Ame Harvey ke, köni trejin me angeic trahmany, nge angeic la nekön haetra. Hnene la fami angeice hna atre la nyipici e Midland Junction, e Australie-Occidentale ngöne la kola jole la nöj göi mani lo itre macatre 1930. Hnei angeice hna acatrene la ihnimi angeic koi Iehova me xomi bapataiso lo angeic a 14 lao macatre. E cili, hnei angeic hna inine tro palahi a kapa la itre hnëqa hna ahnithe koi angeic e hnine la ekalesia. Ame ngöne la angeic a nekötrahmanyi hnene la ketre trejin hna upi angeic troa e la Ita Ne Thup. Ngo tha hnei angeice kö hna kapa, ke ame koi angeic, thatreine kö angeic. Ngo hnene lai trejin hna xatua angeic me hape: “Maine tro la ketre trejin e hnine la organizasio i Iehova a qaja koi eö troa kuca la ketre ewekë, ke kapa ju. Kolo hi lai a amamane laka, angeice a mejiune koi eö.”—2 Kor. 3:5.

Hnenge hna atre la nyipici e Angleterre me nenë memine la mamang. Hnei kaka hna kapa la nyipici e thupen. Ame lo xötrei, hnei nyidrëti hna icilekeu ke, xele kö nyidrëti tro eni a huliwa koi Iehova. Ngo hnenge hna xomi bapataiso lo eni a 9 lao macatre. Ame la ajang, ke troa xome la huliwa ne pionie me mesinare. Ame pe, tha ajane  kö kaka tro ni a pionie e tha 21 palakö lao macatreng. Tha aja i eni kö troa treqene la macatre cili. Ame lo kola 16 lao macatreng, hnenge hna fek a tro Australie me lapa memine la mamang. Ame hë la kola 18 lao macatreng, hnenge hna xome la huliwa ne pionie.

Ame e Australie, hnenge han iöhnyi me Harvey. Nyio asë hi a ajane troa mesinare. Hnei nyio hna faipoipo lo 1951. Hnei nyio hna pane ce xome la huliwa ne pionie koi lue macatre, nge thupene lai hna hë nyio troa xome la huliwa ne thupëne la sirkoskripsio. Ame la sirkoskripsio i nyio tre, ej e Australie-Occidentale, ke tre götrane ka tru. Celë hi matre, hnei nyio hna trongëne la itre gojenyi ka qeadridri matre troa cainöje ngöne la itre götrane gaa hedredrei me gaa nany.

Ame lo 1954, hna könë eni me Harvey troa sine la hna 25 lao ini Gileada. Kola aejëne la aja i nyio troa mesinare. Celë hi matre, hnei nyio hna ti he a tro Neweyok. Ame e cili hnei nyio hna catre inin me sine ajuine la Tusi Hmitrötr. Ketre, nyio fe a hane inine troa qene Espagnol, ngo jole koi Harvey ke, thatreine kö nyidrëti troa qaja hnyawa lo mataitus “r.”

Ame fe ngöne la ini cili, kola thuemacanyi hun laka, maine aja huni troa cainöj elany e Zapo ke, ijije hi tro huni a hane inine troa qene Zapo. Ngo hnei nyio hna nue la organizasio Iehova troa iën la götrane hnë tro nyio a cainöj. Thupene lai, hnei Albert Schroeder ketre atre hamë ini hna hamë eamo koi nyio me nue ijine koi nyio troa pane axecië mekun. Hnei nyidrëti hna öhn laka, tha hnei nyio kö hna sija la lue ëje i nyio. Pine laka, luelue palakö nyio, öni nyidrë: “Hnenge memine la itre xaa ka hamë ini hna sija la lue ëje i epon, nge ka loi e tro epon a ini qene Zapo.” Eje hi, tha jole kö koi Harvey troa inine me qaja hnyawa la qene Zapo.

Hnei nyio hna fek a tro Zapo lo 1955. Hetrenyi la 500 lao ka cainöj e cili. Nge 26 lao macatre i Harvey nge ame ni, ke 24. Hnei nyio hna mesinare e Kobe, ketre götrane hna xep hnei he. Hnei nyio hna lapa e cili koi 4 lao macatre. Thupene lai, hna upi nyio pena troa xome la huliwa ne thupëne la sirkoskripsio e Nagoya. Madrine catre nyio ke, lolo la thiina ne la itre trejin memine la xen. Ngo hnei nyio hna inine troa kuca la aja i Iehova.

Kola traqa koi köni macatre ne nyio a xome la huliwa ne thupëne la sirkoskripsio. Nge  hnene la filial ne Zapo hna sipo nyio troa cainöj kowe la itre atr ka qene Amis e Taïwan. Ame la itre xaa trejin ka qene amis ke, itre ka iamenumenu hë angatr. Celë hi matre, hnene la filial ne Taïwan hna sipone matre troa upe la ketre trejin ka qene Zapo * hnyawa me nyinyine la jol e cili. Ka nyipiewekë catre koi nyio la huliwa i nyio e Zapo, matre jole koi nyio troa canga kapa. Ngo hnei Harvey hna inine troa kapa la nöjei hnëqa hna ahnithe koi angeic. Celë hi matre, hnei nyio hna fek a tro Taïwan.

Nyio a traqa e Taïwan lo Nofeba 1962, nge 2 271 lao ka cainöj e cili, nge ka qene Amis. Eje hi, hnei nyio hna pane inine troa qene Chinois. Ngacama pëkö itus nge tha qene papale kö la ka ini nyio troa qene Chinois, ngo atreine hë nyio.

Thupene la nyio a traqa e Taïwan, hna acili Harvey troa hane huliwa ngöne la ketre neköi filial. Ngo ijije hi tro Harvey a eatrëne hnyawa la itre hnëqa i nyidrë me huliwa koi köni wiik ngöne la treu memine la ekalesia ka qene Amis. Ame itre xaa ijin, nyidrëti a xome la hnëqa ne atre thupëne la distrik, matre hnei nyidrëti hna hane cile fë la itre cainöj ngöne la itre asabele. Maine ju tro Harvey a ujën qene Zapo la itre cainöj matre troa trotrohnine hnene la itre trejin ka qene Amis. Ngo hnene la itre musi hna amekötine laka, tro la itre hmi a qene Chinois. Nyipici laka, nango jole palakö koi Harvey troa qene Chinois, ngo hnei nyidrëti hna cile fë la itre cainöje i nyidrë nge kola ujën hnene la ketre trejin qene Amis.

Ame e Taïwan ke, ketre nöje hna musinën hnei itre sooc. Maine kola ajane hnene la itre trejin troa asabele, loi e troa pane sipon. Ame itre xaa ijin, tha hnei angatre kö hna canga nue la itre trejin, nge ketre tune fe la itre polis. Maine ame ngöne lai wiik ne asabele kolo palahi a itreqe hnene la itre trejin. E cili, hnei Harvey hna tro kowe la itre biero ne polis uti hë la kola hamëne lai pepa. Kola hmahma hnene la itre polis troa goeëne la ketre trenyiwa ngöne la itre biero i angatr.

Ame la nyio a lapa caa wiik memine la ketre ekalesia, ke ca hawa ne huni a tro matre troa traqa ngöne la teritoar. Eahuni a trongëne la itre hneopegejë me elë hune la itre wetr. Mekune palahi ni la eni a xötrei tro e cili. Thupene la hne huni hna iji trii nyimenyime, hne huni hna xomi kar lo 5h30 e hmakany matre troa tro kowe la ketre tribu gaa nany. Hne huni hna trongëne la ketre hneopegejë me elë hune la ketre wetr. Meköti palaha la hna ut, matre eni hnyawa a goeëne la lue caa ne la trejin ka tro pa.

Ame lai hmakanyi hnei Harvey hna ce cainöj memine la itre trejin trahmany, nge hnenge hna tro caasi me cainöje kowe la itre atrene lai neköi tribu ka qene Zapo. Ame hë la kola 1h e hnaipajö, eni a nango kucakuca pine laka, tha hnenge kö hna xen. Ame hë la eni a itronyi me Harvey ke koilo hë la itre trejin. Hnei Harvey hna hamëne la itre xaa itusi së nge hnene lai atr hna hamën la köni wene wakuja. Hnei nyidrëti hna amamai eni la aqane troa öni. Hnei nyidrëti hna kuca la ketre gaa xulu me fuluthe la alien. Ngacama tha ajane kö ni, ngo hnenge pe hna nyitipu nyidrë. Ngo drei la ka troa öni la hnaakönine  wakuja? Eni, pine laka, xele kö Harvey troa xatua ni e traqa ju ni kei ngöne la eni a uti hmaca.

Hetre ewekë ka traqa koi ni ngöne la asabele ne sirkoskripsio. Hnei nyio hna lapa thene la ketre trejin ka lapa ezine la Uma Ne Baselaia. Ame koi angetre Amis, ka nyipiewekë la aqane troa si, matre hnene la föe ne la atre thupën la sirkoskripsio hna hnëkëne lai. Pine laka, hetre huliwa i Harvey, hnei nyidrëti hna upi ni troa sie pa. Nge hetrenyi la köni trap laka, caa trapë tim ka lepany, caa trapë tim ka idreuth, nge caa trap ka pë alien. Eni a sesëkötre ke, hnene lai föe ne la atre thupën la sirkoskripsio hna amë la itre itrap cili e tröne la uma. Ame la itre ka traqa troa hnëkëne la asabele ke, ijije hi tro angatr a öhnyi ni e sie. Hnenge hna sipo eahlo la ketre imano, ngo hnei eahlo hna traqa fë la ketre ibaci ka hmelele. Ngo hnenge hna sipon matre troa amë la hnë sie e kuhu tröne la uma, matre tha tro kö a öhnyi ni. Ame pe, eni a sesëkötre la kola goeë ni hnene la itre waco ka tru me ka wië, ceitu me itre drak. Itre waco ka ihej e tro sa easenyi catr. Celë hi matre, öning: “Tru la huliwa ne la itre trejin matre tha tro kö angatre lai a öhnyi ni. Nge maine tha tro kö ni a sie, tha tro kö lai a dreng akötrëne hnene la lue trefën ka kepe nyio.” Ngo ame pe, hnenge hna sie.

Hnei Harvey hna öhne laka, tha kökötre kö la itre trejin ngöne la götrane u. Hnene laka, thatreine kö angatr e nge pëkö itre itusi qene Amis. Celë hi matre, hnei nyidrëti hna inine la itre trejin troa e qene Amis. Eje hi, ngacama nyimutre la itre trengecatre hna nue ngo hetre thangane catr. Atreine hë la itre trejin troa ketre sipu inine la Tusi Hmitrötr. Ketre, hna ujëne la itre itusi qene Amis ngöne la pune la itre macatre 1960. Nge kola nyiqaane fejane la Ita Ne Thup ngöne qene Amis lo 1968.

Ngo hna wathebone hnei musi troa hamëne la itre itus ngöne la itre xaa qene hlapa, ngo qene Chinois hmekuje hi. Celë hi matre, ame la Ita Ne thup qene Amis ke, ketrepengöne la aqane fejan. Hna fejan ngöne caa götrane qene Amis nge qene Chinois ngöne ketre. Kola mekun hnene la itre atr laka, eahuni a ajane troa ini itre xan troa qene Chinois. Qaane ju hi lai, hnene la organizasio i Iehova hna fejan la itre itusi qene Amis matre troa xatuane la itre ka qaja la qene  hlapa cili troa atre la itre nyipici qa hnine la Tusi Hmitrötr.—Itre hu. 10:34, 35.

Ame ngöne la itre macatre 1960 koi 1970, alanyimu la itre trejin ka qene Amis ka tha trongëne kö la itre trepene meköti Akötresie. Pine laka, tha trotrohnine kö angatr la itre xaa trepene meköt, matre itre xan a kuca la itre huliwa ka sis me iji atrunyi la kahaitr me hucë wene pama me ufi tepek. Hnei Harvey hna xatuane la itre trejin troa trotrohnine la mekuna i Iehova göne la itre ewekë cili. E cili, hna traqa lo udreli hnenge hna qaja ekula.

Hnene la itre xaa trejin hna hetre hni ne ipië me saze. Ngo ame pë hë la itre xan hnei angatr palahi hna kuca la itre huliwa ka sis. Celë hi matre, ame ngöne la 20 lao macatre, ame lo 2 450 nge hetre munën ka cainöj ke, kola uti koi 900. Eahuni a hleuhleu me akötr. Ame pe, atre hnyawa hi hun laka, tha tro kö Iehova a amanathithine la organizasio ka kuca la itre huliwa ka sis. (2 Kor. 7:1) E cili, hna ahmitrötrëne hmaca la itre ekalesia. Nge jëne la ixatua i Iehova, ame enehila, ase hë sasaithe la 11 000 lao itre ka cainöj.

Qaane lo itre macatre 1980, lolo me tingeting e hnine la itre ekalesia. Hetre ijine i Harvey hë troa catre huliwa thatraqane la itre teritoar ka qene Chinois. Madrine catre nyidrë ke, hnei nyidrëti hna ini tusi memine la itre trahmanyi ne la itre trejin föe. Öni Harvey ka hape, tru la madrine i nyidrë ke, hnene lai ketre trahmanyi hna xötrei hane thithi koi Iehova! Ketre tunge fe, eni a madrin, ke nyimutre la itre atr hnenge hna xatuane troa easenyi koi Iehova. Eni fe huliwa ngöne la Bethela e Taïwan memine la nekön trahmanyi me jajiny ne la itre ka ini tusi me eni ekö.

Ame enehila, meci hë la föeng. Ame lo 1 Januare 2010, hna mecitriji ni hnei Harvey ke hna tithi nyidrëti hnene la ketre meci ka pë nyin. Traqa koi 59 lao macatre ne faipoipo i nyio. Nge 60 lao macatre ne nyio a ce huliwa i Akötresie ngöne la drai ka pexej. Nyipici, thatreine kö ni thëthëhmi nyidrë, ngo eni a madrin ke hnenge hna ce cainöj me nyidrë ngöne la lue nöj hnei nyio hna tro ngön. Hnei nyio hna inine troa qaja me cinyanyi ngöne la lue qene hlapa e Asie, ngacama tha ka hmaloi kö.

Itre macatre thupen, hnene la Lapa Ne Xomi Meköti hna ithuecatre koi ni troa bëek e Australie ke, eni ha uti ipië trootro. Hnenge hna pane qaja ka hape: “Xele ni troa fek qa Taïwan.” Ngo hnei Harvey palahi hna ini ni troa drengethenge la hna qaja hnei organizasio. Tha eni kö a ajane troa tha idrei enehila! Thupene lai, eni a trotrohnine laka, ka inamacane la aqane axecië mekune i organizasio.

Ame enehila, eni a huliwa ngöne la Bethela e Australasie ngöne la wiik, me ngöne la ekalesia ngöne la pune wiik. Ame ngöne la Bethela, eni a madrin troa kapa la itre atr ka qene Zapo me Chinois. Ngo eni a lapa treqene la ijine melehmaca. Xecie koi ni laka, ka mel Harvey, lo ka inine troa kuca palahi la aja i Iehova ngöne la mekuna i Nyidrë.—Ioane 5:28, 29.