1. Tui Dravita joxu, nemene la hna hnyingëne hnei itre xan?

 EASË asë hi a ajane troa mele ka loi me mele tingeting. Eje hi, pëkö ka madrin ngöne la kola traqa la itre jol nge easa kucakuca. Ame itre xaa ijin, itre xaa hlue i Iehova a hnying tui Dravita joxu, ka hape: “Uti hë eue la tro ni a ithanata memine la ung, me hace hnine o drai?”—Sal. 13:2.

2. Nemene la hne së hna troa ce wang ngöne la tane mekun celë?

² Eje hi laka, thatreine kö së troa apatrene la xou me hnehengazo qaathe së. Ame pe, ijije hi tro sa xomihnin me elë hun la itre jol. Ame ngöne la tane mekun celë, tro sa pane ce wang la itre kepin matre easa kucakuca me hnehengazo. Thupene lai, tro sa ce wang la sikisi lao nyine troa kuca, matre tha tro kö sa hnehengazo menu ngöne la kola traqa la itre jol.

3. Nemene la itre jol hne së hna thatreine apatren?

³ Nyipici laka, thatreine kö tro sa apatrene la itre jol ka traqa, tune la kola elë la thupene la manie, maine ngöne la kola upi së hnene la ketre sinee troa qenatrekënö maine kuci ngazo pena. Ketre, thatreine kö së troa apatrene la iakötrë ngöne la nöje së. Eje hi, kola traqa la itre jole cili ke, ame ngöne la fene celë, tha trongëne kö la itre atr la itre trepene meköti ne la Tusi Hmitrötr. Ketre, Satana  la ka musinëne la fen. Jëne la “itre ewekë hna hnehengazone ngöne la fene celë,” angeic a thele matre tha tro hmaca kö sa nyihlue i Iehova. (Mat. 13:22; 1 Ioane 5:19) Celë hi kepin matre tru catre la itre jol nge easa kucakuca me hnehengazo.

4. Nemene la thangane e kolo palahi a traqa itrai la itre jol?

⁴ Pine laka kola traqa itrai la itre jol, matre canga tro hi sa kucakuca me hnehengazo. Maine jë tro sa hnehengazo göi manie, maine xoue troa wezipo maine upi së pena qa ngöne la hna huliwa. Maine pena, easa xou troa tha drei Akötresie ngöne la itupath. Ketre, atre hi së laka, easenyi hë tro Satana a upe la itre sine xöle i angeic troa lep la nöje i Akötresie. E cili, tro sa xou e thatre kö së la nyine troa kuca ngöne la ijine cili. Maine jë easa isa hnying ka hape: ‘Hapeu, ka ngazo kö troa hnehengazone la itre ewekë cili?’

5. Pine nemene matre Iesu a qaja ka hape, tha tro kö sa hnehengazo?

⁵ Öni Iesu kowe la itretre dreng: ‘Ea loi ju hë hna hnehengazo.’ (Mat. 6:25) Hapeu, Iesu kö a qaja ka hape, tha tro kö sa hnehengazo? Waea. Hnene la itre xaa hlue i nyidrëti ekö hna hane hnehengazo, ngo tha hnei Iehova kö hna nuetriji angatr. * (1 Ite jo. 19:4; Sal. 6:3) Iesu e celë a akeukawane la itre hni së, matre tha tro kö sa nue la huliwa i Iehova pine la itre jol. Ngo nemene la ka troa xatua së ngöne la easa kucakuca?—Wange ju la hna eköhagen hna hape, “ Aqane Troa Kuca.”

6. Thenge la Filipi 4:6, 7, nemene la ka troa xatua së ngöne la easa kucakuca?

⁶ (1) Troa catre thith. Ame la easa hnehengazo, ijije hi troa xatua së hnene la thith. Thithi jë koi Iehova qa kuhu hni. (1 Pet. 5:7) E cili, tro hë sa kapa “la tingetinge qaathei Akötresie, tingetinge hna thatreine trotrohnine hnei atr.” (E jë la Filipi 4:6, 7.) Jëne la uati hmitrötre i Nyidrë, tro Iehova a xatua së ngöne la easa kucakuca.—Gal. 5:22.

7. Nemene la nyine tro sa kuca ngöne la easa thithi koi Iehova?

⁷ Ame la epuni a thithi koi Iehova, loi e tro epuni a fe la itre aliene hni epun koi Nyidrë. Loi e troa qaja la mekuna i epun memine la itre jol hna cile kow. Sipone jë la inamacane me trengecatre qaathei Iehova, matre xatua epun troa elë hune la jol. Ngo maine thatreine kö epun troa nyinyine lai jol, sipo Nyidrëti jë troa xatua epun troa xomihnine lai jol. Maine tro sa qaja asë, canga tro hi sa öhne la aqane sa i Iehova. Ngo tha tro kö sa hnehengazo e tha canga sa kö Nyidrëti la itre thithi së. Iehova a ajane tro sa fe la itre aliene hni së me catre thith.—Luka 11:8-10.

8. Nemene la nyine tro fe sa qaja ngöne la easa thith?

⁸ Ame la easa nue asë koi Iehova la itre jole së ngöne la thith, loi e tro fe sa qaja la hni ne ole së koi Nyidrë. Loi e tro sa lapa mekun la itre manathith hne së hna kapa qaathei Nyidrë ke, celë hi ka troa xatua së ngöne la easa cile kowe la itre jol. The hnehengazo kö e thatreine kö epuni qaja la itre aliene hni epun koi Iehova. Maine tro hi sa qaja ka hape,  “Xatua ni jë!” ke, Nyidrëti hi lai a dreng.—2 A. l. ite jo. 18:31; Rom. 8:26.

9. Nemene la nyine tro sa kuca ngöne la easa hnehengazo?

⁹ (2) Tha tro kö a mejiune kowe la sipu inamacane së, ngo kowe la inamacane i Iehova. Ame ngöne lo itre macatre 700 M.P.K., hnene la nöje i Iudra hna xou wanga troa lepi angatr hnei angetre Asuria. Celë hi matre hnei angatr hna sipo ixatua koi angetre Aigupito, ketre nöje trenyiwa. (Is. 30:1, 2) E cili, hnei Iehova hna hmekë angatr ka hape, tro lai a hetre ethane kowe la nöj. (Is. 30:7, 12, 13) Jëne Isaia, hnei Iehova hna xatua angatr. Öni Nyidrë: “Tro nyipunie a egöcate hnene la tingetinge me lapaun [i nyipunieti koi ni].”—Is. 30:15b.

10. Eu la itre ijine tro sa amamane koi Iehova laka, easa lapaune koi Nyidrë?

¹⁰ Nemene la aqane tro sa amamane la lapaune së koi Iehova? Hanawang la itre xaa ceitun. Pane mekune jë laka, epuni a öhne la ketre huliwa hna nyithupene hnyawa. Ame pe, kola sipo epuni troa huliwa atrun matre pëhë ijine i epun koi Iehova. Maine pena, kola pi iatre me epun hnene la ketre sine huliwa ka tha hmi kö. Maine pena, tro la ketre sinee i epun a upi epun troa iën, angeic maine Iehova. Ame ngöne la itre jole celë, tha ka hmaloi kö troa axecië mekun, ngo tro kö Iehova a xatua së me amamane koi së la nyine troa kuca. (Mat. 6:33; 10:37; 1 Kor. 7:39) Ngo hapeu, tro kö sa lapaune koi Nyidrë?

11. Nemene la itre tulu ne la Tusi Hmitrötr ka troa xatua së troa mejiune koi Iehova ngöne la iakötrë?

¹¹ (3) Troa xomi ini qa ngöne la itre tulu ka lolo me ka ngazo. Nyimutre la itre tulu e hnine la Tusi Hmitrötr ka amamane la enyipiewekëne troa lapaune koi Iehova. Ame la easa inine la tulu ne la itre hlue i Iehova ekö, loi e tro sa thele la ka xatua angatr troa mejiune koi Nyidrë. Ame lo Hnakotre Ka Tru i Angetre Iudra a wathebone kowe la itre aposetolo troa cainöj, tha hnei angatre kö hna xou. Öni angatr: “Hnëqa huni la troa drengethenge Akötresie hune la atr.” (Itre hu. 5:29) Ketre, tha hnei angatre kö hna xou ngöne la kola thaucë angatr. Pine nemen? Pine laka atre hi angatr laka, tro kö Iehova a ceme angatr nge Nyidrëti a madrine koi angatr. Celë hi matre hnei angatr palahi hna catre cainöjëne la maca ka loi. (Itre hu. 5:40-42) Celë fe hi la ka traqa koi Setefano. Ame la kola troa humuthi angeic hnene la itre ithupëjia, tha hnei angeice kö hna xou. Ame la qëmeke i angeic, kösë “iqëmeke ne angela.” (Itre hu. 6:12-15) Pine nemen? Pine laka, xecie koi angeic laka, Iehova a kepe angeic.

12. Thenge la 1 Peteru 3:14 me 4:14, pine nemene matre easa madrin ngöne la kola akötrë së?

¹² Hnei Iehova hna aijijëne la itre aposetolo troa kuca la itre iamamanyikeu. Kolo lai a amamane laka, ce Nyidrëti me angatr. (Itre hu. 5:12-16; 6:8) Eje hi laka, tha hna aijijë së kö troa tui angatr. Ame pe, jëne la Tusi Hmitrötr, Iehova a amamane laka, Nyidrëti a madrine ngöne la easa “akötr pine la meköt,” nge thei ‘easë la ua i Nyidrë.’ (E jë la 1 Peteru 3:14; 4:14.) Haawe, tha tro kö sa hnehengazone la aqane tro sa ujë elany ngöne la iakötrë. Loi e tro pe sa acatrene la mejiune së koi Iehova laka, atreine hi Nyidrëti troa xatua së. Tune la itre pane Keresiano, loi e tro sa mejiune  kowe la hna thingehnaean hnei Iesu ka hape: “Tro kö ni a hamëne koi nyipunie la itre trengewekë, me inamacan, matre tha tro kö la itre ithupëjia me nyipunie a atreine sa.” Öni nyidrëti fe: “Pine la hnei nyipunieti hna cile hut, tro hë nyipunieti a mel.” (Luka 21:12-19) Ketre, tha tro kö sa thëthëhmine laka, ijije hi tro Iehova a amelene la itre hlue i Nyidrë ka mele nyipici ke, atrepengöi angatre hnyawa hi hnei Nyidrë.

13. Pine nemene matre ka nyipiewekë fe la tulu ne la itre ka tha mejiune kö koi Iehova?

¹³ Loi e tro fe sa xomi ini qa ngöne la itre ka tha mejiune kö koi Iehova. Celë hi ka troa xatua së matre tha tro kö sa tui angatr. Hanawang la tulu i Asa, joxu ne Iudra. Ame la ketre ijin, hna lepe la nöje i angeic hnene la ketre trongene isi ka tru. E cili, hnei Asa hna sipo ixatua koi Iehova, nge hnei Nyidrëti hna sa la thithi angeic, me xatua angeic troa ngaan la ithupëjia. (2 A. l. ite jo. 14:9-12) Ngo thupene lai, hnei Baasa, joxu ne Isaraela, me trongene isi nyidrë ka co, hna thele troa isi me Asa. E cili, tha hnei Asa kö hna thele ixatua thei Akötresie. Hnei angeic hna nyithupene la angetre Asuria matre tro angatr a xatua angeic. (2 A. l. ite jo. 16:1-3) Ketre, ame la kola qatr hnei Asa, hna tithi angeic hnei mec, ngo tha hnei angeice kö hna sipo ixatua koi Iehova.—2 A. l. ite jo. 16:12.

14. Nemene la ini hne së hna xom qa ngöne la itre tria i Asa?

¹⁴ Ame lo xötrei, hnei Asa hna thele ixatua thei Iehova ngöne la kola traqa la itre jol. Ngo ame hë e thupen, hnei angeic hna mejiune kowe la sipu trengecatre i angeic. Ame koi angeic, jëne mele la troa sipo ixatua koi angetre Asuria. Ngo ka tria la aqane mekuna i angeic. Jëne la ketre perofeta, öni Iehova koi Asa: “Hnei nyipëti hna qale kowe la joxu ne Suria, nge tha lapa qale koi Iehova Akötesi nyipë, qa ngöne lai utetë hë qa thei nyipëti la hnënge ishi ne la joxu ne Suria.” (2 A. l. ite jo. 16:7) Eje hi, loi e tro sa thupën matre tha tro kö sa mejiune kowe la sipu trengecatre së, me nuetrije la ixatua qaathei Iehova ngöne la Tusi Hmitrötr. Ngacama kola upi së troa canga axecië mekun göne la ketre jol, ngo loi e tro sa mejiune koi Iehova. Tro kö Nyidrëti a xatua së troa inamacan.

15. Nemene la nyine tro sa kuca ngöne la easa e Tusi Hmitrötr?

¹⁵ (4) Troa hnehene la itre xötr ne la Tusi Hmitrötr. Ame la easa e la Tusi Hmitrötr, hetre itre xötr ka amamane la enyipiewekëne la troa mejiune koi Iehova. Loi e tro sa hnehene la itre xötre cili. Loi e tro sa e catrëne itre ej, maine cinyanyine pena matre troa e lapan. Hna upi Iosua troa catre e la tusi Wathebo matre troa inamacan. Ketre, hnene la itre eamo qaathei Iehova hna hamë trengecatre i angeic, me xatua angeic matre tha tro kö a xou. (Ios. 1:8, 9) Ketre tu së fe, nyimutre la itre xötr e hnine la Tusi Hmitrötr ka akeukawanyi së me xatua së ngöne la kola traqa la itre jol.—Sal. 27:1-3; Ite Edomë 3:25, 26.

16. Nemene la aqane upe Iehova la itre trejin matre troa xatua së troa mejiune koi Nyidrë?

¹⁶ (5) Troa ce tro memine la itre hlue i Akötresie. Iehova a upe la itre trejin troa xatua së troa mejiune koi Nyidrë. Ame  ngöne la itre icasikeu, easa kepe thangane qa ngöne la itre ini me itre mekun hna hamën hnene la itre trejin. (Heb. 10:24, 25) Ketre, ijije fe tro sa fe la hni së kowe la ketre trejine ka macaj. Eje hi, kola ithuecatre koi së me xatua së hnene la “tenge ewekë ka loi” hna qaja hnene la ketre sinee.—Ite Edomë 12:25.

17. Thenge la Heberu 6:19, nemene la aqane tro la mejiune së a xatua së ngöne la kola traqa la itre jol?

¹⁷ (6) Troa acatrene la mejiune së koi elany. Ame la mejiune së, tre, “kösë iuhni kowe la mele së.” Ej a xatua së troa catr ngacama kola traqa la nöjei pengöne jol. (E jë la Heberu 6:19.) Pane mekune jë së la mele hna thingehnaean hnei Iehova ngöne la fene ka hnyipixe! Patre hë la itre ewekë ka akötrë së, nge tha tro hmaca kö sa hnehengazo. (Is. 65:17; Mika 4:4) Ketre, ame la easa cainöj, easë hi lai a acatrene la mejiune së. Haawe, catre jë së cainöj me inine la itre atr. E cili, tro ha ‘xecie hnyawa la mejiune së uti hë la pun.’—Heb. 6:11.

18. Nemene la ka troa traqa elany, nge nemene la ka troa xatua së troa cile catr?

¹⁸ Easenyi hë la pune la fene celë, matre nyimutre la itre jol ka troa traqa. Nge tro hë së lai a hnehengazo me kucakuca. Tro la topik ne la macatre 2021 a xatua së matre tha tro kö sa mejiune kowe la sipu trengecatre së, ngo tro pe sa mejiune koi Iehova. Ame ngöne la itre drai ka troa traqa, loi e tro sa amamane ngöne la aqane ujë së laka, easa lapaune kowe la hna qaja hnei Iehova, ka hape: “Tro nyipunie a egöcate hnene la tingetinge me lapaun.”—Is. 30:15.