1-2. (a) Nemene la aqane xatua Yoshiko hnene la tusi Isaia 41:10? (b) Drei fe la ka kepe eloine qa ngöne Isaia 41:10?

ÖNI droketre koi Yoshiko, ketre trejin föe, ka hape, itre treu pe hi ne tro eahlo a mel. Nemene la hnei eahlo hna kuca? Hnei Yoshiko hna mekune la ketre xötr ka ithuecatr, ene Isaia 41:10. (E jë.) Öni eahlo jë hi koi droketre ka hape, tha xou i eahlo kö ke, Iehova a ea catrëne la ime i eahlo. * Hnene lai xötr hna akeukawane la hni Yoshiko, me xatua eahlo troa catre lapaune koi Iehova. Tro fe la xötre celë a hane xatua së, matre tha tro kö sa hnehengazo menu, e traqa ju la itre jol. Tro sa pane ce wang la kepin matre qaja jë Akötresie la maca celë koi Isaia.

² Hnei Iehova hna upi Isaia troa cinyihane la itre trengewekë celë, matre troa aegöcatrene la angetre Iuda ka troa po e Babulona. Ngo ka hetre eloine fe kowe la itre hlue i Nyidrëti enehila. (Is. 40:8; Rom. 15:4) Easa melëne la “nöjei ijine ka aköte.” Celë hi matre, nyipiewekë fe koi së la ithuecatre hna hamëne ngöne la tusi Isaia.—2 Tim. 3:1.

3. (a) Nemene la köni ewekë hna thingehnaeane ngöne la topik ne la macatre 2019, ngöne Isaia 41:10? (b) Pine nemene matre ka nyipiewekë la itre hna thingehnaeane cili?

³ Tro sa ce wang ngöne la tane mekun celë, la köni ewekë hnei Iehova hna thingehnaean, nge ka acatrene la lapaune së. Ej e hnine la tusi Isaia 41:10: (1) Ce Iehova me easë, (2) Nyidrëti la Akötresi së, nge (3) Nyidrëti a troa xatua së.  Ka nyipiewekë la itre hna thingehnaeane * celë ke, tui Yoshiko, nyimutre la itre jol ka traqa koi së enehila. Ketre, kola ngazo catre trootro la fen. Ame itre xan, hna qanangazo angatr me cile koi angatr hnene la itre mus. Haawe, tro sa pane ce wang la köni ewekë hna thingehnaean.

4. (a) Nemene la pane ewekë hna thingehnaean, hne së hna troa ce wang? (Wange ju la ithuemacany.) (b) Nemene la aqane amamane Iehova la aliene hni Nyidrëti koi së? (c) Nge nemene la thangane lai?

⁴ Iehova a akeukawane la itre hni së, me hape: “The qou kö, ke ce ini me eö.” * Iehova a amamane laka, ce Nyidrëti me easë, la Nyidrëti a wangatrunyi së me hnimi së. Hanawang la aqane amamane Iehova la aliene hni Nyidrëti koi së. Öni Nyidrë: “Eö la hniminang, tro ni a atrunyi ’ö; nge hnenge hna hnimi ’ö.” (Is. 43:4) Pëkö ewekë e celë fen me e koho hnengödrai, ka atreine troa thapa la ihnimi Iehova kowe la itre ka mele nyipici koi Nyidrë. (Is. 54:10) Kola thue trengecatre së hnene la ihnimi Iehova me aqane imelekeu së me Nyidrë. Tro kö Iehova a thupë së, tune la aqane thupë Aberahama, enehmu i Nyidrë. Öni Iehova koi angeic: “The qou kö; ini la pete i eö.”—Gen. 15:1.

5-6. (a) Nemene la ka amamane ka hape, aja i Iehova troa xatua së troa cile kowe la itre jol? (b) Nemene la ini hne së hna xom qa ngöne la tulu i Yoshiko?

⁵ Aja i Iehova troa xatua së troa cile kowe la itre jol. Öni Nyidrëti kowe la nöje i Nyidrë: “E tro eö a trongëne la hnagejë, tro ni a ce me eö; nge eö a trongëne la ite hneopegejë, tha tro kö a kaca tranyi ’ö; e tro eö a tro nyipine la eë, tha tro kö a deuthi ’ö, nge tha tro kö eö a weli hnei ukahlokin.” (Is. 43:2) Kola hapeu la xötre celë?

⁶ Tha hnei Iehova kö hna qaja ka hape, tro Nyidrëti a xometrije la itre jol hne së hna cile kow. Öni Iehova, tha tro kö Nyidrëti a nue la “ite hneopegejë” ne la itre jol troa tranyi së. Ketre, tha tro kö la “ukahlokin” ne la itre itupath a akötrë së. Hnei Iehova hna  thingehnaean laka, tro kö Nyidrëti a ceme easë, me xatua së troa “trongëne” me cile kowe la itre jol. Nemene la hna troa kuca hnei Iehova? Nyidrëti a troa apatrene la xou së, matre tro palahi sa catr, ngacama kola thele troa humuthi së. (Is. 41:13) Hnei Yoshiko, lo hna qaja ha e caha hun, hna jelenyipicine lai. Önine la nekö i eahlo jajiny: “Eahuni a haine la aqane tingetinge i nenë. Öhne hi eahun laka, Iehova la ka hamë tingeting koi eahlo. Utihë la eahlo a mec, hnei eahlo palahi hna qeje Iehova me itre hnei Nyidrëti hna thingehnean, kowe la itre droketre me itre xaa ka wezipo.” Nemene la ini hne së hna xome qa ngöne la tulu i Yoshiko? Maine tro sa mejiune kowe la hna thingehnaeane hnei Akötresie ka hape, “Ce ini me eö,” haawe, tha tro hë sa xou, ngo tro pe sa cile catr ngöne la itre jol.

7-8. (a) Nemene la hnaaluene ewekë hna thingehnaeane hne së hna troa ce wang, nge nemene la aliene ej? (b) Pine nemene matre Iehova a qaja kowe la itretre Iuda ka po ka hape, ‘The hnehengazo menu kö’? (c) Nemene la hna qaja ngöne Isaia 46:3, 4, nge ka xatuane la nöje i Akötresie, matre tha tro kö angatr a xou?

⁷ Hanawang la hnaaluene ewekë hna qaja hnei Isaia. Kola hape: ‘The hnehengazo menu kö, ke ini la Akötresi ’ö.’ Nemene la aliene la trengewekë celë? Ame la atr ka ‘hnehengazo menu,’ tre, angeic “a goe hutrö ke, angeic a xou e traqa pi la ketre ewekë maine ketre atr ka troa akötrë angeic.” Kolo fe a qaja la “easa hnehengazon menune la ketre jol.”

⁸ Pine nemene matre Iehova a qaja kowe la itretre Iuda ka po e Babulona ka hape, tha tro kö angatr a ‘hnehengazo menu’? Atre hi Nyidrëti laka, tro angatr a xouene la itre atr e cili. Nemene la hnei angatr hna xouen? Ame ngöne la pune la 70 lao macatre ne po angetre Iuda, tro la trongene isi angetre Madai me Peresi a lepi Babulona. Iehova a troa nyijëne la trongene isi cili, matre troa thapa la nöje i Nyidrë qa Babulona. (Is. 41:2-4) Ame la kola dreng hnei angetre Babulona me itre xaa nöj laka, kola easenyi la itre ithupëjia me angatr, angatr a thele troa ithuecatrekeu, me hape: “Catepi.” Ketre, hnei angatr hna kuca la nyimu idrola me mejiune laka, tro itre ej a thupë angatr. (Is. 41:5-7) Ngo Iehova a aupune la hni angetre Iuda ka po, me hape: ‘Eö Isaraela hlueng, [the tune kö la itre ka lapa ezi eö] . . . The hnehengazo menu kö, ke ini la Akötesi ’ö.’ (Is. 41:8-10) Öni Iehova: “Ini la Akötesi ’ö.” Iehova a akeukawane la hni ne la itre hlue i Nyidrë. Tha hnei Nyidrëti kö hna thëthëhmi angatr. Nyidrëti la Akötresi angatr, nge angatre la nöje i Nyidrë. Öni Iehova koi angatr: “Tro ni a kapa . . . nge tro ni a amelen.” Celë hi itre trengewekë ka ithuecatre me ka akeukawane la hni ne la itretre Iuda ka po e Babulona.—E jë la Isaia 46:3, 4.

9-10. Pine nemene matre tha tro pi kö sa xou? Qaja jë la ketre ceitun.

⁹ Ame fe enehila, itre atr a hnehengazo menu ke, ngazo catre trootro hë la fen. Ketre, easa cile kowe la itre jol. Ngo tha tro pi kö sa xou. Iehova a qaja koi së ka hape: “Ini la Akötesi ’ö.” Pine nemene matre kola xatua së hnene la itre trengewekë celë, matre tha tro kö sa hnehengazo menu?

¹⁰ Hanawang la ketre ceitun: Jim me Ben e hnine la avio. Catrecatre la eny, nge kola enijëne la avio. Nyidroti a drenge la atre xomi avio a qaja ka hape: “Hnöthe catrëne ju la itre beletre i nyipunie. Kola troa ihnaihnai la  avio.” Kolo ha traqa la xou koi Jim. Ngo önine jë hi lai atre xomi avio: “The xou kö. Eni, pilot.” Jim a seseu ke, ame koi angeic, thatreine kö troa mejiune kowe la atre xomi avio. Ngo, angeic a öhne laka, tha xou i Ben kö. Jim a hnyingëne koi Ben, ka hape: “Hnauëne la eö a lapa thaup?” Kola nango nyima hnei Ben, me hape: “Kemeng la ka xomi avio! Maine tro eö a atre hnyawa la hna atreine kuca hnene la kemeng, tha tro hë eö lai a xou.”

11. Nemene la itre ini hne së hna xom qa ngöne la ceitune ne la lue atr ka xomi avio?

¹¹ Nemene la itre ini hne së hna xom qa ngöne la ceitune celë? Ceitu së hi me Ben laka, pëkö xou the së ke, atre Iehova hnyawa hi hne së, Keme së e koho hnengödrai. Xecie hnyawa koi së laka, tro kö Iehova a xatua së troa cile kowe la itre jol, ka troa traqa ngöne la pune la fene celë. (Is. 35:4) Ngacama kola xou la itre atr e cailo fen, ngo tha xou së fe kö ke, easa mejiune koi Iehova. (Is. 30:15) Easë pe a tui Ben, la easa qaja kowe la itre atr la itre kepin, matre ka loi e troa mejiune koi Akötresie. Tro hë lai a xecie koi angatr laka, Iehova a troa xatua angatr troa cile kowe la nöjei pengöne jol.

12. (a) Nemene la hnaakönine ewekë hna perofetan hne së hna troa ce wang? (b) Nemene la aliene la hna hape, “ime” i Iehova?

¹² Hanawang la hnaakönine ewekë hna perofetan hnei Isaia, hna hape: “Tro ni a aegöcatenyi ’ö ; he, tro ni a xatua eö.” Ase hë Isaia qejepegnöne la aqane tro Iehova a aegöcatrene la nöje i Nyidrë. Öni angeic: ‘Iehova a traqa fë la men ; nge tro la ime i nyidrëti a musi thatraqai nyidrëti kö.’ (Is. 40:10) Ame la aliene la hnaewekë hna hape, ‘im’ e hnine la Tusi Hmitrötr, tre, kola qaja  la men. Haawe, ame la kola hape, “tro la ime i [Iehova] a mus,” tre, kola amekunë së laka, trene mene Iehova Joxu. Hnene la mene i Nyidrë, matre Iehova a xatuane la itre hlue i Nyidrëti ekö. Nge Nyidrëti palahi a ithuecatre me thupëne la itre ka mejiune koi Nyidrë enehila.—Deu. 1:30, 31; Is. 43:10.

13. (a) Eue la ijine Iehova a aegöcatrenyi së? (b) Nemene la ewekë hna thingehnaean ka aegöcatrenyi së me hamë mejiune koi së?

¹³ Tha paatre kö la hnei Iehova hna ahnith amë. Ame la kola qanangazo së, öni Nyidrë: “Tro ni a aegöcatenyi ’ö.” Ame ngöne la itre xaa nöj, itre ithupëjia me easë a thele troa acilëne la huliwa ne cainöj me wathebone la itre huliwa ne la organizasio. E cili, tha tro kö sa xou. Ase hë Iehova thingehnaeane laka, tro Nyidrëti a aegöcatrenyi së me hamë mejiune koi së. Öni Nyidrë: “Pëkö ewekë hna kuca nyine ishi me [epun] hna troa ien.” (Is. 54:17) Kolo lai a amekunë së la köni ewekë ka sisitria.

14. Pine nemene matre tha sesëkötre kö së la kola qanangazo së hnene la itre ithupëjia me Akötresie?

¹⁴ Ame la hnapan, tre, kola xele ma wai së ke, easa xötrethenge Keriso. (Mat. 10:22) Ase hë Iesu perofetan ka hape, troa qanangazone la itretre drei nyidrë, ngöne la itre drai ne la pun. (Mat. 24:9; Ioane 15:20) Ame la hnaaluen, tre, hnei Isaia hna perofetane ka hape, tro la itre ithupëjia me easë a xele ma wai së, me thele troa humuthi së. Angatr a silitrengathoi së, me iaö së me axösisi së. (Mat. 5:11) Tha tro jë kö Iehova a sewe angatr troa huliwane la itre jiane isi cili, nyine akötrë së. (Efe. 6:12; Hna ama. 12:17) Ngo tha tro kö sa xou. Pine nemen?

15-16. (a) Nemene la hnaakönine ewekë nyine tro sa mekun, nge kola anyipicine tune kaa hnene la tusi Isaia 25:4, 5? (b) Nemene la aqane amamane hnene la tusi Isaia 41:11, 12, la pune kowe la itre ka akötrë së?

¹⁵ Ame la hnaakönin, tre, hnei Iehova hna qaja ka hape, “pëkö ewekë hna kuca nyine ishi” me easë “hna troa ien.” Tune la easa zae fene la ketre ngöne uma nge kola catrehnine  la wene, ketre tune fe, easa zae thei Iehova ngöne la kola ‘elëhni hnei angetre catre mek.’ (E jë la Isaia 25:4, 5.) Tha tro kö a huti la itre aqane iakötrë ne la itre ithupëjia me easë.—Is. 65:17.

¹⁶ Iehova fe a acatrene la mejiune së koi Nyidrë, ngöne la Nyidrëti a qaja amamane la ewekë ka troa traqa kowe la “angete elëhni” koi së. (E jë la Isaia 41:11, 12.) Ngacama catrehnine ju hë la iakötrë me isi ne la itre ithupëjia, ngo eje palahi la pune koi angatr: “Tro angat’ a kösë pëkö; troa pate la itete iwatratra me eö.”

17-18. (a) Nemene la aqane troa acatrene la mejiune së koi Akötresie, hnene la hne së hna e Tusi Hmitrötr? Qaja jë la ketre ceitun. (b) Nemene la aqane troa xatua së, e tro sa lapa mekune la topik ne la macatre 2019?

¹⁷ Easa acatrene la mejiune së koi Iehova, ngöne la easa atre Nyidrëti hnyawa. Nge tro sa atre Akötresieti hnyawa, e hne së hna e Tusi Hmitrötr me sine thel. Tusi Hmitrötr a qaja la aqane thupëne Iehova la nöje i Nyidrëti ekö. Celë hi ka acatrene la mejiune së laka, tro kö Nyidrëti a thupë së enehila.

¹⁸ Hanawang la ketre ceitune ka lolo hna hamën hnei Isaia, nge ka amamane la aqane thupë së hnei Iehova. Hnei Isaia hna aceitunë Iehova me ketre atre thupë mamoe, nge itre mamoe la itre hlue i Nyidrë. Öni Isaia göi Iehova: ‘Tro nyidëti a engëne la itre nekö i mamoe i nyidrë ngöne la lue ime i nyidrë, me xepi nyudreni ngöne la imano i nyidrë.’ (Is. 40:11) Ame la Iehova a xepaconyi së, Nyidrëti hi lai a thupë së me akeukawane la itre hni së. Aja ne la hlue ka nyipici me ka inamacane troa xatua së troa atreine cile kowe la itre jol. Celë hi matre, angatr a iëne la tusi Isaia 41:10, matre troa nyi taane la topik ne la macatre 2019. Önine la xötr: ‘The hnehengazo menu kö, ke ini la Akötesi ’ö.’ Lapa mekune jë la xötre celë ke, ej a troa aegöcatrenyi së ngöne la kola traqa la itre jol.