1-2. Nemene la itre itupath ka traqa kowe la itre hlue i Iehova?

 AME la kola traqa koi së la ketre jol, ke hna aca tro saze la mele së. Hna öhne thei Luis a la ketre cancer. Nge hnei droketre hna qaja koi angeic ka hape, easenyi hë tro angeic a mec. Ka huliwa catre Monika me föi angeic koi Iehova. Ngo ame ju hi lo ketre ijin, hnei Monika hna atre ka hape, hekö hë nyixetë la föi angeic, nge ka qatre thup pe. Hnei Olivia, ketre trejin föe ka tha faipoipo kö, hna trotrij la hnalapa i angeic ke, kola troa traqa la ketre udreli. Ame la angeic hmaca a bëek, ke hna fej la hnalapa i angeic. Ame ngöne hi la hnepe ijin, hna aca tro saze la mele ne la itre trejin. Hna hane fe kö traqa la itre ewekë cili koi epun? Hna hane kö traqa koi epun la ketre jol ka aca saze la mele i epun?

² Easë asë hi a cile kowe la itre itupath me itre sine mec. Ketre, pine laka itre Temoë Iehova së, easa qëmeke kowe la icilekeu me iaxösisi qaathene la itre atr ka xele ma wai së. Tha Iehova kö a apatrene la itre jole cili. Ngo ase hë Nyidrëti qaja ka hape, tro kö Nyidrëti a xatua së. (Is. 41:10) Jëne la ixatua i Nyidrë, tro sa madrin, me atreine axecië mekune hnyawa, me mele nyipici koi Nyidrë, ngacama tru catr la itre itupath. Ame ngöne la tane mekune celë, tro sa ce wange la 4 lao aqane tro Iehova a xatua së ngöne la itre ijine akötr. Tro mina fe sa ce wange la nyine tro sa kuca matre kapa la ixatua i Nyidrë.

 TRO KÖ AKÖTRESIE A THUPË EPUN

3. Tune kaa easë, la easa melëne la ketre jole ka tru?

³ Kola traqa la jol. Ame la kola traqa la ketre jole ka tru, thatreine hë së waiewekë hnyawa me axecië mekun. Pine nemen? Pine laka, tru palaha la akötre së nge tru la itre ewekë hne së hna hnehengazon. Kösë miti hë koi së nge thatre kö së la nyine troa kuca. Hane hi la hna qaja hnei Olivia me Monika ngöne la nyidroti a cile kowe la itre jol. Öni Olivia: “Ame la eni a öhne laka, hna fej la umang, ke hleuhleu catre ni nge thatre kö ni la nyine troa kuca.” Öni Monika: “Ame la eni a atre ka hape, ka nyixetë la föi eni, ke hleuhleu catre ni. Tha nyine qaja kö la akötreng, kösë hna kuluhmathi ni. Göi thatreine fe ni kuca la itre jol e celë hnalapa. Tha ase kö ni hane mekune ka hape, tro ni a melëne lai.” Nemene la ixatua i Iehova ngöne la itre ijine cili?

4. Thenge la Filipi 4:​6, 7, nemene la hnei Iehova hna troa hamë së?

⁴ Ixatua i Iehova. Ase hë Nyidrëti qaja ka hape, tro kö Nyidrëti a hamë së, la “tingetinge qaathei Akötresie.” (E jë la Filipi 4:​6, 7.) Ame cili, kola lapa hnyawa la hni së, ke ka lolo la aqane imelekeu së me Iehova. Tingetinge lai “hna thatreine trotrohnine hnei atr,” nge ka sisitria. Ase hë epuni drenge la kola tingetinge la hni epun, thupene la hnei epun hna thith? Celë hi hna hëne ka hape, “tingetinge qaathei Akötresie.”

5. Tro la tingetinge qaathei Akötresie a thupëne tune kaa la hni me mekuna së?

⁵ Kola qaja hnene palahi la xötre cili ka hape, “tro ha thupëne la itre hni me mekuna” së hnene la tingetinge qaathei Akötresie. Hna xome la hnaewekë, “tro ha thupëne” göne troa qaja la itre sooc hna upe troa thupëne la ketre traon qëmeken la itre ithupëjia. Matre kola meköle tingeting la itre atrene la traon, ke atre hi angatr ka hape, hetre ka thupëne la itre qëhnelö. Ketre tun, tingetinge qaathei Akötresie a thupëne la hni me mekuna së. Nge kola lapa hnyawa la hni së, ke atre hi së laka, pëkö ka troa axouenyi së. (Sal. 4:8) Tui Hana, ngacama tha canga patre kö la jole ka traqa koi së, ngo tingetinge la hni së. (1 Sam. 1:​16-​18) Maine tingetinge la hni së, ke loi hi la itre mekuna së nge hmaloi hi koi së troa axecië mekun hnyawa.

6. Nemene la nyine tro sa kuca matre kapa la tingetinge qaathei Akötresie? (Wange ju fe la iatr.)

⁶ Nyine tro sa kuca. Maine epuni a seseu, ke sipo Iehova jë troa thupë epun.  Troa tune kaa? The mano kö thith, uti hë la epuni a kapa la tingetinge qaathei Iehova. (Luka 11:9; 1 Thes. 5:​17) Hnei Luis, lo trejin hne së hna qaja ha e kula, hna qejepengöne la kola ithuemacanyi nyidrë me Ana föi nyidrë ka hape, hna e drai nyidrëti pe hi. Öni nyidrë: “Ame ngöne la itre ijine ka tune lai, ke jole catre troa axecië mekun göi troa nyinyine la mec me itre xaa ewekë ju kö. Ngo jëne la thith, tingetinge la hni nyio.” Tha mano kö Luis me föi nyidrë thith matre sipo Iehova troa thupëne la hni nyidro, me hamëne la tingeting, me inamacane troa axecië mekune hnyawa. Hnei nyidroti hna öhne la ixatua i Nyidrë. Maine epuni a cile kowe la ketre itupath, catre jë thith, nge tro hë la tingetinge qaathei Akötresie a thupëne la hni me mekuna i epun.​—Rom. 12:12.

TRO KÖ IEHOVA A ACILE HUTI EPUN

7. Tune kaa easë, la easa cile kowe la ketre jole ka tru?

⁷ Kola traqa la jol. Ame la easa cile kowe la ketre jole ka tru, tha nyipi loi hë la itre aliene hni së, itre mekuna së, me itre aqane ujë së, tune ekö. Kösë kola jole la itre aliene hni së. Hnei Ana hna qaja ka hape, ketre atre pena ha angeic thupene la kola meci hnei Luis. Öni angeic: “Ame itre xaa ijin, hleuhleu catre ni, nge kola traqa koi ni la itre mekun ka ngazo. Eni fe a wesitr, ke patre hë nyidrë.” Ame itre xaa drai, Ana a hleuhleu, ke angeic casi pe hi, nge xou i angeic troa axecië mekun ngöne la itre götrane laka, Luis la ka xome ekö. Matre kösë angeic nyipine la ketre wene ka tru. Tro Iehova a xatua së tune kaa e kola jole la itre aliene hni së?

8. Nemene la hnei Iehova hna qaja koi së ngöne Isaia 33:6?

⁸ Ixatua i Iehova. Ase hë Nyidrëti qaja ka hape, tro kö Nyidrëti a acile huti së. (E jë la Isaia 33:6.) Ame la kola traqa la wene, ke tro lai a jumejume la ketre he. Loi e troa hetre ailerons ngöne la lue götrane lai he, matre tha tro kö ej a enienij. Celë hi ka aijijëne la he memine la itre atren troa traqa hnyawa ngöne la götran hna tro kow. Troa lolo la itre ailerons e ka nyinyape palahi la he. Ketre tun, maine tro palahi sa catre nyihlue i Iehova ngacama easa cile kowe la itre jol, tro kö Nyidrëti a acile huti së.

9. Tro la itre jia ne huliwa a xatua epun tune kaa troa cile catr? (Wange ju fe la iatr.)

⁹ Nyine tro sa kuca. Ame la kola jole la itre aliene hni epun, isine jë troa catre  thith, me sine la itre icasikeu me catre cainöj. Eje hi, tha tro hmaca kö lai a tune ekö, ngo mekune kö laka, ka atreine tulu ewekë Iehova. (Wange ju fe la Luka 21:​1-4.) Ame ngöne la itre huliwa i Iehova, catre jë ini Tusi cas me lapa mekun la itre hnei epun hna e. Hnei Nyidrë hna hnëkëne koi epun la itre tane mekun me itre video, ka troa xatua epun troa cile catr ngöne la itre ijine jol. Huliwane jë fe la itre jia ne huliwa ka hetreny ngöne la qene hlapa i epun, tune la application JW Library^®, Index des publications des Témoins de Jéhovah, me Nyine Thele Mekun Ne La Itretre Anyipici Iehova. Öni Monika, lo trejin hna qaja ha ekula ka hape, ame mina la kola traqa la itre mekune ka ngazo, angeic a xome la itre jia ne huliwa cili, matre thele eamo. Hnei angeic hna thele la itre hnaewekë hna hape “wesitr,” me “mele thoi” maine “mele nyipici.” Thupene lai, angeic a e la itre tane mekun uti hë la tingetinge la hni angeic. Öni angeic: “Tha lolo kö ni la eni a nyiqane ithel, ngo ame hë e thupen, kösë Iehova a haluthi ni. Eni a öhne ngöne la eni a e Tus laka, trotrohnine hi Iehova la itre aliene hning, nge ce Nyidrëti me eni.” Tro kö Iehova a acile huti epuni fe uti hë la tingetinge la hni epun.​—Sal. 119:​143, 144.

TRO KÖ IEHOVA A XATUA EPUN

10. Tune kaa së thupene la kola traqa la ketre jole ka tru?

¹⁰ Kola traqa la jol. Thupene la kola traqa la ketre jole ka tru koi së, ke tro lai a kucakuca la ngönetrei së me mekuna së. Easë hi lai a tune la ketre atr ka majemine nyinyape catr, ngo thupene ju hi la kola eatr, ke angeic a tro pejepej. Maine jë, jole koi së troa kuca la itre ewekë ka hmaloi koi së ekö, nge xele hë së ma kuca la itre ewekë ka amadrinë së ekö. Tui Elia, hace koi së troa mejë qa ngöne la hna meköl. Easë hi a ajane troa meköl. (1 Ite jo. 19:​5-7) Tro Iehova a xatua së tune kaa la easa kucakuca?

11. Nemene la ketre aqane xatua së hnei Iehova? (Salamo 94:18)

¹¹ Ixatua i Iehova. Ase hë Nyidrëti qaja ka hape, tro kö Nyidrëti a xatua së. (E jë la Salamo 94:18.) Nyipiewekë kowe la atr ka eatr hna sport troa hujan la ketre ewekë maine ketre atr matre atreine tro. Ketre tu së fe, loi e troa hetre ixatua, matre catre huliwa i Iehova. Maine  eje hi lai, hane la hnei Iehova hna troa kuca: “Ini Iehova Akötesi ’ö, ate ea la ime maca i ’ö, ate qaja koi ’ö, ka hape, The qou kö, tro ni a xatua eö.” (Is. 41:13) Hnei Dravita joxu hna kapa la ixatua cili. Qëmekene la itre jol me itre ithupëjia, öni angeic koi Iehova: kola “kepe ni draië hnene la [ime] maca i [nyipë.]” (Sal. 18:35) Ngo tro Iehova a xatua së tune kaa?

12. Drei la hnei Iehova hna up matre xatua së?

¹² Iehova a xatua së jëne la itre xaa atr. Ame lo ketre ijin Dravita a kucakuca, hnei Ionathana, sinee i angeic hna xatua angeic me aegöcatrenyi angeic. (1 Sam. 23:​16, 17) Hnei Iehova fe hna upi Elisaia troa xatua Elia. (1 Ite jo. 19:​16, 21; 2 Ite jo. 2:2) Ame fe enehila, Iehova a xatua së jëne la itre fami së, me itre sinee së maine itre qatre thup. Ngo ame la easa akötr, xele së ma wai atr, easa pi lapa cas. Nge aqane kö lai. Nemene la nyine tro sa kuca matre kapa la ixatua qaathei Iehova?

13. Nemene la nyine tro sa kuca matre kapa la ixatua i Iehova? (Wange ju fe la iatr.)

¹³ Nyine tro sa kuca. The lapa casi kö. Ame la atr ka lapa cas, thatreine hë angeic a waiewekë hnyawa, nge angeic hi a goeëne la itre jole ka eje thei angeic. Tro la aqane waiewekë cili a uku angeic troa xomi mekun ka ngazo. (Ite edomë 18:1) Ka loi mina fe e itre xaa ijin troa nango lapa cas ngöne la easa cile kowe la itre jole ka tru. Ngo, maine qea palaha la hne së hna lapa cas, ke easë hë lai a thipetrij la ixatua i Iehova. Ngacama tha ka hmaloi kö, kapa ju la ixatua qaathene la fami epun, me itre sinee me itre qatre thup. Iehova hi lai ka upi angatr troa xatua epun.​—Ite edomë 17:17; Is. 32:​1, 2.

TRO KÖ IEHOVA A AKEUKAWANYI EPUN

14. Nemene la itre ewekë ka troa axouenyi së?

¹⁴ Kola traqa la jol. Ame itre xaa ijin, easa cile qëmekene la itre ewekë ka axouenyi së. Hna hane fe traqa kowe la itre hlue i Iehova ekö, la xou me hleuhleu pine la itre ithupëjia me itre xaa jole ju kö. (Sal. 18:4; 55:​1, 5) Ame enehila, kola icilekeu me easë ngöne la hna ini, ngöne la hnë huliwa, hnei fami maine musi pena. Maine jë easa xou troa mec, ke easë a wezipo. Ame ngöne la itre ijine cili, easa aja ixatua tune la ketre nekönatr. Tro Iehova a xatua së tune kaa?

15. Thenge la Salamo 94:​19, nemene la hnei Iehova hna troa kuca koi së?

 ¹⁵ Ixatua i Iehova. Tro kö Nyidrëti a akeukawanyi së me aupunyi së. (E jë la Salamo 94:19.) Kola amekunë së hnene la Salamo celë, la ketre nekönatre jajiny laka, xou nyën troa meköl, ke kola hedreng me mani. Pane mekune jë la keme i nyën a traqa me haluthi nyën, matre aupunyi nyën uti hë la nyën a meköl. Kolo palahi a hedreng me mani, ngo tingetinge la hni nyën, ke ce nyën me keme i nyën. Qëmekene la ketre jol ka iaxoueny, aja i easë troa lapa fen la ime Iehova Keme së, uti hë la tingetinge la hni së. Nemene la nyine tro sa kuca matre akeukawanyi së hnei Iehova?

16. Nemene la nyine tro sa kuca matre akeukawanyi së hnei Iehova? (Wange ju fe la iatr.)

¹⁶ Nyine tro sa kuca. Xomi ijine jë troa thithi lapa koi Iehova me e la Trengewekë i Nyidrë. (Sal. 77:​1, 12-​14) Matre ame la kola traqa la ketre jol, canga tro hi epun a thele ixatua thei Iehova, Keme i epun. Qaja jë koi Nyidrë la epuni a xou me seseu. Nue Nyidrëti pi troa ithanata me akeukawanyi epun jëne la Tusi Hmitrötr. (Sal. 119:28) Maine jë, tro la itre xaa itus ne la Tusi Hmitrötr a akeukawanyi epun. Tune la tusi Iobu, Salamo maine Ite Edomë, memine fe la itre trengewekë i Iesu ngöne la tusi Mataio mekene 6. Ame la epuni a thith me e la Tusi Hmitrötr, ke epun hi lai a nue Iehova troa akeukawanyi epun.

17. Nemene la ka xecie koi së?

¹⁷ Xecie koi së laka, tro kö Iehova a ce me easë ngöne la itre ijine akötr. Tha tro jë kö Nyidrëti a nuetriji së. (Sal. 23:4; 94:14) Tro kö Nyidrëti a thupë së, acile huti së, xatua së me akeukawanyi së. Öni Isaia 26:3 göi Iehova: “Tro [nyipë] a thupëne ngöne la nyipi tingetinge la ate ka cile huti la hni; ke angeic’ a lapaune koi [nyipë.]” Haawe, catre jë mejiun koi Iehova, nge isine jë troa kuca la itre ewekë, matre kapa la ixatua i Nyidrë. Ngacama traqa ju hë la itre jol, ngo tro kö epuni a öhnyi trengecatr.