Tha sihngödri kö koi Paulo laka, ka hetre thangane catr la itre ithuemacanyi hna tro fë hnei Satana. Ngo, hetre itre keresiano ka tha hmek. Ame kowe la itre xa trejin e Korinito, ka catr angatr ngöne la nyipici, matre thatreine kö tro Satana a amenu angatr. (1 Korinito 10:12) Celë hi matre hna hmekë angatr hnei Paulo, me hape: “Ini a qou, wanga angazone la ite hni nyipunie ngöne la thina ka meköti me ka wië thei Keriso, tune la hnei une hna iaö Eva hnene la tenge iaö i nyën.”​—2 Korinito 11:3.

Kola mama jëne la itre ithanata i Paulo laka, tha tro pi kö sa qale kowe la sipu inamacane së. Ame la pane nyine tro sa kuca tre, ene la troa atrehmekune laka, ka hetre ethanyine la itre ithuemacanyi hna tro fë hnei Satana. Nge thupene lai, tro sa thel troa ketre thupë së kö qa ngön. Aqane tro hi së lai a ujë matre tha tro kö a amenu së hnene itre ej.

Ame la itre ithuemacanyi hna qaja e celë tre, itre ka thoi maine pena ka iaöne la itre atr, maine ka amenune la mekun, me musinëne la aqane ujë i angatr. Önine la ketre itus, ame la itre ithuemacanyi ka thoi tre, “ka ngazo, me ka hetre ethanyin, nge tha ka meköti kö.” Itre atr a qejepengöne lai ka hape, “trengathoi, maine hna atrun, maine ka iaö, maine ka amenune la mekun.”​—Propaganda and Per­suasion.

Ka hetre ethanyine catr la itre ithuemacanyi hna sil ke, tro lai a amenune trongëne la aqane waiewekë së, nge thatre ju kö së. Ceitune hi lai memine la ketre eny hna mecin; tha ka mama kö, nge tha drenge kö së la punepunen. Öni Van­ce Packard, ketre atr ka inamacan, ka hape, ka hetre ethanyine la itre ithuemacanyi hna sil kowe la aqane ujë së, nge “ka tha mama kö koi së.” Önine la ketre ka inamacan, jëne la itre ithuemacanyi hna sil, ngazo pi hë la aqane ujë ne la itre atr, ke hna uku angatr troa isi ihumuth (kola apëne la itre atrene la ketre nöj), me iakötrë pi nöj me pi hmi.​—Easily Led​—A History of Propaganda.

Maine hna amenu së hnene la itre ithuemacanyi qaathei atr, haawe, tha sesëkötre kö së laka, troa amenu së tune lai hnei Satana. Atre hnyawa hi Satana la pengöne la atr qaane la kola xupi angeic. Ketre, Satana enehila la ka musinëne la “fene hnengödrai asëjëihë,” matre ijiji angeice hi troa ahlemune la itre trengathoi angeic. (1 Ioane 5:​19; Ioane 8:​44) Satana a “atimekëne la ite hni” ne la ka ala nyimu jëne la itre ithuemacanyi hnei angeic hna sil. Matre angeic enehila a “amenune la fene hnengödrai asëjëihë.” (2 Korinito 4:4; Hna Amamane 12:9) Nemene la nyine tro sa kuca matre tha tro kö a amenu së hnene la itre trengathoi i angeic?

Öni Iesu, hetre nyine kuca matre tha tro kö a amenu së hnene la itre trengathoi i Satana: “Tro hë nyipunie a ate la nyipici, nge tro ha nue amacai nyipunie hnene la nyipici.” (Ioane 8:​31, 32) Ame ngöne la hna isi, nyipiewekë tro la atre isi a atre la itre nyipi ithuemacanyi wanga tro jë la itre trengathoi ne la ithupëjia a amenu angeic. Ekaa la hnë troa öhne la itre nyipi ithuemacany? Hnei Iehova hna hamëne la itre ithuemacanyi cili hnine la Wesi Ula i Nyidrë, ene la Tusi Hmitrötr. Tro sa öhne e cili la nöjei ithuemacanyi ka ijij matre tha tro kö a amenu së hnene la itre trengathoi i Satana.​—2 Timoteo 3:​16, 17.

Atre hnyawa hi Satana lai. Matre, angeic a amenu së me sewe së troa e, me inine la Tusi Hmitrötr jëne la fen hnei angeic hna musinën. The amenu nyipunieti kö hnene la “ite nyinyithina i diabolo”! (Efeso 6:​11) Eje hi laka, nyipiewekë tro sa atre la nyipici. Ngo, loi e tro fe sa isine troa sine thel la nyipici. (Efeso 3:​18) Öni Noam Chomsky, “Thatreine kö ketre troa tro fë la nyipici, me amë ej e hnine la atuate i eö. Qa i eö troa ketre sipu thele ej, matre troa atre.” Waipengöne hnyawa jë “o drai la ite hna cinyihan” matre ‘troa ketre sipu thele la nyipici.’​—Ite Huliwa 17:11.

Xele catre Satana matre tro eö a atreine waiewekë me kapa la itre ithuemacanyi ka meköt qa ngöne la hnei eö hna dreng. Matre, ame la “aliene la itre ithuemacanyi hna sil tre, gön matre tro la itre atr a kapa itre ej.” (Media and Society in the Twen­tieth Century) The canga jele nyipicine kö la nöjei ewekë hnei eö hna dreng, ngo tha hna pane mekune hnyawa pe. (Ite Edomë 14:15) Hnei Akötresie hna hamë eö la atreine waiewekë, me atreine mekun. Haawe, jëne tro eö lai a acatrene la lapaune i eö.​—Ite Edomë 2:​10-​15; Roma 12:​1, 2.

Ame la itre soc hna amenun hnene la itre ithuemacanyi hna sil tre, canga tro hi angatre a xou troa isi. Ketre, tro hë angatr a itö isi, maine ananyine pena la itre sine soce i angatr. Önine la ketre tane isi Alema, ame la ketre kepine matre hna ngaan la angetre Alema lo Pane Isi Ka Tru tre, hnene hi la itre ithuemacanyi hna sil. Öni angeic, hna amenun la itre atr hnene la itre trengathoi, matre kösë hna lapa xomi angatr hnene itre ej. Celë hi aqane huliwa i Satana fe lai matre troa thë la cas ka ej thene la itre keresiano enehila. Angeic a thelejëne matre troa iwesitrë la itre trejin. Nge tro itre xan a mekun ka hape, tha ka meköti kö la aqane huliwa ne la organizasio i Iehova, ene pe angatr a trotrije pi.

The amenu nyipunieti kö! Trongëne jë la itre eamo ne la Tusi Hmitrötr, nge thele jë troa cas memine la itre trejin. Tusi Hmitrötr a xatua së tro pala hi sa nue la ngazo i ketre me ketre, me saqe unijolene la itre hnepe ihmönyinyi. (Kolose 3:​13, 14; Mataio 5:​23, 24) Ketre, ej a hmekë së matre tha tro kö sa ananyine la ekalesia. (Ite Edomë 18:1) Loi e tro sa thele matre tha tro kö a amenu së hnene la itre trengathoi Satana. Isa waipengöi epuni jë me hape, ‘Ame lo kola akötrë ni hnene la ketre trejin, tune kaa la aqane ujëng? Hnenge kö hna amadrinë Iehova, maine Satana?’​—Galatia 5:​16-​26; Efeso 2:​2, 3.

Ame la soc ka tha nyipici kö kowe la tane isi, tha tro kö angeice lai a isi hnyawa. Tro la ithupëjia a thele jëne matre tro la soc a luelue, nge tha tro hë angeic a mejiune kowe la tane isi angeic. E traqa ju tria hnene la tane isi, tro la ithupëjia a thel troa amenu angeic, me hape: “Tha ijije kö troa mejiune kowe la tane isi!” nge “Tro eö lai a traqa kowe la pune ka ngazo!” Celë hi hna kuca hnei Satana. Angeic a thelejëne matre tha tro kö eö a mejiune kowe la itre hnei Iehova hna acil troa elemekene la nöje i Nyidrë.

Nemene la nyine tro eö a kuca matre tha tro kö a amenu eö? Lapa catre ju e hnine la organizasio i Iehova. Catre jë nyipici me sajuëne la itre atr ka elemeken la nöje i Iehova ngacama itre atr ka tha pexeje kö. (1 Thesalonika 5:​12, 13) Kola isi memine la organizasio hnene la itre ka iamenumenu me itre xane ju kö. (Tito 1:​10) Maine kösë nyipici la itre ithanata i angatr, ngo “the canga enienije kö la ite hni nyipunie.” (2 Thesalonika 2:2) Xötrethenge jë la eamo i Paulo koi Timoteo, kola hape: “Cile huti ju eö ngöne la nöjei ewekë hna ini’ ö,” nge the thëthëhmine kö “la itete ini’ ö.” (2 Timoteo 3:​14, 15) Pane mekune ju la nöjei ewekë ka anyipicine koi eö laka, hlue ka nyipici me ka inamacan la nyine troa mejiune kow. Nge Iehova la ka amamane koi eö la itre nyipici ne la Tusi Hmitrötr jëne la hlue cili. Nge traqa ha enehila koi ca hadredre lao macatre ne ini së hnene ej.​—Mataio 24:45-​47; Heberu 13:​7, 17.

Hetre itre xa aqane amenu eö hnei Satana. Ame itre xa ijin, angeic a thele troa axounyi eö. Iaxoueny “la ketre ithuemacanyi hna sil, nge ka hekö catr.” (Easily Led​—A History of Propagan­da) Öni Philip M. Taylor, ketre porofesör ne Agele, Itretre Asuria ekö a mus kowe la itre ithupëjia i angatr jëne la iaxoueny me itre ithuemacany hna sil. Ketre, Satana fe a nyijëne la xoue atr, maine xouene la iakötrë me xoue mec matre hmaca ju eö hna huliwa i Iehova.​—Isaia 8:​12; Ieremia 42:11; Heberu 2:​15.

The nue Satana pi kö troa traqa kowe la mekuna i angeic! Öni Iesu: “The qou kö e angete humuthe la ngönetei, ke pëkö xa hna ateine hnei angate troa kuca.” (Luka 12:4) Catre jë pe mejiune laka, tro kö Iehova a eatrëne la hnei Nyidrëti hna sisiny, ene la troa thupëne la mele së, me hamë së “la etrune la men,” matre atreine së troa cile catr kowe la itre itupathi Satana.​—2 Korinito 4:​7-9; 1 Peteru 3:​14.

Hetre itre ijin laka, eö a kucakuca maine xou. Ngo, the thëthëhmine kö la itre ithanata i Iehova koi Iosua, kola hape: “Catejë, nge iahlëpi ; the qou kö, nge the hmengöhmengöne kö, ke eje kö Iehova Akötesi ’ö thei ’ö ngöne la hnei ’ö hna troa tro kow.” (Iosua 1:9) Maine hetre hnei eö hna seseun, canga thithi jë koi Iehova me fe la hni eö koi Nyidrë. Nge eje hi laka, “tro ha thupëne la ite hni [eö] me ite mekune i [eö] . . . hnene la tingetinge ka sisitia qa thei Akötesie hune la nöjei mekun’ asë.” Tro hë eö e cili a hetrenyi la trengecatr troa cile kowe la nöjei ithuemacanyi hna sil hnei Satana.​—Filipi 4:​6, 7, 13.

Hetrenyi la itre ithuemacanyi hna sil hnei Rabesake, maca i angetre Asuria matre troa axouene la nöje i Akötresie. Ame la aja i angeic, tro angatr a mekun ka hape, pëkö ketre ka atreine troa thepe angatr qaathene la angetre Asuria, nge ketre thatreine jë kö Iehova. Matre, öni angeic, hnei Iehova hna upe la angetre Asuria troa thë triji Ierusalema. Nemene la hna qaja hnei Iehova? “The tro kö a qouene la tenge ewekë hnei nyipëti hna denge lo hnei ite hlue ne la joxu ne Asuria hna qaja angazo ni.” (2 Ite Joxu 18:22-​25; 19:6) Iehova a upe jë la angela i Nyidrë, ame hna lepe la ala 185 000 lao itretre isi Asuria ngöne la ca jidr!​—2 Ite Joxu 19:35.

Hnei eö kö hna hane goeën la ketre film laka, hna amenun la ketre atr, nge thatre kö angeic? Nge eö a ajane troa sue koi angeic ka hape: ‘The jelenyipicine kö! Angatre lai a thoi koi eö!’ Haawe, pane mekune jë fe laka, itre angela a qaja koi eö ka hape: “The amenu eö kö hnene la itre trengathoi Satana!”

Haawe, the drenge kö la itre ithuemacanyi hna sil hnei Satana. (Ite Edomë 26:24, 25) Drei Iehova jë pe, me mejiune koi Nyidrë ngöne la nöjei huliwa i eö. (Ite Edomë 3:​5-7) Ka tru eö koi Nyidrë, matre Nyidrëti a ithuecatre koi eö ka hape: “Neköng, inamacanepi, mate madinejë la hning.” (Ite Edomë 27:11) Maine tro eö a ujë tune lai, thatreine jë pi kö Satana troa amenune la mekune i ö!