1-2. (a) Pine nemene matre tha sesëkötre kö së la kola traqa la itre jol? (b) Nemene la hne së hna troa ce wang ngöne la tane mekune celë?

 PINE laka itre hlue i Iehova së, matre tha sesëkötre kö së la easa ixelë me itre jol. Atre hi së la hna qaja hnei Tusi Hmitrötr ka hape, “tro së lai a lö kowe la Baselaia i Akötresie jëne la itre akötr ka nyimutre.” (Itre hu. 14:22) Ketre, ame la itre xaa jol ke, tro hi a patr elanyi ngöne la fene ka hnyipixe. Nge ame e cili “pë hmaca kö mec, me hleuhleu, me treij, me akötr.”—Hna ama. 21:4.

² Tha Iehova kö a thepe së qa ngöne la itre itupath, ngo Nyidrëti pe a xatua së troa xomihnin itre ej. Goeëne la hnei Paulo hna qaja kowe la itre keresiano ne Roma. Thupene la hna e wengën la itre jol ka traqa koi angeic me itre trejin, öni angeic: “Easë pala hi a hun hnene la atre hnimi së.” (Rom. 8:35-37) Kolo hi lai a hape, jëne la ixatua i Iehova, ijije hi tro sa hun, ngacama easë nyipine la itre jol. Tro sa ce wang la aqane xatua Iosefa hnei Iehova, me aqane tro fe Nyidrëti a xatua së.

3. Hna saze tune kaa la mele i Iosefa?

³ Öhne hi hnene la itre xaa nekö i Iakobo qatr ka hape, tru catre kö la ihnimi nyidrë koi Iosefa hui angatr. (Gen. 37:3, 4) Celë hi matre zalu catr angatr koi Iosefa. Ame hë lo ketre ijin, hnei angatr hna salemë Iosefa kowe la angetre  Midiana. Hnene la itretre salem hna xomi angeic a tro Aigupito, matre nanyi hë angeic qa ngöne la hnalapa i angeic. Nge ame e cili, hna salemë angeic koi Potifara, tane la itre sooce i Farao. Saze catr la mele i Iosefa! Ame ekö lo, angeic la nekö hnimina i kem, ngo ame hë enehila, angeic la ketre hlu e Aigupito.—Gen. 39:1.

4. Nemene la itre jol ka traqa koi së?

⁴ Önine la ketre Tusi Hmitrötr, “ame la itre akötr, ke kola traqa koi së asë.” (Ate cai. 9:11) Nge easë fe a cil kowe la itre jol ka “hane traqa koi nöjei atr asë.” (1 Kor. 10:13) Maine jë, kola akötrë së ke, easa drengethenge Iesu. Itre atr a hnyimasai së, maine icilekeu, maine axösisi së pine la lapaune së. (2 Tim. 3:12) Traqa ju hë la nöjei pengöne jol, ngo tro kö Iehova a xatua së troa xomihnin itre ej. Tro sa ce wang la aqane xatua Iosefa hnei Nyidrë.

5. Nemene la hna öhne hnei Potifara goi Iosefa? (Genese 39:2-6)

⁵ E jë la Genese 39:2-6. Öhne hi Potifara laka, Iosefa la ketre nekötrahmanyi ka atrein, nge ka huliwa catr. Nge öhne fe nyidrë ka hape, “Iehova pala hi a eatrëne la nöjei huliwa i Iosefa.” b Celë hi matre hnei nyidrë hna xomi Iosefa troa huliwa koi nyidrë. Ketre, hnei nyidrë hna “nu asë la itre ewekë i nyidrë koi Iosefa, pëkö hnei nyidrëti hna hnehengazon.” Nemene hë la thangan? Kola hlemu loi hnei Potifara.

6. Ame koi epun, tune kaa Iosefa lo angeic thei Potifara?

⁶ Ame koi epun, tune kaa Iosefa ngöne la ijine cili? Nemene la aja i angeic? Tro Potifara a öhne la itre huliwa i angeic me olene koi angeic? Waea. Aja i angeic troa bëeke hmaca kowe la keme i angeic. Ngacama tru catr la itre hnëqa hna athip koi angeic, ngo angeic palahi a nyihluene la ketre atr ka thil koi haze. Nge hnei Iehova kö hna nue Iosefa troa nyihlue i Potifara. Ngo troa ngazo catr hmaca kö la mele i Iosefa.

7. Pine nemene matre ngazo catre hë la mele i Iosefa? Tune kaa ha la mele i angeic enehila? (Genese 39:14, 15)

⁷ Ame ngöne Genese mekene 39, kola wesiwes koi Iosefa hnene la föi Potifara, nge eahlo palahi a iaö angeic matre troa ce meköl me eahlo. Ngo tha hnei Iosefa kö hna kei thenge la aja i eahlo. Pine laka, wesitre catr eahlo, hnei eahlo hna thoi ka hape, hnei Iosefa hna thel troa angazo eahlo. (E jë la Genese 39:14, 15.) Ame hnei Potifara hna kuië Iosefa e hnine la kalabus, nge nyimu macatre ne lapa angeic e cili. (Gen. 39:19, 20) Ka tune kaa lai kalabus? Ame la hnëewekë ‘kalabus’ ngöne Genese 40:15 ke, kösë “sima,” maine “hnaop.” Easa trotrohnine ka hape, ka mit e kuhu hnin, matre hleuhleu catre angeic. (Gen. 40:15) Ketre ame lo xötrei, hna ceinëne la lue ca i angeic, nge goi ceinëne fe la nyinawa i angeic. (Sal. 105:17, 18) Ngazo catre hë la mele i Iosefa! Ame ekö, ketre hlu hna mejiune kow hnei maseta, ngo ame enehila, angeice hë ngöne la kalabus.

8. Ame la kola jole catre la mele së, nemene la ka xecie koi së?

⁸ Hna hane fe kö traqa koi epun la ewekë celë: Epun palahi a thith, ngo kolo jë pe ka hape, catrehnine jë la jol ka traqa koi epun. Pine laka, easa mel ngöne la fene i Satana, tro palahi a traqa koi së la itre jol. Nge tha Iehova kö a apatren itre ej. (1 Ioane 5:19) Ngo the luelue kö laka, öhne hi Iehova la jol hnei epuni hna melën, nge Nyidrëti a meku epun. (Mat. 10:29-31; 1 Pet. 5:6, 7) Ketre öni Nyidrë: “Tha tro jë kö ni a triji eö, nge tha tro jë kö ni a nuaxöji eö.” (Heb. 13:5) Tro kö Iehova a xatua epun, ngacama ame koi epun, pëhë nyin la jole i epun. Tro sa ce wang la aqane xatua Iosefa hnei Nyidrë.

9. Nemene la ka amamane ka hape, ce Iehova me Iosefa ngöne la kalabus? (Genese 39:21-23)

⁹ E jë la Genese 39:21-23. Ame ngöne la itre macatre ne akalabusi Iosefa, ke ce Iehova palahi me angeic. Hnei Iehova hna xatua angeic tune kaa? Kola tro la itre drai, nge kola metrötrë Iosefa hnene la tane kalabus, tui Potifara ekö. Matre tha qea ju kö, nge kola acili angeic troa ameköti huliwa kowe la itre hna akalabusin. Öni Tusi Hmitrötr, “tha goeëne hë la tane kalabusi la itre huliwa i Iosefa.” Hetre huliwa i Iosefa hë matre tha mekune hë angeic la jol ka traqa koi angeic. Nyine hain la ewekë ka traqa! A drei fe la ka hane mekun ka hape, troa acil la ketre atr ka thel troa angazone la föe ne la ketre hene ka tru i Farao ngöne la göhnë cili. Kolo hi lai a anyipicine la hna qaja ngöne Genese 39:23 ka hape, “Ce Iehova me Iosefa, nge Iehova pala hi a kuca, matre tro loi la nöjei huliwa i Iosefa.”

10. Qejepengöne jë la kepin matre tha canga mama kö koi Iosefa la ixatua i Iehova.

¹⁰ Ame koi epun, tune kaa Iosefa ngöne la ijine cili? Hna upezö angeic menu, me akalabusi angeic. Matre ame koi epun, öhne kö Iosefa laka, Iehova a aejëne la nöjei huliwa i angeic? Aja i angeice kö troa amadrinëne la tane kalabus? Waea. Ame la aja i angeic ke, troa öhne ka hape, pëkö ngazo i angeic me nue angeic qa ngöne la kalabus. Göi sipone fe angeic kowe la ketre hna akalabusin troa qaja aloinyi angeic koi Farao, matre xomi angeic qa cili. (Gen. 40:14) Ngo, thëthëhmine pë hë la atre cili qeje Iosefa koi Farao. Matre lue macatre hmaca kö ne lapa Iosefa ngöne la kalabus. (Gen. 40:23; 41: 1, 14) Ngo hnei Iehova palahi hna kuca matre tro loi la nöjei huliwa i Iosefa. Tune kaa?

11. Nemene la hnei Iehova hna aijijë Iosefa troa kuca, nge hna eatrëne tune kaa la aja i Iehova?

¹¹ Ame lo Iosefa ngöne la kalabus, hnei Iehova hna hamë Farao la lue pu. Ame la Farao a atre ka hape, atreine Iosefa qejepengöne la lue pu i nyidrë, ke hnei nyidrë hna iup troa thei angeic. Aja i Farao troa atre la aliene la lue pu. Hnei Iehova hna xatua Iosefa troa qejepengöne itre ej, me qaja la itre nyine troa kuca. Celë hi lai ka ketri Farao. Öhne hi Farao ka hape, ce Iehova me Iosefa matre hnei nyidrë hna acili angeic troa thewe xen kowe la nöje Aigupito asë. (Gen. 41:38, 41-44) Itre macatre thupen, hna traqa la jiin atraqatr ngöne la nöje Aigupito utihë Kanana, lo nöj hna mele ngön hnene la fami Iosefa. Ijiji Iosefa hi troa amelene la fami angeic, me thupëne la itre xötrapan ne la Mesia.

12. Pine nemene matre mama hi ka hape, Iehova a eatrëne la nöjei huliwa i Iosefa?

¹² Pane mekune jë la itre ewekë ka traqa koi Iosefa. Drei la ka upi Potifara troa wangatrehmekunyi Iosefa, nge ketre hlue hi angeic? Drei la ka ukune la tane kalabus troa hamë hnëqa koi Iosefa, ngacama hna akalabusi angeice hi? Drei la ka hamën koi Farao la itre pu? Drei la ka hamën koi Iosefa la atreine troa qejepengön itre ej? Drei la ka upi Farao troa acili Iosefa troa thewe xen e Aigupito? (Gen. 45:5) Mama cile hi ka hape, Iehova pala hi a eatrëne la nöjei huliwa i Iosefa. Hnene la itre mama i Iosefa hna thele troa humuthi angeic, ngo hnei Iehova hna kuca matre eatr la aja i Nyidrë.

13. Iehova kö a nyinyine asë la itre jole së? Qejepengöne jë.

¹³ Nemene la ini hne së hna xome qa ngöne la hna melën hnei Iosefa? Iehova kö a nyinyine asë la itre jole së? Nyidrëti kö la ka amekötine la nöjei ewekë ka traqa koi së, me thupëne laka, tro kö a eatr? Waea, tha celë kö la hna qaja hnei Tusi  Hmitrötr. (Ate cai. 8:9; 9:11) Ngo, atre hi së laka, ame la easë ngöne la itupath, ke öhne hnyawa hi Iehova la hne së hna melën nge drenge hi Nyidrë la easa xëwe koi Nyidrë. (Sal. 34:15; 55:22; Is. 59:1) Ketre, Nyidrëti fe a xatua së troa cile catr. Tune kaa?

14. Tune kaa la aqane xatua së hnei Iehova ngöne la easa cile kowe la itre jol?

¹⁴ Iehova a xatua së la Nyidrëti a akeukawanyi së me ithuecatre koi së ngöne la nyipi ijin. (2 Kor. 1:3, 4) Celë hi ka traqa koi Eziz, ketre trejin trahmany ne Turkménistan. Hna akalabusi angeic koi lue macatre pine la lapaun i angeic. Öni angeic, “Ame lo hmakany qëmekene troa kootrë ni, hnene la ketre trejin hna e koi ni la Isaia 30:15, kola hape: ‘Tro nyipunie a egöcatre hnene la tingetinge me lapaun.’ Hnene la xötre cili hna xatua ni troa tingeting me catre mejiun koi Iehova. Hnenge hna lapa mekune la xötre cili lo eni ngöne la kalabus, nge celë hi ka xatua ni.” Mekune kö epuni lo ijine Iehova a akeukawanyi epun me ithuecatre koi epun lo epuni a aja ixatua?

15-16. Nemene la ini hne së hna xome qa ngöne la hna melën hnei Tori?

¹⁵ E thupene la hna traqa la itre itupath, la easa öhne laka hnei Iehova hna xatua së troa cile kow itre ej. Nge celë hi hna melën hnei Tori, ketre trejin föe. Hnene la nekö i eahlo trahmany Mason hna isi memine ketre cancer koi sikis lao macatre uti hë la nyiën a mec. Easa trotrohnine laka, akötre catre Tori. Öni eahlo, “Pëkö ketre akötr ka tun, kowe la ketre thin. Ce mekunange hi memine la itre xaa kem me thin laka, tru catre kö la akötr the së la easa goeëne la nekö së e akötr, hune la sipu akötre së.”

 ¹⁶ Tru catre la akötre i Tori hnene la itupath celë, ngo ame hë e thupen, hnei eahlo hna mekun lo itre aqane xatua eahlo hnei Iehova. Öni eahlo, “Ame enehila, eni a öhne la aqane xatua huni hnei Iehova lo ijine kola wezipo la neköng. Ame lo kola wezipo catr hnei Mason, hnene la itre trejin hna hnyapë loto a lue hawa jë kö troa ituë e pital. Hetre atr palahi ka traqa troa iwai me ixatua. Ketre, hnene la itre trejin hna thupëne matre, tro palahi hun a hetreny la ka nyipiewekë. Ame fe lo itre ijine jole catr, ke pëkö ca ka pë the hun.” Hnei Iehova hna hamë Tori me Mason la trengecatr matre xomihnine la jol.—Wange ju la hna eköhagen hna hape, “ Hnei Iehova Hna Hamë Hun La Ka Nyipiewekë.”

17-18. Nemene la ka troa xatua së troa wangatrun la ixatua i Iehova ngöne la itre ijine jol? (Salamo 40:5)

¹⁷ E jë la Salamo 40:5. Ame la hna thel hnene la ka eli wetr ke, ene la troa traqa e koho hune la wetr. Ngo, ame ngöne la gojeny, ke nyimu götran hnë tro angeic a cil matre goeën la itre hna xup xötreithi angeic. Ketre tu së fe, loi e tro sa xomi ijine troa lapa mekun la aqane xatua së hnei Iehova ngöne la easa cile kowe la itre jol. Ame la kola fenes la drai, isa hnyinge jë ka hape: ‘Tune kaa la aqane amanathithi ni hnei Iehova enehila? Tha patre kö la jole theng, ngo tune kaa la aqane xatua ni hnei Iehova troa xomihnin ej?’ Pane mekune jë la ketre ewekë hnei Iehova hna kuca matre xatua epun troa cile catr.

¹⁸ Maine jë epuni a thithi koi Iehova matre apatrene la jole i epun. Aqane kö lai, pëkö engazone la troa ujë tun. (Fil. 4:6) Ngo, the thëthëhmine kö la itre manathith hnei Iehova hna hamë epun enehila. Mekune palakö lo hnei Nyidrëti hna qaja laka, tro kö Nyidrëti a ithuecatre koi epun me xatua epun troa cile catr. Celë hi matre amamane jë la hni ne ole i epun kowe la ixatua i Nyidrë. Ame e cili, tro hë epuni a öhne laka, ngacama epun ngöne la itupath, tro kö Iehova a xatua epun troa cile catr, tune la hnei Nyidrëti hna kuca koi Iosefa.—Gen. 41:51, 52.