1-2. (a) Pine nemene matre atre hnyawa hi së laka, tha ka jole kö koi së troa atrune la drai ne meci Iesu? (b) Nemene la itre thiina i Iesu hne së hna troa ce wang?

ATRE fe hi nyipunieti la itre ewekë hna kuca ngöne la Drai Ne Amekunën? Tha thëthëhmine kö së lo itre ewekë hna kuca ngöne la ijine cili. Pine nemen? Pine laka, tha ka jole kö troa hnëkëne la pui ne xeni cili. Ngo ame pe, ketre drai ka sisitria catr. Maine jë, tro sa hnying ka hape, ‘Pine nemene matre tha ka jole kö troa hnëkëne la pui ne xeni cili?’

² Ame lo Iesu e celë fen, hnei nyidrëti hna hamëne la itre ini ka tru. Itre ini ka lualai, nge ka hmaloi troa trotrohnin. (Mat. 7:28, 29) Ketre, hnei nyidrëti hna hnëkëne la Pui Ne Xeni ne la meci nyidrë, matre tha tro kö a jole koi së troa atrune * la drai cili. Tro sa pane lapa mekune la Drai Ne Amekunëne memine la itre xaa ewekë hnei Iesu hna qaja me kuca. Tro hë sa trotrohnine hnyawa la aqane hni ka ipië Iesu me aqane catr me ihnimi nyidrë. Ketre, tro sa ce wang la aqane tro sa xome la itre thiina ka lolo i nyidrë.

3. Tune la hna qaja ngöne Mataio 26:26-28, nemene la aqane hnëkëne Iesu la Drai Ne Amekunën, nge nemene la hna nyihatrene hnene la lue xeni hna xom?

³ Ame ngöne la Drai Ne Amekunën, tre, ce Iesu memine lo 11 lao aposetolo i nyidrë. Hnei nyidrëti hna xome la itre  munëne xen thupene la Paseka, matre hmaloi hi troa atrune la drai cili. (E jë la Mataio 26:26-28.) Hnei nyidrëti hna xome la falawa tha hna levenëne kö me waina, me amamane kowe la itre aposetolo i nyidrë laka, lue xeni lai ka troa nyihatrene la ngönetrei me madra i nyidrëti ka pexej. Easenyi hë matre huujëne jë nyidrëti la mele i nyidrë. Tha sesëkötre kö la itre aposetolo la aqane hnëkëne Iesu la pui ne xeni celë, ka hnyipixe nge ka nyipiewekë catr. Pine nemen?

4. Nemene la aqane tro sa trotrohnine jëne la eamo i Iesu koi Maretha ka hape, ka hmaloi hi troa hnëkëne la pui ne xen?

⁴ Tro sa pane ce wang la itre ewekë ka traqa ngöne la itre treu qëmeken. Ame ngöne lo hnaakönine macatre ne Iesu e celë fen, hnei nyidrëti hna tro troa wange la itre sinee i nyidrë, Lazaro, Maretha me Maria. Hnei Iesu hna nyiqane hamë ini. Maretha hi e cili, ngo angeic a kuci xen ke, angeice la ka könë Iesu. Thupene lai, hnei Iesu hna amekötine la mekuna i Maretha. Öni nyidrëti koi angeic, ka hape, tha nyipiewekë kö troa kuca atrune la xen. (Luka 10:40-42) Itre hawa qëmeken troa mec, hnei Iesu hna kuca la hnei nyidrëti hna qaja. Hnei nyidrëti hna hnëkëne la pui ne xen, tha jole kö troa kuca. Nemene la ini hne së hna xome göi Iesu?

5. Nemene la hna amamane hnene la pui ne xen göi Iesu, nge pine nemene matre ka ihmeku memine la hna qaja ngöne Filipi 2:5-8?

⁵ Kola mama la hni ne ipië i Iesu ngöne la aqane qaja me kuca nyidrëti la itre ewekë. Celë hi matre, ame ngöne la jidri tixenuë i Iesu e celë fen, hnei nyidrëti hna amamane la hni ne ipië i nyidrë. (Mat. 11:29) Atre hnyawa hi Iesu laka, nyidrëti a troa tro fë la ketre huuje ka sisitria. Iehova a troa amele nyidrëti hmaca me acili nyidrëti troa joxu e koho hnengödrai. Atre hnyawa hi nyidrëti lai, ngo tha hnei nyidrëti kö hna hnëkëne la ketre pui ne xeni ka tru, thatraqane la meci nyidrë. Hnei nyidrëti hna qaja kowe la itretre drei nyidrë, ka hape, troa amekunëne la drai cili e nöjei macatre, me hnëkëne la ketre pui ne xen ka co hi. (Ioane 13:15; 1 Kor. 11:23-25) Nyine tro hi a amamane ka hape, tha ka pi mama kö nyidrë. Easa madrine laka, ka hni ka ipië la joxu së e koho hnengödrai.—E jë la Filipi 2:5-8.

6. Nemene la aqane tro sa hni ka ipië tui Iesu, ngacama kola traqa la itre jol?

 ⁶ Nemene la aqane tro sa hni ka ipië tui Iesu? Nyipiewekë tro sa pane wangatrune la itre xan. (Fil. 2:3, 4) Pane mekune jë së lo jidri tixenuë i Iesu. Atre hnyawa hi Iesu laka, tro nyidrëti a akötr. Tru la hnei nyidrëti hna hnehengazone la itre aposetolo i nyidrë ke, easenyi hë tro nyidrëti a mec. Celë hi matre, hnei nyidrëti hna inine la itre aposetolo, me ithuecatre koi angatr, me akeukawane la hni angatr. (Ioane 14:25-31) Ka tru koi Iesu la itre xan, nge pine pë hë la itre aja i nyidrë. Drei la ketre tulu ka lolo koi së!

7. Nemene la aqane amamane Iesu, thupene la Pui Ne Xeni Ne La Joxu ka hape, ka catr nyidrë?

⁷ Thupene la hnei Iesu hna nyiqane atrune la Pui Ne Xeni Ne La Joxu, hnei nyidrëti hna amamane laka, ka catre nyidrë. Tune kaa? Hnei Iesu hna kapa la aja ne la Tretretro i nyidrë, ngacama atre hnyawa hi nyidrëti laka, troa qanangazo nyidrë me humuthi nyidrë. (Mat. 26:65, 66; Luka 22:41, 42) Hnei Iesu hna mele nyipici, matre troa atrune la ëje i Iehova, me sajuëne la musi cile i Akötresie. Nge jëne la meci nyidrë, ijije hi troa mel epine palua la nöjei atr ka ietra. Celë hi aqane hnëkëne Iesu la itretre drei nyidrë, troa cile kowe la itre jol ka troa traqa.

8. (a) Nemene la hnei Iesu hna qaja kowe la itre aposetolo? (b) Itre macatre thupene la meci Iesu, nemene la aqane nyitipune la itretre dreng la aqane catre i nyidrë?

⁸ Hnei Iesu hna amamane ka hape, ka catre nyidrë. Tha hnei nyidrëti kö hna mekune catrëne la itre akötre i nyidrë. Hnei nyidrëti pe hna wangatrune la itre aja ne la itre aposetolo. Hnei Iesu hna acile la pui ne xen, thupene la hna upetröneë Iuda. Nge  hna kuca matre troa amekunëne kowe la itre hna iën, la itre manathithi hna kapa qa ngöne la madra i nyidrë, me qa ngöne la isisinyikeu ka hnyipixe. (1 Kor. 10:16, 17) Hnei Iesu hna xatuane la itretre drei nyidrë troa catre mele nyipici, matre troa ceme nyidrëti e koho hnengödrai. Hnei Iesu hna qaja amamane koi angatr la aja i nyidrë me Iehova. (Ioane 15:12-15) Hnei Iesu hna qaja kowe la itre aposetolo, la itre jole ka troa traqa koi nyidrë. Thupene lai, hnei Iesu hna ithuecatre koi angatr troa nyitipu nyidrë. Hnei nyidrëti hna qaja koi angatr, ka hape, “catejë nyipunie!” (Ioane 16:1-4a, 33) Itre macatre thupen, hnene la itretre drei Iesu hna nyitipune la aqane wangatrune Iesu la itre xan, me aqane catre i nyidrë. Nyipici laka, itre ewekë lai ka troa akötrëne la mele i angatr, ngo ame pe hnei angatr palahi hna ithuecatrekeu.—Heb. 10:33, 34.

9. Nemene la aqane tro sa catr tui Iesu?

⁹ Ame enehila, easë fe a nyitipune la aqane catre i Iesu. Nyipiewekë tro la itre trejin a catre mele nyipici, ngöne la kola icilekeu me angatr. Ame itre xaa ijin, kola akalabusine la itre trejin, ngo pëkö kepin. Ame e cili, loi e tro sa kuca la hne së hna atrein, matre troa xatua angatr me cilëgöli angatr. (Fil. 1:14; Heb. 13:19) Ame la ketre aqan, tre, ene la troa cainöj me ‘catr.’ (Itre hu. 14:3) Loi e tro sa catre tro fë la maca ne Baselaia, ngacama kola icilekeu me qanangazo së. Maine jë tro sa xou e itre xaa ijin. Nemene la nyine tro sa kuca?

10. Nemene la nyine tro sa kuca ngöne la itre wiik qëmekene la Drai Ne Amekunën, nge pine nemen?

¹⁰ Nyipiewekë tro sa lapa mekune la itre eloine la mele hna huujëne hnei Iesu, matre tro palahi sa catr. (Ioane 3:16; Efe. 1:7) Itre wiik qëmekene la Drai Ne Amekunën, loi  e tro sa amamane la hni ne ole së kowe la thupene mel. Tro sa e la itre xötr ne la Tusi Hmitrötr me catre thith, matre xatua së troa lapa mekune la drai cili. Nge ame la jidri ne easa atrune la Drai Ne Amekunën, tre, kola qejepengöne hnyawa la itre xen hna xome thatraqane la drai cili. Ame hë la easa trotrohnine la hna kuca hnei Iehova me Iesu koi së me koi itre sinee së, tre, kola acatrene la mejiune së thatraqane la mele elany. Kolo fe a thue trengecatre së troa cile catr, uti hë la pun.—Heb. 12:3.

11-12. Nemene la hna ini së qaane ekö?

¹¹ Qaane hë ekö, hna ini së ka hape, ame la Pui Ne Xeni Ne La Joxu, tre, ketre ijine easa amekunëne la thupene mel, memine la hni ka ipië i Iesu me aqane catre i nyidrë. Atraqatre la madrine së ke, hetrenyi palahi Iesu, Atre Huuj Ka Sisitria, la lue thiina cili, nge nyidrëti a cilëgöli së! (Heb. 7:24, 25) Maine easa ajane troa amamane la hni ne ole së koi Iesu, loi e tro sa kuca la hnei nyidrëti hna qaja, ene la troa catre atrune la drai ne meci nyidrë. (Luka 22:19, 20) Easa atrune la drai celë ngöne lo ijine 14 Nisa, drai ka sisitria ne la macatre.

¹² Kolo fe a amekunë së hnene la Pui Ne Xeni Ne La Joxu la ketre thiina ka upi Iesu troa meci pi së. Atre asë hi la itre atr e cailo fen la thiina i nyidrë. Nemene la thiina cili?

13. Nemene la hna qaja ngöne Ioane 15:9 me 1 Ioane 4:8-10, göne la ihnimi Iehova me Iesu, nge nemene la thangane koi së?

¹³ Hnei Iesu hna nyitipune la ihnimi Iehova, ngöne la nöjei ewekë hnei nyidrëti hna kuca. (E jë la Ioane 15:9; 1 Ioane 4:8-10.) Ej e kuhu hni Iesu la aja troa huujëne la mele i nyidrë thatraqai së. Jëne la huuje celë, easë asë hi, itre hna iën me “ite xa mamoe,” a kepe manathith qa ngöne la ihnimi Iehova me nekö i Nyidrë. (Ioane 10:16; 1 Ioane 2:2) Pane mekune jë fe la lue ewekë hna xom ngöne la Drai Ne Amekunën. Lue ej a amamane la ihnimi Iesu kowe la itretre drei nyidrë. Tune kaa?

14. Nemene la aqane amamane Iesu la ihnimi nyidrëti kowe la itretre dreng?

¹⁴ Hnei Iesu hna amamane la ihnimi nyidrëti kowe la itre hna iën. Hnei nyidrëti hna upi angatr troa atrune la pui ne xen, nge tha ka jole kö. Ame fe enehila, itre hna iën a atrune la Drai Ne Amekunën e nöjei macatre, ngacama nyimutre la itre jol, tune la kalabus. (Hna ama. 2:10) Hnei angatre kö hna drengethenge Iesu? Eje hi!

15-16. Nemene la aqane atrune la Pui Ne Xeni Ne La Joxu hnene la itre xaa trejin, ngacama tru ju hë la itre jol?

¹⁵ Qaane ekö utihë enehila, itre Keresiano a atrune la drai ne meci Iesu. Angatr a catre atrune la Pui Ne Xeni Ne La Joxu, ngacama tru ju hë la itre jol. Hanawang la itre xaa ceitun. Hna akalabusi Harold King e Chine. Hnei nyidrëti hna thele la aqane tro nyidrëti a atrune la Drai Ne Amekunën, ngacama pëkö xaa trejin. Hnei nyidrëti hna hnëkëne juetrëne la falawa memine la waina, thenge la hna hetreny. Hnei nyidrëti fe hna thele la hmekune la Drai Ne Amekunën. Ame hë la kola atrune la Drai Ne Amekunën, hnei nyidrëti hna ketre nyima caas me thith me tro fë la cainöj.

¹⁶ Hane hi la ketre ceitun. Ame ngöne la hnaaluene isi ka tru, hnene la itre trejine föe hna thele troa atrune la Pui Ne Xeni Ne La Joxu, ngacama kola thele troa humuthi angatr. Ngo pine laka, tha tru kö la itre ewekë nyine troa hnëkëne thatraqane la drai cili, matre hmaloi hi koi angatr troa atrune  juetrëne la Drai Ne Amekunën. Öni angatr: “Eahuni a cile xötreithe la ita hna ati areto me waina. Eahuni a amele i bougie ke, hudrume palaha la laam. . . . E cili, eahuni a amexeje la aja huni troa kuca asë la hne huni hna atrein, matre troa atrune la ëje ka hmitrötre i Akötresie.” Hapeu, tha ketre tulu ne lapaune kö lai ka lolo? Ketre, hnei Iesu hna amamane la ihnimi nyidrëti koi së. Hnei nyidrëti hna ahmaloeëne la aqane tro sa atrune la Drai Ne Amekunën, ngacama tru ju hë la itre jol!

17. Nemene la itre hnying nyine tro sa isa ithanatan?

¹⁷ Easenyi hë la Drai Ne Amekunën, matre loi e tro sa isa hnying ka hape: ‘Nemene la aqane tro ni a ihnim tui Iesu? Eni kö a wangatrune la itre aja ne la itre trejin, nge co pë hë la itre sipu ajang? Eni kö a wangatrehmekune laka, hetre hna thatreine kuca hnene la itre trejin?’ Epi tro palahi sa nyitipu Iesu me ‘ihnimikeu.’—1 Pet. 3:8.

18-19. (a) Nemene la ka xecie koi së? (b) Nemene la nyine tro sa kuca enehila?

¹⁸ Calemi hë la ijine tro sa atrune la Drai Ne Amekunëne tixenuë ne la meci Iesu. Ame la Iesu a troa “traqa” ngöne la ijine akötr atraqatr, nyidrëti a troa icasinekeune la nöjei “iana” e koho hnengödrai. E cili, tha tro hmaca kö sa atrune la Drai Ne Amekunën.—1 Kor. 11:26; Mat. 24:31.

¹⁹ Ame e thupene la Drai Ne Amekunën tixenuë, tro palahi la nöje i Iehova a mekune la pui ne xen cili laka, ketre hatrene ihnim, me hni ne ipië me catr. Tro la itre ka atrune ekö la drai cili a qejepengön, matre tro la itre xan a hane kepe eloin. Maine easa ajane troa kepe thangan qa ngöne la pui ne xen cili enehila, loi e tro sa hni ne ipië me catr me ihnim, tui Iesu. Xecie hnyawa koi së laka, tro sa kepe manathithi qaathei Iehova.—2 Pet. 1:10, 11.