TANE MEKUN 4
Kepin Matre Easa Sine La Drai Ne Amekunën
“Tro pala pë hë nyipunie a kuca la, nyine mekune koi ni.”—LUKA 22:19.
NYIMA 20 Cilieti a Nue La Nekö Hnimina i Cilie
MEKUN KA TRU *
1-2. (a) Eu la ijine easa mekun la ketre sinee së ka mec? (b) Nemene la hna acile hnei Iesu ngöne lo jidr qëmekene tro nyidrëti a mec?
NGACAMA nyimutre la itre macatre ne meci la ketre sinee së, ngo easë palahi a meku angeic. Celë hi matre, ame ngöne la drai ne meci angeic, easë hmaca a mekun lo itre ijine easa ce mel.
2 Ame ngöne la macatre, easa sine memine la itre milio lao atr e cailo fen la drai ne meci Iesu Keriso, ketre atr hne së hna hnim. (1 Pet. 1:8) E cili, easa lapa mekun la hna kuca hnei Iesu thatraqai së memine la aqane thepe së qa ngöne la ngazo me mec. (Mat. 20:28) Eje hi, Iesu a ajane tro la itretre drei nyidrë a lapa mekun la meci nyidrë. Ame lo jidr qëmekene tro nyidrëti a mec, hnei nyidrëti hna acile la ketre ijine xeni ka sisitria, me hape: “Tro pala pë hë nyipunie a kuca la, nyine mekune koi ni.”—Luka 22:19.
3. Nemene la hne së hna troa ce wang ngöne la tane mekun celë?
3 Ame thene la itre ka sine la Drai Ne Amekunën la meci Keriso ke, ala xalaithe hi la itre ka mejiune troa mel e hnengödrai. Ame la itre milio lao atr ka sine la ijine cili, angatr a mejiune troa mel e celë fen. Ame ngöne la tane mekun celë, tro sa ce wang la itre kepin matre, tru la aja ne la lue gurupe cili troa sine la Drai Ne Amekunën e nöjei macatre. Tro fe sa ce wang la itre manathith hne së hna troa kapa qa ngöne la hna atrune la drai cili. Haawe, tro sa pane ce wang la itre kepin matre kola sine la drai cili hnene la itre trejin hna iën.
KEPIN MATRE ITRE HNA IËN A SINE LA DRAI NE AMEKUNËN
4. Pine nemene matre itre trejin hna iën a xeni la falawa me ije la waina ngöne la Drai Ne Amekunën?
4 Ame ngöne la macatre, itre trejin hna iën a lapa treqen la Drai Ne Amekunën ke, hetre hnei angatr hna troa kuca ngöne la ijine cili. Pine nemene matre angatr a xeni la falawa me ije la waina? Tro sa pane ce wang la ka traqa ngöne la jidri tixenuë i Iesu e celë fen. Thupene la Paseka, hnei Iesu hna acile la Xeni Heji Ne La Joxu. Hnei nyidrëti hna tro fë trongëne la falawa me waina kowe la ala 11 lao aposetolo ka mele nyipici, me upi angatr troa xeni me ij. Hnei Iesu hna qaja koi angatr la lue isisinyikeu, ene la isisinyikeu ka hnyipixe memine la isisinyikeu göne la Baselaia. * (Luka 22:19, 20, 28-30) Hnene la lue isisinyikeu cili hna aijijëne la itre aposetolo me itre xaa trejin e thupen, troa hane joxu me atre huuj e koho hnengödrai. (Hna ama. 5:10; 14:1) Celë hi matre, itre hna iën * hmekuje hi la ka ijij troa xome la falawa me waina ngöne la Drai Ne Amekunën.
5. Nemene la hna atre hnene la itre hna iën göne la mejiune i angatr?
5 Ame la ketre kepin matre itre hna iën a lapa treqene la Drai Ne Amekunën ke, angatr a lapa mekun la mejiune i angatr elany. Eje hi, tru catre la itre manathith hnei angatr hna troa kapa elany qaathei Iehova. Tro angatr a hetrenyi la mel ka pë pun, me ce musi me Iesu Keriso memine la ala 144 000. Ketre, tro fe angatr a ceme Iehova Akötresie e koho hnengödrai! (1 Kor. 15:51-53; 1 Ioane 3:2) Atre hi angatr laka, itre manathithi hi lai qaathei Iehova. Ngo nyipiewekë tro angatr a mele nyipici uti hë la angatr a mec. (2 Tim. 4:7, 8) Eje hi, itre hna iën a madrin troa lapa mekun la mejiune i angatr elany. (Tito 2:13) Ngo tune kaa la “itre xaa mamoe”? (Ioane 10:16) Hnauëne la angatr a sine la Drai Ne Amekunën?
KEPIN MATRE ITRE XAA MAMOE A SINE LA DRAI NE AMEKUNËN
6. Pine nemene matre itre xaa mamoe a sine la Drai Ne Amekunën e nöjei macatre?
6 Ame la itre xaa mamoe, angatr a sine la Drai Ne Amekunën, ngo tha angatre kö a xome la falawa me waina. Angatre hi a goeën. Ame lo 1938, hna hën la itre xaa mamoe troa hane sine la Drai Ne Amekunën. Kola qaja ngöne la Ita Ne Thup ne 1 Maac 1938, ka hape: “Ijije hi tro la [itre xaa mamoe] a sine me goeëne la hna kuca ngöne la icasikeu cili. . . . Ketre ijine madrine lai koi angatr.” Ceitune hi lai memine la easa sine la ketre faipoipo. Itre xaa mamoe a madrine troa sine la Drai Ne Amekunën.
7. Pine nemene matre itre xaa mamoe a lapa treqene la cainöj hna cile fë ngöne la Drai Ne Amekunën?
7 Itre xaa mamoe a lapa mekun la mejiune i angatr elany. Angatr a lapa treqene la cainöj hna troa tro fë ngöne la Drai Ne Amekunën. Kola troa qaja la itre manathith hne së hna troa kapa ngöne la 1 000 lao macatre ne ce musi Keriso memine la ala 144 000. Eje hi, tro angatr a aparadraisone la ihnadro, me xatuane la nöjei atr asë elany troa pexej. Itre ka sine la Drai Ne Amekunën a lapa mekun la ijine kola troa eatre la itre hna perofetan hnei Tusi Hmitrötr, ngöne Isaia 35:5, 6; 65:21-23; me Hna Amaman 21:3, 4. Ame la easa lapa mekun la mele së elany ngöne la fene ka hnyipixe, kola acatrene la mejiune së nge kolo fe a xatua së troa catre nyihlue i Iehova.—Mat. 24:13; Gal. 6:9.
8. Nemene la ketre kepin matre itre xaa mamoe a sine la Drai Ne Amekunën?
8 Hane hi la ketre kepin matre itre xaa mamoe a sine la Drai Ne Amekunën. Angatr a ajane troa amamane la ihnimi angatr me caas memine la itre hna iën. Tusi Hmitrötr a qaja ka hape, tro la itre hna iën a ce huliwa memine la itre ka mejiune troa mel e celë fen. Kola hapeue lai? Tro sa ce wang la itre xaa ceitun.
9. Thenge la hna perofetan ngöne Zakaria 8:23, nemene la aqane goeëne la itre hna iën hnene la itre xaa mamoe?
9 E jë la Zakaria 8:23. Ame ngöne la hna perofetan celë, kola qaja la aqane ce huliwa ne la itre xaa mamoe memine la itre hna iën. Ame lo hna hape, “atre Iudra” me “nyipunie,” tre, kola qaja la itre trejin hna iën. (Rom. 2:28, 29) Nge ame lo “ala [10] qa ngöne la itre qene hlapa asë,” tre, kola qaja la itre xaa mamoe. Angatr a “xölehuje” maine caasi memine la itre hna iën, me ce nyihlue i Akötresie. Celë hi matre, itre xaa mamoe a ce sine memine la itre hna iën la Drai Ne Amekunën.
10. Nemene la aqane eatrëne Iehova la hna perofetan ngöne Ezekiela 37:15-19, 24, 25?
10 E jë la Ezekiela 37:15-19, 24, 25. Hnei Iehova hna eatrëne la hna perofetan celë, me acasine la itre hna iën memine la itre xaa mamoe. Ame ngöne la hna perofetan, kola qaja la lue sinöe. Ame la itre ka mejiun troa mel e koho hnengödrai ke, angatre la sinöe “i Iudra” (tribu ne la itre joxu ne Isaraela ekö). Nge ame la itre ka mejiune troa mel e celë fen ke, angatre la sinöe “i Eferaima.” * Hnei Iehova hna acasine la lue gurup cili, matre troa “caa sinöe.” Kolo lai a hape, angatr a ce nyihlue i Akötresie fene la musi Iesu Keriso. Ame ngöne la macatre, itre hna iën me itre xaa mamoe a sine la Drai Ne Amekunën. Tha lue gurupe hmaca kö, ngo angatr asë hi ngöne la “caa hna axö mamoe” nge ‘caasi hi la atre thupën.’—Ioane 10:16.
11. Thenge la Mataio 25:31-36, 40, tune kaa la aqane sajuëne la itre trejin me Keriso hnene la itre xaa mamoe?
11 E jë la Mataio 25:31-36, 40. Ame la “itre mamoe” hna qaja ngöne la xötr celë, tre, kola qaja la itre ka mejiune troa mel e celë fen, nge ka mele nyipici ngöne la itre drai ne la pun. Angatr a sajuëne la itre trejin me Keriso me xatua angatr troa eatrën la huliwa ne cainöj me inine la itre atr e cailo fen asë.—Mat. 24:14; 28:19, 20.
12-13. Nemene la aqane amamane la itre xaa mamoe laka, angatr a sajuëne la itre trejin me Keriso?
12 Ame e nöjei macatre, itre xaa mamoe a sajuëne la itre trejin me Keriso. Eje hi, itre wiik qëmekene la Drai Ne Amekunën, angatr a catre cainöj me hëne la itre atr troa hane sine la drai cili. (Wange ju la hna eköhagen hna hape, “ Epuni Kö a Hnëkë Kowe La Drai Ne Amekunën?”) Ketre, angatre fe a ixatua me hnëkë hnyawa matre troa tro loi la Drai Ne Amekunën ngöne la nöjei ekalesia, ngacama pëkö trejin hna iën thei angatr. Itre xaa mamoe a madrin troa sajuëne la itre trejin me Keriso. Atre hi angatr laka, ame la nöjei ewekë hnei angatr hna kuca kowe la itre trejin hna iën ke, kösë angatre hi lai a kuca koi nyidrë.—Mat. 25:37-40.
13 Nemene la itre xaa kepin matre easë asë hi a sine la Drai Ne Amekunën, ngacama isa mejiune së kö elany?
KEPIN MATRE EASË ASË HI A SINE LA DRAI NE AMEKUNËN
14. Nemene la aqane amamane Iehova me Iesu la ihnimi nyidroti koi së?
14 Tru la hni ne ole së kowe la ihnimi Iehova me Iesu. Eje hi, nyimutre la aqane amamane Iehova la ihnimi Nyidrëti koi së. Ngo ame la ka sisitria ke, hnei Nyidrëti hna upe la Nekö hnimina i Nyidrë matre troa akötre me meci pi së. (Ioane 3:16) Nge ketre hatrene fe hi lai ne la ihnimi Iesu. (Ioane 15:13) Thatreine kö tro sa të hmaca koi Iehova me Iesu la ihnim hnei nyidroti hna amamane koi së. Ame pe, ijije hi tro sa amamane la hni ne ole së ngöne la aqane mele së e nöjei drai. (Kol. 3:15) Nge ame la easa sine la Drai Ne Amekunën, kola amekunë së la ihnimi Iehova me Iesu koi së, nge kolo fe a aijijë së troa amamane la ihnimi së koi nyidro.
15. Pine nemene matre itre hna iën me itre xaa mamoe a wangatrune la thupene mel?
15 Easa wangatrune la thupene mel. (Mat. 20:28) Itre trejin hna iën a wangatrune la thupene mel ke, celë hi ka aijijë angatr troa kapa la itre manathith qaathei Iehova. Pine laka, angatr a lapaune kowe la mele hna huujën hnei Keriso, matre Iehova a jelemeköti angatr me nyi kuku angatr. (Rom. 5:1; 8:15-17, 23) Atraqatre fe la hni ne ole ne la itre xaa mamoe kowe la thupene mel. Eje hi, jëne la madra hna huujën hnei Keriso, Akötresieti a kepe angatr, me aijijë angatr troa hane nyihlue i Nyidrë, nge angatre fe a mejiune troa mele pe qa ngöne la “akötr atraqatr.” (Hna ama. 7:13-15) Haawe, itre hna iën me itre xaa mamoe a amamane la hni ne ole i angatr kowe la thupene mel, ngöne la angatr a sine la Drai Ne Amekunën e nöjei macatre.
16. Pine nemene matre easa sine la Drai Ne Amekunën?
16 Easa sine la Drai Ne Amekunën ke, easa ajane troa drengethenge Iesu. Ngacama isa mejiune së kö elany, ngo easë asë hi a ajane troa trongëne la hna amekötin hnei Iesu ngöne lo jidri tixenuë i nyidrë e celë fen, ka hape: “Tro pala pë hë nyipunie a kuca la, nyine mekune koi ni.”—1 Kor. 11:23, 24.
ITRE MANATHITH QA NGÖNE LA HNA SINE LA DRAI NE AMEKUNËN
17. Pine nemene matre ame la easa sine la Drai Ne Amekunën, kola xatua së troa easenyi catr koi Iehova?
17 Easa easenyi catr koi Iehova. (Iako. 4:8) Tune la hne së hna ce wang, ame ngöne la ijine ne la Drai Ne Amekunën, easa lapa mekun la mejiune së qaathei Iehova memine la ihnimi Nyidrëti koi së. (Iere. 29:11; 1 Ioane 4:8-10) Kolo lai a acatrene la ihnimi së koi Iehova, nge easa easenyi catr koi Nyidrë.—Rom. 8:38, 39.
18. Nemene la thangan e tro sa lapa mekun la tulu i Iesu?
18 Kola upi së troa nyitipu Iesu. (1 Pet. 2:21) Ame la itre drai qëmekene la Drai Ne Amekunën, easa lapa mekun la wiik tixenuë i Iesu e celë fen, memine la meci nyidrë, me ijine kola amele nyidrëti hmaca. Nge ame la cainöj hna tro fë ngöne la Drai Ne Amekunën, tre, kola qaja la ihnimi Iesu koi së. (Efe. 5:2; 1 Ioane 3:16) Ame la easa e me lapa mekun la tulu i Iesu, kola upi së troa “tro thenge lo aqane tronge i nyidrë.”—1 Ioane 2:6.
19. Tune kaa la aqane tro sa lapa ngöne la ihnimi Akötresie?
19 Kola thue aja së troa lapa ngöne la ihnimi Akötresie. (Iudra 20, 21) Easa lapa ngöne la ihnimi Akötresie, ngöne la easa catre drengethenge Nyidrë, me atrune la ëje i Nyidrë, me amadrinë Nyidrë. (Ite Edomë 27:11; Mat. 6:9; 1 Ioane 5:3) Ame la easa sine la Drai Ne Amekunën, kola thue aja së tro palahi a mele nyipici koi Iehova, me qaja koi Nyidrë ka hape, ‘Eni a ajane troa lapa ngöne la ihnimi nyipë uti hë epine palua!’
20. Pine nemene matre easa sine la Drai Ne Amekunën?
20 Ngacama easa mejiune troa mel e hnengödrai maine e celë fen, ngo hetre itre kepin matre easa sine la Drai Ne Amekunën. Ame ngöne la drai cili, kola amekunë së la meci Iesu Keriso, ketre atr hne së hna hnim. Ngo ame la ka sisitria ke, kola amekunë së la hatrene ihnimi ka tru qaathei Iehova, ene lo Nyidrëti a upe la Nekö i Nyidrë troa meci pi së. Ame la macatre celë, easa troa atrune la Drai Ne Amekunën e Draikatru 15 Eiperem 2022. Nyipici, tru la ihnimi së koi Iehova me Iesu, matre pëkö ketre ewekë ka troa sewe së troa sine la Drai Ne Amekunën.
NYIMA 16 Atrunyi Iehova Jë Me Siana i Nyidrë
^ Ngacama easa mejiune troa mel e celë fen maine e koho hnengödrai, ngo easë asë hi a madrin troa sine la Drai Ne Amekunën e nöjei macatre. Tro sa ce wang la itre mekun qa hnine la Tusi Hmitrötr ka amamane la enyipiewekëne la drai cili memine la itre manathith hne së hna troa kapa.
^ Maine epuni a aja itre xaa ithuemacany göne la isisinyikeu ka hnyipixe me isisinyikeu göne la Baselaia, wange ju la tane mekun hna hape, “Tro Nyipunie a Baselaia Angete Huj” ngöne la Ita Ne Thup ne 15 Okotropa 2014, g. 10-15.
^ GÖI TROA TROTROHNIN: Ame la itre hna iën, tre, kola qaja la itre Keresiano hna iën nge ka mele palakö e celë fen.
^ Maine epuni a aja itre xaa ithuemacany göne la lue sinöe hna qaja ngöne Ezekiela mekene 37, wange ju la “Itre Hnyinge Ne La Itre Ka e” ngöne la Ita Ne Thup ne Julai 2016.
