1-2. (a) Nemene la mekuna i Iehova göne la itre milio lao atr ka sine la Drai Ne Amekunën? (Wange ju la pane iatr.) (b) Nemene la hne së hna troa ce wang ngöne la tane mekun celë?

PANE mekune jë së la Iehova a öhne la itre milio lao atr e cailo fen, angatr a caas matre troa atrune la Pui Ne Xeni Ne La Joxu. Tha Nyidrëti hmekuje kö a goeëne la itre atr ka alanyim, ngo Nyidrëti fe a goeë angatr isa ala cas. Öhne hi Nyidrëti la itre ka traqa e nöjei macatre. Hetre itre xan ka traqa ngacama hna qanangazo angatr. Ame itre xan, ngacama tha traqa kö angatr kowe la itre xaa icasikeu, ngo angatr a sine la Drai ne Amekunën, pine laka, atre hnyawa hi angatr laka, ka nyipiewekë troa sine la drai cili. Öhne fe hi Iehova la itre ka xötrei traqa, nge ka ajane troa atrepengöne la drai cili.

² Eje hi, madrine catre Iehova troa goeëne la kola traqa la nöjei atr troa sine la Drai Ne Amekunën. (Luka 22:19) Ngo ame pe, tha Iehova kö a goeëne la etrun. Ka nyipiewekë koi Nyidrëti la kepin matre angatr a traqa. Ame ngöne la tane mekun celë, easa troa sa la ketre hnyinge ka tru: Pine nemene matre easa wangatrune me sine la itre icasikeu hna hnëkëne hnei Iehova e nöjei macatre, tune la Drai Ne Amekunën memine la itre xaa icasikeu?

3-4. (a) Pine nemene matre easa sine la itre icasikeu? (b) Nemene la hne së hna amamane ngöne la easa sine la itre icasikeu? (c) Thenge la hna qaja ngöne 1 Korinito 11:23-26, pine nemene matre tha tro kö sa triane la Drai Ne Amekunën?

³ Easa sine la itre icasikeu ne la ekalesia, matre tro sa hmi koi Iehova Akötresie. Easë fe e cili a kapa la itre ini qaathei Iehova. Ketre, ame la itre ka pi tru, tre, angatr a mekun ka  hape, pëkö eloine troa sine la itre icasikeu. (3 Ioane 9) Ngo easa madrine pine laka, easa kapa la itre ini qaathei Iehova me organizasio i Nyidrë.—Is. 30:20; Ioane 6:45.

⁴ Ame la easa sine la itre icasikeu, easa amamane la hni ne ipië me aja së troa kapa la itre ini qaathei Iehova. Easa sine la Drai Ne Amekunëne la meci Keriso, pine laka, ka nyipiewekë catre koi së. Ketre, easa drengethenge la hna amekötin hnei Iesu, lo kola hape, “Kucajë la nyine mekune koi ni.” (E jë la 1 Korinito 11:23-26.) Ame ngöne la icasikeu celë, tre, kola acatrene la mejiune së koi elany. Ketre, kola amekunë së la etrune la ihnimi Iehova koi së. Ngo atre hi Iehova laka, loi e tro palahi a hamë ithuecatre koi së. Celë hi matre, hnei Nyidrëti hna hnëkëne la itre icasikeu e nöjei wiik. Maine hetre hni ne ipië së, tha tro jë kö sa triane itre ej. Easë fe a xomi ijin ngöne la wiik, matre troa hnëkë hnyawa me sine itre ej.

5. Pine nemene matre kola kapa la ihë i Iehova, hnene la itre ka hni ka ipië?

⁵ Ame e nöjei macatre, Iehova a könëne la itre atr ka hni ka ipië troa kapa la itre ini qaathei Nyidrë. Nyimutre la itre atr ka kapa la ihë i Nyidrë. (Is. 50:4) Angatr a madrin troa sine la Drai Ne Amekunën, me sine fe la itre xaa icasikeu. (Zaka. 8:20-23) Madrine catre së me itre xan ka hane xötrei traqa, troa kapa la itre hna amekötine hnei Iehova me nue Nyidrë troa eatrongë së, Nyidrë ‘ate xatua së me amele së.’ (Sal. 40:17) Drei la madrine ka tru, troa kapa la itre ini qaathei Iehova me Iesu, Nekö Hnimina i Nyidrë!—Mat. 17:5; 18:20; 28:20.

6. Nemene la aqane xatuane la ketre trahmany ka hni ka ipië, troa sine la Drai Ne Amekunën?

⁶ Ame e nöjei macatre, easa isine troa hëne la nöjei atr troa hane sine la Drai Ne Amekunëne la meci Keriso. Hna kapa la ihë së hnene la itre ka hetre hni ne ipië. Hanawange la tulu ne la ketre trahmany. Hnei nyidrëti hna kapa la pepa ne ihë kowe la Drai Ne Amekunën. Hnei nyidrëti hna qaja kowe la trejin, ka hape, tha tro kö nyidrëti a traqa. Ngo ame ngöne la jidri ne atrune la Drai Ne Amekunën, ke sesëkötre ju hi la trejin la kola lö e hnine la Uma Ne Baselaia la trahmany. Kola haine la aqane kepe nyidrë hnene la itre trejin. Hnei nyidrëti hna sine la itre icasikeu. Ame ngöne la macatre, köni icasikeu hnei nyidrëti hna trian. Nemene la ka uku nyidrë troa sine la itre icasikeu? Önine lo trejin ka könë nyidrë, “Ketre trahmanyi ka hetre hni ne ipië.” Nyipici, hnei Iehova hna könëne lai trahmany, matre troa hane atrunyi Nyidrë. Ka bapataiso hë nyidrëti enehila.—2 Sam. 22:28; Ioane 6:44.[2]

7. Nemene la aqane troa xatua së troa hni ka ipië, hnene la itre ini ngöne icasikeu memine la itre hna e ngöne Tusi Hmitrötr?

⁷ Ame la itre ini hne së hna kapa qa ngöne la itre icasikeu, me qa ngöne la hna e Tusi Hmitrötr, tre, kola xatua së troa hni ka ipië. Ame ngöne la itre wiik qëmekene la Drai Ne Amekunën, ke, kola amexeje koi së la tulu ne ipië i Iesu. Hna huujëne la mele i nyidrë thatraqai së. Ketre, hna amekötine fe koi së troa e la itre xötr ka qejepengöne la itre ewekë ka traqa qëmekene tro Iesu a mec, memine lo kola amele nyidrëti hmaca. E cili, kola akökötrene la hni ne ole së kowe la mel hna huujëne hnei Iesu. Kolo fe a upi së troa nyitipune la tulu ne ipië i Iesu me kuca la aja i Iehova, ngacama tha ka hmaloi kö koi së.—Luka 22:41, 42.

8. Nemene la aqane amamane Iesu ka hape, ka catre nyidrë?

⁸ Loi e tro fe sa tupathe troa nyitipune la aqane catre i Iesu. Pane mekune jë së la aqane catre nyidrë, qëmekene tro nyidrëti a mec. Atre hnyawa Iesu laka, troa qanangazo nyidrë hnei itre ithupëjia, me lepi nyidrë, me humuthi nyidrë. (Mat. 20:17-19) Ngo tha hnei Iesu kö hna xou. Ame ngöne la ijine cili, hnei nyidrëti hna qaja kowe la itre aposetolo ka ce me nyidrë e Gethesemane: “Cilejë, eësha tro, hana wang, dei hë la ate wanaxoeë ni.” (Mat. 26:36, 46) Ame ngöne la kola traqa troa othi nyidrë hnene la itre atr me itre sooc, hnei nyidrëti hna tro me qaja koi angatr, ka hape, troa nue pe la itre aposetolo i nyidrë. (Ioane 18:3-8) Drei la aqane catre i Iesu! Ame fe enehila, kola nyitipune la aqane catre Iesu hnene la itre Keresiano hna iën memine la itre xaa mamoe. Tune kaa?

9. (a) Pine nemene matre nyipiewekë troa catr, matre troa sine la itre icasikeu? (b) Nemene la thangane la aqane catre së thene la itre trejin hna akalabusin?

⁹ Ame itre xaa ijin, nyipiewekë troa catr, matre troa sine la itre icasikeu. Ame la itre xaa trejin, angatr a catre sine la itre icasikeu ngacama angatr a akötr, me kucakuca maine wezipo pena. Ame itre xan, kola icilekeu me angatr hnene la hnepe lapa i angatr, maine hnei musi pena. Pane mekune jë së la thangane la aqane catre së thene la itre trejin hna akalabusin. (Heb. 13:3) Ame la angatr a öhne laka, ngacama easa cile kowe la itre jol ngo easë palahi a catre nyihlue i Iehova, tre, kola acatrene la lapaune i angatr. Ketre, kola thue trengecatre i angatr me acatrene la aqane mele nyipici angatr koi Iehova. Celë hi hna melëne ekö hnei Paulo. Ame lo angeice e hnine la kalabusi e Roma, tre, angeic a madrine laka, kolo palahi a mele nyipici koi Iehova hnene la itre trejin. (Fil. 1:3-5, 12-14) Qëmekene maine thupene la kola nue angeic, hnei Paulo hna cinyihane la tusi angeic koi angetre Heberu. Angeic a qaja koi itre Keresiano ka mele nyipici koi Iehova, ka hape, troa “cile huti la ihnimi tejin” nge tha tro pi kö a triane la itre icasikeu.—Heb. 10:24, 25; 13:1.

10-11. (a) Drei la itre hne së hna troa könëne troa sine la Drai Ne Amekunën? (b) Nemene kepin hna hamën ngöne Efeso 1:7?

¹⁰ Easa amamane laka, ka catre së ngöne la easa könëne la itre sinee së me itre sine huliwa së, maine itre ka lapa ezi së pena, troa hane sine la Drai Ne Amekunën. Pine nemene matre easa könë angatr? Tru la hni ne ole së kowe la itre hna kuca hnei Iehova me Iesu, matre thatreine kö së troa lapa thaup. Aja së tro fe angatr a atre la itre nyine troa kuca, matre troa hane kepe thangane “la ihnimi gufa” i Iehova, jëne la thupene mel.—E jë la Efeso 1:7; Hna ama. 22:17.

¹¹ Ame fe la easa nue trengecatr troa sine la itre icasikeu, tre, easa amamane la ketre thiina ka sisitria catr, nge ka eje thei Iehova me Iesu.

12. (a) Pine nemene matre kola acatrene la ihnimi së koi Iehova me Iesu, hnene la itre icasikeu? (b) Nemene la aqane xatua së hnene la tusi 2 Korinito 5:14, 15, troa nyitipu Iesu?

¹² Hnene la ihnimi së koi Iehova me Iesu, matre easa catre sine la itre icasikeu. Nge ame la nöjei ini hne së hna kapa e cili, ke, kola acatrene la ihnimi së koi nyidro. Kola amekunë së fe e cili la itre hnei nyidroti hna kuca thatraqai së. (Rom. 5:8) Ame la Drai Ne Amekunën, tre, kola amekunëne la etrune la ihnimi nyidroti koi së, me kowe fe la itre ka tha trotrohnine palakö la enyipiewekëne la thupene mel. Easa olene atraqatr koi nyidro, matre easa thele troa nyitipu Iesu e nöjei drai. (E jë la 2 Korinito 5:14, 15.) Ketre, easa atrunyi Iehova pine laka, hnei Nyidrëti hna hamë së la thupene la mel. Ame la ketre aqane tro sa atrunyi Nyidrë, ke troa hamë mekun ngöne la itre icasikeu.

13. Nemene la aqane troa amamane la etrune la ihnimi së koi Iehova me Iesu? Qejepengöne jë.

¹³ Ijije hi tro sa amamane la etrune la ihnimi së koi Iehova me Iesu. Ame itre xaa ijin, easa nue trengecatre troa sine la itre icasikeu. Ame ngöne la wiik, tre, kola icasikeu thupene la huliwa, matre easa kucakuca. Nge hetre icasikeu mina fe e pune wiik, ngöne la ijine easa mano. Hapeu, öhne kö Iehova la easa sine la itre icasikeu, ngacama easa kucakuca? Eje hi! Madrine catre Iehova troa goeën, laka, easa nue trengecatre koi Nyidrë, me amamane la etrune la ihnimi së koi Nyidrë.—Mar. 12:41-44.

14. Nemene la aqane amamane Iesu la tulu ne ihnim, ngöne lo nyidrëti a nue la mele i nyidrë?

¹⁴ Hnei Iesu hna amamane koi së la tulu ne ihnim, ngöne lo nyidrëti a nue la mele i nyidrë. Tha hnei nyidrëti kö hna cile troa meci thatraqane la itretre drei nyidrë. Nge eje thei nyidrëti la aja troa amë panëne la aja i angatr, nge pine pë hë la itre sipu aja i nyidrë. Hnei nyidrëti hna tro kowe la itretre dreng, ngacama kucakuca catre nyidrë me akötr. (Luka 22:39-46) Hnei Iesu hna catre thele la aqane troa xatua itre xan. (Mat. 20:28) Eje hi, maine catrecatre la ihnimi së koi Iehova me kowe la itre trejin, haawe, tha tro kö sa triane la Drai Ne Amekunën memine fe la itre xaa icasikeu ne la ekalesia.

15. Drei la itre hne së hna troa xatuane hnyawa?

 ¹⁵ Easa sine la lapa ne la ange trejin, matre easa thele troa könëne la itre xan tro fe a hane sine la lapa cili. Ngo, tru catre kö la aja së troa xatuane la “nöjei ate ne la lapa i angete lapaun,” ene la itre trejin ka nanazij, nge ka tha traqa hmaca kö troa sine la itre icasikeu. (Gal. 6:10) Tru la ihnimi së koi angatr, matre easa ithuecatre koi angatr troa hane sine la itre icasikeu së, tune la Drai Ne Amekunën. Madrine catre së tui Iehova me Iesu, ngöne la kola bëeke hmaca hnene la ketre trejin ka nanazije koi Iehova, Tretretro ka tru ihnimin me Atre Thupë Mamoe.—Mat. 18:14.

16. (a) Nemene la aqane tro sa itö ithuecatr, nge nemene la thangane la itre icasikeu së? (b) Pine nemene matre ketre ijine ka loi ngöne la macatre, la troa lapa mekune la itre hna qaja hnei Iesu ngöne Ioane 3:16?

¹⁶ Ame la itre wiik qëmekene la Drai Ne Amekunën, könëne jë la nöjei atr kowe la heji ne Draikatru 19 Eiperem 2019. (Wange ju la hna eköhagen hna hape, “ Tro Kö Sa Hane Hë Angatr?”) Ame ngöne la macatre, thele jë së troa ithuecatrekeu. Loi e tro sa hane hamë mekun, ngöne la itre icasikeu hna hnëkëne hnei Iehova. Ka nyipiewekë pine laka, easenyi catre hë la pune la fen celë. Tro lai a xatua së troa hetre hni ne ipië me acatrene la aqane catre së me ihnimi së. (1 Thes. 5:8-11) Catre jë së amamane la etrune ihnimi së koi Iehova me kowe la Nekö i Nyidrë ke, hnei nyidroti hna hnimi së!—E jë la Ioane 3:16.