1-2. Pine nemen matre easa atrune la Drai Ne Amekunën e nöjei macatre?

 HNEI Iesu hna huujëne la mele i nyidrë thatraqai së a 2 000 hë lao macatre enehila. Celë hi ka aijijë së troa hane kapa la mel ka pë pun. Ame lo jidr qëmekene tro Iesu a mec, hnei nyidrëti hna upe la itretre drei nyidrë troa atrune la drai cili, hnei falawa me waina matre tha tro kö angatr a thëthëhmine la hnei nyidrëti hna kuca.—1 Kor. 11:23-26.

² Easa trongëne la hnei Iesu hna amekötin ke, tru catr la ihnimi së koi nyidrë. (Ioane 14:15) Ame e nöjei macatre, ngöne la ijine Drai Ne Amekunën, easa xomi ijine troa lapa mekun la aliene la meci nyidrë me thith, matre troa amamane la hni ne ole së kowe la hnei nyidrëti hna kuca. Ketre, easa catre cainöj me hëne la nöjei atr troa sine la drai cili ka sisitria. Haawe, nyipiewekë tro sa sine la Drai Ne Amekunën, nge pëkö ketre ewekë ka troa sewe së.

3. Nemen la hne së hna troa ce wange ngöne la tane mekune celë?

³ Ka nyipiewekë catre kowe la itre hlue i Iehova troa atrune la meci Iesu. Köni aqane amaman angatre lai, ene la: (1) troa trongëne hnyawa la tulu hna amekötine hnei Iesu, (2) troa hëne la nöjei atr troa sine la Drai Ne Amekunën, me (3) troa atrune ej, ngacama tru catre la itre jole së. Celë hi köni mekun hne së hna troa ce wang ngöne la tane mekune celë.

4. Nemen la itre nyipici hna amexej e nöjei macatre ngöne lo cainöj ne Drai Ne Amekunën, nge pine nemen matre tha tro pi kö sa wangacon itre ej? (Luka 22:19, 20)

⁴ Ame e nöjei macatre ngöne la ijine Drai Ne Amekunën, easa dreng la ketre cainöj hna nyitrepene hnei Tusi Hmitrötr, nge ka sa hnyawane la itre hnying. Ej a qejepengöne la kepine matre ka nyipiewekë koi së la thupene mel, me amamane laka, jëne la meci ne la ala cas, tro ha nue la ngazo ne la ka alanyim. Ketre, ej a amekunë së la hna nyihatrene hnene la falawa me waina, me qaja la itre ka ijij troa xen la falawa me iji la waina. (E jë la Luka 22:19, 20.) Eje mina fe a aijijë së troa lapa mekun la itre manathith hna troa kapa elany hnene la itre ka mejiun troa mel e celë fen. (Is. 35:5, 6; 65:17, 21-23) The wangacone kö së la itre nyipici cili. Traqa koi itre miliar lao atr ka thatre itre ej, memine la enyipiewekëne la mel hna huujëne hnei Iesu. Nge ame la angatr a atrune la Drai Ne Amekunën, tha angatre fe kö a xötrethengene la tulu hna amekötin hnei Iesu. Pine nemen?

5. Thupene la kola mec lo itre aposetolo, pine nemen matre tha metrötrëne hë la itre atr lo tulu hnei Iesu hna amekötin?

⁵ Thupene la kola mec hnene la itre aposetolo, hna lö hnine la ekalesia hnene la itre keresiano thoi. (Mat. 13:24-27, 37-39) Hnei angatr hna qaja “la itre ewekë ka qaliqali, matre hule koi angatr la itretre dreng.” (Itre hu. 20:29, 30) Hnene la itre keresiano thoi cili hna inine la itre atr ka hape, tha hnei Iesu kö “hna aca huujë nyidrë matre thu la itre ngazo ne la ka ala nyim,” tune la hna qaja hnei Tusi Hmitrötr, ngo tro pe a anyimua kuca la huuje cili. (Heb. 9:27, 28) Ame enehila, tru catr la itre atr ka mejiun kowe la ini ka thoi cili. Angatr a tro e nöjei wiik maine e nöjei drai koi uma hmitrötr, matre troa atrun lo hna hape, “le sacrifice de la Messe.” b Ame pena la itre xaa hmi, tha nyipiewekë kö koi angatr troa atrune lapane la ijine meci Iesu. Nge thatre kö angatr la aliene la thupene mel. Itre xan a hnying ka hape, ‘Ijije kö tro la meci Iesu a köletrije la itre ngazong?’ Pine nemen matre angatr a luelu? Pine laka, hna amenu angatr hnene la itre ka qaja ka hape, tha ijiji kö tro la mele hna huujën hnei Iesu a köletrije la itre ngazo i angatr. Hnene la itre nyipi keresiano hna öhne tune kaa la nyipici?

6. Ame lo 1872, nemen la hna trotrohnine hnei Charles Russel me itre ka ce huliwa me nyidrë?

⁶ Ame ngöne la pun lo itre macatre 1 800, hnei Charles Russell me itre ka ce huliwa me nyidrë hna xomi ijine troa thele hnyawa la itre ini qa hnine la Tusi Hmitrötr. Hnei angatr hna thele troa trotrohnine la nyipi aliene la mel hna huujën hnei Iesu, me aqane troa atrun la drai ne meci nyidrë. Ame lo 1872, angatr petre hi a trotrohnine ka hape, hnei Iesu hna nue la mele i nyidrë kowe la nöjei atr asë. Ame la angatr a atre lai ke, hnei angatre hna canga tro fë la ini cili ka hnyipixe, jëne la itre itus, me itre nuvel, me itre zonal. Nge e cili, angatre fe hë a atrun ngöne la macatre la Drai Ne Amekunën, tune lo itre pane keresiano ekö.

7. Nemene la thangane koi së la hna ithel hnei Charles Russell me itre ka ce huliwa me nyidrë?

⁷ Easa kepe thangane enehila, lo hna ithele hnyawa ekö, hnene lo itre keresiano. Jëne lai, hnei Iehova hna amamai së  la aliene la mel hna huujën hnei Iesu, memine la eloine kowe la itre atr elany. (1 Ioane 2:1, 2) Ketre, trotrohnine hë së ka hape, ame thene la itre hlue i Akötresie, hetre ka troa mel e hnengödrai me mele palua e celë fen. Ame la easa öhne la ihnimi Iehova, memine la itre manathith hne së hna kapa jëne la huuje i Iesu, ke kola easenyi së koi Nyidrë. (1 Pet. 3:18; 1 Ioane 4:9) Celë hi matre, tune la itre trejin ekö, easa hëne la itre atr troa atrun la Drai Ne Amekunën, thenge lo itre hna amekötin hnei Iesu.

8. Nemene la hna kuca hnene la itre hlue i Iehova matre troa hëne la itre atr kowe la Drai Ne Amekunën? (Goeëne ju la iatr.)

⁸ Qaane hë ekö, itre hlue i Iehova a hëne la itre atr troa sine la Drai Ne Amekunën. Ame lo 1881, hnene la itre trejin e Etazini hna nyiqane icasikeu thene la ketre trejin e Allegheny (Pennsylvanie) matre troa atrune la meci Iesu. Nge ame pë hë e thupen, hna atrune la Drai Ne Amekunën ngöne la itre ekalesia asë. Ame lo Maac 1940, kolo fe a hane hëne la itre atre ne la teritoar troa sine la Drai Ne Amekunën. Ame lo 1960, hnene la Bethela hna nyiqane fejan la itre pepa ne ihë kowe la itre ekalesia. Qaane ju hi lai, itre miliar lao pepa ne ihë hna hamën kowe la itre atr. Hnauëne la easa nue trengecatr troa hëne la itre atr kowe la Drai Ne Amekunën?

9-10. Drei la hne së hna hën kowe la Drai Ne Amekunën, nge nemene la thangan koi angatr? (Ioane 3:16)

⁹ Ame la ketre kepin matre easa hëne la itre atr kowe la Drai Ne Amekunën ke, aja  i easë tro angatr a atre la hnei Iehova me Iesu hna kuca koi së asë. (E jë la Ioane 3:16.) Aja i easë tro la itre hnei angatr hna dreng me öhn a ketri angatr, me thue aja i angatr troa nyihlue i Iehova. Tha easë hmekuje kö a hën la itre atre ne fen.

¹⁰ Easë mina fe a hëne la itre trejin ka nanazij. Aja i easë tro angatr a öhne ka hape, Iehova palahi a hnimi angatr. Easa madrine troa öhne la itre trejin ka nanazij a traqa troa sine la Drai Ne Amekunën. Angatre hmaca a mekun lo ijine angatr a nyihlue i Iehova. Hane hi la hna melëne hnei Monica. c Hnei angeic hna nyiqane cainöje hmaca lo kola COVID-19. Thupene la angeic a sine la Drai Ne Amekunën lo 2021, öni angeic: “Truedre hë lao macatre ne tha cainöje ni matre ka ketrepengöne kö la Drai Ne Amekunën ne la macatre ce ke, eni hmaca cainöj me hëne la itre atr kowe la Drai Ne Amekunën. Hnenge hna catre cainöj la ijine cili matre troa olene koi Iehova me Iesu la hnei nyidroti hna kuca koi ni.” (Sal. 103:1-4) Ngacama tha traqa kö la itre atr kowe la Drai Ne Amekunën, ngo kola amadrinë Iehova la easë catre hëne la itre atr.

11. Tune kaa la aqane amanathithine Iehova la itre trengecatre së troa hëne la itre atr kowe la Drai Ne Amekunën? (Hagai 2:7)

¹¹ Hnei Iehova hna amanathithine la itre trengecatre së troa hën la itre atr kowe la Drai Ne Amekunën. Ame lo 2021, traqa koi 21 367 603 lao atr ka sine la Drai Ne Amekunën, ngacama hetre hna amekötin göne lo mec COVID-19. Tru catre kö la itre atr ka traqa ngöne la ijine cili hune lo itre xaa macatre! Ase hë sasaith la etrune la itre Temoë Iehova ngöne la fen. Ngo, tha celë kö la ka nyipiewekë koi Iehova, Nyidrëti pe a goeëne la hni ne la itre atr ka traqa. (Luka 15:7; 1 Tim. 2:3, 4) Xecie koi së laka, jëne la huliwa ne ihë, Iehova a xatuane la itre atr ka thele Nyidrë.—E jë la Hagai 2:7.

12. Nemen la itre ewekë ka ajolë së troa sine la Drai Ne Amekunën? (Goeëne ju la iatr.)

¹² Ase hë Iesu qaja ka hape, ame ngöne la itre drai ne la pun, tro palakö sa cile kowe la itre jol ka tru. Troa icilekeu hnei fami, me axösisi së, nge troa traqa la itre isi me itre mec ka ixötrekeu. (Mat. 10:36; Mar. 13:9; Luka 21:10, 11) Maine jë tro la itre ewekë cili a ajolë së troa atrune la Drai Ne Amekunën. Tro sa ce wang la aqane xatuane Iehova la itre trejin ka cile kowe la itre jole cili.

13. Tune kaa la aqane amanathithine Iehova la trengecatre i Artem troa atrun la Drai Ne Amekunën ngöne la kalabus?

¹³ Ngöne la kalabus. Hnene la itre trejin hna akalabusin pine la lapaun i angatr, hna isine troa atrun la drai ne meci Iesu. Celë hi hna melëne hnei Artem. Ame ngöne la ijine Drai Ne Amekunën lo 2020, hna ce umë Artem me itre xan ngöne hi la neköi hnahage ka 17 mètres carrés. Ngacama angeic ngöne la kalabus, hnei angeic hna xome la hnei angeic hna hetreny matre nyihatrene la falawa me waina. Ketre, hnei angeic fe hna mekun troa cile fë cainöj, ngacama pëkö ka troa drei angeic. Ka ufi sixa catr me qeje ka sis la itre hna ce umëne me angeic. Nemene la hnei angeic hna kuca? Hnei angeic hna sipo angatr troa tha ufi sixa me qeje ka sis göi ca hawa hi. Sesëkötre pi kö angeic la angatr a kapa la sipo i angeic. Ketre öni Artem  koi angatr, “Aja i epuni kö tro na qejepengöne koi epun la Drai Ne Amekunën?” Tha kapa kö angatr. Ngo ame hë la angatr a öhnyi Artem a atrun la Drai Ne Amekunën ke, hnei angatr hna hnyinge koi angeic.

14. Nemen la hna kuca ngöne la ijine COVID-19 matre atrun la Drai Ne Amekunën?

¹⁴ Ngöne lo ijine COVID-19. Hnene la mec COVID, matre tha atrune ju kö la itre Temoë Iehova la Drai Ne Amekunën ngöne la itre Uma Ne Baselaia. Ngo tha celë kö la ka sewe angatr troa atrun la drai cili. d Ame la itre ekalesia ka trene Ëternet, hnei angatr hna sine la Drai Ne Amekunën jëne Zoom. Ngo, tune kaa kowe la itre trejin ka pë Ëternet? Ame ngöne la itre xaa nöj hna cile fë la cainöj jëne tele maine radio. Ketre, hna enregistré la cainöj ngöne la 500 lao qene hlapa, matre tro la itre atr ka lapa ngöne la itre götran gaa nanyi a hane atrun la Drai Ne Amekunën. Nge hnene la itre trejin hna tro fë la itre enregistrement cili kowe la itre ka ajan.

15. Nemen la hna kuca hnei Sue ngöne la kola icilekeu hnei fami, nge nemen la ini koi së?

 ¹⁵ Ngöne la kola icilekeu la fami. Ame la ketre jole ka sewe itre xan troa atrun la Drai Ne Amekunën, ke ene la icilekeu i fami. Tro sa ce wange la hna melëne hnei Sue. Ame lo hej qëmeken la Drai Ne Amekunën ne lo macatre 2021, hnei Sue hna qaja kowe la trejin ka ini Tus me angeic ka hape, tha angeic kö a troa hane sine la drai cili, ke kola icilekeu la fami. Matre hnene la trejin ka ini Tus me Sue hna e la Luka 22:44. Hnei eahlo hna amamai Sue la enyipiewekëne troa xötrethenge la tulu i Iesu me thith koi Iehova ngöne la easa cile kowe la itre jol, matre acatrene la mejiune së koi Nyidrë. Ame hë lo hmakany, hnei Sue hna hnëkëne la falawa me waina, me goeëne ngöne la site jw.org la Hmi e Hmakany hna hnëkën kowe la Drai Ne Amekunën. Nge ame lo hej, hnei angeic hna sine la Drai Ne Amekunën jëne telefon ngöne la hnahage i angeic matre pëkö ka troa ajolë angeic. Ame hë lo thupen, hnei Sue hna cinyany kowe la ka ini Tus koi angeic ka hape: “Oleti la hnei eapo hna xatua ni eidrilo. Ase hë ni kuca la hnenge hna atrein matre sine la Drai Ne Amekunën, nge hnei Iehova pë hë hna amanathithin. Madrine catre ni la!” Haawe, e traqa ju eö melëne la jole celë, tro kö Iehova a xatua eö.

16. Pine nemen matre xecie koi së laka, tro kö Iehova a amanathithine la itre trengecatre së troa sine la Drai Ne Amekunën? (Roma 8:31, 32)

¹⁶ Iehova a wangatrune la itre trengecatr hne së hna nu matre atrun la drai ne meci Iesu. Öhne hi Iehova la hni ne ole së koi Nyidrë, nge Nyidrëti a amanathithi së. (E jë la Roma 8:31, 32.) Haawe, isine jë së la macatre celë troa sine la Drai Ne Amekunën, nge catre jë kuca la itre huliwa i Iehova ngöne la ijine cili.