1, 2. Nemene la aqane goeëne itre atr la huliwa i angatr?

 ALA NYIMU la itre atr ka mekune ka hape, ka nyipi ewekë la atr thenge la huliwa hnei angeic hna kuca. Ame ngöne la itre xa nöj, e kola thele troa atre la ketre atr, canga tro hi a hnyinge ka hape: “Eö a huliwa ekaa?”

² Hnene la Tusi Hmitrötr hna hane qaja la pengöne la atr thenge la huliwa i angeic. Kola qeje “Mataio la telona,” me “Simona ate kuci kupeine öni, “ me “Luka, tene dösinöe hnimina.” (Mataio 10:3; Ite Huliwa 10:6; Kolose 4:14) Ame itre xa ijin, ej a qaja la hnëqa ne la atr ngöne la huliwa i Akötresie. Pane meku Davita Joxu ju, me Elia perofeta, me Paulo aposetolo. Hnene la itre atr celë hna wangatrune la itre hnëqa hna nue koi angatr hnei Iehova. Ketre tune mina fe, loi e tro sa nyipiewekëne la itre hnëqa së ngöne la huliwa i Akötresie.

3. Pine nemene matre tro la itre qatr a inine la itre thupëtresij? (Wange ju la pane iatr.)

³ Atraqatre la aja së troa huliwa i Iehova, nge easa wangatrune  la itre hnëqa së. Matre easa catre huliwa i Nyidrë thenge la hne së hna atrein. Ngo, eje hi laka, e qatre hë së, tha ijiji së hë troa kuca la hne së hna majemine kuca ekö lo kola thupëtresij. (Ate Cainöj 1:4) Matre ketre jole lai kowe la itre hlue i Iehova. Ame enehila, kolo pala hi a kökötre la huliwa ne cainöj, nge organizasio i Iehova a huliwane la itre jia ne huliwa ka hnyipixe matre troa ketr la itre atr ka ala nyimu catre hmaca kö hnene la maca ka loi. Ngo, jole pi hë e itre xa ijin kowe la itre qatr troa inine la xa aqane huliwa ka hnyipixe. (Luka 5:39) Ketre, ka troa patr thene la atr la trenge catre i angeic, ke kola qatre trootro. (Ite Edomë 20:29) Matre, hatrene ihnimi hi lai e tro la itre qatr a inine la itre thupëtresij troa xome la itre xa hnëqa e hnine la organizasio i Iehova.—E jë la Salamo 71:18.

4. Pine nemene matre jole pi hë koi itre xan troa nue la hnëqa i angatr? (Wange ju la itre mekune hna eköhagen, “Kepine Matre Jole Pi Hë Troa Nue La Hnëqa.”)

⁴ Nyipici laka, tha ka hmaloi kö kowe la ka trene hnëqa troa nue la huliwa i angeic kowe la ketre thupëtresij. Ketre hnëqa lai hna xome qaane ekö, nge hna eatrëne hnyawan. Matre akötre pi hë kowe lai trejin troa nue la hnëqa i angeic. Maine pena, tro angeic a hnehengazone me hape, e tha angeice kö la ka kuca la huliwa, tha tro jë kö lai a tro loi. Nge ame koi angeic, pëkö ijine i angeic troa inine la itre xa trejin. Nge ame pena la itre thupëtresij, loi e tro angatr a atreine itreqe e pë pala ha hnëqa hnei angatr hna kapa.

5. Nemen la itre hnying hne së hna troa ce ithanatan göne la tan mekune celë?

⁵ Pine nemene matre nyipi ewekë kowe la itre qatre troa xatuane la itre thupëtresij troa xomi hnëqa? Nemen la aqane tro angatr a eatrëne lai? (2 Timoteo 2:2) Nge pine nemen matre troa lolo la aqane waiewekë ne la itre thupëtresij la angatre a ce huliwa memine la itre qatr, me xomi ini qaathei angatr? Tro sa pane ce wang la aqane hnëkëne Davita Joxu la nekö i angeic matre troa xome la ketre hnëqa ka tru.

6. Nemene la hna ajan troa kuca hnei Davita joxu? Nemene la hnei Iehova hna qaja koi angeic?

⁶ Nyimu macatre ne akötrë Davita, ame hnei angeic hna fek trootro. Ame hë la angeic a joxu, angeic hë lapane la ketre uma ka lolo. Matre öni angeic koi Nathana perofeta: “Hana wang, ini ha la a lapa ngöne la uma arasi, ngo eje kö la puha ne isisinyikeu i Iehova fene la ite hēn.” Atraqatr la aja i Davita troa xup la ēnē i Iehova ka mingöming. Öni Nathana koi angeic: “Kuca asë jë la nöjei ewekë ka ej’ e kuhu hni nyipë, ke ce Akötesie me nyipë.” Ngo tha celë kö lai la aja i Iehova. Hnei Nyidrëti hna upi Nathana troa qaja koi Davita ka hape: “Tha tro kö eö a xupe la uma nyine hnalapang.” Atre hë Davita ka hape, tro pë hë la ketre nekö i angeic a xup la ēnē. Hnei Iehova hna sisiny koi Davita ka hape, tro pala hi Nyidrë a ceme angeic. Nemen la aqane ujë i Davita?—1 Aqane lapa ite Joxu 17:1-4, 8, 11, 12; 29:1.

7. Nemen la aqane ujë i Davita kowe la hna amekötin hnei Iehova?

⁷ Pi tro pala ha Davita a xup la ēnē thatraqai Iehova matre hace catr koi angeic. Ngo ame pe, hnei angeic pala hi hna sajuën la huliwa hna athip koi Solomona nekö i angeic. Hnei Davita hna  hnëkën la itre ka huliwa memine la itre jian, ene la fao, me kopa, me sileva, me gool, me sinöe. Tha hnei angeice kö hna thele troa atre la atr ka troa xup elanyi la ēnē, kola qaja la ēnē i Solomona. Hnei angeic pe hna thuecatre koi Solomona me hape: “Enehila, neköng, tro Iehova a ce me hmunë ; nge manathithi hë hmunë, nge xupejë la ēnē i Iehova Akötesi hmunë tune lo hna qeje hmunë.”—1 Aqane lapa ite Joxu 22:11, 14-16.

8. Nemene jë la mekuna i Davita göi Solomona? Ngo nemene la hnei Davita hna kuca?

⁸ E jë la 1 Aqane lapa ite Joxu 22:5. Maine jë ame koi Davita, tha ijiji Solomona kö troa iujin la huliwa ka tru ka tune lai. Troa “sisitia cat” la ēnē, nge ame Solomona tre, “nekönate ka pujepuje.” Ngo tha luelue kö Davita laka, tro Iehova a xatua Solomona troa eatrën la huliwa ka tru cili. Matre hnei Davita hna kuca asë la hnei angeic hna atrein matre troa hnëkën la huliwa cili.

9. Nemene la mekuna ne la itre trejin qatr la kola nue la itre hnëqa kowe la itre thupëtresij? Qaja jë la ketre ceitun.

⁹ Tha tro kö la itre trejin qatr a hace fë la kola nue la itre hnëqa kowe la itre thupëtresij. Atre asë hi së lo ka hape, ame la huliwa ka sisitria enehila tre, ene la huliwa i Iehova. Matre ixatua ka tru elanyi ngöne la huliwa cili, e troa inine la itre thupëtresij troa xome la itre hnëqa. Pane mekune ju la ketre kem ka hetre kuku ka inine xomi loto. Ame hë la kuku a hetre permis, angeice hë a ketre xomi loto. Haawe, ame itre xa ijin, nyidroti a ithöeëne troa xomi loto. Nge ame hë la kola qatre catre hnei kem, kuku pë hë la ka xom la loto. Hapeu, tro kö a wesitre la kem? Ohea, madrine pe nyidrë la kola ngenu sai nyidrë. Ketre tune mina fe, tru la madrinene la itre trejin qatr la kola goeëne la itre thupëtresij hnei angatr  hna inine me hnëkën troa xom la itre hnëqa ngöne la organizasio i Iehova.

10. Nemene la mekuna i Mose göi troa hetre hnëqa?

¹⁰ Tha tro pi kö sa zalu pine la itre hnëqa i itre xan. Loi e tro sa xomi ini qa ngöne la aqane ujë i Mose, lo kola ujë ceitu me perofeta hnene la itre xa angetre Isaraela. (E jë la Numera 11:24-29.) Hnei Iosua hna thel troa sewe angatr, ngo öni Mose: “Eö a aköte pi ini? epi nöjei perofeta la nöjei ate i Iehova asë, epi atë hui angate hnei Iehova la [u]a i nyidë!” Atre hnyawa hi Mose ka hape, Iehova la ka elemeken la huliwa. Matre tha hnei angeice kö hna thele troa atrunyi angeice kö, ngo ame la aja i angeic, tro la itre hlue i Iehova asë a hetre hnëqa. Tune kaa fe së? Madrine kö së la kola kapa la itre hnëqa hnene la itre xa trejin ngöne la organizasio i Nyidrë?

11. Nemene la hna qaja hnene la ketre trejin göi troa nue la itre hnëqa koi itre xan?

¹¹ Ala nyimu la itre trejin ka catre huliwa i Iehova koi nyimu macatre hë, nge hna inine me hnëkëne la itre thupëtresij troa xome la itre xa hnëqa. Tro sa ce wang la pengöi Peter. Ame ngöne la 74 lao macatre ne huliwa i Akötresie o drai nyidrë, 35 lao macatre ne huliwa Bethela nyidrë e Europe. Nyimu macatre ne xome nyidrë la hnëqa ne atre thupëne la Biero Thatraqane La Huliwa Ne Cainöj. Ame hë e thupen, hna nue la hnëqa cili koi Paul, ketre thupëtresij hnei nyidrëti hna inin me hnëkën thatraqane lai. Hapeu, madrine kö Peter la kola saze tune lai? Eje hi. Öni nyidrë: “Tru catre la madrineng laka, hetrenyi la itre trejin hna inin me hnëkën matre troa kapa la itre xa hnëqa ka tru, nge ka eatrëne hnyawa itre ej.”

12. Nemene la ini hne së hna xom qa ngöne la tulu i Reoboama?

¹² Ame hë la kola joxu hnei Reoboama, nekö i Solomona, hnei angeic hna thele eamo thene la itre qatr göi aqane tro angeic a eatrëne hnyawa la hnëqa i angeic. Ngo ame hë e thupen, hnei angeic hna thipetrij la eamo i angatr! Hnei angeice pe hna xötrethenge la eamo hna hamën hnei itre thupëtresij ka ce tru me angeic. Matre ngazo catre la thangane lai. (2 Aqane lapa ite Joxu 10:6-11, 19) Nemene la ini hne së hna xom qa ngön? Loi e tro sa thele eamo thene la itre qatr ke, hetre hnei angatr hna melëne hë. Tha tro kö la itre thupëtresij a thel troa kuca pala hi la itre ewekë tune ekö. Ngo ame pe, loi e tro angatr a nyipiewekëne la itre mekune hna hamën  hnene la itre qatr. Tha tro kö angatr a saqe mekun ka hape, tha loi kö la mekuna ne la itre qatr.

13. Nemene la aqane tro la itre thupëtresij a ce huliwa memine la itre qatr?

¹³ Ame itre xa ijin, kola nue la hnëqa hna cilëne hnene la itre qatr ka maca ngöne la huliwa kowe la itre thupëtresij. Haawe, loi e tro la itre thupëtresij a xomi ini qaathene la itre qatr. Ame göi Paul me Peter, lo hne së hna ce ithanatane e caha, hnei Paul lo hna nyihna i Peter, me xom la hnëqa i nyidrë. Öni angeic e thupen, “Hnenge hna xomi ijin troa thel eamo thei Peter, nge hnenge hna thuecatre koi itre xan ngöne la Biero Thatraqane La Huliwa Ne Cainöj troa hane ujë tun.”

14. Nemene la ini hne së hna xom qa ngöne la aqane ce huliwa i Timoteo me Paulo?

¹⁴ Timoteo la ketre thupëtresij ka co catre kö hui Paulo aposetolo, ngo hnei nyidroti hna ce huliwa koi nyimu macatre. (E jë la Filipi 2:20-22.) Öni Paulo koi angetre Korinito: “Hnenge hna upi Timoteo koi nyipunie, lo nekönge hniminang, nge ate nyipici koi Joxu, lo ate tro ha amexeje koi nyipunie la ite thinange ngöne la huliwa i Keriso, tune la hnenge hna inine la nöjei ekalesia e cailo.” (1 Korinito 4:17) Kola mama hnyawa e celë laka, hnei Paulo me Timoteo hna ce huliwa hnyawa, me ce ithawakeune la huliwa. Hnei Paulo hna xomi ijin troa ini Timoteo la “ite thina [i nyidrë] ngöne la huliwa i Keriso,” ene la itre aqane huliwa i nyidrë, nge hna kapa hnyawa hnei Timoteo. Tru la hnei Paulo hna hnimi Timoteo, nge xecie hnyawa koi nyidrë laka, tro angeic a thupëne hnyawane la itre trejin ne Korinito. Loi e tro la itre qatre thup a nyitipu Paulo aposetolo la kola inin me hnëkëne la itre xa trejin troa elemeken la ekalesia.

15. Roma 12:3-5 a xatua së tune kaa troa atreine melëne la itre ewekë ka hnyipixe?

¹⁵ Easa melëne la ketre hneijine ka lolo catr. Kolo pala hi a kökötre lolo la götrane ka mama ne la organizasio i Iehova. Nge, tro pala kö lai a hetre nyine saze elanyi ngöne la itre xa götran. Ame la itre xa ewekë hna anyipixene tre, ka isa ketri së, nge jole pi hë troa cile kow. Maine hetre hni ne ipië së, me catre kuca la huliwa ne la Baselaia, tro lai a xatua së matre tha tro kö sa thel troa sipu kuci mekun. E tro sa ujë tune lai, tro easë lai a cas me itre trejin. Öni Paulo kowe la itre keresiano ne Roma: “The tro kö kete ate a mekune atrunyi angeice kö hune la ka ijij troa mekun.” Thupene lai, angeic a qaja ka hape, tune la itre igötranene la ngönetrei, ka isa hetre huliwan, haawe, isa hetre hnëqan asë hi la itre atrene la ekalesia.—Roma 12:3-5.

16. Nemene la hna kuca hnene la nöjei keresiano matre tro pala hi a hetrenyi la tingetinge me cas e hnine la organizasio i Iehova?

¹⁶ Itre hlue i Iehova asë a catre sajuëne  la Baselaia me eatrën asë la hna upi angatr troa kuca. Itre trejin qatr a inin, me hnëkëne la itre thupëtresij. Itre trejin thupëtresij a xom la itre xa hnëqa ka tru cememine la hni ka ipië me metrötr. Ketre, hetre madrine la itre trejin trahmanyi ka faipoipo troa eatrëne la hnëqa i angatr, e hna xatua angatr hnene la itre föi angatr, ngacama saze ju hë la pengöne la mele i angatr. Loi e tro la itre föe a nyitipu Perisila, ka ce huliwa nyipici me Akula, föi angeic.—Ite Huliwa 18:2.

17. Nemene la hnei Iesu hna inine kowe la itretre drei nyidrë?

¹⁷ Iesu la tulu ka sisitria göi troa ini me hnëkëne la itre atr. Atre hi Iesu ka hape, tro pë hë itre xan elanyi a sisedrëne la huliwa i nyidrë. Atre hi nyidrë ka hape, itre ka tha pexeje kö la itretre drei nyidrë. Ngo, hetre mejiune i nyidrë laka, tro angatr elanyi a akökötrene catrëne hmaca kö la huliwa ne cainöj hune la aqane kuca i nyidrë. (Ioane 14:12) Matre hnei nyidrëti hna inine me hnëkë angatre hnyawa, nge maca hnyawa ha angatr troa cainöj ngöne la nöjei götrane hnei angatr hna troa tro kow.—Kolose 1:23.

18. Nemene la huliwa hnei epuni hna troa kuca elany? Nemene huliwa hne së hna kuca enehila?

¹⁸ Thupene hë la kola meci me amele Iesu hmaca, hnei Iehova hna hamë Iesu la itre xa huliwa hmaca kö nyine troa kuca, memine fe la mus “e koho palua hune la nöjei Joxu, me mus, me men, me ite tan.” (Efeso 1:19-21) Nge e meci pi së, nge ka nyipici së koi Iehova qëmekene tro Amagedo a traqa, tro hmaca kö së lai a mel elany, nge nyimutre la itre huliwa ka lolo hne së hna troa kuca ngöne la fen ka hnyipixe. Ngo ame enehila, hetrenyi së la ketre huliwa ka tru nyine tro sa kuca, ene la troa cainöjëne la maca ka loi me inine la itre atr matre tro angatr a hane nyihlue i Iehova. Haawe, thupëtresij ju hë së maine qatr, “catejë troa huliwa i Joxu pala hi.”—1 Korinito 15:58.