1. Nemene la hne së hna kapa qa ngöne la ihnimi Akötresie?

 HNEI Ioane aposetolo hna cinyihane ka hape, “Akötresieti la ihnim.” (1 Ioane 4:8) Kolo lai a amekunë së la ketre nyipici: Akötresieti la Qaane la mel, nge Nyidrëti fe la Qaane la ihnim. Iehova a hnimi së! Ihnimi Nyidrëti a hamë madrine me tingeting koi së.

2. Thenge la Mataio 22:37-40, nemene la lue wathebo ka tru, nge pine nemene matre jole itre xaa ijine troa trongëne la hnaaluen?

² Hnei Iesu hna upe la itre Keresiano troa ihnim. (E jë la Mataio 22:37-40) Pine laka, atre Iehova hnyawa hi hne së, matre hmaloi koi së troa trongëne la pane wathebo. Eje hi, ka pexeje Iehova nge Nyidrëti a hnimi së. Ngo maine jë, jole koi së troa trongëne la hnaaluene wathebo. Pine nemen? Pine laka, tha ka pexeje kö la itre trejin me easë. Ame itre xaa ijin, angatr a qaja me kuca la itre ewekë ka akötrë së. Atre hi Iehova laka, troa traqa la itre jole cili koi së. Celë hi matre hnei Nyidrëti hna upe la itre ka cinyihane la Tusi Hmitrötr, tui Ioane, troa amamane la enyipiewekëne la troa ihnimikeu memine la aqane tro sa melën.—1 Ioane 3:11, 12.

3. Nemene la hnei Ioane hna amamane ngöne la itre tusi angeic?

³ Hnei Ioane hna amamane laka, nyipiewekë tro la itre Keresiano a ihnim. Tru catre kö la hnaewekë “ihnim” ngöne la tusi Ioane hune la itre xaa Evangelia. Traqa koi 100 lao macatre i Ioane ngöne la angeic a cinyihane la Evangelia i angeic memine lo köni xaa itus. Kola mama ngöne la itre tusi angeic laka, loi e troa nyitrepene la itre  huliwa së hnene la ihnim. Ame pe, tha canga trotrohnine kö Ioane la mekun celë.—1 Ioane 4:10, 11.

4. Hapeu, hnei Ioane kö hna amamane la ihnimi angeic koi itre xan?

⁴ Ame lo Ioane a nekötrahmanyi, jole koi angeic troa amamane la ihnimi angeic. Ame la ketre ijin, hnei Iesu me itretre drei nyidrë hna tro qa Samaria uti hë Ierusalema. Ngo tha hna kepe angatre hnyawa kö hnene la itre atrene la ketre traon e Samaria. Nemene la hna kuca hnei Ioane? Hnei angeic hna sipo Iesu matre tro angeic me Iakobo a hëne la eë qa hnengödrai matre apatrenyi angatr! (Luka 9:52-56) Ame la ketre ijin, hnei Ioane hna wangacone la itre xaa aposetolo. Hnei angeic me trejin me angeic hna upe la thine i nyidro troa sipo Iesu troa hamë hnëqa ka tru koi nyidro ngöne la Baselaia. E cili, hnene la itre xaa aposetolo hna elëhni! (Mat. 20:20, 21, 24) Ngacama tru catr la itre tria i Ioane, ngo tru la ihnimi Iesu koi angeic.—Ioane 21:7.

5. Nemene la hne së hna troa ce wang ngöne la tane mekun celë?

⁵ Ame ngöne la tane mekun celë, tro sa ce wang la tulu i Ioane, memine la itre xaa ini hnei angeic hna hamën göne la ihnim. Tro fe sa ce wang la aqane troa hnime la itre trejin. Ketre, tro sa ce ithanatane la nyine tro la itre kem a kuca matre troa thupëne la fami angatr cememine la ihnim.

6. Nemene la aqane amamane Iehova la ihnimi Nyidrëti koi së?

⁶ Nyimutre la itre ka mekun laka, ame la nyipi ihnim ke, ene la troa ithanata amenyikenyi kowe la ketre atr. Ngo ame pe, troa mama la ihnimi ngöne la itre huliwa. (Wange ju fe la Iakobo 2:17, 26.) Hanawang la tulu i Iehova. Nyidrëti a amamane la ihnimi Nyidrëti koi së, jëne la itre trengewekë ka iakeukawany e hnine la Tusi Hmitrötr. (Sal. 25:10; Rom. 8:38, 39; 1 Ioane 4:19) Ngo Nyidrëti fe a amamane la ihnimi Nyidrë jëne la itre huliwa i Nyidrë. Öni Ioane: “Hna mama la ihnimi nyidrëti koi së qa ngöne laka, hnei nyidrëti hna upe la Nekö hnimina i nyidrëti ka cas kowe la fen, göi troa amele së jëne la Nekön.” (1 Ioane 4:9) Hnei Iehova hna nue la Nekö hnimina i Nyidrë troa akötr me mec thatraqai së. (Ioane 3:16) Eje hi, atraqatr la ihnimi Nyidrëti koi së!

7. Tune kaa la aqane amamane Iesu la ihnimi nyidrëti koi së?

⁷ Hnei Iesu mina fe hna amamane la  ihnimi nyidrëti kowe la itretre drei nyidrë. (Ioane 13:1; 15:15) Hnei Iesu hna amamane la ihnimi nyidrëti koi angatr jëne la aqane ithanata me aqane ujë i nyidrë. Öni nyidrë: “Pëkö ihnim ka tru catre hune la: ene la tro ketre a meci pine la sinee i angeic.” (Ioane 15:13) Nemene la thangane la easa lapa mekun la itre hnei Iehova me Iesu hna kuca koi së, ekö me enehila?

8. Thenge la 1 Ioane 3:18, nemene la nyine tro sa kuca?

⁸ Easa amamane la ihnimi së koi Iehova me Iesu ngöne la easa drengethenge nyidro. (Ioane 14:15; 1 Ioane 5:3) Ketre, hnei Iesu hna upi së troa ihnimikeu. (Ioane 13:34, 35) Maine easa ajane troa amamane la ihnimi së kowe la itre trejin, tha tro hi qaja ngo loi e tro fe sa amamane koi angatr. (E jë la 1 Ioane 3:18.) Nemene la aqane tro sa kuca?

9. Nemene la hna kuca hnei Ioane pine la ihnimi nyidrë?

⁹ Maine ju, ijije hi tro Ioane a ce huliwa memine la keme i angeic, me nyi ie matre hetrenyi la ka ijij koi angatr. Ngo ame pe, hnei angeice hna nue la mele i angeic troa cainöjëne la nyipici göi Iehova me Iesu. Eje hi laka, tha ka hmaloi kö la mele i Ioane ke, hna akötrë angeic. Ketre, ame lo qatre hë angeic, hna helë angeic qa ngöne la nöj. (Itre hu. 3:1; 4:1-3; 5:18; Hna ama. 1:9) Ngacama hna akalabusi Ioane, ngo hnei nyidrëti palahi hna meku itre xan. Ame lo kola akalabusi nyidrëti e Patamo, hnei nyidrëti hna cinyihane la tusi Hna Amaman, me iupi fë kowe la itre ekalesia, la itre ewekë ka troa traqa elany. (Hna ama. 1:1) Nge thupene lai, hnei Ioane hna cinyihane me qejepengöne la mele i Iesu me huliwa ne cainöje i nyidrë. Ketre, hnei nyidrëti hna cinyihane la köni tus matre ithuecatre kowe la itre trejin. Tune kaa la aqane tro sa nyitipu nyidrë?

10. Nemene la aqane tro sa amamane la ihnimi së koi itre xan?

¹⁰ Ijije hi tro sa amamane la ihnimi së, jëne la aqane huliwane së la mele së. Aja i Satana memine la fene i angeic tro sa sipu meku së kö, me nue la traem me trengecatre së matre troa thele manie maine hlemu pena. Ngo isapengöne kö la itre trejin e cailo fen ke, angatr a nue la traeme i angatr troa cainöjëne la maca ka loi kowe la itre atr. Ame itre xan, angatr a cainöj ngöne la drai ka pexej me inine la itre atr.

11. Nemene la aqane amamane la itre xaa trejin la ihnimi angatr koi Iehova me koi itre xan?

¹¹ Alanyimu la itre trejin ka huliwa ngöne la drai ka pexej matre hetrenyi la ka ijij kowe la fami angatr. Ame pe, angatre fe a catre sajuëne la organizasio i Akötresie. Angatr a ixatua ngöne la itre nöj hna lep hnei hulö, maine ixatua ngöne la Huliwa ne Xupi Uma Ne Baselaia, nge angatre fe a kuië ahnahna. Ihnimi angatr koi Akötresie me kowe la itre xan la ka upi angatr troa kuca la itre ewekë celë. Ketre, easë fe a amamane la ihnimi së kowe la itre trejin ngöne la easa sine la itre icasikeu me hamë mekun. Ngacama easa kucakuca, ngo easa sine itre ej. Ngacama easa xou troa hamë mekun, ngo easa kuca. Nge ngacama easë asë hi a cile kowe la itre jol, ngo easa ithuecatrekeu qëmeken me e thupen la itre icasikeu. (Heb. 10:24, 25) Easa olene kowe la trengecatre hna nue hnene la itre trejin!

12. Nemene la ketre aqane amamane Ioane la ihnimi nyidrë kowe la itre trejin?

 ¹² Hnei Ioane hna amamane la ihnimi nyidrë kowe la itre trejin, ngöne la nyidrëti a qaja aloinyi angatr me eamo angatr. Ame ngöne la itre tusi nyidrë, hnei nyidrëti hna qaja aloine la lapaune me aqane mele nyipici ne la itre trejin. Nge hnei nyidrëti fe hna eamo angatr göne la ngazo. (1 Ioane 1:8–2:1, 13, 14) Ketre tune fe, loi e tro sa qaja aloin me olene kowe la itre trejin la itre ewekë ka lolo hnei angatr hna kuca. Nge maine ka tria la aqane mekun maine aqane ujë ne la ketre trejin, loi e tro sa eamo angeic cememine la menyik. Celë hi aqane tro sa hnimi angeice lai. Tha ka hmaloi kö troa eamo la ketre sinee, ngo Tusi Hmitrötr a qaja ka hape, itre sinee a ithuecatrekeu.—Ite Edomë 27:17.

13. Nemene la nyine tha tro kö sa kuca?

¹³ Ame itre xaa ijin, ihnimi së a sewe së troa kuca la ketre ewekë, tune la troa drenge akötrëne la hna qaja hnene la ketre trejin. Hane hi la ka traqa ngöne la ijine Iesu a cainöje trootro. Hnei nyidrëti hna qaja kowe la itretre drei nyidrë ka hape, maine angatr a ajane troa mel, loi e tro angatr a pane öni la ngönetrei nyidrë me ije la madra i nyidrë. (Ioane 6:53-57) Alanyimu thei angatr la ka nuetriji nyidrë pine la hnei nyidrëti hna qaja. Ngo hnene la itre sipu sinee i Iesu, tui Ioane, hna mele nyipici. Maine jë, hna asesëkötrë angatre fe nge tha trotrohnine kö angatr la aliene la hna qaja hnei Iesu. Ngo tha hnei angatre kö hna luelu me drenge akötrën. Hnei angatre pe hna mejiune koi nyidrë ke, atre hi angatr laka, ka nyipici palahi nyidrë. (Ioane 6:60, 66-69) Eje hi, tha tro kö sa drenge akötrëne la hna qaja hnene la itre trejin! Maine hetre jol ka traqa, loi e tro sa pane nue angatr troa qeje mekun.—Ite Edomë 18:13; Ate cai. 7:9.

14. Pine nemene matre tha tro kö sa methinëne la itre trejin?

¹⁴ Hnei Ioane mina fe hna hmekë së qa ngöne la troa methinëne la itre trejin. Maine tha trongëne kö së la eamo cili, tro hë Satana lai a iaö së. (1 Ioane 2:11; 3:15) Celë hi ka traqa kowe la itre pane Keresiano ekö. Hnei Satana hna thele troa thë la caas e hnine la ekalesia me  aciane la imethinë. Ame lo ijine Ioane a cinyihane la itre tusi angeic, hnene la itre xan ka hetrenyi la aqane mekuna i Satana hna lö hnine la ekalesia, tui Dioterefe. Hnei angeic hna thë la caas ne la itre trejin. (3 Ioane 9, 10) Pëkö metrötre i angeic kowe la itre hna upe hnene la lapa ne xomi meköt. Nge hnei angeice fe hna thele troa upetröneëne la itre trejin ka kapa la itre atr hnei angeic hna methinën. Drei la ketre aqane ujë ka pi tru! Ame fe enehila, Satana a thele troa thë la caas ne la itre trejin me sewe angatr troa itö ixatua. Haawe, tha tro kö sa nue la imethinë troa iananyi së memine la itre trejin.

15. Nemene la nyine troa mekun hnene la itre hene la fami?

¹⁵ Ame la hene la fami, angeic a amamane la ihnimi angeic kowe la fami me hamë angatr la ka ijij ngöne la götrane la ngönetrei. (1 Tim. 5:8) Ngo loi e tro angeic a mekun laka, tha celë kö ka troa acatrene la aqane imelekeu i angatr me Iehova. (Mat. 5:3) Pane mekune jë la tulu hna hamën hnei Iesu kowe la itre kem. Thenge la tusi Ioane, ame lo Iesu hune la sinöe, hnei nyidrëti hna mekun la fami nyidrë. Ame lo ijine cili, hnei Ioane me Maria hna ce lapa me nyidrë. Ngacama tru la akötre i Iesu, ngo hnei nyidrëti hna sipo Ioane troa thupë Maria, thine i nyidrë. (Ioane 19:26, 27) Maine ju, ijije hi tro Iesu a sipone kowe la ketre sipu trejin me nyidrë troa thupë Maria. Ngo tha xötrethenge nyidrëti palakö hnei angatr. Hnei Iesu hna mekun la mele i Maria memine fe la aqane imelekeu i eahlo i Iehova.

16. Nemene la itre hnëqa i Ioane?

¹⁶ Nyimutre la itre hnëqa i Ioane. Pine laka, ketre aposetolo nyidrë, matre nyipiewekë tro nyidrëti a amamai tulu ngöne la hna cainöj. Nge maine jë, ka faipoipo nyidrë, matre nyipiewekë tro nyidrëti a thupëne la fami nyidrë ngöne la götrane ngönetrei me thupëne fe la aqane imelekeu i angatr me Iehova. (1 Kor. 9:5) Nemene la ini kowe la itre hene ne la fami?

17. Nemene la aqane tro la itre kem a amamane la ihnimi angatr kowe la fami angatr?

¹⁷ Ame la itre trejin trahmany ka hetre  fami ke, nyimutre la itre hnëqa i angatr. Loi e tro angatr a amamai tulu ngöne la hna huliwa matre atrunyi Iehova. (Efe. 6:5, 6; Tito 2:9, 10) Nge maine hetre hnëqa i angatr e hnine la ekalesia, loi e tro angatr a xomi ijine troa ithuecatre kowe la itre trejin me catre cainöj. Ketre, nyipiewekë tro angatr a ini tus memine la föe i angatr me itre nekö i angatr. Tro hë angatr a madrine la hna kuca hnei kem matre troa thupë angatr.—Efe. 5:28, 29; 6:4.

18. Nemene la ka xecie koi Ioane?

¹⁸ Nyimutre la itre ewekë ka traqa ngöne la mele i Ioane. Tru catre la itre jol hnei angeic hna cile kow nge ka tupathe la lapaune i angeic. Ngo hnei angeic palahi hna catre trongëne la itre hna amekötin hnei Iesu, tune la troa hnime la itre trejin. Xecie koi angeic laka, tro kö Iehova me Iesu a hnimi angeic me aegöcatrenyi angeic troa elë hun la nöjei pengöne jol. (Ioane 14:15-17; 15:10; 1 Ioane 4:16) Tha hnei angeice kö hna nue Satana memine la fen troa sewe angeic troa hnime la itre trejin, ngöne la aqane ithanata me aqane ujë i angeic.

19. Nemene la hna ithuecatre koi së ngöne 1 Ioane 4:7, nge pine nemen?

¹⁹ Tui Ioane, easa mel ngöne la fene i Satana ka imethinë. (1 Ioane 3:1, 10) Angeic a thel troa sewe së troa hnime la itre trejin me easë. Ngo maine tro sa hmek, tha tro kö angeic a hun. Haawe, catre jë së amamane jëne la aqane ithanata me aqane ujë së laka, easa hnime la itre trejin! Tro hë sa madrine troa hane sine la lapa i Iehova me mele madrin.—E jë la 1 Ioane 4:7.