1-2. (a) Tune kaa së la easa lapa mekune la itre hnei Iesu hna kuca lo nyidrëti e celë fen? (b) Nemen la hne së hna troa ce wang ngöne la tane mekune celë?

 AKÖTRE catre së la kola mec la ketre sinee së, nge tru la hne së hna meku angeic! Ma ame jë lo xötrei, jole catre së ke, easë hmaca mekune lo angeic a thë fë la akötre i angeic qëmeken troa mec. Ngo kola tro la itre drai, easë hmaca mekune lo itre ijine easa ce mel me ce madrin, memine la itre hnei angeic hna qaja me kuca matre ithuecatr koi së.

² Ketre tun, kola ketri së la easa e la aqane akötrë Iesu qëmeken tro nyidrëti a mec. Matre ame ngöne la Drai Ne Amekunën, loi e tro sa pane lapa mekune la aliene la hnei nyidrëti hna kuca koi së. (1 Kor. 11:24, 25) Eje hi, easa madrin la easa lapa mekune la itre hnei Iesu hna qaja me kuca lo nyidrëti e celë fen. Kolo fe a thuecatr koi së la itre hnei nyidrë hna kuca enehila, me itre hnei nyidrëti hna troa kuca elany. Ame la easa lapa mekune la itre ewekë cili memine la ejuine la ihnimi Iesu koi së, ke tro lai a upi së troa olene koi nyidrë. Celë hi hne së hna troa ce wang ngöne la tane mekune celë.

3. Nemene la ka upi së troa amamane la ole së kowe la thupene mel?

³ Tru la ole së la easa lapa mekune la mel me meci Iesu. Ame lo nyidrëti e celë fen, hnei nyidrëti hna qaja kowe la itre atr, la itre manathith hnei angatr hna troa kapa elanyi fene la Baselaia i Akötresie. Ame la itre hnei nyidrëti hna  qaja koi angatr ekö, ke ka ketri së fe enehila. Tru la ole së kowe la thupene mel, ke celë hi lai ka aijijë së troa hane nyisinee i Iehova me Iesu. Nge ame la itre ka lapaune koi Iesu, ke tro angatr a hane kapa elany la mel ka pë pun, me iöhnyi hmaca memine la sinee i angatr ka mec. (Ioane 5:28, 29; Rom. 6:23) Drei së matre tro sa hane kapa la itre manathithi cili! Atreine kö së të koi Iehova me Iesu la itre hnei nyidroti hna kuca koi së? Waea. (Rom. 5:8, 20, 21) Ngo, ijije hi tro sa amamane la ole së koi nyidro. Tune kaa?

4. Tune kaa la aqane olene Maria Magadalena la itre ewekë hnei Iesu hna kuca koi eahlo? (Wange ju la iatr.)

⁴ Tro sa ce wang la tulu ne la ketre föe ne Iudra, Maria Magadalena. Tru la akötre i eahlo, ke hna löthi eahlo hnene la 7 lao dremoni. Ame koi eahlo, ka luzi hë eahlo. Matre, pane mekune jë la madrine i eahlo la Iesu a helëne trije la itre dremoni qaathei eahlo! Celë hi ka upi eahlo troa hane atre drei Iesu, me nue la traem, me trengecatr, me itre mo i eahlo troa xatua nyidrë ngöne la huliwa ne cainöj. (Luka 8:1-3) Nyipici tru la madrine i Maria kowe la hnei Iesu hna kuca koi eahlo, ngo sisitria catre palakö la ahnahna hnei eahlo hna troa kapa elany qaathei nyidrë. Tro Iesu a hamëne la mele i nyidrë kowe la nöjei atr, “matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.” (Ioane 3:16) Ketre, hnei Maria hna olene koi Iesu ngöne la eahlo a mele nyipici koi nyidrë. Maria fe hi ezi Iesu lo nyidrëti a thip ngöne la sinöe ne iaxösisi. Eahlo e cili a amamane koi Iesu me kowe la itre xan ka hape, ce eahlo me angatr. (Ioane 19:25) Thupene lo Iesu a mec, hnei Maria me lue xaa föe hna itöne la itre haö ka pui lolo, matre köle la ngönetrei nyidrë. (Mar. 16:1, 2) Nge hna amanathithi Maria, ke eahlo la hnei Iesu hna pane ithanata memin  lo kola amele nyidrëti hmaca. Tha hane fe kö nyidrëti mama tun kowe la itre xaa atre dreng.—Ioane 20:11-18.

5. Tune kaa la aqane tro sa amamane la ole së kowe la itre hnei Iehova me Iesu hna kuca koi së?

⁵ Tui Maria, loi e tro fe sa amamane la ole së koi Iehova me Iesu. Tune kaa? Loi e tro sa nue la traeme së, me trengecatre së, me itre mo së kowe la huliwa ne Baselaia. Tune la troa ixatua ngöne la huliwa ne xup me nyihnyawane la itre uma ne hmi së.

6. Pine nemen matre ijije hi tro sa qaja ka hape, ahnahna koi së isa ala cas la thupene mel?

⁶ Ihnimi Iehova me Iesu a upi së troa hnimi nyidro. (1 Ioane 4:10, 19) Nge kola kökötre catre la ihnimi easë koi nyidro, la easa atre ka hape, hnei Iesu hna meci pi së. Tui Paulo lo nyidrëti a qaja kowe la angetre Galatia, ka hape: ‘Nekö i Akötresie la atre hnimi ni, me meci pi ni.’ (Gal. 2:20) Jëne la thupene mel, hnei Iehova hna ee së koi Nyidrë, matre hane jë fe së nyisinee i Nyidrë. (Ioane 6:44) Kola ketri së la easa atre ka hape, hnei Iehova hna öhne la ketre ewekë ka loi the së, me huujëne la nekö hnimina i Nyidrëti matre tro sa nyisinee i Nyidrë. Hapeu, tha kolo kö lai a acatrene la ihnimi epun koi Iehova me Iesu? Isa hnyinge jë ka hape: ‘Hetre nyine tro kö ni a kuca koi nyidro?’

7. Tune la ka mama ngöne la iatr, tro sa amamane tune kaa la ihnimi së koi Iehova me Iesu? (2 Korinito 5:14, 15; 6:1, 2)

⁷ Ihnimi së koi Iehova me Iesu, a upi së troa hnime la itre xan. (E jë la 2 Korinito 5:14, 15; 6:1, 2.) Ame la ketre aqane tro sa amamane la ihnimi së koi itre xan, ke ene la troa catre cainöj. Loi e tro sa ithanata kowe la nöjei atr hne së hna ixelë memin, ngacama isa hane ngönetrei së  kö, me tribu, me huliwa, me göhnë hna cilën ngöne la nöj. Aqane tro hi së lai a kuca la aja i Akötresie, matre “tro la nöjei pengön atr a mel, me atrehmekune hnyawa la nyipici.”—1 Tim. 2:4.

8. Tro sa amamane tune kaa la ihnimi së kowe la itre trejin?

⁸ Ame la ketre aqane tro sa amamane la ihnimi së koi Iehova me Iesu, ke ene la troa hnime la itre trejine me easë. (1 Ioane 4:21) Loi e tro sa nyipiewekë angatr, me xatua angatr troa cile kowe la itre jol. Ketre, loi e tro sa ithuecatr koi angatr ngöne la kola mec la ketre sinee i angatr, me hane wai angatr la angatr a wezipo. Nge, maine angatr a kucakuca, isine jë troa hamë ithuecatr koi angatr. (2 Kor. 1:3-7; 1 Thes. 5:11, 14) Loi e tro palahi sa thithi sai angatr. Nge the thëthëhmine kö, “ka hetre thangane catre la thithi ne la atre ka meköt.”—Iako. 5:16.

9. Nemene la ketre aqane tro sa amamane la ihnimi së kowe la itre trejin?

⁹ Ame la ketre aqane tro sa hnime la itre trejine me easë, ke, ene la troa mele tingetinge me angatr. Matre, easa isine troa nyitipune la aqane nue Iehova la itre ngazo së. Hnei Iehova hna nue la nekö i Nyidrë troa meci pine la itre ngazo së, haawe, loi e tro fe sa nue la ngazo hna kuca koi së hnene la itre trejin. The tune kö lo hlue ka ngazo ngöne lo ceitune i Iesu. Ka tru catre lo gufa i angeic, ngo hna nu hnene la maseta. Ngo tha hnei angeice kö hna nu la gufa ne la ketre hlu, ngacama ka co hi. (Mat. 18:23-35) Maine hetre iwesitrë i epun memine la ketre trejin ne la ekalesia, loi e traqa pë hë la Drai Ne Amekunën, nge ase hë epon iloi. (Mat. 5:23, 24) Tro hë lai a mama hnyawa e cili, la ejuine la ihnimi epun koi Iehova me Iesu.

10-11. Tro la itre qatre thup a amamane tune kaa la ihnimi angatr koi Iehova me Iesu? (1 Peteru 5:1, 2)

¹⁰ Tro la itre qatre thup a amamane tune kaa la ihnimi angatr koi Iehova me Iesu? Ame la pane nyine tro angatr a kuca, ke troa thupëne hnyawa la itre mamoe i Iesu. (E jë la 1 Peteru 5:1, 2.) Kolo ithuecatre Iesu lai koi Peteru. Thupene la hnei Peteru hna akönia qaja ka hape, thatre Iesu kö hnei angeic, hnei angeic hmaca hna amamane koi Iesu la ihnimi angeic koi nyidrë. Ame lo kola amele Iesu hmaca, öni nyidrë koi Peteru: “Simona nekö i Ioane, eö kö a hnimi ni?” Tru catre la aja i Peteru troa amamane la ihnimi angeic koi Iesu. Matre öni Iesu koi Peteru: “Ithuane jë la itre neköi mamoeng.” (Ioane 21:15-17) Qaane ju hi lai, hnei angeic hna thupëne hnyawa me hnim la itre neköi mamoe i Iesu.

¹¹ Itre qatre thup, tro epuni a amamane tune kaa ka hape, ka tru koi epun la trengewekë i Iesu koi Peteru, ngöne la ijine Drai Ne Amekunën? Ene la troa xatuane la itre trejine ka nanazij troa bëeke koi Iehova. Epuni hi lai a amamane la ihnimi epun koi Iehova me Iesu. (Ezek. 34:11, 12) Loi e tro mina fe epuni a kapa la itre ka ini Tus, me itre ka xötrei traqa kowe la Drai Ne Amekunën. Aja i easë tro angatr a bëeke hmaca me hane nyihlue i Iehova.

12. Hnauëne laka, ka ithuecatre fe koi së la itre trengewekë i Iesu? (Ioane 16:32, 33)

¹² Ame lo jidr qëmekene tro Iesu a mec, öni nyidrë kowe la itretre dreng: “Ngo eje hi laka, ame e celë fen, tro ha icilekeu me nyipunie, ngo catre pi pe! Ase hë ni ngaane la fen.” (E jë la Ioane 16:32, 33.)  Nemene la ka xatua Iesu troa cile catr qëmekene la itre ithupëjia me mele nyipici uti hë la mec? Mejiune nyidrë koi Iehova. Nge atre hi nyidrë laka, tro fe a hane traqa tune kowe la itretre drei nyidrë. Celë hi matre hnei nyidrë hna sipo Iehova troa xatua angatr. (Ioane 17:11) Hnauëne laka, ka ithuecatre fe lai koi së? Pine laka, pëkö sa i Iehova. (1 Ioane 4:4) Öhne asë hi nyidrëti koilo. Haawe, e tro sa mejiune koi Iehova, tha tro kö sa xou, ngo pe sa cile catr.

13. Tune kaa la aqane amamane Iosefa atre Arimathea la catre i angeic?

¹³ Tro sa ce wang la tulu i Iosefa atre Arimathea. Ketre atr hna metrötrën thene la angetre Iudra. Angeic la ketre atrene la hnaakootr ka tru i angetre i Iudra. Ame lo Iesu palakö a cainöje trootro, hnei angeic hna xoue atr. Öni Ioane ka hape, “Ketre atre drei Iesu angeic, ngo pine laka, xou i angeic e angetre Iudra, angeic a juetrëne lai.” (Ioane 19:38) Ngacama ka kapa Iosefa la maca ne la Baselaia, ngo hnei angeic hna juetrëne koi itre xan la lapaune i angeic koi Iesu. Ma angeice jë xouene laka, tha tro hmaca kö a metrötrë angeic e troa atre ka hape, angeic la ketre atre drei Iesu. Ame pe, öni Tusi Hmitrötr, thupene la Iesu a mec, hnei Iosefa hna “tro ju koi Pilato troa sipone la ngönetrei i Iesu.” (Mar. 15:42, 43) Eje hi, tha xou i angeice hë troa amamane ka hape, ka lapaune angeic koi Iesu.

14. Nemene la nyine tro epuni a kuca matre tha tro kö a xoue atr?

¹⁴ Hna hane fe kö traqa koi epun troa xoue atr tui Iosefa? Hnei epuni kö hna hane hmahma troa qaja kowe la itre sine ini maine sine huliwa i epun ka hape, ketre Temoë Iehova epun? Epuni kö a xou troa nyiqane cainöj maine xomi bapataiso, wanga qajangazo epuni jë? The nue pi kö la itre ewekë cili, troa sewe epun troa kuca la loi. Catre jë pe thithi koi Iehova. Sipo iele Nyidrëti jë troa hamë epuni la catr matre troa kuca la aja i Nyidrë. Nge ame la epuni a öhne la aqane sa Nyidrë la itre thithi epun, ke tha tro hë epuni lai a xoue atr.—Is. 41:10, 13.

15. Nemene la thangane kowe la itretre dreng la kola mama hnei Iesu koi angatr? (Luka 24:52, 53)

¹⁵ Akötre catre la itretre dreng la Iesu a mec. Pane meku angatre jë ngöne la ijine cili. Patre hë la sinee i angatr hnei  angatr hna hnim, nge kösë pëhë mejiune i angatr. (Luka 24:17-21) Eloine pe, ame lo Iesu a mama koi angatr thupene la kola amele nyidrëti hmaca, hnei nyidrë hna ithuecatr koi angatr me qejepengöne koi angatr la aqane eatrëne nyidrë la itre hna perofetan. Nge hnei Iesu mina fe hna ahnithe koi angatr la ketre hnëqa ka tru. (Luka 24:26, 27, 45-48) Celë hi matre thupene la 40 lao drai, lo Iesu a elë e hnengödrai, angatr pena ha a madrin. Nyipici, angatr a madrin ke, melehmaca ha Iesu, nge tro kö nyidrëti a xatua angatr troa eatrëne la huliwa hnei nyidrë hna ahnithe koi angatr. Celë hi ka upi angatr troa catre nyihlue i Iehova.—E jë la Luka 24:52, 53; Itre hu. 5:42.

16. Tro sa nyitipune tune kaa la itretre drei Iesu?

¹⁶ Tro sa nyitipune tune kaa la itretre drei Iesu? Tro fe sa madrin, e tro sa catre nyihlue i Iehova ngöne la ijine Drai Ne Amekunën, me e nöjei drai. Matre tro së e cili, a amë panëne la Baselaia i Iehova ngöne la mele së. Ame itre xan, hnei angatr hna acone la itre hawa ne huliwa i maseta matre troa cainöj, me sine la itre icasikeu, me kuca la hmi ne la fami e nöjei wiik. Ame pena itre xan, ke hnei angatr hna ahmaloeëne la mele i angatr matre troa huliwa catr kowe la ekalesia maine troa tro kowe la ketre götran ka aja ixatua. Nyipici, tha ka hmaloi kö troa catre nyihlue i Iehova, ngo tro kö Nyidrëti a amanathithi së, e tro sa amë panëne la Baselaia ngöne la mele së.—Ite edomë 10:22; Mat. 6:32, 33.

17. Nemene la nyine tro epuni a kuca qëmekene la Drai Ne Amekunën? (Goeëne ju la iatr.)

¹⁷ Tru la madrine së troa atrune la Drai Ne Amekunën e Draiangedic 4 Eiperem. Ngo the treqene kö la drai cili troa lapa mekune la aqane mele i Iesu lo nyidrëti e celë fen, memine lo nyidrëti a mec. Nge qëmekene la Drai Ne Amekunën, lapa mekune jë la etrune la ihnimi Iehova me Iesu koi së. Xomi ijine jë troa e me lapa mekune la itre ewekë ka traqa hna cinyanyi ngöne lo tablo hna hape, “Wiik Tixenuë i Iesu e Celë Fen” ka mama ngöne la Mele Me Huliwa Ne Cainöj Ne La Keresiano—Pepa Nyine Huliwan ne Eiperem 2019 g. 4. E jë la itre xötr, ka troa acatrene la ole, me ihnim, me catr, me madrine i epun. Nge thele jë fe la aqane tro epuni a amamane la ole i epun. Eje hi, nyidrëti a wangatrune la itre trengecatr hnei epuni hna kuca matre troa meku nyidrë ngöne la ijine Drai Ne Amekunën.—Hna ama. 2:19.