1-2. Nemen la nyine tro palahi sa kuca thupene la bapataiso? Qejepengöne jë.

 AIJA nyidrawane eö la hnalapa i eö? Maine jë, qëmekene tro eö a lapane la uma, ke hnei eö hna pane nyidrawan asë. Ngo tune kaa e tha nyidrawane hë eö? Atre hi së laka, tro hë lai a canga dro lai uma. Haawe, loi e troa nyidrawane lapane la uma matre tro palahi ej a porop.

² Ketre tun, loi e tro palahi sa amekötine la aqane mekune së me aqane ujë së. Qëmekene tro sa bapataiso, hne së hna nue trengecatr troa “ahmitrötrë së qa ngöne la itre ewekë ka adrone la ngönetrei së, me mekuna së.” (2 Kor. 7:1) Ngo ame enehila, loi e tro sa trongëne la eamo i Paulo aposetolo, me ‘ahnyipixene pala hi la itre aqane waiewekë së.’ (Efe. 4:23) Pine nemen matre ka nyipiewekë lai? Pine laka saqe hi troa adronyi së hnene la itre ewekë ne la fen celë. Maine aja së troa amadrinë Iehova, loi e tro palahi sa isa waipengö së, ene la itre mekuna së, me aqane waiewekë së me itre aja së.

3. Nemene la aliene la troa ahnyipixene la aqane mekune së? (Roma 12:2)

³ Nemen la nyine tro sa kuca matre ahnyipixene la aqane mekune së? (E jë la Roma 12:2.) Ame la hnëewekë qene Geres hna ujëne ka hape, “ahnyipixene la aqane mekun  i nyipunie” ke, kolo fe a hape, troa “saze la aqane mekune i nyipunie.” Tha kolo kö lai a hape, tro hi sa kuca la loi. Ngo, loi e tro pe sa saze la mele së matre trongëne la itre trepene meköti Iehova. Tha tro hi a aca kuca, ngo tro palahi a kuca lapan.

4. Nemene la nyine tro sa kuca matre tha tro kö la fen a löthe la aqane mekune së?

⁴ Ame elany, e pexeje hë së, ke tro palahi sa kuca la itre ewekë ka amadrinë Iehova. Ngo ame enehila, loi e tro sa pane nue trengecatr matre amadrinë Nyidrë. Ame ngöne la Roma 12:2, Paulo a qaja laka, ka ce tro hi la troa ahnyipixene la aqane mekun memine la troa atre la aja i Akötresie. Haawe, the nue pi kö la fene celë troa löthe la aqane mekune së. Loi e tro pe sa isa waipengö së ka hape, ame la itre ewekë hne së hna ajane troa eatrën, me itre mekun hne së hna xome ke, ka ihmeku memine la mekuna i Akötresie maine mekuna i fen.

5. Nemene la itre hnying ka amamane ka hape, tha thëthëhmine kö së la drai Iehova? (Goeëne ju la iatr.)

⁵ Tro sa xome la ketre ceitun. Öni Iehova, the ‘thëthëhmine kö la ijine hna hape, celë hë la drai Iehova.’ (2 Pet. 3:12) Isa hnyinge jë ka hape: ‘Kolo kö a mama ngöne la meleng laka, easenyi hë troa apatrene la fene celë? Eni kö a amamane ka hape, ka sisitria la huliwa i Iehova hune la troa ini aqeanyi maine huliwa i maseta? Xecie kö koi ni laka, tro Iehova a thupë ni me faming? Maine eni pena a hnehengazo kowe la itre ewekëng?’ Pane mekune jë la madrine i Iehova la Nyidrëti a öhnyi epun a amë panëne la aja i Nyidrë ngöne la mele i epun!—Mat. 6:25-27, 33; Fil. 4:12, 13.

6. Nemene la nyine tro palahi sa kuca?

 ⁶ Loi e tro palahi sa waipengö së, me saze la itre thiina së ka ngazo. Öni Paulo kowe la angetre Korinito: “The mano kö nyipunie isa tupathe ka hape, nyipunieti kö ngöne la lapaun. Nge catre jë isa waipengöi nyipunie.” (2 Kor. 13:5) Tha eje casi kö la troa sine la itre icasikeu, me cainöj matre amamane ka hape, easë “ngöne la lapaun.” Loi e tro fe a mama ngöne la aqane mekune së, me itre aliene hni së, me itre aja së. Nyipiewekë tro palahi sa e la Tusi Hmitrötr matre ahnyipixen la aqane mekune së. Celë hi ka troa xatua së troa waiewekë tui Iehova, me amadrinë Nyidrë.—1 Kor. 2:14-16.

7. Thenge la Efeso 4:31, 32, nemene la nyine tro sa kuca? Pine nemene matre tha ka hmaloi kö?

⁷ E jë la Efeso 4:31, 32. Tha tro hmekuje kö sa saze la aqane mekune së, ngo loi e tro fe sa “heetrëne la thiina ka hnyipixe.” (Efe. 4:24) Nyipiewekë tro sa nue trengecatr. Eje hi, tha ka hmaloi kö troa xometrij la trengehni, me elëhni, me iwesitrë qa kuhu hni së. Pine nemene matre jole catr troa saze la itre thiina së? Pine laka, ase hë lapane la hni së hnene la itre xaa thiina cili. Öni Tusi Hmitrötr, hetre atr ka “canga elëhni, nge ka pi iöni hatrë.” (Ite edomë 29:22, MN) Thupene la bapataiso, nyipiewekë tro palahi sa isine troa nuetrij la itre thiina ka ngazo. Celë hi hna melën hnene la ketre trejin.

8-9. Thenge la hna melën hnei Stephen, pine nemen matre loi e tro palahi sa isine troa nuetrij la itre thiina ka ngazo?

⁸ Stephen la ketre trejin ka elëelëhni. Öni angeic, “Ase hë bapataiso ni, ngo eni palahi a isine troa saze. Ame lo ketre ijin, eni a cainöje trootro, nge hnenge hna weje huzune la ketre atr ka atrekënö la ikaho ngöne la lotong. Ame hë la eni a easenyi koi angeic, ke hnei angeic hna nuetrije la ikaho me kötr. Hnenge hna qaja kowe la itre trejin la ewekë ka traqa koi ni, nge sa jë hi la ketre qatre thup ka hape, ‘Stephen, maine ea ju eö lai trahmany, tro eö a uë angeic?’ Hna ketri ni hnene la hnyinge i nyidrë, nge celë hi ka upi ni troa thele la tingeting.” b

⁹ Tui Stephen, ijije hi troa fetra hmaca la itre thiina së hnapan. Maine celë hi ka traqa koi eö, the kucakuca kö, nge the mekune kö ka hape, tha Iehova kö a kepe eö. Ketre öni Paulo: “Ame la eni a thele troa kuca la loi, ngazo la ka mama theng.” (Rom. 7:21-23) Pine laka itre atr ka ngazo së, loi e tro palahi sa isine matre tha tro kö a fetra hmaca la itre thiina së ka ngazo. Ka ceitune hi lai memine la poussière ngöne la hnalapa së. Loi e tro palahi sa köle matre troa porop. Maine easa ajan troa “porop” maine wië, loi e tro sa nue trengecatr. Nemene la ka troa xatua së?

10. Nemene la aqane tro sa nuetrij la itre thiina ka ngazo? (1 Ioane 5:14, 15)

¹⁰ Qaja jë koi Iehova la itre thiina hnei eö hna pi saze, nge tro kö Nyidrëti a drei eö, me xatua eö. (E jë la 1 Ioane 5:14, 15.) Tha tro kö Iehova a apatrene la thiina i eö cili, ngo tro Nyidrëti a xatua eö troa nuetrije la thiina cili. (1 Pet. 5:10) Ketre, the kuca kö la itre ewekë ka troa ahlëne hmaca lai thiina cili, tune la  troa goeëne la itre film, maine emisio, maine e pena la itre itus ka amamane lai thiina cili. Nge the ahlëne kö thei eö la itre aja ka ngazo.—Fil. 4:8; Kol. 3:2.

11. Nemene la aqane tro palahi sa heetrëne la thiina ka hnyipixe?

¹¹ Ngacama ase hë epun unatrij lo itre thiina i epun hnapan, ngo nyipiewekë tro epuni a heetrëne la thiina ka hnyipixe. Troa tune kaa? Ame la epuni a öhne la ketre thiina thei Iehova, ke thele jë troa nyitipu Nyidrë. (Efe. 5:1, 2) Ame la epuni a e la ketre hna melën e hnine la Tusi Hmitrötr ka amamane la aqane nue Iehova la ngazo i itre xan, isa hnyinge jë ka hape, ‘Eni kö a nue la ngazo i itre xan?’ Maine epuni a e la ketre xötr ka amamane la utipine i Iehova kowe la itre ka pë ewekë, isa hnyinge jë ka hape, ‘Eni kö a mekun la itre trejin ka pë ewekë, me thel troa xatua angatr?’ E tro epuni a isine troa heetrëne la itre thiina ka hnyipixe, tro lai a ahnyipixene la aqane mekune i epun. Maine kola fetra hmaca la itre thiina i epun hnapan, ke the kucakuca kö!

12. Kola mama tune kaa ngöne la aqane ujë i Stephen la emenene la Tusi Hmitrötr?

¹² Hnei Stephen, lo trejin hna qaja e caha, hna isine troa heetrëne la thiina ka hnyipixe. Öni angeic: “Qaane lo eni a bapataiso, hna traqa la itre ewekë laka, maine eni ju ekö lo, ke tro ni a canga elëhni. Ngo hnenge hna ananyine la itre atr ka pi iwesitrë, me thele la itre aqane troa nyinyine la jol. Hnei föeng me itre xan hna qaja aloinyi ni pine la aqane ujëng ngöne la itre ijine cili, nge eni fe a sesëkötr! Tha hnene kö la sipu trengecatreng, ngo qa ngöne la emenene la Tusi Hmitrötr.”

13. Nemene la ka troa xatua së matre tha tro kö sa kei thenge la itre aja ne ngönetrei? (Galatia 5:16)

¹³ E jë la Galatia 5:16. Iehova a hamë së la uati hmitrötr matre xatua së troa catre kuca la loi. Ame la easa ini Tusi Hmitrötr, easë hi lai a kapa la ixatua ne la uati hmitrötr. Ketre, easa kapa la uati hmitrötr ngöne la easa sine la itre icasikeu. Ame ngöne la itre ijine cili, easa ce madrin memine la itre trejin ka isine troa kuca la loi tu së, nge celë hi ka ithuecatre koi së. (Heb. 10:24, 25; 13:7) Ame la easa sipo Iehova troa xatua së troa nuetrij la ketre aja ka ngazo, Nyidrëti a hamë së la trengecatr matre troa cil kowe la aja cili. Tha kolo kö lai a hape, troa patr la itre aja së ka ngazo thupene la hna ini Tusi Hmitrötr, maine icasikeu, maine thith. Ngo e tro sa majemine kuca la itre ewekë cili, ke tha tro kö sa kei thenge la itre aja së ka ngazo. Tune la hna qaja hnei Galatia 5:16, tha tro kö la itre ka mele thenge la ua a “kei thenge la itre aja ne ngönetrei.”

14. Pine nemene matre nyipiewekë tro palahi sa isin troa hetre aja ka loi?

¹⁴ Ngacama catrecatre hë la imelekeu së me Iehova, ngo loi e tro palahi sa isin troa hetre aja ka loi. Pine nemen? Ke eje palahi the së la aja troa kuca la ngazo. Bapataiso ju hë së, ngo ijije hi tro hmaca a huli së hnene la itre hne së hna majemine kuca ekö, tune la troa elo mani, maine iji gorok, maine goeë iatr ka sis. (Efe. 5:3, 4) Önine la ketre trejin trahmany: “Ame la ka jole catre koi ni, ke ene la troa isi memine la ajang troa tro koi trahmany. Öninge pena kö ka hape, tro hi a canga patr, ngo eje palahi theng.” E  catrehnine palaha la aja ka ngazo e kuhu hni së, nemene la ka troa xatua së?

15. Pine nemene matre ka ithuecatr la troa atre ka hape, hetre itre xan ka isi memine la itre aja ka ngazo? (Goeëne ju la iatr.)

¹⁵ The mekune pi kö ka hape, epuni casi hi la ka isi memine la ketre aja ka ngazo. Öni Tusi Hmitrötr: “Ame la itre itupath ka traqa koi nyipunie, kolo fe a hane traqa koi nöjei atr asë.” (1 Kor. 10:13a) Önine la ketre Tusi Hmitrötr ka hape: “Casi hi la itre itupath ka traqa koi epun me kowe la itre xaa trahmanyi me föe.” Hna cinyanyine lai kowe la itre trejin trahmanyi me föe ne Korinito. Ame la itre xan thei angatr ekö ke, itre ka nyixetë, nge itre trahmanyi ka ce meköl me trahmany, me itre ka iji gorok. (1 Kor. 6:9-11) Ame koi epun, patre hnyawa ha la itre aja cili thei angatr thupene la bapataiso? Waea. Nyipici, itre trejin hna iëne angatr, ngo itre atr ka tha pexeje palakö. Matre ame itre xaa ijin, angatr a isi memine lo itre aja i angatr ekö. Celë hi ka ithuecatre koi së. Pine nemen? Pine laka, kola amamane ka hape, hetre hlue i Iehova hë ka hane melëne la jol ka traqa koi së enehila. Celë hi matre “cile huti ju ngöne la lapaun, ke atre hë [së] ka hape, hna traqa fe la itre akötre cili kowe la lapa ne la itre trejin me [së] e cailo fen.”—1 Pet. 5:9.

16. Nemene la ketre hnö nyine tro sa thupen, nge pine nemen?

¹⁶ Itre xaa trejin a mekun ka hape, pëkö ka atreine trotrohni angatr. Ngo ketre hnö la troa mekune tun, ke tro epuni lai a mekun ka hape, ka luzi hë epun, nge tha ijiji epuni kö troa isi memine la itre aja ka ngazo. Eloine pe, tha celë kö la hna qaja hnei Tusi Hmitrötr. Ej a qaja ka hape: “Ka nyipici Akötresie, matre tha tro kö nyidrëti a nue nyipunie kowe la itupath hnei nyipunie hna thatreine  xomihnin, ngo hnine la itupath, tro kö nyidrëti a nyi jëne kötre i nyipunie, matre atreine jë nyipunie cile hut.” (1 Kor. 10:13b) Haawe, ngacama catrehnine la aja ka ngazo ka ej thei epun, ngo ijiji epun troa mele nyipici koi Iehova. Nge jëne la ixatua i Nyidrë, tha tro kö epuni a kei kowe ej.

17. Nemene la nyine tro sa kuca, e fetra hmaca jë la itre aja së ka ngazo?

¹⁷ The thëthëhmine kö laka, itre atr ka tha pexeje kö së, matre tro lai a fetra hmaca la itre aja ka ngazo. Ngo e traqa mina ha, canga lepetrije pi, tui Iosefa lo angeic a kötrene la föi Potifara. (Gen. 39:12) The kei thenge pi kö la itre aja i epuni ka ngazo!

18-19. Nemene la itre hnyinge ka troa xatua së troa ahnyipixene la aqane mekuna së?

¹⁸ Tro sa ahnyipixene la aqane mekune së, e tro la itre mekun me itre huliwa së a ihmeku memine la aja i Iehova. Tha ka hmaloi kö matre nyipiewekë tro sa nue trengecatr. Haawe, loi e tro palahi sa hnyinge ka hape: ‘Kolo kö a mama ngöne la aqane ujëng laka, easa melëne la itre drai ne la pun? Mama kö theng la itre thiina ka hnyipixe? Eni kö a nue la uati hmitrötr troa xatua ni troa cile kowe la itre aja ka ngazo?’

¹⁹ Ame la epuni a isa waipengöi epun, ke madrine jë kowe la itre ewekë hnei epuni hë hna kuca. Maine öhne hi epun laka, hetre nyine tro palakö epuni a huliwan, the kucakuca kö. Trongëne jë pe la hna qaja ngöne Filipi 3:16, kola hape: “Pine laka hne së asë hi hna kökötr ngöne la lapaun, loi e tro pala hi së a isa nyinyape hnyawa ngöne la iwaja ka cas.” Haawe, tro kö Iehova a amanathithine la itre trengecatr hnei epuni hna nu matre tro palahi a ahnyipixene la aqane mekune i epun.