TANE MEKUN 4
NYIMA 30 Tretretrong, Akötresingö Nge Enehmung
Iehova a Hnimi Epun
“Ka nyipi menyike la ihnimi i Iehova.”—IAKO. 5:11.
MEKUN KA TRU
Tro sa ce wange la aqane tro la ihnimi Iehova a easenyi së koi Nyidrë me thupë së me hamë trengecatre së.
1. Ka tune kaa Iehova koi epun?
HNEI epuni kö hna hane hnyinge ka hape, ka tune kaa Iehova? Ame la epuni a thith koi Nyidrë, ka tune kaa Nyidrëti koi epun? Nyipici laka, tha öhnyi Nyidrëti kö hne së, ngo hetre itre hnaewekë e hnine la Tusi Hmitrötr ka qeje Nyidrë. Kola qeje Iehova ka hape, “jö me pete” me “eë ka dreuthetrije la nöjei ewekë asë.” (Sal. 84:11; Heb. 12:29) Ketre, ej a aceitunëne la lolo i Iehova memine la etë safairo, me kopa ka palulu me lewen. (Ezek. 1:26-28) Celë hi matre, easë a hain me metrötrë Nyidrë.
2. Nemene la ka troa sewe së troa easenyi Iehova?
2 Pine laka, tha öhnyi Iehova kö së, matre jole koi së troa mekun ka hape, Iehova a hnimi së. Maine jë tro sa mekun ka hape, tha tro kö Nyidrëti a hane hnimi së, pine la itre jole hne së hna cile kow. Maine pena, ke tha hna hnimi së hnene la keme së. Trotrohni së hi hnei Iehova memine la kepine matre jole koi së troa easenyi Nyidrë. Celë hi matre, Nyidrëti a amamai së la pengöi Nyidrë jëne la Trengewekë i Nyidrë.
3. Nemene la thangane e tro sa atre laka, Iehova a hnimi së?
3 Ame la hnaewekë ka qaja hnyawane la pengöi Iehova, ke ihnim. (1 Ioane 4:8) Tusi Hmitrötr a hape, Akötresieti la ihnim. Nyidrëti a kuca asë la itre ewekë ngöne la ihnim. Pine laka, tru catre la ihnimi Iehova, matre Nyidrëti fe a hnim la itre ka xele ma wai Nyidrë. (Mat. 5:44, 45) Ame ngöne la tane mekune celë, easë a troa ce wange la pengöi Iehova memine la ihnimi Nyidrëti koi së. Maine tro sa thele troa atre Nyidrëti hnyawa, ke tro ha kökötre la ihnimi së koi Nyidrë.
TRU LA IHNIMI IEHOVA KOI SË
4. Tune kaa epun la epuni a atre ka hape “ka nyipi menyike la ihnimi i Iehova?” (Wange ju fe la iatr.)
4 “Ka nyipi menyike la ihnimi i Iehova.” (Iako. 5:11) Tusi Hmitrötr a aceitunë Nyidrë me ketre thin ka menyik. (Is. 66:12, 13) Pane mekune jë la ketre thin ka thupëne hnyawane la nekö i eahlo. Eahlo a enienijëne la nekö i eahlo hune la watingöneca i eahlo me ithanata amenyiken koi nyën. Ame la nyën a treij, ke eahlo a isine troa aupunyi nyën. Loi e xecie koi së laka, ame la easa akötr, ke tro kö Iehova a hnimi së. Önine la atre cinyihane la Salamo: “Ngöne la nyimu mekun’ e kuhu hning, kola akeukawane la hninge hnene la ite nyine aupune qa thei [nyipë.]”—Sal. 94:19.
“Kola aupune la nekönatr hnei thin, ketre tune tro ni a aupunyi nyipunie” (Wange ju la paragarafe 4)
5. Pine laka ka ihnimi nyipici lae Iehova, nemene la ka xecie koi epun?
5 Ka mele nyipici lae Iehova. (Sal. 103:8) Ame la easa kuca la ketre ewekë ka ngazo, tha Nyidrëti kö a nuetriji së. Anyimua akötrë Nyidrë hnene la angetre Isaraela. Ngo ame la kola ietra hnene la nöj, ke Iehova a amamane la ihnimi Nyidrëti koi angatr. Öni Nyidrëti kowe la nöj: “Eö la hniminang, tro ni a atrunyi ’ö; nge hnenge hna hnimi ’ö.” (Is. 43:4, 5) Tha saze kö Iehova. Ijiji së hi troa mejiune kowe la ihnimi Nyidrë. Ngacama hne së hna kuca la itre ngazo ka tru, ngo tha tro jë kö Nyidrëti lai a nuetriji së. Maine tro sa ietra me bëeke hmaca koi Nyidrë, ke tro së lai a öhne laka, tha saze kö la ihnimi Nyidrëti koi së. Tro kö Nyidrëti a “nyipi köle tij’ asë” la itre ngazo së. (Is. 55:7) Tusi Hmitrötr a aceitunëne la aqane nue Nyidrëti la itre ngazo së me “itre ijine iakeukawanyi qaathei Iehova.”—Itre hu. 3:19.
6. Nemene la hna ini së hnei Zakaria 2:8 göi Iehova?
6 E jë la Zakaria 2:8. Pine laka Iehova a hnimi së, trotrohnine hi Nyidrë la itre aliene hni së, nge aja i Nyidrë troa thupë së. Ame la easa akötr, ke Nyidrëti fe a akötr. Matre xecie koi së laka, tro kö Nyidrëti a kapa la itre thithi së, e tro sa hape: “Thupë ni ju tune la wene demune mek.” (Sal. 17:8) Ka nyipiewekë la wene dremune alamek ngöne la ngönetrei nge tha nyine tro kö a ketr. Matre ame la Iehova a aceitunë së memine la wene dremune alameke i Nyidrë, ke kösë Nyidrëti a qaja koi së ka hape, ‘Ame la itre ka akötrëne la itre hlueng, ke kola akötrëne la itre ka nyipiewekë koi ni.’
7. Pine nemene matre loi e tro sa acatrene la lapaune së laka, Iehova a hnimi së?
7 Aja i Iehova troa xecie koi së isa ala cas laka, Nyidrëti a hnimi së. Ngo atre hi Nyidrëti laka, pine la itre ewekë ka akötrë së ekö, easa hnyinge ka hape, Nyidrëti kö a hnimi së. Maine jë easë cile kowe la ketre jol enehila, matre easa luelu kowe la ihnimi Nyidrë. Tro sa wange la aqane amamane Iehova la ihnimi Nyidrëti koi Iesu, kowe la itre hna iën me koi së isa ala cas, matre acatrene la lapaune së laka, Nyidrëti a hnimi së.
AQANE AMAMANE IEHOVA LA IHNIMI NYIDRË
8. Pine nemen matre xecie koi Iesu ka hape, Iehova a hnimi nyidrë?
8 Qane ekö, hnei Iehova memine la Nekö hnimina i Nyidrë hna acatrene la ihnimi nyidro. Ka hekö catre hë la imelekeu i nyidro. Hnei Iehova hna qaja amamane la ihnimi Nyidrëti koi Iesu ngöne Mataio 17:5. Maine ju tro hi Nyidrëti a qaja ka hape, ‘Hane hi la, eni a madri nyën.’ Ngo aja i Iehova tro sa atre laka, tru la ihnimi Nyidrëti koi Iesu, matre öni Nyidrë “Nekönge hniminang.” Madrine catre Iehova koi Iesu, ke aja i Iesu troa huujëne la mele i nyidrë. (Efe. 1:7) Xecie koi Iesu laka, Iehova a hnimi nyidrë. Pine laka, mama cile hi koi Iesu la ihnimi Iehova, matre drenge catre nyidrë e kuhu hni nyidrë. Celë hi matre anyimua qaja nyidrë ka hape, Keme i nyidrë a hnimi nyidrë.—Ioane 3:35; 10:17; 17:24.
9. Nemene la hnaewekë hnei Paulo hna qaja matre amamane la ihnimi Iehova kowe la itre hna iën? Qejepengöne jë. (Roma 5:5)
9 Hnei Iehova fe hna qaja amamane la ihnimi Nyidrëti kowe la itre keresiano hna iën. (E jë la Roma 5:5.) Öni Paulo ka hape, “hna hamëne” la ihnimi cili. Önine la ketre itus ka qejepengöne la Tusi Hmitrötr ka hape, kösë hna “neni la ketre tim ka tru” hui angatr. Ketre ceitune lai ka amamane la etrune la ihnimi Iehova kowe la itre keresiano hna iën! Atre hi la itre hna iën ka hape, angatr la “itre hna hnime hnei Akötresie.” (Iudra 1) Ioane aposetolo a qaja la aliene hni angatr ka hape: “Hanawange la pengöne ihnim hna hamë së hnene la Kem, laka, troa hë së ka hape, itre nekö i Akötresie!” (1 Ioane 3:1) Hapeu, Iehova a hnime hmekuje hi la itre hna iën? Waea. Hnei Iehova hna amamane laka, Nyidrëti a hnimi së isa ala cas.
10. Nemene la hatrene ihnimi Iehova koi epun?
10 Nemene la hatrene ihnim ka tru i Iehova? Thupene mel la hatrene ihnimi Iehova hna thatreine amamane hnei itre xan! (Ioane 3:16; Rom. 5:8) Hnei Iehova hna huujëne la Nekö hnimina i Nyidrë. Hnei Nyidrë hna nue Iesu troa mec thatraqane la itre ngazo së me aijijë së troa nyisinee i Nyidrë. (1 Ioane 4:10) E tro sa lapa mekun la hnei Iehova me Iesu hna kuca koi së, ke tro hë së lai a öhne la etrune la ihnimi nyidroti koi së, isa ala cas. (Gal. 2:20) Tha hna hamëne kö la thupene mel hnene hi laka, hnei Iehova hna amekötin. Ketre ahnahna lai, hna hamëne ngöne la ihnim. Hnei Iehova hna amamane laka, tru la ihnimi Nyidrëti koi së, ngöne la Nyidrëti a huujëne la Nekö hnimina i Nyidrë. Hnei Nyidrë hna nue Iesu troa akötr me meci pi së.
11. Nemene la ini hne së hna xome qa ngöne Ieremia 31:3?
11 Tune la hne së hna ce wang, Iehova a qaja amamane la ihnimi Nyidrëti koi së. (E jë la Ieremia 31:3.) Hnei Iehova hna e së koi Nyidrë, ke Nyidrëti a hnimi së. (Wange ju fe la Deuteronomi 7:7, 8.) Pëkö ca ewekë maine atr ka troa sewe së qa ngöne la ihnimi Nyidrë. (Rom. 8:38, 39) Tune kaa epun, la epuni a atre ka hape, Iehova a hnimi epun? E jë la Salamo 23, me wange la thangane la ihnimi Iehova koi Dravita me aqane thupë angeic hnei Nyidrë. Tro fe lai a hetre thangane koi së, isa ala cas.
TUNE KAA EPUN LA EPUNI A ATRE KA HAPE IEHOVA A HNIMI EPUN?
12. Tune kaa la aqane qejepengöne epun la Salamo 23?
12 E jë la Salamo 23:1-6. Ame la Salamo 23 ke ketre nyima. Dravita a nyimane ka hape, Iehova a hnimi angeic, nge tro kö Nyidrëti a thupë angeic. Angeic a qaja la aqane imelekeu i angeic me Iehova, lo Atre Thupë Mamoe. Hnei Dravita hna nue Iehova troa eatrongë angeic, matre tha xou i angeic kö, nge ka mejiun angeic koi Nyidrë. Atre hi angeic ka hape, Iehova a amamane e nöjei drai la ihnimi Nyidrëti koi angeic. Pine nemene matre ka xecie koi angeic?
13. Pine nemen matre xecie koi Dravita laka, tro kö Iehova a thupë angeic?
13 “Tha tro kö ni a pë ewekë.” Öhne hi Dravita la ihnimi Iehova, ke hnei Nyidrëti palahi hna hamë angeic la itre ka nyipiewekë kowe la mel. Atre fe hi angeic laka, Iehova la sinee i angeic, nge madrine catre Nyidrëti koi angeic. Celë hi matre xecie koi angeic laka, tro kö Iehova a hamë angeic la itre ka nyipiewekë kowe la mel, ngacama traqa ju hë la itre jol. Xecie koi angeic laka, Iehova a hnimi angeic, matre tha seseu menu kö angeic, nge angeic a melëne la hna hetreny me mele madrin.—Sal. 16:11.
14. Tune kaa la aqane hnim me thupë së hnei Iehova?
14 Iehova a ihnim me thupë së ngöne la easa akötr. Thatre kö Claire, a ketre trejine ka huliwa Bethela, a 20 hë lao macatre enehila, la nyine troa kuca lo kola traqa itrai la itre jol kowe la fami angeic. Hna AVC hnene la keme i angeic, nge hna upetröneëne la ketre trejin me angeic. Ketre, thatreine hë la fami i angeic nyithupene la uma me magasin i angatr. Tune kaa la aqane hnim me thupë angatr hnei Iehova? Öni Claire: “Hnei Iehova hna hamëne kowe la faming la ka ijij e nöjei drai. Ame itre xaa ijin, tru palaha la hnei Nyidrëti hna hamëne koi angatr! Eni hmaca mekune la aqane xatua hun hnei Iehova, nge thatreine kö ni thëthëhmine la ihnimi Nyidrë. Celë hi ka xatua ni troa cile catre kowe la itre xaa itupath ka traqa e thupen.”
15. Nemene la ka hamë trengecatre hmaca koi Dravita? (Wange ju fe la iatr.)
15 ‘Nyidëti hmaca a hamë trengecatreng.’ Seseu catre Dravita hnene la itre jol me itre itupath ka traqa koi angeic. (Sal. 18:4-6) Ngo, hnene la ihnim me aqane menyike i Iehova hna aegöcatrenyi angeice hmaca. Ame la angeic a kucakuca, Iehova a e angeic ngöne “la hnënge haö ka cia loi” me “ngöne la ite timi ka tha enij.” Celë hi ka hamë trengecatre koi Dravita troa catre nyihlue i Iehova ngöne la madrin.—Sal. 18:28-32.
Ame ngöne lo itre ijin Saulo a weje huzu Dravita, hnei Iehova hna hnim me thupë Dravita matre hna hamë trengecatre i angeic hmaca (Wange ju la paragarafe 15)
16. Kola hamë trengecatre i epun tune kaa hnene la ihnimi Iehova?
16 Ketre tune enehila, hnene la “ihnimi Iehova laka tha pate kö shë” la easa cile kowe la itre jol. (Ite teije. 3:22; Kol. 1:11) Hane hi la ka traqa koi Rachel. Ame lo ijine COVID-19, hna trotriji angeic me Iehova hnene la föi angeic. Akötre catre angeic. Nemene la hnei Iehova hna kuca koi angeic? Öni angeic: “Hnei Iehova hna aijijëne la itre sineeng troa ce me eni. Hnei angatr hna ce lapa me eni, traqa fë xen koi ni me iupi fë message me itre xötr ka iakeukawany. Ketre hnei angatre hna amekunë ni ka hape, Iehova a thupë ni. Eni palahi a olene koi Iehova la hna hamë ni la ketre fami ka ihnim.”
17. Pine nemene matre tha Dravita kö a “qouene la ngazo”?
17 “Tha tro kö ni a qouene la ngazo; ke ce [nyipë] me ini.” Tru catr hnei ithupëjia i Dravita ngöne la mele i angeic, nge xönë hi angeic troa mec e itre xaa ijin. Ngo jëne la ihnimi Iehova, tha xou i angeic kö, nge atre hi angeic laka, Iehova a thupë angeic. Traqa ju hë la itre jol, ngo xecie koi angeic ka hape, ce Iehova me angeic, nge celë hi ka akeukawanyi angeic. Matre öni angeic: Hnei Iehova hna “amele ni qa ngöne la ite qoung’ asë.” (Sal. 34:4) Eje hi hna traqa koi Dravita la xou, ngo hnei angeic hna elëhune lai, ke atre hi angeic ka hape, Iehova a hnimi angeic.
18. Kola akeukawanyi epun tune kaa, ngöne la epuni a atre ka hape, Iehova a hnimi epun ngöne la epuni a xou?
18 Kola hamë trengecatre së tune kaa la easa atre ka hape, Iehova a hnimi së ngöne la easa xou? Hnei Susi ketre pionie hna qejepengöne la aliene hni angeic me föi angeic ngöne lo kola hnöjua hnene la nekö i nyidroti trahmany. Öni angeic: “Ame la kola traqa la ketre ewekë ka akötr ngöne la mele i epun, ke kola ketri epun, nge thatre kö epun la nyine troa kuca. Ngo hnene la ihnimi Iehova hna thupë nyio me akeukawanyi nyio.” Öni Rachel lo trejin hna qaja e kula, ka hape: “Ame lo ketre hej, tha fene akötre kö ni me seseu. Matre hnenge hna thithi koi Iehova me treij. Ame e cili, eni a drenge la Iehova a aupune la hning, tune la ketre thine a aupune la nekö i eahlo, ame hnenge hna meköle hmaca. Tha tro kö ni a thëthëhmine la hnei Iehova hna kuca koi ni.” Foa lao macatre ne akalabusi Tasos ketre qatre thup, ke xele angeic troa hane sooc. Hnei Iehova hna hnim me thupë angeic tune kaa? Öni angeic: “Hnei Iehova hna hamëne la ka nyipiewekë kowe la meleng me itre xaa ewekë ju kö. Celë hi ka acatrene la mejiuneng koi Nyidrë. Ketre jëne la uati hmitrötr, Nyidrëti a xatua ni troa madrin, ngacama tha ka loi kö la mel ngöne la kalabus. Eni a trotrohnine e cili laka, e tro ni a catre huliwa me Nyidrë, ke tro palahi Nyidrëti a hnimi ni. Celë hi matre, hnenge hna xome la huliwa ne pionie ngöne la kalabus.”
EASENYI JË KOWE LA AKÖTRESIE KA TRU IHNIMIN
19. (a) E xecie koi së laka Iehova a hnimi së, nemene la hne së hna troa qaja koi Nyidrë? (b) Nemene la xötr ka ketri epun, ka qaja la ihnimi Iehova? (Wange ju la hna eköhagen “ Itre Xötr Ka Amamane La Ihnimi Iehova.”)
19 Kola amamane hnene la hna melëne hnei Dravita, Claire, Rachel, Susi me Tasos ka hape, ce Iehova, “Akötresie ne ihnim” memine la itre hlue i Nyidrë! (2 Kor. 13:11) Nyidrëti a hnimi së isa ala cas. Xecie koi së laka, Nyidrëti a haluthi së “hnene la ihnim” i Nyidrë. (Sal. 32:10) Ame la easa lapa mekune la aqane hnimi së hnei Iehova, ke tro së lai a öhne la iwanakoime i Nyidrë, ngöne la mele së me easenyi catre koi Nyidrë. Catre jë thith koi Nyidrë me qaja ka hape, nyipiewekë la ihnimi Nyidrëti koi së. Qaja asë jë koi Nyidrë la itre hne së hna seseu, ngacama xecie koi së laka, trotrohni së hi hnei Nyidrë nge aja i Nyidrë troa xatua së.—Sal. 145:18, 19.
20. Pine nemen matre ihnimi Iehova a easenyi së koi Nyidrë?
20 Tune la idreuthine la eë ngöne la ijine hnötr, kola akeukawanyi së hnene la ihnimi Iehova. Ka tru nge ka menyik la ihnimi Iehova. Haawe madrine jë, ke Iehova a hnimi epun. Nge qaja amamane jë ka hape: “Eni a hnimi Iehova”!—Sal. 116:1, NWT.
NEMENE LA AQANE TRO EPUNI A SA?
-
Nemene la ini hne së hna xome qa ngöne la ihnimi Iehova?
-
Pine nemene matre xecie koi epun ka hape, ka tru la ihnimi Iehova koi epun?
-
Tune kaa epun la epuni a atre ka hape, Iehova a hnimi epun?
NYIMA 108 Ihnimi Nyipici i Akötresie
a Hna saze la itre ëj.