1. Nemene la ka amamane laka, alanyimu la itre ka “tha hnimi atr”?

 HNEI Tusi Hmitrötr hna perofetan ka hape, ame ngöne la itre drai ne la pun, alanyimu la itre ka “tha hnimi atr.” (2 Tim. 3:1, 3) Ame enehila, nyimutre la itre trefën ka seihnacil. Kola iwesitrë lapa hnene la itre kem me thin, matre itre nekönatr a mekun laka, pëkö ka hnimi nyudren. Ngacama caasi hi la hnalapa ngo kösë itre trenyiwa angatr. Önine la ketre ka inamacan: “Tha ithanata hë la itre kem me thin me itre nekönatr. Angatr a isa goeë ordinatör me tablet me telefon maine elo jeux pena. Ngacama angatr a ce lapa e hnine la uma ngo kösë ithatre kö angatr.”

2-3. (a) Thenge la Roma 12:10, drei la hne së hna troa hnim? (b) Nemene la hne së hna troa ce wang ngöne la tane mekun celë?

² Nyipici laka, tha easë kö a ajane troa ceitu memine la itre atr enehila ka pë ihnimin. (Rom. 12:2) Easë pe a amamane la ihnimi së kowe la itre sinee së me itre trejin ngöne la nyipici. (E jë la Roma 12:10.) Ame la hnaewekë “ihnimikeu” tre, kola qaja la ihnimi e hnine la hnepe lapa. Celë hi lai ihnimi hne së troa amamane kowe la itre trejin e hnine la ekalesia. Eje hi, maine tro sa ihnimikeu, tro hë sa caasi me xatuane la itre xan troa madrin troa catre nyihlue i Iehova e hnine la ekalesia.—Mika 2:12.

³ Loi e tro sa ce wang la tulu i Iehova memine la itre xaa tulu e hnine la Tusi Hmitrötr matre xatua së troa ihnimi trejin.

4. Tune kaa la aqane amamane ngöne Iakobo 5:11 laka, Iehova a hnimi së?

⁴ Tusi Hmitrötr a amamane laka, nyimutre la itre thiina ka lolo i Iehova. Ej a qaja ka hape: “Akötresieti la ihnim.” (1 Ioane 4:8) Celë hi lai thiina ka upi së troa easenyi koi Nyidrë me nyisinee i Nyidrë. Ketre, Tusi Hmitrötr a qaja ka hape, “ka nyipi menyike la ihnimi i Iehova.” (E jë la Iakobo 5:11.) Drei la ketre thiina ka mingöming ka amamane la etrune la ihnimi së koi Iehova!

5. Nemene la aqane utipi së hnei Iehova, nge tune kaa la aqane tro sa nyitipu Nyidrë?

⁵ Ame ngöne Iakobo 5:11, kolo fe qaja la ketre thiina ka lolo i Iehova, ene la aqane utipine i Nyidrë. (Eso. 34:6) Iehova a utipi së ngöne la Nyidrëti a nue la itre ngazo së. (Sal. 51:1) Ngo ame e hnine la Tusi Hmitrötr, tha kolo hmekuje kö a qaja la troa nue la ngazo i ketre. Kolo fe a qaja la aliene hni së ngöne la easa öhne la ketre atr ka akötr nge ka aja ixatua. Öni Iehova ka hape, tha ceitui Nyidrëti kö memine la ketre thin; catrecatre kö la trenge aja i Nyidrë troa xatua së. (Is. 49:15) Celë hi matre, ame la easa cile kowe la itre jol, Iehova a canga xatua së. (Sal. 37:39; 1 Kor. 10:13) Easa utipine la itre trejin, ngöne la easa nue la ngazo hnei angatr hna kuca koi së me thele troa iloi. (Efe. 4:32) Ngo easa amamane la hni ne utipine së ngöne la angatr a cile kowe la itre jol. Eje hi, maine ihnim la ka upi së troa utipi angatr, easë lai a nyitipu Iehova, tulu ne ihnim.—Efe. 5:1.

6. Nemene la aqane amamane Dravita me Ionathana la ihnimi trejin?

⁶ Tusi Hmitrötr a qaja la itre atr ka tha pexeje kö nge ka hetre ihnimi trejin. Hanawang la tulu i Ionathana me Dravita. Öni Tusi Hmitrötr: ‘Ame hna acatrene la ihnimi Ionathana me Dravita, nge Ionathana a hnimi [Dravita] tune la aqane  hnimi angeice kö.’ (1 Sam. 18:1) Hnei Iehova hna ië Dravita matre troa nyihnai Saulo joxu. Ngo hnei Saulo hna zalu pi Dravita me thele troa humuthi angeic. Eloine pe tha hnei Ionathana kö, nekö i Saulo, hna ceme nyidrë troa humuthi Dravita. Hnei Ionathana me Dravita hna sisiny ka hape, tro palahi nyidroti a caas me lue nyipi sinee uti hë epine palua.—1 Sam. 20:42.

7. Maine ju, nemene la itre ewekë ka troa ajolëne la aqane imelekeu i Dravita me Ionathana?

⁷ Nyipici, nyine haine la aqane ihnimi Ionathana me Dravita. Maine ju, tha ijiji nyidroti kö troa lue nyipi sinee ke, tru catre kö Ionathana hui Dravita. Traqa koi 30 lao macatre ne iananyi nyidro. Ketre, maine ju tro Ionathana a mekun laka, ketre nekötrahmanyi Dravita nge pëkö hnei angeic hna atre. Ngo tha hnei Ionathana kö hna wangaconyi Dravita.

8. Pine nemene matre ketre nyipi sinee Ionathana koi Dravita?

⁸ Maine ju, tro Ionathana a zalu koi Dravita. Angeic la nekö i joxu, nge maine ju, angeic la ka troa mus thupe i Saulo, keme i angeic. (1 Sam. 20:31) Ngo hnei Ionathana hna hetre hni ne ipië me mele nyipici koi Iehova. Celë hi matre, hnei angeic hna sajuëne la mekuna i Iehova göi Dravita. Hnei angeic hna nyipici koi Dravita, ngacama hnei Saulo hna elëhni koi angeic.—1 Sam. 20:32-34.

9. Hnei Ionathana kö hna goeë Dravita ceitu me ketre ithupëjia? Qejepengöne jë.

⁹ Hnei Ionathana hna hnimi Dravita tune la sipu trejin me angeic, matre tha hnei angeice kö hna goeë Dravita ceitu me ketre ithupëjia. Eje hi, ka maca Ionathana troa huji pehna me isi. Ka hlemu fe angeic me Saulo troa “saqe . . . hune la ite aeto, nge cate hune la ite liona.” (2 Sam. 1:22, 23) Maine ju, tro Ionathana a pi mama fë la itre ewekë cili maine zalu pena koi Dravita. Ngo hnei Ionathana hna haine la aqane catre i Dravita me mejiune koi Iehova. Nge thupene lo Dravita a humuthi Goliatha, hnei Ionathana hna hnimi Dravita tui angeice kö. Tro sa amamane tune kaa la ihnimi së kowe la itre trejin, tui Ionathana me Dravita?

10. Nemene la aliene la kola hape, ‘catre jë ihnimikeu qa kuhu hni’?

¹⁰ Tusi Hmitrötr a qaja ka hape, loi e tro sa ‘catre ihnimikeu qa kuhu hni.’ (1 Pet. 1:22) Hnei Iehova hna amamai tulu koi së. Eje hi, maine tro sa mele nyipici me hnimi Iehova, tro hë Nyidrëti a hnimi së. (Rom. 8:38, 39) Ame la aliene la hnaewekë qene Geres, “catre” ke, kola qaja la ketre atr ka nue trengecatr matre troa amamane la ihnimi angeic. Ame itre xaa ijin, jole koi së troa amamane la ihnimi së kowe la itre trejin. Ngo nemene la nyine troa kuca ngöne la easa elëhni kowe la ketre trejin? Loi e tro sa catre “ixomihnikeu thenge la ihnim. Nge mele tingetinge jë me itre xan, nge isine jë troa acatrene la cas i nyipunie, lo hnei nyipunieti hna kapa jëne la ua.” (Efe. 4:1-3) Maine tro palahi sa thele tingeting memine la itre trejin, tha tro hë sa lapa mekune la itre tria i angatr. Ngo tro hë sa goeëne la itre trejin, ceitu me Iehova.—1 Sam. 16:7; Sal. 130:3.

11. Pine nemene matre tha ka hmaloi kö troa hnime la itre trejin e itre xaa ijin?

¹¹ Nyipici laka, ame itre xaa ijin, tha ka  hmaloi kö troa hnime la itre trejin, pine laka, atre hi së la itre hnepe ngazo ka eje thei angatr. Celë hi lai ka traqa ekö kowe la itre pane Keresiano. Ame Euodia me Sunetuke tre, lue föe ka “ce isigöline me [Paulo] la maca ka loi.” Ngo hnei nyidroti hna iwesitrë pine la ketre ewekë, ngo tha hna qaja kö hnei Tusi hmitrötr. Celë hi matre, hnei Paulo hna ithuecatre koi nyidroti troa “ca mekun thei Joxu.”—Fil. 4:2, 3.

12. Nemene la ka troa xatua së troa ihnimi trejin?

¹² Nemene la ka troa xatua së troa ihnimi trejin? Loi e tro sa thele troa atrepengöne hnyawa la itre trejin e hnine ekalesia, matre trotrohni angatr. Ketre, tha tro kö sa nue la itre macatre së ka iananyi maine nöje së troa sewe së troa caas. Loi e tro palahi sa mekune la tulu i Ionathana me Dravita. Ngacama 30 lao macatre ka iananyi nyidro, ngo lue treme sinee nyidro. Hapeu, ijije kö tro epuni a hane nyisineene la ketre trejin ka tru maine ka co e hnine la ekalesia? Maine eje hi, tro hë epuni a amamane laka, epuni a ‘hnime la lapa ne la itre trejin asë.’—1 Pet. 2:17.

13. Pine nemene matre ka epe së kowe la itre xaa trejin e hnine la ekalesia?

¹³ Ngo hapeu, tro kö sa easenyi catr kowe la nöjei trejin asë? Waea, easa easenyi catr kowe la itre trejin ka ce mekun me easë nge ka ajane la itre ewekë hne së fe hna ajan. Hnei Iesu hna hën asë la itre aposetolo i nyidrë ka hape, “sinee.” Ame pe, epe catre kö nyidrë koi Ioane. (Ioane 13:23; 15:15; 20:2) Ngo tha hnei Iesu kö hna ië hna hnim. Ame la Ioane me Iakobo, trejin me angeic, a sipo Iesu troa hamëne la ketre hnëqa ka tru ngöne la Baselaia i Akötresie, öni nyidrë: “Ame pë hë göi atre lapa ngöne götrane macang me ming, tre lue göhnë lai hna hnëkëne kö hnei Kakati thatraqane la itre hnei nyidrëti hna iën.” (Mar. 10:35-40) Tui Iesu, ngacama itre sinee së la itre xaa trejin, ngo tha tro pi kö sa ië hna hnim.  (Iako. 2:3, 4) Ame la ka ië hna hnim ke, ka thi lapa angeic. Celë hi matre, tha tro kö sa ië hna hnim e hnine la ekalesia.—Iudra 17-19.

14. Thenge la Filipi 2:3, nemene la ka troa xatua së troa caasi e hnine ekalesia?

¹⁴ Ame la easa hnime la itre trejin, easë lai a thele tingeting me caasi e hnine la ekalesia. Pane mekune jë lo tulu i Ionathana. Tha hnei Ionathana kö hna zalu koi Dravita ke, hnei Iehova hna ië angeic troa joxu. Ketre, tha hnei Ionathana kö hna goeë Dravita ceitu me ketre ithupëjia. Tro sa nyitipu Ionathana tune kaa? Tha tro kö sa zalu pine la itre trejin. Loi e tro pe sa hetre hni ne ipië me ‘mekune ka hape, sisitria kö itre xane hui’ easë. (E jë la Filipi 2:3.) Ketre, tha tro kö sa thëthëhmine laka, nyipiewekë asë hi së e hnine la ekalesia. Maine tro sa hetre hni ne ipië, tro hë sa goeëne la ka loi thene la itre trejin me xomi ini qa ngöne la aqane mele nyipici angatr.—1 Kor. 12:21-25.

15. Nemene la ini hne së hna xom qa ngöne la hna melën hnei Tanya me itre nekö i eahlo?

¹⁵ Ame la easa cile kowe la ketre jol, Iehova a akeukawane la hni së jëne la ihnim me ixatua ne la itre trejin. Hanawang la ketre ceitun. Hnene la ketre thin memine la köni nekö i eahlo hna sine la asabele ka tru, “Tha Tro Kö a Patre La Ihnim!” lo 2019 e Etazini. Ngo thupene la porogarame ne Mecixen hnaipajö, hna hnai angatr ngöne loto. Öni Tanya: “Thupene la asabele, hne huni hna bëeke hmaca kowe la hnë meköle hun. Jenge ju hi la loto huni hnene la ketre  trahmany. Ngacama pëkö ka eatr ngo eahuni asë a xou. Hnene la ketre trejin trahmany ka sine la asabele hna cile troa iati. Ngo tha nyidrëti hmekuje kö la ka xatua hun. Hnene fe la faifi lao trejin qa Suède ka traqa koi asabele, hna cil me xatua hun. Nge hnene la itre trejine föe hna xomi ni memine la neköng jajiny ngöne la ime i angatr. Celë hi ka akeukawane la hni nyio. Öning koi angatr ka hape, pëkö eatre hun, ngo xele angatr troa nue hun. Ame hë la kola traqa hnei polis me droketre, hnei angatr hna ce lapa me hun. Hnei angatre fe hna hamëne la itre hne huni hna ajan. Eje hi, öhne hi hune la etrune la ihnimi Iehova. Celë hi lai ka acatrene la ihnim me hni ne ole huni koi Iehova me kowe la itre trejin.” Hapeu, hnei epuni kö hna hane melëne lai? Hnene kö la ketre trejin hna hnimi epun ngöne la epuni a aja ixatua?

16. Nemene la thangane la troa hnime la itre trejin e hnine la ekalesia?

¹⁶ Nemene la thangane la troa hnime la itre trejin e hnine la ekalesia? Easa ithuecatre koi angatr ngöne la angatr a cile kowe la itre jol. Easa thele troa caas me tingeting la ekalesia. Easa anyipicine laka, itretre drei Iesu së nge kola thue aja kowe la itre xan troa hane lö ngöne la nyipi hmi. Ngo ame la ka sisitria ke, easa atrunyi Iehova, “Keme ka tru trenge utipin, me Akötresie ne iakeukawany.” (2 Kor. 1:3) Haawe, catre pi së troa amamane la ihnimi trejin e hnine la ekalesia!