TANE MEKUN 3
Kola Atrunyi Iehova Me Iesu Hnene La Ka Alanyimu Atraqatr
“Mele ju kö hun jëne la Akötresi hun, atre lapane la theron, me jëne la Neköi Mamoe.”—HNA AMA. 7:10.
NYIMA 14 Atrune Jë La Joxu Ka Hnyipixe Ne La Ihnadro
MEKUN KA TRU *
1. Nemene la thangane la cainöj hna cile fë lo 1935 kowe la ketre nekötrahmany?
HNENE la ketre nekötrahmanyi hna xomi bapataiso lo 1926, nge 18 lao macatre i angeic. Itretre Ini Tusi Hmitrötr la kem me thine i angeic. Celë hi aqane hën la Itretre Anyipici Iehova ekö. Hnei nyidroti hna inine la köni neköi nyidroti trahmany me lue jajiny troa nyihlue i Iehova me nyitipu Iesu Keriso. Ame e nöjei macatre, hnene lai nekötrahmanyi hna xom la falawa me ije la waina ngöne la Drai Ne Amekunën, tune la itre xaa Itretre Ini Tusi Hmitrötr. Ngo hna saze la aqane waiewekë i angeic hnene la cainöj hna hape, “Ka Alanyimu.” Hnei Joseph Rutherford hna cile fë la cainöj cili lo 1935, ngöne la asabele e Washington (Etazini). Nemene la hna amamane ngöne la asabele cili?
2. Nemene la hna amamane ngöne la cainöje i trejine Rutherford?
2 Ame ngöne lai cainöj, hnei trejine Rutherford hna amamane la itre ka troa sine la ka “ala nyimu atraqatr” hna qaja ngöne Hna Amaman 7:9. Ame ekö, easa mekun laka, kolo itre ka tha mele nyipici kö koi Akötresie, ngo ka troa mele fe e hnengödrai, tune la itre hna iën. Ngo jëne la Tusi Hmitrötr, hnei trejine Rutherford hna amamane laka, ame la ka alanyimu atraqatr, tre, kolo itre xaa mamoe * i Keriso ka xulu qa ngöne la “akötr atraqatr.” Tha tro kö angatr a elë e hnengödrai, ngo tro pe angatr a mele palua e celë fen. (Hna ama. 7:14) Öni Iesu: “Hetre itre xa mamoenge kö, ngo tha sine kö nyudreni la hnë axö mamoe celë; ngo loi e tro fe ni a alö nyudren, nge tro nyudreni a drenge la aqane ewekëng, nge tro hë nyudren a ca hna axö mamoe, nge tro hi a ca atre thup.” (Ioane 10:16) Eje hi, kola qaja la Itretre Anyipici Iehova ka mejiune troa mele palua ngöne la Paradraiso e celë fen. (Mat. 25:31-33, 46) Tro sa ce wang la thangane la ithuemacany celë ka hnyipixe, kowe la itre hlue i Iehova tune lo nekötrahmany.—Sal. 97:11; Ite edomë 4:18.
KETRE ITHUEMACANY KA HNYIPIXE A SAZE LA AQANE WAIEWEKË NE LA KA ALANYIM
3-4. Ame ngöne la asabele ne 1935, nemene la hna trotrohnine hnene la itre thauzane lao trejin göne la mejiune i angatr?
3 Ame ngöne la cainöj, hnei trejine Rutherford hna qaja kowe la itre atr ka hape: “Kola sipone kowe la itre ka mejiune troa mele palua e celë fen troa cil.” Önine la ketre atrene la icasikeu ka hape, alanyimu catre kö la itre ka cil. Öni trejine Rutherford: “Hanawang la ka alanyimu atraqatr!” E cili, kola xexe hnene la itre atrene la icasikeu. Trotrohnine hë la itre ka cil laka, tha hna ië angatre kö hnene la uati hmitrötre i Akötresie, matre troa mel e hnengödrai. Ame la drai thupen, 840 lao atr ka xomi bapataiso. Nge alanyimu thei angatr ka sine la itre xaa mamoe.
4 Thupene lai cainöj, tha hnene hmaca kö lo nekötrahmanyi hna xome la falawa me ije la waina ngöne la Xeni Heji Ne La Joxu. Ketre tune fe la itre thauzane lao xaa trejin. Caasi hi la mekuna i angatr memine la ketre trejin ka qaja ka hape: “Thupene la Drai Ne Amekunën lo macatre 1935, tha hnenge hmaca kö hna xome la falawa me ije la waina. Trotrohnine hë ni laka, tha hnei Iehova kö hna ië ni troa hane mel e hnengödrai. Eni a mejiune troa mel e celë fen me hane huliwa ngöne la Paradraiso elany.” (Rom. 8:16, 17; 2 Kor. 1:21, 22) Kola kökötre la etrune la ka alanyimu atraqatr, nge angatr a ce huliwa memine la itre hna iën ka mele palakö e celë fen.
5. Nemene la mekuna i Iehova göne la itre ka tha xome hmaca kö la falawa me waina ngöne la Drai Ne Amekunën?
5 Nemene la mekuna i Iehova göne lo itre ka tha xome hmaca kö la falawa me ije la waina lo 1935? Nge nemene la mekuna i Nyidrë göne la itre ka xome la falawa me waina, ngo ka trotrohnin e thupen laka, tha hna ië angatre kö? (1 Kor. 11:28) Itre xan a xome la falawa me waina ke, thatre hnyawa kö angatre la mejiune i angatr. Ngo loi e tro angatr a wangatrehmekun laka, ka tria la mekuna i angatr me catre nyihlue i Iehova. E cili, tro hë Nyidrëti a kepe angatr memine la itre xaa mamoe. Ketre, ngacama tha xome hmaca kö angatr la falawa me waina, ngo loi e tro palahi angatr a atrune la Drai Ne Amekunën, me amamane la hni ne ole i angatr kowe la hna kuca hnei Iehova me Iesu thatraqai angatr.
KETRE MEJIUNE KA SISITRIA
6. Nemene la hnei Iesu hna qaja kowe la itre angela ngöne Hna Amaman mekene 7?
6 Calemi hë la akötr atraqatr. Celë hi matre, loi e tro hmaca sa ce wang la tusi Hna Amaman mekene 7, göne la ka alanyimu atraqatr me itre hna iën. Ame e celë, Iesu a upe la itre angela troa cilaxome la foa lao enyi ne apatren, uti hë la Iehova a pelehatren me jelemekötine la itre hna iën. (Hna ama. 7:1-4) E cili, kola troa acili angatr troa joxu me itretre huuje me Keriso e hnengödrai. (Hna ama. 20:6) Tru la madrine la itre atrene la lapa i Akötresie, ngöne la ala 144 000 lao hna iën a kapa la edrö i angatr e hnengödrai.
Ka alanyimu atraqatr a heetrë iheetr ka qea ka wië, nge angatr a xomi dröne pama me cile qëmekene la elolone la therone i Akötresie me qëmekene la Neköi Mamoe (Wange ju la tane mekun 3, paragarafe 7)
7. Thenge la Hna Amaman 7:9, 10, nemene la hna meköl goeëne hnei Ioane, nge nemene la hna kuca hnene la gurupe cili?
7 Thupene la Ioane a qaja la ala 144 000 lao joxu me itretre huuj, hnei angeic hna meköl goeëne la ka “alanyimu atraqatr” ka mele pe ngöne la isi Amagedro. Alanyimu catre kö angatr hune lo pane gurup, nge pëkö ka atreine e la etru i angatr. (E jë la Hna Amaman 7:9, 10.) “Angatr a heetrë iheetre ka qea ka wië.” Kola amamane laka, hnei angatr hna “thupën matre tha tro kö a adronyi” angatr hnene la fene i Satana, nge hnei angatr hna mele nyipici koi Akötresie me Keriso. (Iako. 1:27) Angatr a sue ka hape, Iehova me Iesu Neköi Mamoe, la ka amele angatr. Ketre, angatr a xome la itre dröne pama, nyine amamane laka, ame koi angatr, Iesu la Joxu hna iën hnei Iehova.—Wange ju la Ioane 12:12, 13.
8. Thenge la Hna Amaman 7:11, 12, nemene la mekuna ne la itre angela ngöne la angatr a goeëne la ka alanyimu atraqatr?
8 E jë la Hna Amaman 7:11, 12. Nemene la mekuna ne la itre angela ngöne la angatr a goeëne la ka alanyimu atraqatr? Öni Ioane ka hape, tru la madrine i angatr nge angatr a atrunyi Akötresie. Xecie koi së laka, tru la madrinene la lapa i Akötresie ngöne la angatr a troa goeën elany la ka alanyimu atraqatr ka mele pe ngöne la isi Amagedro.
9. Thenge la Hna Amaman 7:13-15, nemene la hna kuca hnene la ka alanyimu atraqatr?
9 E jë la Hna Amaman 7:13-15. Hnei Ioane hna öhn laka, hnene la ka alanyimu atraqatr “hna wasine la itre iheetre i angatr, me awiën ngöne la madra ne la Neköi Mamoe.” Kola amamane laka, ka lolo la mekuthetheu i angatr qëmeke i Iehova nge hnei Nyidrëti hna kepe angatr. (Is. 1:18) Hnei angatr hna nue mel koi Iehova me xomi bapataiso. Angatr a catre lapaune kowe la mel hna huujën hnei Iesu nge catrecatre la aqane imelekeu i angatr me Iehova. (Ioane 3:36; 1 Pet. 3:21) Ijiji angatre hi troa cil qëmekene la therone i Akötresie me “kuca la huliwa ka hmitrötr e lai me jidr hnine la uma ne hmi i Nyidrë.” Eje hi, angatr a catre cainöjëne la Baselaia me amë panëne la huliwa i Iehova ngöne la mele i angatr, nge pine pë hë la itre sipu aja i angatr.—Mat. 6:33; 24:14; 28:19, 20.
Ka alanyimu atraqatr a madrin troa tro qa ngöne la akötr atraqatr (Wange ju la paragarafe 10)
10. Nemene la ka xecie kowe la ka alanyimu atraqatr, nge nemene la hna thingehnaeane ka troa eatr?
10 Loi e troa xecie kowe la ka alanyimu atraqatr laka, tro Akötresieti a thupë angatr thupene la akötr atraqatr. Öni Tusi Hmitrötr: “Ame lo Atre lapane la theron, nyidrëti a hnëkë itat koi angatr matre thupë angatr.” Tro hë angatr a öhne la aqane eatr la hna thingehnaean celë: “Tro [Akötresieti] a köletrije la itre trenge timidra qa ngöne la itre lue meke i angatr, nge pë hmaca kö mec, me hleuhleu, me treij, me akötr.”—Hna ama. 21:3, 4.
11-12. (a) Thenge la Hna Amaman 7:16, 17, nemene la itre manathith hna troa kapa hnene la ka alanyimu atraqatr? (b) Pine nemene matre itre xaa mamoe a sine la Drai Ne Amekunën?
11 E jë la Hna Amaman 7:16, 17. Alanyimu enehila la itre hlue i Iehova ka mecijin ke, angatr a mel ngöne la itre nöj gaa pë mo maine gaa isi. Ame itre xan, hna akalabusine pine la lapaune i angatr. Ame pe, tru la madrinene la ka alanyimu atraqatr ke, atre hi angatr laka, thupene la kola apatrene la fene celë ka ngazo, troa mana la xen ngöne la götrane u me götrane ngönetrei. Ketre, tha tro kö angatr a “drenge la idreuth” ne la elëhni Iehova, ngöne la kola troa nue kowe la fene i Satana la itre enyi ne apatren. Thupene la akötr atraqatr, tro Iesu a eatrongë angatr “kowe la itre qeqe ne timi ne mel” ka pë pun. Pane mekune jë: Tha ceitu i angatre kö memine la itre milio lao atr ka mel enehila. Maine jë, tha tro kö angatr a hane mec!—Ioane 11:26.
12 Tru la hni ne ole ne la itre xaa mamoe ke, hetre mejiune i angatr qaathei Iehova me Iesu. Nyipici laka, tha hnei Iehova kö hna ië angatr troa mel e hnengödrai. Ngo tha kolo kö lai a hape, Iehova a wangaconyi angatr. Eje hi, nyimutre la itre kepin matre itre Keresiano hna iën me itre xaa mamoe a ce atrunyi Akötresie me Keriso, me sine la Drai Ne Amekunën.
LOI E TROA CATRE ATRUNYI AKÖTRESIE ME KERISO
Kola amekunë së hnene la falawa me waina hna tro fë ngöne la Drai Ne Amekunën laka, hnei Iesu hna meci pi së me aijijë së troa mele palua (Wange ju la paragarafe 13-15)
13-14. Pine nemene matre itre Keresiano hna iën me itre xaa mamoe a ce atrune la Drai Ne Amekunën?
13 Ame ngöne la 1000 lao atr ka sine la Drai Ne Amekunën, ala caasi hi la ka xome la falawa me iji la waina. Kolo lai a amamane laka, ala xalaithe pe hi la itre ka xome la falawa me waina ngöne la itre ekalesia. Eje hi, ame thene la itre ka sine la Drai Ne Amekunën, alanyimu catre kö la itre ka mejiune troa mel e celë fen. Pine nemene matre angatr a sine la icasikeu cili? Hanawang la ketre ceitun. Easa sine la faipoipo ne la sinee së ke, easa ajane troa amamane kowe la lue trefën la ihnimi së, me ce madrine me nyidro. Ketre tune fe, itre xaa mamoe a atrune la Drai Ne Amekunën, matre amamane la ihnimi angatr koi Keriso me kowe la itre hna iën. Angatre fe a amamane la hni ne ole i angatr kowe la thupene mel, ka aijijë angatr troa mele palua e celë fen.
14 Ketre, angatre fe a sine la Drai Ne Amekunën ke, angatr a drengethenge la hna amekötin hnei Iesu. Ame lo Iesu a acile la Xeni Heji Ne La Joxu memine la itre aposetolo, öni nyidrë: “Tro pala pë hë nyipunie a kuca la, nyine mekune koi ni.” (1 Kor. 11:23-26) Eje hi, maine hetre itre xaa hna iën palakö e celë fen, loi e tro la itre xaa mamoe a atrune la Xeni Heji Ne La Joxu. Nge tro fe angatr a hëne la itre xan troa hane ce atrune me angatr la drai cili.
15. Tro sa atrunyi Akötresieti tune kaa me Iesu ngöne la Drai Ne Amekunën?
15 Ame ngöne la Drai Ne Amekunën, easa atrunyi Iehova me Iesu ngöne la easa nyima me thith. Ame la cainöj kowe la macatre celë ke, “Troa Amamane La Hni Ne Ole Së Koi Akötresie Me Iesu!” Kola troa acatrene la hni ne ole së koi Iehova me Iesu. Ame la easa troa tro fë la falawa me waina, loi e tro sa mekun la itre hatren, ene la ngönetrei me madra i Iesu. Kolo fe a amekunë së laka, hnei Iehova hna upe la Nekö i Nyidrë, matre troa meci pi së me aijijë së troa hetrenyi la mel ka pë pun. (Mat. 20:28) Eje hi, tru la aja ne la itre ka hnimi Iehova me Iesu, troa sine la Drai Ne Amekunën.
OLENE JË KOI IEHOVA LA MEJIUNE SË
16. Nemene la ka ceitu thene la itre Keresiano hna iën memine la itre xaa mamoe?
16 Caasi hi la aqane goeëne Iehova la itre Keresiano hna iën me itre xaa mamoe. Nyidrëti a wangatrune me hnimi angatr. Celë hi matre, hnei Nyidrëti hna upe la Nekö i Nyidrë, matre troa meci pine la lue gurupe cili. Ngacama isapengöne kö la mejiune la itre hna iën me itre xaa mamoe, ngo nyipiewekë tro angatr asë a mele nyipici koi Akötresie me Keriso. (Sal. 31:23) Ketre, caasi hi la aqane xatua së hnene la uati hmitrötr. Iehova a nunuëne la uati hmitrötre i Nyidrëti koi së thenge la itre hne së hna ajan.
17. Nemene la hna lapa treqen hnene la itre Keresiano hna iën?
17 Ame la itre Keresiano hna iën, tha hna hnaho angatr kö memine la mejiune troa mel e hnengödrai. Akötresieti la ka hamë angatr la mejiune cili. Angatr a lapa mekun me thithi fë la mejiune i angatr. Ketre, angatr a lapa treqene la ijine tro angatr a kapa la ahnahna cili. Eje hi, thatreine kö angatr mekun la pengöne ngönetrei angatr elany. (Fil. 3:20, 21; 1 Ioane 3:2) Ame pe, angatr a trengeneune la ijine tro angatr a öhnyi Iehova me Iesu memine la itre angela me itre xaa Keresiano hna iën, me xome la hnëqa i angatr.
18. Nemene la hna lapa treqen hnene la itre xaa mamoe?
18 Ame la itre xaa mamoe, angatr a ajane troa mele palua e celë fen. Hnei Iehova hna amë la aja cili e kuhu hni angatr. (Ate cai. 3:11) Angatr a lapa treqene la ijine troa aparadraisone la fen. Angatre fe a ajane troa xupi uma i angatr, me eëny, me hnaho nekönatr ka pë mec. (Is. 65:21-23) Angatr a ajane troa kanothe la fene hnengödrai, me elëne la itre wetr, me ngenu ngöne la itre hnaxulu me itre hnagejë. Aja i angatr troa atrepengöne la nöjei ewekë hna xup hnei Iehova. Ngo ame la ka sisitria, tre, troa easenyi catre koi Nyidrë.
19. Nemene la hna aijijë së troa kuca ngöne la Drai Ne Amekunën, nge eu la drai tro sa atrune ej?
19 Iehova a hamë mejiune kowe la nöjei hlue i Nyidrë. (Iere. 29:11) Nemene la aqane tro asë hi sa amamane la hni ne ole së koi Iehova me Iesu? Loi e tro sa atrune la Drai Ne Amekunën la meci Keriso. Celë hi drai ka sisitria kowe la itre nyipi Keresiano. Ame ngöne la macatre 2021, easa troa atrune la drai cili e Mecixen 27 Maac 2021 thupene la kola lö la jö. Ame itre xan, angatr a sine la drai cili ngacama kola icilekeu maine akalabusi angatre pena. Ngacama easë caas, maine ngöne la ketre neköi gurup, maine ngöne la ekalesia, ngo tha tro kö sa thëthëhmin laka, Iehova, Iesu, itre angela me itre hna iën a goeë së, nge angatr a madrin. Haawe, catre pi së atrune la Drai Ne Amekunën cememine la madrin!
NYIMA 150 Thele Akötresieti Jë Matre Mele Nyipunie
^ Ame e Mecixen 27 Maac 2021 tre, ketre drai ka sisitria catre kowe la Itretre Anyipici Iehova. Angatr a troa atrune la Drai Ne Meci Keriso. Ame thei angatr, alanyimu la itre ka sine la gurup hna hën hnei Iesu ka hape, “itre xaa mamoe.” Nemene la hna amamane göne la gurupe cili lo macatre 1935? Nemene la itre manathithi hna troa kapa hnene la itre xaa mamoe thupene la akötr atraqatr? Nge tro angatr a atrunyi Akötresie me Iesu tune kaa ngöne la Drai Ne Amekunën?
^ GÖI TROA TROTROHNIN: Ame la itre xaa mamoe, kolo itre ka sine la nöje i Akötresie ngöne la itre drai ne la pun. Angatr a xötrethenge Keriso me mejiune troa mele palua e celë fen. Ame pena la ka alanyimu atraqatr ke, kola qaja la itre xaa mamoe ka mele pe ngöne la ijine tro Keriso a amekötine la itre atr ngöne la akötr atraqatr.
