TANE MEKUN 5
Tro Huni a Ce Tro Me Nyipunie
“Tro huni a ce tro me nyipunie, ke ate hë huni laka thei nyipunie la Akötesie.”—ZAKA. 8:23.
NYIMA 26 Epuni Lai a Kuca Tun Koi Ni
MEKUN KA TRU *
Madrine catre la itre xaa mamoe (‘ala treen’) troa ce nyihlue i Iehova memine la itre hna iën (“atre Iudra”) (Wange ju la paragarafe 1-2)
1. Nemene la hnei Iehova hna qaja göne la hnedrai së?
HNEI Iehova hna perofetan göne la hnedrai së ka hape: “Troa xölehuje hnene la ala luepi [10] qa ngöne la ite qene hlapa asë, nge tro angat’ a xölehuje la pune la ixete ne la ate Iuda, me hape, ‘Tro huni a ce tro me nyipunie, ke ate hë huni laka thei nyipunie la Akötesie.’ ” (Zaka. 8:23) Ame la “ate Iuda,” tre, angeic a nyihatrene la itre hnei Akötresieti hna iën hnei uati hmitrötr. Itre hna hëne fe ka hape, “Isaraela i Akötresie.” (Gal. 6:16) Ame ‘la ala treen,’ tre, angatr a nyihatrene la itre ka mejiune troa mel epine palua e celë fen. Atre hi angatr laka, Iehova la ka iëne la itre trejin hna hën, nge angatr a madrin troa ce nyihlue i Akötresieti me angatr.
2. Nemene la aqane tro la ‘ala treen’ a ‘ce tro’ la itre hna iën?
2 Eje hi laka, thatre kö së la ëjene la nöjei trejin hna iën enehila, * ngo ijije hi tro la itre ka mejiune troa mel e celë fen, a ‘ce tro’ me angatr. Tune kaa? Öni Tusi Hmitrötr ka hape, tro la ‘ala treen’ a “xölehuje la pune la ixete ne la ate Iuda, me hape, ‘Tro huni a ce tro me nyipunie, ke ate hë huni laka thei nyipunie la Akötesie.’ ” Tusi Hmitrötr a qaja la ketre atre Iudra. Ngo ame la “nyipunie” tre, kola qaja la nyimu atr. Haawe, ame la atre Iudra cili, tre, angeic a nyihatrene la gurup ne la itre hna iën asë. Ame la itre xan tha hna iëne kö, tre, angatr a ce nyihlue i Iehova memine la itre hna iën. Ngo, atre hi angatr laka, tha hna musinë angatre kö hnene la itre hna iën ke, Iesu la joxu së.—Mat. 23:10.
3. Nemene la itre hnying hna troa sa ngöne la tane mekun celë?
3 Pine laka, hetrenyi palahi enehila la itre trejin hna iën, matre itre xan a hnying ka hape: (1) Nemene la aqane tro la itre trejin hna iën a sipu goeë angatre kö? (2) Nemene la aqane tro sa ujë kowe la itre ka xom la falawa me ije la waina ngöne la Drai Ne Amekunën? (3) Hapeu, tro kö sa seseu me hnehengazo e kolo palahi a elë la etrun ne la itre hna iën? Troa sa la itre hnying hnene la tane mekun celë.
AQANE TRO LA ITRE HNA IËN A ISA GOEË ANGATRE KÖ
4. Nemene la hna qaja ngöne 1 Korinito 11:27-29, nyine tro la itre hna iën a lapa mekun, nge pine nemen?
4 Loi e tro la itre hna iën a lapa mekun la hna qaja ngöne 1 Korinito 11:27-29. (E jë.) Nemene la aqane tro la ketre hna iën a xom la falawa me ije waina “ngo tha ijij” pe? Maine jë, hnei angeic hna xen la falawa me ije la waina ngo tha trongëne pe angeic la itre wathebo i Iehova. (Heb. 6:4-6; 10:26-29) Atre hi la itre hna iën laka, nyipiewekë tro angatr a mele nyipici, e aja i angatr troa kapa la “thupen, ene la ihë i Akötresie, ihë qa hnengödrai jëne Keriso Iesu.”—Fil. 3:13-16.
5. Nemene la aqane tro la itre trejin hna iën a isa goeë angatre kö?
5 Uati hmitrötre i Iehova a xatuane la itre hlue i Nyidrë troa hetre hni ne ipië, nge tha tro kö a pi tru. (Efe. 4:1-3; Kol. 3:10, 12) Celë hi matre, ame kowe la itre hna iën, tha sisitria kö angatr hune la itre xan. Atre hi angatr laka, ceitune hi la aqane amanathithi angatre hnei Iehova memine la itre xaa hlue i Nyidrë. Tha angatre kö a mekun laka, atrepengöne hnyawa kö angatr la Tusi Hmitrötr hune la itre xan. Ketre, tha tro angatre kö a qaja koi ketre ka hape, ketre hna iën angeic matre loi e tro fe angeic a xom la falawa me waina ngöne la Drai Ne Amekunën. Angatre pe a hetre hni ne ipië. Atre hi angatr laka, Iehova hmekuje hi la ka iëne la itre atr troa tro hnengödrai eë.
6. Thenge la 1 Korinito 4:7, 8, nemene la aqane tro la itre hna iën a ujë?
6 Ame kowe la itre hna iën, ketre manathith ka tru troa mel e koho hnengödrai. Ngo xele kö angatr troa atrunyi angatr. (Fil. 2:2, 3) Ketre, atre hi angatr laka, pëkö ka öhne la Iehova a ië angatr. Celë hi matre, tha sesëkötre kö la ketre hna iën, e tha mejiune kö itre xan koi angeic. Atre hi angeic la mekuna i Tusi Hmitrötr laka, tha tro kö a canga dreng la ketre atr ka qaja ka hape, hna acili hnëqa angeic hnei Akötresie. (Hna ama. 2:2) Tha ajane kö la itre hna iën troa pi tru. Celë hi matre, tha canga qaja kö angatr ka hape, itre hna iën angatr. Tha angatre kö a selë angatre kö.—E jë la 1 Korinito 4:7, 8.
7. Nemene la nyine tha tro kö a kuca hnene la itre hna iën, nge pine nemen?
7 Ame la itre hna iën, tha angatre kö a ce tro hmekuje hi memine la itre xaa hna iën, tune la ketre gurup. Tha angatre kö a thele la itre xaa trejin hna iën, matre troa ithanatane la mejiune i angatr, me iöhny matre troa ini Tusi Hmitrötr. (Gal. 1:15-17) Maine tro la itre hna iën a ujë tune lai, tha tro kö a caasi la ekalesia. Ketre aqane ujë lai ka icilekeu memine la uati hmitrötr ke, ej a xatuane la nöje i Akötresie troa mele tingeting me caas.—Rom. 16:17, 18.
AQANE TRO SA UJË KOWE LA ITRE HNA IËN
Tha tro kö sa atrune palaha la itre trejin hna iën, maine itre xaa trejin ka elemeken, kösë itre atr ka hlemu (Wange ju la paragarafe 8) *
8. Pine nemene matre tro sa thupëne la aqane ujë së kowe la itre hna iën? (Wange ju la ithuemacany.)
8 Nemene la aqane tro sa ujë kowe la itre trejin hna iën? Tha tro kö sa atrune palaha la ketre atr, ngacama ketre hna iëne ju hë. (Mat. 23:8-12) Tusi Hmitrötr a ithuecatre koi së troa ‘nyitipune la lapaune’ ne la itre qatre thup. Ngo tha hna qaja kö ka hape, tro sa acile la ketre atr troa musinë së. (Heb. 13:7) Eje hi laka, öni Tusi Hmitrötr, “tro kö a sisitria” la itre xan. Ngo tha hnene kö laka, itre hna iën angatr. Hnene pe laka, angatr a “musi aloin” me “huliwa catr göi troa cainöj me hamë ini.” (1 Tim. 5:17) Maine tro sa atrune palaha la ketre trejin hna iën, tro hë angeic a hmahma. * Maine pena, tro hë angeic a pi mama. (Rom. 12:3) Tha ajane kö së troa kuca la ketre ewekë, ka troa akeine la ketre trejine me Keriso, ketre hna iën!—Luka 17:2.
9. Nemene la aqane tro sa amamane laka, easa metrötrëne la itre hna iën?
9 Nemene la aqane tro sa amamane laka, easa metrötrëne la itre hna iën hnei Iehova? Tha tro kö sa hnyingë angatr la hnei angatr hna kuca, matre ië angatre jë. Tha tro kö sa thele troa lö hnine la mele i angatr. (1 Thes. 4:11; 2 Thes. 3:11) Ketre, tha tro kö sa mekun laka, hna iëne fe la itre föi angatr, me itre kem me thine i angatr, maine itre xaa atrene la fami angatr. Tha hna iëne kö la ketre atr hnene la fami angeic. Ngo ketre ahnahna lai qaathei Akötresie. (1 Thes. 2:12) Ketre, tro sa thupëne la aqane tro sa hnying, matre tha tro kö a akötrëne la itre xan. Tha tro kö sa hnyingëne kowe la föe ne la ketre hna iën, la pengöne la mele i eahlo elany ngöne la fene ka hnyipixe, nge paatre hë föi eahlo. Xecie hnyawa koi së laka, ame ngöne la fen ka hnyipixe, tro kö Iehova a “amejine la ite ewekë ka mele asëjëihë.”—Sal. 145:16.
10. Nemene la aqane tro sa thupën matre tha tro kö sa “haine la pengö i ketre”?
10 Tro fe sa kepe thangan qa ngöne laka, tha hne së kö hna atrune palaha la ketre hna iën. Tune kaa? Öni Tusi Hmitrötr ka hape, hetre itre xaa trejin hna iën ka troa kei. (Mat. 25:10-12; 2 Pet. 2:20, 21) Maine tha tro kö sa “haine la pengö i ketre,” tha tro hë sa xötrethenge la itre atr, ngacama itre hna iën, maine itre trejin hna atre hnyawa, maine itre ka hekö hë nyihlue i Iehova. (Iuda 16, ftn.) Maine tro angatr a tria me nuetrij la ekalesia, ngo tro palahi a catre la lapaune së koi Iehova, nge tro palahi sa catre nyihlue i Nyidrë.
TRO KÖ SA SESEU E KOLO PALAHI A ELË LA ETRUN NE LA ITRE HNA IËN?
11. Nemene la ka traqa kowe la etrune la itre hna iën?
11 Ame ekö, hna uti la etrune la itre trejin hna iën. Ngo ame hë enehila, kola elë trootro la etrune i angatr e nöjei macatre. Hapeu, tro kö sa seseu? Ohea. Tro sa ce wang la itre kepin.
12. Pine nemene matre tha tro kö sa seseu e kolo palahi a elë la etrune la itre ka xom la falawa me waina ngöne la Drai Ne Amekunën?
12 “Atre kö Iehova la itre atr i nyidrë.” (2 Tim. 2:19) Tha ceitui Iehova kö memine la itre trejin hna iën. Thatre kö angatr la itre hnei Iehova hna iën. Ame thene la itre ka xen me ije la waina ngöne la Drai Ne Amekunën, hetre itre xan hna tha iëne kö. Ame la itre xan e angatr, tha xome hmaca kö angatr la falawa me waina. Ame itre xan, tru catre la itre jole i angatr matre angatre ha mekun laka, angatr a troa ce musi me Keriso e koho hnengödrai. Eje hi, thatre kö së la etrune la itre hna iën ka mele palakö.
13. Tusi Hmitrötre kö a qaja la etrune la itre hna iën ka mel e celë fen qëmekene la akötr atraqatr?
13 Iesu a troa acasine la itre hna iën ka mel e cailo fen asë. (Mat. 24:31) Tha hnei Tusi Hmitrötre kö hna qaja ka hape, ame ngöne la itre drai hnapin, ala xalaithe pe hi la itre hna iën e celë fen. (Hna ama. 12:17) Tha hna qaja fe la etrune la itre hna iën ka mel e celë fen, ngöne la kola troa nyiqane la akötr atraqatr.
Nemene la aqane tro sa ujë, e ketre trejin a xom la falawa me waina ngöne la Drai Ne Amekunën? (Wange ju la paragarafe 14)
14. Thenge la Roma 9:11, 16, nemene la aqane iëne la itre hna iën?
14 Iehova la ka sa ijine troa iëne la itre hna iën. (Rom. 8:28-30) Hnei Iehova hna nyiqane iën la itre hna iën, thupene la kola bapataiso Iesu. Ame ngöne la hneijine la itre pane Keresiano, hna iën asë la itre Keresiano. Itre macatre thupen, hnene la itre xan hna qaja ka hape, itre Keresiano angatr ngo tha xötrethenge Iesu pe. Ame pe, hnei Iehova kö hna iëne la itre nyipi Keresiano. Tune lo hna qaja hnei Iesu, angatre hi la qitr ka cia nyipine la haö. (Mat. 13:24-30) Ame ngöne la itre drai hnapin, hnei Iehova palahi hna iëne la itre atr ka troa sine la ala 144 000. * Haawe, maine tro Akötresieti a iëne la itre xan qëmekene la pun, tha tro kö sa luelu. (E jë la Roma 9:11, 16.) * Tha tro kö sa ujë tune la itre hlu ngöne la ceitune hna hamën hnei Iesu. Hnei angatr hna eetr pine la aqane ujë ne la maseta kowe la itre ka nyiqane huliwa ngöne la hawa tixenuë.—Mat. 20:8-15.
15. Hapeu, itre hna iën asë hi la ka sine la “hlue ka nyipici me ka inamacan,” hna qaja ngöne Mataio 24:45-47? Qejepengöne jë.
15 Tha itre hna iën asë hi la ka sine la “hlue ka nyipici me ka inamacan.” (E jë la Mataio 24:45-47.) Ame enehila, Iehova me Iesu a upe la itre xaa trejin troa hamë xen, maine inine la ka alanyim. Ketre tune fe ngöne la hneijine la itre pane Keresiano, hnene la itre trejin hna iën, hna cinyihane la Itre Hna Cinyihan Qene Geres. Ala xalaithe hi la itre hna iën ka “hamë xeni ngöne la nyipi ijin” kowe la nöje i Akötresieti enehila.
16. Nemene la hna ini së hnene la tane mekun celë?
16 Nemene la hna ini së hnene la tane mekun celë? Hnei Iehova hna amekötin ka hape, alanyimu kö la itre hlue i Nyidrëti ka troa mel epine palua e celë fen. Nge ala xalaithe pe hi la itre ka troa mel e koho hnengödrai me ce musi me Iesu. Iehova a amanathithine la nöjei hlue i Nyidrë; itre hna nyihatren hnene lo “atre Iudra” memine lo itre hna nyihatren hnene la ka ‘ala treen.’ Ketre, Nyidrëti a ajane tro asë hi angatr a trongëne la itre wathebo i Nyidrë me mele nyipici. Nyipiewekë tro asë hi sa hetre hni ne ipië, me ce nyihlue i Nyidrë me caas. Loi e tro fe sa thele tingeting e hnine la ekalesia. Easenyi hë la pun, matre catre pi së nyihlue i Iehova me xötrethenge Keriso, tune la “ca hna axö mamoe.”—Ioane 10:16.
^ Ame ngöne la macatre celë, tro sa atrune la Drai Ne Amekunën la meci Keriso e Draiangedic 7 Eiperem. Nemene la aqane tro sa goeëne la itre ka xen la falawa me ije la waina ngöne la drai celë? Hapeu, tro kö sa seseu me hnehengazo, e kolo palahi a elë la etrune la itre hna iën? Celë hi itre hnying hna troa sa hnene la tane mekun celë, hna nyitrepene hnene la Ita Ne Thup ne Januare 2016.
^ Thenge la Salamo 87:5, 6, Akötresieti elany a troa qaja amamane la ëjene la itre ka troa ce musi Iesu e koho hnengödrai.—Rom. 8:19.
^ Wange ju la hna eköhagen hna hape, “‘Tha Thina Ka Qali Kö’ La Ihnim” ngöne la Ita Ne Thup ne Januare 2016.
^ Kola qaja ngöne Itre Huliwa 2:33 ka hape, kola hamëne la uati hmitrötr jëne Iesu. Ngo Iehova la ka iëne la ketre atr.
^ Maine epuni a aja itre xaa ithuemacany, tro jë kowe la “Questions des lecteurs” ngöne la Ita Ne Thup ne 1 Mei 2007, qene Wiwi.
NYIMA 34 Tro Jë Ngöne La Nyipici
^ ITRE IATR: Pane mekune jë laka, alanyimu la itre ka nyape troa xomi foto memine la ketre atrene la Lapa Ne Xomi Meköt me föe i nyidrë, ngöne la ketre asabele. Pëkö metrötre ne la itre ka ujë tune lai!
