1-3. Pine nemene matre kola treije hnene la itre xaa hlue i Iehova?

 EU LA ijine epuni a treij? Nyipici laka, easa treije ne madrin. Ngo ame itre xaa ijin, easa treij ke, hna meci hnene la ketre sinee së hna hnim. Öni Lorilei, ketre trejine föe qa Etazini: “Ame itre xaa ijin, thatreine kö ni xomihnine la meci ne la nekönge jajiny. Matre eni a akötr me hleuhleu. Kösë pëkö ka atreine akeukawane la hning me xatua ni.” *

² Hetre itre xaa kepin matre easa treij. Öni Hiromi, ketre pionie qa Zapo: “Ame itre xaa ijin, eni a kucakuca ke, pëkö ka drei ni ngöne la hna cainöj. Eni a treij me thithi koi Iehova troa xatua ni matre öhne la ketre atr ka thele la nyipici.”

³ Hapeu, hna hane fe traqa koi së la itre jole cili? Eje hi. (1 Pet. 5:9) Nyipici laka, easa ajane troa ‘nyihlue i Iehova memine la madrin,’ ngo ame itre xaa ijin, easa treij me akötr me hleuhleu ke, kola tupathe la lapaune së hnene la itre xaa jol. (Sal. 6:6; 100:2) Nemene la ka troa xatua së troa cile kowe la jole cili?

4. Nemene la hne së hna troa ce wang ngöne la tane mekun celë?

⁴ Hetre itre ini nyine tro sa xom qa ngöne la tulu i Iesu. Eje hi, hnei Iesu fe hna hane “treij” e itre xaa ijin. (Ioane 11:35; Luka 19:41; 22:44; Heb. 5:7) Tro sa pane ce wang la itre ijine cili, me xomi ini qa ngön. Nge tro fe sa  ce wang la itre nyine troa kuca ngöne la easa treij.

5. Nemene la itre ini hne së hna xom qa ngöne la hna melën hnei Iesu ngöne Ioane 11:32-36?

⁵ Ame ngöne lo ijine hnötr macatre 32 M.K., hna wezipo hnei Lazaro, sinee i Iesu hna hnim, me meci e thupen. (Ioane 11:3, 14) Maria me Maretha la lue xa i Lazaro nge tru la ihnimi Iesu koi angatr ala kön. Akötre me hleuhleu la mele i nyidro ngöne lo kola meci hnei Lazaro. Thupene lai, hnei Iesu hna tro Bethania, traon hna mele ngön hnei Maria me Maretha. Ame la Maretha a atre laka, Iesu a traqa, hnei angeic hna nyenyap troa itronyi me nyidrë. Pane mekune jë la aliene hni Maretha ngöne lo angeic a hape: “Joxu, maine nyipëti ju e celë, tha tro kö a meci la neköi jining.” (Ioane 11:21) Ame lo Iesu a öhnyi Maria me itre xan a treij, hnei nyidrëti fe “hna treij.”—E jë la Ioane 11:32-36.

6. Hnauëne la Iesu a treij ngöne la ijine cili?

⁶ Hnauëne la Iesu a treij ngöne la ijine cili? Kola qaja ngöne la itus, Étude perspicace des Écritures ka hape: “Hnei Iesu hna treij ke, hna meci hnei Lazaro, sinee i nyidrë. Ketre, hnei nyidrëti hna öhne la kola treij hnene la lue mama i Lazaro.” * Maine jë, Iesu a mekun la kola tithi Lazaro hnei mec, memine la akötre i angeic qëmekene tro angeic a mec. Nge tru la akötre i Iesu ngöne la kola treije pi Lazaro hnei Maria me Maretha. Maine jë, hna hane traqa fe koi epun la akötre cili, ngöne la kola meci la ketre sinee i epun. Tro sa ce wang la köni ini qa ngöne la ijine Iesu a treij.

7. Nemene la ini hne së hna xom göi Iehova, qa ngöne la Iesu a treije pine la itre sinee i nyidrë?

⁷ Öhne hi Iehova la itre aliene hni së. Iesu “la hnaiji” Iehova, Keme i nyidrë. (Heb. 1:3) Celë hi matre, ame lo Iesu a treij ke, nyidrëti a amamane la itre  aliene hni Iehova. (Ioane 14:9) Eje hi, öhne hi Iehova la akötre i epun ngöne la kola meci la ketre sinee i epun. Nge Nyidrëti fe a akötr. Nyidrëti a ajane troa akeukawane la hni epun me xatua epun—Sal. 34:18; 147:3.

8. Pine nemene matre xecie koi së laka, tro Iesu a amelene la itre sinee së ka mec?

⁸ Iesu a ajane troa amelene hmaca la itre sinee së ka mec. Qëmekene tro Iesu a treij, hnei nyidrëti hna qaja koi Maretha, ka hape: “Tro la jini eö a mele hmaca.” Hnei Maretha hna mejiune koi Iesu. (Ioane 11:23-27) Ketre hlue i Iehova Maretha, matre atre hi angeic la itre ijine kola amelene hmaca la itre atr hnei Elia perofeta me Elisaia. (1 Ite jo. 17:17-24; 2 Ite jo. 4:32-37) Maine jë, hnei angeice fe hna hane dreng la itre ijine Iesu a amelene hmaca la itre xan. (Luka 7:11-15; 8:41, 42, 49-56) Haawe, loi e xecie fe koi epun laka, tro hmaca epuni a iöhnyi memine la itre sinee i epuni ka meci hë. Eje hi, hnei Iesu hna treij ngöne lo nyidrëti a akeukawane la hni ne la itre sinee i nyidrë. Kolo lai a amamane la aja i nyidrë troa amelene hmaca la itre atr!

9. Tune kaa la aqane tro sa nyitipu Iesu me xatuane la itre ka treij me akötr? Qaja jë la ketre ceitun.

⁹ Ijije hi tro sa xatuane la itre ka treij me akötr. Tha hnei Iesu hmekuje kö hna ce treij me Maretha me Maria. Ngo hnei nyidrëti mina fe hna drei nyidro me akeukawane la hni nyidro. Ketre tu së fe, loi e tro sa xatuane la itre ka treij me akötr. Öni Dan, ketre qatre thup qa Australie: “Eni a aja ixatua ngöne lo kola meci la föeng. Hnene la itre xaa trefën hna traqa troa wai ni e lai me jidr me drei ni. Hnei angatr hna nue ni troa treij, me xatua ni. Hnei angatr hna wasine la lotong, me komisio, me kuci xen ngöne la eni a kucakuca. Nge hnei angatr hna ce thithi me eni. Eje hi, itre ‘trejin angatr ngöne la itre ijine akötr.’ ”—Ite edomë 17:17, MN.

10. Thenge la Luka 19:36-40, nemene la ka traqa koi Iesu?

¹⁰ Hnei Iesu hna traqa e Ierusalema lo 9 Nisan 33 M.K. Alanyimu la itre ka traqa me seluthe la itre iheetre i angatr hune la gojeny ke, aja i angatr troa acili nyidrë troa joxu. Maine jë, angatr a madrin ngöne la ijine cili. (E jë la Luka 19:36-40.) Ngo thatre kö la itretre drei Iesu la itre ewekë ka troa traqa e thupen. “Ame ju hi la [Iesu] a easenyin e Ierusalema, nyidrëti a pane goeëne ju la traon, me treije pin.” Iesu a treij ke, atre hi nyidrëti la ka troa traqa kowe la traon e Ierusalema.—Luka 19:41-44.

11. Pine nemene matre hnei Iesu hna treije pine la traon e Ierusalema?

¹¹ Ngacama hna kepe Iesu hnyawa hnene la angetre Iudra, ngo alanyimu kö la ka thipetrije la maca ne la Baselaia. Celë hi kepin matre nyidrëti a treij. Eje hi, kola troa lep apatrene la traon e Ierusalema, nge tro la angetre Iudra a po ngöne la ketre nöje trenyiwa. (Luka 21:20-24) Tune la hna perofetan hnei Iesu, nyimutre la itre atr ka tha drei nyidrë. Nge tune kaa ngöne la hneijine së? Maine jë, ala xalaithe hi la itre ka kapa la nyipici. Ngo tune kaa la aqane troa xatua së hnene la hna melën hnei Iesu? Tro sa ce wang la köni ini.

12. Nemene la ini hne së hna xom göi Iehova, ngöne la Iesu a treije pine la itre atr hnei nyidrëti hna cainöje kow?

 ¹² Tru la ihnimi Iehova kowe la itre atr. Celë hi lai ka mama ngöne lo Iesu a treij. “Xele kö Nyidrë troa apatrene la ketre e nyipunie, ngo loi e tro pe nyipunieti asë a ietra.” (2 Pet. 3:9) Ame enehila, easa amamane la ihnimi së kowe la itre atr, ngöne la easa catre cainöj matre ketr la hni angatr hnene la maca ka loi ne la Baselaia.—Mat. 22:39. *

13-14. Tune kaa la aqane utipine Iesu la itre atr, nge tro sa nyitipu nyidrë tune kaa?

¹³ Hnei Iesu hna catre cainöj. Hnei nyidrëti hna amamane la ihnimi nyidrë kowe la itre atr, me ini angatr. (Luka 19:47, 48) Pine nemen? Pine laka, nyidrëti a utipi angatr. Ame itre xaa ijin, alanyimu catre palaha la ka ajane troa drei Iesu, matre pëkö ijine tro nyidrë me itretre drei nyidrëti a xen. (Mar. 3:20) Ketre, hnei nyidrëti hna wang la ketre atr e jidr. (Ioane 3:1, 2) Eje hi, tha canga xötrethenge Iesu kö hnene lo itre ka drei nyidrë. Ame pe, hnei angatr asë hna dreng la maca hna tro fë hnei Iesu. Ame enehila, easa ajane tro la nöjei atr a dreng la maca ka loi. (Itre hu. 10:42) Celë hi matre, loi e tro palahi sa catre cainöj.

¹⁴ Loi e troa saze la aqane tro sa cainöj. Maine tro sa saze la itre hawa ne easa cainöj, tro hë së lai a ketr la itre atr ka hetre hni ne aja kowe la maca ka loi. Öni Matilda, ketre pionie: “Eni me föeng a saze la itre hawa ne nyio a hëne la itre atr. Ame e hmahmakany, nyio a cainöj kowe la itre atr ka huliwa ngöne magazë. Ame ngöne la ijine xen, nyio a cainöje fë i présentoir. Nge ame e hnaipajö hej, nyio a cainöj ngöne la itre hnalapa trootro.” Haawe, tha tro hmekuje kö sa cainöj ngöne la ijine hne së hna ajan. Ngo loi e tro fe sa saze la itre hawa ne cainöje së, matre iöhnyi memine la nöjei atr. E cili, tro hë sa amadrinë Iehova.

15. Thenge la Luka 22:39-44, nemene la ka traqa ngöne lo jidri tixenuë i Iesu e celë fen?

¹⁵ Ame lo 14 Nisan 33 M.K., ene lo jidri tixenuë i Iesu e celë fen, hnei nyidrëti hna tro kowe la gatran e Gethesemane. Nge hnei nyidrëti hna catre thithi koi Iehova. (E jë la Luka 22:39-44.) Eje hi, Iesu a cile kowe la itre jol ka tru, matre hnei nyidrëti hna “tro fë . . . la itre xëwe me itre sipo hna sue catre fë ce me trenge timidra.” (Heb. 5:7) Nemene la hna sipon hnei Iesu? Hnei nyidrëti hna sipo trengecatre koi Iehova, matre troa atreine mele nyipici me kuca la aja i Nyidrë. Öhne hi Iehova la kola hnehengazo hnene la Nekö i Nyidrë, matre hnei Nyidrëti hna upe la ketre angela troa aegöcatrenyi Iesu.

16. Pine nemene matre hnei Iesu hna treij ngöne la gatran e Gethesemane?

¹⁶ Ame lo Iesu ngöne la gatran e Gethesemane, hnei nyidrëti hna treij. Pine nemen? Pine laka, xele kö nyidrëti troa silitrengathoi nyidrë. Ketre, atre hi Iesu la hnëqa ka tru hna ahnithe koi nyidrë, ene la troa cilëgöline la ëje ne la Keme i nyidrë me mele nyipici uti hë la pun. Haawe, nemene la ini hne së hna xom qa ngöne la ijine cili, ngöne la kola tupathe la lapaune së? Tro sa ce wang la köni mekun ka tru.

17. Nemene la ini hne së hna xom qa ngöne la aqane sa Iehova la itre thithi Iesu?

¹⁷ Iehova a dreng la itre xëwe së. Hnei Iehova hna dreng la itre thithi Iesu. Pine nemen? Pine laka, ame la ka sisitria koi Iesu ke, troa mele nyipici koi Iehova me cilëgöline la ëje i Nyidrë. Maine celë fe hi lai hne së hna hnehengazon, tro Iehova a sa la itre thithi së me xëwe së. Nge tro kö Nyidrëti a xatua së.—Sal. 145:18, 19.

18. Pine nemene matre Iesu la ketre sinee ka ihnim me utipin?

¹⁸ Öhne hi Iesu la itre aliene hni së. Ame la easa kucakuca, hapeu, tha aja së kö troa hane xatua së hnene la ketre sinee ka melëne fe la jole cili? Celë hi lai hna kuca hnei Iesu koi së. Atre hi nyidrëti  la pengön ne la atr ka kucakuca me aja ixatua. Trotrohni së hi hnei nyidrë, nge tro kö nyidrëti a xatua së “ngöne la nyipi ijin.” (Heb. 4:15, 16) Eje hi, hnei Iesu lo hna kapa la ixatua ne la angela ngöne la gatran e Gethesemane. Haawe, loi e tro fe sa kapa la ixatua qaathei Iehova jëne la itre itusi së, me video, me cainöj, me itre qatre thup maine itre xaa trejin ka macaj.

19. Nemene la ini hne së hna xom qa ngöne la hna melën hnei Luz?

¹⁹ Tro Iehova a hamë së “la tingeting.” Tune kaa la aqane tro Iehova a aegöcatrenyi së? Nyidrëti a sa la itre thithi së me hamë së la “tingetinge hna thatreine trotrohnine hnei atr.” (Fil. 4:6, 7) Jëne la tingeting hna hamën hnei Iehova, kola lolo la hni së me itre mekuna së. Celë hi lai hna melën hnei Luz, ketre trejine föe. Öni angeic: “Eni a lapa caas, matre ame itre xaa ijin, eni a mekun laka, tha hnimi ni kö hnei Iehova. E cili, eni a canga thithi koi Iehova me qaja la itre aliene hning. Celë hi lai ka xatua ni troa xomihnine la itre akötr.” Kola mama ngöne la tulu i Luz laka, maine tro sa catre thith, tro ha tingeting me lolo la hni së.

20. Nemene la itre ini hne së hna xom qa ngöne la itre trenge timidra i Iesu?

²⁰ Nyimutre la itre ini hne së hna xom qa ngöne la itre ijine Iesu a treij! Kola amekunë së tro palahi a akeukawane la hni ne la itre sinee së ka meci sineen. Kolo fe a acatrene la mejiune së laka, tro kö Iehova me Iesu a xatua së ngöne la kola meci la ketre sinee së. Ketre, kola ithuecatre koi së troa nyitipu Iehova me Iesu, me utipine la itre atr ngöne la hna cainöj. Nge kolo fe a akeukawane la hni së la easa atre laka, trotrohnine hi Iehova me Iesu la itre aliene hni së, nge aja i nyidro troa xatua së. Haawe, catre pi së trongëne la itre ini cili, uti hë la ijine tro Iehova a “köletrije la itre trenge timidra qa ngöne la itre lue meke [së]”!—Hna ama. 21:4.