lapa Ne Xomi Meköt la enyipiewekëne troa hamë ini. Itre macatre hë enehila, angatr a inine la itre trejin trahmany ka troa mel e celë fen, la aqane troa xomiujine la huliwa i Akötresie. Hnei angatr hna acile la itre ini thatraqane la itre qatre thup, me itretre thupë sirkoskripsio, me itre atrene la filial, me itre ka hetre hnëqa ngöne la Bethela, me itre xane ju kö. Ame kö la ini thatraqane la itretre ixatua ngöne la itre komite ne la Lapa Ne Xomi Meköt, ke hna iujine hnene la itre atrene la Lapa Ne Xomi Meköt. Itretre ixatua fe hë a xome la itre hnëqa ka tru ngöne la organizasio. Kola ini angatre la aqane troa sisedrëne la huliwa ne thupën la itre mamoe i Keriso.

14. Nemene la ini ka tru hne së hna ce wange ngöne la tane mekune celë?

¹⁴ Hane hi la ini ka tru hne së hna ce wange ngöne la tane mekune celë. Qëmekene troa nyipune la akötr atraqatr, ngacama elë asë hë la itre hna iën a tro hnengödrai, ngo tro palahi a ej la hmi ka wië e celë fen. Pine laka, Iesu Keriso la ka iujine la itre hlue i Iehova e celë fen, tha tro kö a patre la hmi Iehova. Ame ngöne la ijine cili, troa cile koi së hnei Gog Atre Magog, ene la itre nöj hna acasin. (Ezek. 38:18-20) Ngo tha tro kö la isi cili a apatrene la hmi ka wië. Tro kö Iehova a amelene la itre hlue i Nyidrë! Hnei Ioane aposetolo hna meköle goeëne la “ka ala nyimu atraqatr” ene lo itre xaa mamoe i Keriso. Öni Tusi Hmitrötr, angatr a “xulu qa ngöne la akötr atraqatr.” (Hna ama. 7:9, 14) Haawe, kolo hi lai a amamane ka hape, hna thupë angatre hnyawa hnei Iehova!

15-16. Thenge la Hna Amaman 17:14, nemene la hna troa kuca hnene la itre hna iën ngöne la isi Amagedro, nge pine nemen matre ka ithuecatre koi së?

¹⁵ Maine jë, tro la itre xan a hnying ka hape: ‘Nemene la huliwa ne la itre hna iën thupene la angatr a elë e koho hnengödrai?’  Tusi Hmitrötr a sa ka hape, tro la itre mus e celë fen a “isi memine la Neköi Mamoe.” Ngo tha tro kö angatr a hun. Öni Tusi Hmitrötr: “Tro la Neköi Mamoe a ngaa angatr.” Nge drei la ka troa ce isi me nyidrë? Önine la xötr, kolo “itre hna hën me iën, itre ka mele nyipici.” (E jë la Hna Amaman 17:14.) Kola qeje drei? Kola qaja la itre trejin hna iën hna amelene hmaca! Matre qëmekene troa nyipun la akötr atraqatr, e angatr asë hë e hnengödrai, ame la pane hnëqa i angatr, ke troa isi. Ketre hnëqa lai ka lolo catr! Ame itre xan ekö, qëmeken troa atre Iehova, ke itre ka isi. Nge ame pena la itre xan, ke itre ka sooc. Ngo ame hë la angatr a atre Iehova, ke atreine hë angatr mele tingeting me itre xan. (Gal. 5:22; 2 Thes. 3:16) Matre hnei angatr hna nuetrij la nöjei pengöne isi. Ngo ame hë la angatr a melehmaca e koho hnengödrai, tro angatr a ce me Keriso me itre angela troa isi memine la itre ithupëjia me Akötresie.

¹⁶ Pane mekune jë la: ame la itre xaa trejin hna iën enehila, ke qatre hë angatr nge tha egöcatre hmaca kö angatr. Ngo ame hë la kola amele angatr hmaca e hnengödrai, ke itre angela ka tru trengecatr, nge ka troa mele palua. Ame la pane hnëqa i angatr, ke troa ce isi me Iesu Keriso, Joxu Ne Isi. Thupene la isi Amagedro, tro angatr a ce huliwa me Iesu, matre xatuane la itre atr troa pexeje trootro. Tru catre kö la hnei angatr hna troa kuca koi së qa hnengödrai, hune lo hnei angatre hna kuca e celë fen!

17. Easa atre tune kaa ka hape, tha tro kö a xoue la itre hlue i Iehova asë ngöne la isi Amagedro?

¹⁷ Ka sine kö epun la itre xaa mamoe? Maine eje hi, nemene la nyine tro epuni a kuca ngöne la isi Amagedro? Loi e troa mejiune koi Iehova me trongëne la itre hna amekötin. Kola hapeue lai? Troa drengethenge la hna qaja ngöne la xötre celë: “Löjë kowe la hnahage i ’ö, nge thingeju la qëhnelö thupe i ’ö, nge zaju kösë une meke, pane patë hë la elëhni.” (Is. 26:20) Ame ngöne la ijine cili, tha tro kö a xoue la itre hlue i Iehova e hnengödrai me e celë fen. Tui Paulo aposetolo, xecie koi së laka, thatreine kö la “mus, me itre ewekë enehila, me itre ewekë elany . . . thepe së qa ngöne la ihnimi Akötresie.” (Rom. 8:38, 39) The thëthëhmine kö laka, Iehova a hnimi epun, nge tha tro kö Nyidrëti a nuaxöji epun!