1-2. Nemene la itre jol ka traqa kowe la itre xaa hlue i Iehova, nge nemene la pune koi angatr?

 HANAWANG la köni ceitun: Ame la hnapan, ketre droketre a qaja kowe la trejine thöth laka, hna tithi angeic hnene la ketre mec ka tru, nge troa hace catre trootro la mele i angeic. Ame la hnaaluen, hna upe la ketre trejin qa ngöne la hna huliwa, nge tha hna öhnyi huliwa hmaca kö. Ame la hnaakönin, thatreine hë la ketre trejine föe troa catre huliwa i Iehova ke, qatre hë eahlo.

² Maine jë, easa hane melëne la itre jol cili. E cili, easa mekun laka, tha ka nyipiewekë hë së. Kola paatre la madrine së nge easa wangaconyi së. Ketre, hetre ethane kowe la aqane imelekeu së me itre xan.

3. Nemene la aqane goeëne Satana memine la itre ka nyitipu angeic, la mele ne la itre atr?

³ Kola mama ngöne la fene celë la aqane goeëne Satana la mel. Hnei Satana palahi hna wangacone la itre atr. Hnei Satana hna thoi koi Eva ka hape, maine tro angeic a tha drei Akötresie, tro hë angeic a mele madrin. Atre hnyawa hi Satana laka, meci la pune kowe la itre ka tha drei Akötresie. Ketre, Satana la ka musinëne la itre musi e celë fen, tune la itre ka salem, me itre politik, me itre hmi. Tha sesëkötre kö së laka, itre atr ka trenamo, me itre ka kuci politik, me itre hene ne hmi a nyitipu angeic. Angatr a wangacone la itre atr, nge tha nyipiewekëne kö angatr la mele ne la itre atr.

4. Nemene la hne së hna troa ce wang ngöne la tane mekun celë?

⁴ Ame pena Iehova, Nyidrëti a nyipiewekë së me xatua së ngöne la easa cile kowe la itre jol me kucakuca. (Sal. 136:23; Rom. 12:3) Tro la tane mekun celë a amamane la aqane tro Iehova a xatua së ngöne la: (1) Kola tithi së  hnei mec, (2) easa cile kowe la itre jol göi manie, me (3) ngöne la easa uti ipië trootro me mekun laka, tha nyipiewekë hmaca kö së koi Nyidrë. Ngo tro sa pane ce wang la kepin matre ka nyipiewekë asë hi së koi Iehova.

5. Nemene la ka amamane laka, Iehova a wangatrune la itre atr?

⁵ Ngacama hna xupi së hnei dro, ngo sisitria catre kö së hune la dro. (Gen. 2:7) Hane hi la itre ewekë ka amamane laka, Iehova a wangatrunyi së. Hnei Nyidrë hna xup la atr hnaiji Nyidrë, matre ijije hi tro sa xom la itre thiina i Nyidrë. (Gen. 1:27) Celë hi matre, sisitria catre kö la atr hune la itre xaa ewekë hna xup. Ketre, hnei Iehova hna upi së troa thupëne la ihnadro memine la itre öni.—Sal. 8:4-8.

6. Nemene la itre xaa ewekë ka amamane laka, Iehova a wangatrune la itre atr ngacama ka tha pexeje kö së?

⁶ Ngacama hna tria hnei Adramu, ngo Iehova palahi a wangatrune la itre atr. Hnei Nyidrëti hna upi Iesu, Nekö Hnimina i Nyidrë, troa meci pi së. (1 Ioane 4:9, 10) Jëne la thupene mel, Iehova a troa amelene hmaca la itre ka mec, “itre atre ka meköt, me ka tha meköti kö.” (Itre hu. 24:15) Tusi Hmitrötr a amamane laka, ngacama tha tru kö hnei mo së, maine easa kucakuca, maine pena easa uti ipië trootro, ngo Iehova palahi a wangatrunyi së.—Itre hu. 10:34, 35.

7. Nemene la itre ewekë ka amamane laka, Iehova a wangatrune la itre hlue i Nyidrë?

⁷ Nyimutre la itre ewekë ka amamane laka, ka nyipiewekë së koi Iehova. Nyidrëti la ka ee së koi Nyidrë, nge öhne hi Nyidrëti la aqane kapa së la maca ka lolo. (Ioane 6:44) Ame la easa easenyi koi Iehova, Nyidrëti a easenyi koi së. (Iako. 4:8) Ketre, Iehova a nue ijin me trengecatr matre troa ini së. Atre hi Nyidrëti la pengö së enehila, nge atre hi Nyidrëti laka, ijiji së hi troa macaje trootro. Nyidrëti a ameköti së ke, Nyidrëti a hnimi së. (Ite edomë 3:11, 12) Eje hi, Iehova a wangatrunyi së!

8. Nemene la hna qaja ngöne Salamo 18:27-29 göne la aqane tro sa goeëne la itre jole së?

⁸ Alanyimu la itre ka wangaconyi Dravita Joxu. Ame pe, xecie hnyawa koi angeic laka, tro kö Iehova a hnimi angeic me xatua angeic. Ngo hetre ethane koi angeic la aqane mekun ne la itre xan. (2 Sam. 16:5-7) Ngacama easa kucakuca me cile kowe la itre jol, ngo tro kö Iehova a xatua së troa saze aqane mekun, me elë hune la jol. (E jë la Salamo 18:27-29.) Maine tro Iehova a xatua së, pëkö ka atreine troa thapa la madrine së troa nyihlue i Nyidrë. (Rom. 8:31) Tro sa ce wang la köni jol ka traqa, memine la enyipiewekëne la troa mekun laka, Iehova a hnimi së.

9. Nemene la mekuna së ngöne la kola tithi së hnei mec?

⁹ Ame la easa wezipo, kola hetre ethane kowe la itre aliene hni së. Easa mekun laka, tha nyipiewekë hmaca kö së. Ketre, easa hmahma pine laka, itre xan a öhne la jol ka eje the së nge easa aja ixatua. Ame itre xan, thatre kö angatr laka, easa wezipo. Ngo easa hmahma ke, thatreine hë së kuca la itre xaa ewekë. Ame ngöne la itre ijine jol, Iehova a ithuecatre koi së. Tune kaa?

10. Thenge la Ite Edomë 12:25, nemene la ka troa xatua së ngöne la easa wezipo?

 ¹⁰ Ame la easa wezipo, ijije hi troa ithuecatre koi së hnene “la tenge ewekë ka loi.” (E jë la Ite Edomë 12:25.) Ame ngöne la Tusi Hmitrötr, Iehova a amamane laka, Nyidrëti a wangatrunyi së ngacama easa wezipo. (Sal. 31:19; 41:3) Maine tro sa e lapane la itre trengewekë i Akötresie, tro hë Nyidrëti a xatua së troa thipetrij la itre mekun ka ngazo.

11. Nemene la aqane xatuane la ketre trejine thöth hnei Iehova?

¹¹ Hanawang la hna melën hnei Jorge, ketre thöth. Hna tithi angeic hnene la ketre mec ka hace catr. Angeic a mekun laka, tha nyipiewekë hmaca kö angeic. Öni Jorge: “Eni a hmahma ke, itre xan a goeë ni. Kola ngazo trootro la mecing, matre eni a mekun la aqane troa saze la meleng. Pëhë madrineng, nge hnenge hna xëwe koi Iehova troa xatua ni.” Nemene la aqane xatua Jorge hnei Iehova? Öni angeic: “Thatreine hë ni hnehen la itre mekun, matre hnenge hna e lapane la itre xötr ngöne Salamo, ka amamane la etrune la ihnimi Iehova kowe la itre hlue i Nyidrë. Celë hi la ka xatua ni. Ame itre xaa ijin, itre xan a öhn laka, eni a hnyimahnyima. Öni angatr ka hape, kola ithuecatre koi angatr la angatr a öhn laka, eni a madrin. Eje hi, Iehova a sa la itre thithing! Hnei Nyidrëti hna xatua ni troa saze la aqane mekuneng. Eni a lapa mekun la itre hna qaja hnei Tusi Hmitrötr göne la aqane goeë ni hnei Iehova. Tha hnehengazone menune hë ni la mecing.”

12. Nemene la aqane xatuane Iehova, la itre hna tithi hnei mec?

¹² Maine hna tithi së fe hnei mec, tha  tro kö sa thëthëhmine laka, trotrohnine hi Iehova la jole së. Sipone jë koi Nyidrë troa xatua së troa saze la itre mekuna së me madrin. Thele jë e hnine la Tusi Hmitrötr la itre mekune i Iehova ka ithuecatr. Lapa mekune jë la itre xötr ka amamane la etrune la ihnimi Iehova kowe la itre hlue i Nyidrë. Tro hë sa öhn laka, Iehova a hnime la itre ka mele nyipici.—Sal. 84:11.

13. Nemene la mekuna ne la ketre kem, e hna upi nyidrë qa ngöne hna huliwa?

¹³ Itre hene hnepe lapa a ajane troa thupëne la fami angatr. Ngo tune kaa e hna upe la ketre trejin trahmany qa ngöne hna huliwa, nge pë pe nyipi kepin? Ngacama hnei nyidrëti hna catre thel la ketre huliwa, ngo pëkö huliwa hna öhn. Maine jë, tro nyidrëti a mekun laka, tha nyipiewekë hmaca kö nyidrë. Nemene la aqane tro Iehova a xatua nyidrë?

14. Pine nemene matre Iehova a eatrëne la itre hnei Nyidrëti hna thingehnaean?

¹⁴ Iehova a eatrëne la itre hnei Nyidrëti hna thingehnaean. (Ios. 21:45; 23:14) Nyimutre la itre kepin matre Nyidrëti a ujë tune lai. Ame la hnapan ke, troa hetre thangane kowe la ëje i Nyidrë. Hnei Iehova hna qaja ka hape, tro Nyidrëti a xatuane la itre hlue i Nyidrë ka mele nyipici. Thatreine kö tro Nyidrëti a triane la hnei Nyidrëti hna qaja. (Sal. 31:1-3) Ketre, atre hi Iehova laka, tro së lai a hleuhleu e pëkö ixatua i Nyidrëti kowe la itre sipu atrene la fami Nyidrë. Öni Nyidrë ka hape, tro Nyidrëti a thupë së me hamë së la ka nyipiewekë, me xatua së troa mele nyipici. Pëkö ka atreine  sewe Nyidrë troa eatrëne la aja i Nyidrë!—Mat. 6:30-33; 24:45.

15. (a) Nemene la jol ka traqa kowe la itre pane Keresiano? (b) Nemene la aqane xatua së hnene la hna qaja ngöne Salamo 37:18, 19?

¹⁵ Loi e tro sa mekun la itre kepin matre Iehova a eatrëne la itre hnei Nyidrëti hna qaja. Tro hë lai a xecie koi së laka, tro kö Nyidrëti a xatua së ngöne la easa cile kowe la itre jol göi manie. Hanawang la tulu ne la itre pane Keresiano. Ame lo kola icilekeu memine la ekalesia e Ierusalema, “hnene la nöjei keresiano, ngo tha itre aposetolo fe kö, hna kötr.” (Itre hu. 8:1) Hnei angatr hna cile kow la itre jol göi manie! Hna thapa la itre uma me itre huliwa ne la itre Keresiano. Ngo tha hnei Iehova kö hna nuaxöji angatr, ngacama pëhë madrine i angatr. (Itre hu. 8:4; Heb. 13:5, 6; Iako. 1:2, 3) Hnei Iehova hna xatuane la itre pane Keresiano ekö, nge tro fe Nyidrëti a xatua së enehila.—E jë la Salamo 37:18, 19.

16. Pine nemene matre easa mekun e itre xaa ijin laka, tha tru hë la itre hne së hna hamën koi Iehova?

¹⁶ Ame la easa uti ipië trootro, easa mekun laka, tha tru hë la itre hne së hna hamën koi Iehova. Celë fe hi la hna melën hnei Dravita joxu ngöne lo nyidrëti a qatr trootro. (Sal. 71:9) Nemene la aqane tro Iehova a xatua së?

17. Nemene la hna ini së hnene la tulu i Jheri?

¹⁷ Hanawang la ceitune i Jheri, ketre trejine föe. Hna hë eahlo troa sine la formation göi huliwa ne nyidrawa uma, ngöne la Uma Ne Baselaia. Ngo tha aja i eahlo kö troa hane sin. Öni eahlo: “Qatre hë ni, nge meci hë la föeng. Ketre, pëkö hnenge hna atreine kuca ngöne la huliwa  cili. Tha nyipiewekë hmaca kö ni.” Ame lo jidr qëmekene la formation, hnei eahlo hna fe la hni eahlo koi Iehova ngöne la thith. Ame lo eahlo a traqa ngöne la Uma Ne Baselaia, ka luelu palahi eahlo. Ame ngöne la porogaram, önine la ketre trejin ka hape, ame la ka nyipiewekë, tre, troa nue Iehova troa ini së. Öni Jheri: “Ajange fe hi lai! Hnenge hna treij ke, Iehova a sa lo thithing. Nyidrëti a ithuecatre koi ni ka hape, ka nyipiewekë fe ni, nge Nyidrëti a troa xatua ni troa huliwa!” Jheri a mekun la ewekë cili me hape: “Ame lo eni a traqa ke, eni a xou me luelu. Ngo ame e thupen, eni ha madrin me catrecatr, nge öhne ju hi ni laka, ka nyipiewekë fe ni!”

18. Nemene la aqane amamane Tusi Hmitrötr laka, Iehova a wangatrune la huliwa së ngacama qatre hë së?

¹⁸ Ngacama qatre hë së, ngo hetre huliwa së palahi qaathei Iehova. (Sal. 92:12-15) Öni Iesu ka hape, ngacama co hi la itre hne së hna atreine kuca, ngo ka nyipiewekë asë hi la itre hne së hna kuca koi Iehova. (Luka 21:2-4) Haawe, loi e tro sa kuca asë la hne së hna atrein. Maine jë, tro sa qeje Iehova, me thithi sane la itre trejin, me ithuecatre kowe la itre xan troa mele nyipici. Ame koi Iehova, easë hi lai a catre huliwa, tha hnene kö la etrune la itre hne së hna kuca, ngo hnene pe la aja së troa drengethenge Nyidrë.—1 Kor. 3:5-9.

19. Nemene la mejiune hna hamën ngöne Roma 8:38, 39?

¹⁹ Madrine catre së troa nyihlue i Iehova, Akötresie ka wangatrune la itre hlue i Nyidrë! Hnei Nyidrëti hna xupi së matre troa kuca la aja i Nyidrë. Nge easa mele madrin ngöne la easa nyihlue i Nyidrë. (Hna ama. 4:11) Ngacama kola wangaconyi së hnene la fen, ngo tha celë kö la aqane goeë së hnei Iehova. (Heb. 11:16, 38) Ame itre xaa ijin, easa kucakuca ke, hna tithi së hnei mec, maine hetre jole së göi manie, maine pena easa uti ipië trootro. Ngo tha tro kö sa thëthëhmin laka, pëkö ka atreine thepe së qa ngöne la ihnimi ne la Keme së e koho hnengödrai.—E jë la Roma 8:38, 39.