1. Pine nemene matre ijije hi tro sa qaja ka hape, qaathei Iehova la nöjei ewekë asë? (Wange ju la pane iatr.)

QAATHEI Iehova la nöjei ewekë asë! Ewekë i Nyidrëti “la hnengödrai memine la hnengödrai ne la ite hnengödrai, me fene hnengödrai fe me nöjei ewekë asëjëihë ngön’ ej.” (Deuteronomi 10:14; Hna Amamane 4:11) Ketre tu së fe, itre atre i Iehova së ke, Nyidrëti la ka xupi së. (Salamo 100:3) Ngo ame thene la nöjei atr, hetre hnei Iehova hna iën matre troa cilëne la ketre hnëqa ka tru.

2. Drei la itre hnei Iehova hna iëne matre troa musi e koho hnengödrai?

² Ame ngöne Salamo 135, kola qaja la itre hlue i Iehova ka mele nyipici ekö e Isaraela ka hape, itre “nyine tenge nyi nyidë.” (Salamo 135:4) Ketre, hnei Hosea hna perofetan ka hape, tro fe angetre ethen a hane sine la nöje i Iehova. (Hosea 2:23) Hna eatre la hna perofetane cili, ngöne lo Iehova a iëne la itre atr ka xulu qa ngöne la itre xa nöj, matre troa hane musi  e koho hnengödrai me Keriso. (Ite Huliwa 10:45; Roma 9:23-26) Ame la itre hna siëne hnei uati hmitrötr, tre, itre hna hën ka hape, “nöje ka hmitrötr.” Angatre hi la “xöte hna itön” hnei Iehova. (1 Peteru 2:9, 10) Ngo tune kaa la itre hlue i Akötresie ka troa mele pe epine palua e celë fen? Hnei Iehova hna hë angatre mina fe ka hape, “nöjeng” me “ite hnenge hna iën.”—Isaia 65:22.

3. (a) Drei enehila la itre ka hane imelekeu me Iehova? (b) Nemene la hne së hna troa ce wange ngöne la tane mekune celë?

³ Ame enehila, kola ce nyihlue i Iehova hnene la “hnënge mamoe ka xalaith” ka troa mel epine palua e koho hnengödrai, memine la “itre xa mamoe” ka troa mel epine palua e celë fen. Nge “casi hi la hna axö mamoe.” (Luka 12:32; Ioane 10:16) Celë hi matre, tru la hni ne ole së koi Iehova ke, hnei Nyidrëti hna aijijë së troa hane imelekeu me Nyidrë. Tro sa ce wange ngöne la tane mekune celë, la aqane tro sa amamane la hni ne ole së koi Iehova.

4. Nemene la aqane tro sa amamane la hni ne ole së koi Iehova, nge nemene la aqane amamai tulu i Iesu?

⁴ Easa amamane la hni ne ole së koi Iehova, ngöne la easa nue la mele së koi Nyidrë me xomi bapataiso. E cili, kola mama kowe la nöjei atr laka, itre atre i Iehova hë së, nge easa ajane troa drengethenge la itre hnei Nyidrëti hna qaja. (Heberu 12:9) Hnei Iesu hna hane kuca tun, ngöne lo kola bapataiso nyidrë. Ngacama Iesu la ketre atrene la nöje ka sa xepu koi Iehova, ngo hnei nyidrëti hna nue la mele i nyidrëti koi Iehova. Kösë Iesu hi a qaja ka hape: “Akötesingöti fe, madine ni troa kuca la aja i cilie.”—Salamo 40:7, 8.

5, 6. (a) Nemene la hna qaja hnei Iehova ngöne la kola bapataiso Iesu? (b) Nemene la ceitune ka amamane la etrune la madrine i Iehova, ngöne la easa nue mel koi Nyidrë?

⁵ Nemene la mekuna i Iehova ngöne lo Iesu a xomi bapataiso? Öni Tusi Hmitrötr: ‘Nge ase hë bapataiso Iesu, ame hna canga lö pi qa ngöne la tim; nge hanawang, la hnengödrai hna thawa pi koi angeic, ame hnei angeice hna goeëne la uati Akötesie kola sesë pi kösë piny, me traqa hui nyidrë. Nge drei lai aqane ula qa hnengödrai kola ulatin, ka hape, Drei la Nekönge hniminang ; ini a madri nyidrë.’ (Mataio 3:16, 17) Ketre atre i Iehova ha Iesu. Ngo madrine catre Iehova ngöne la Iesu a nue la mele i nyidrë thatraqane la huliwa ne la Tretretro i Nyidrë.—Salamo 149:4.

⁶ Eje hi laka, qaathei Iehova la nöjei ewekë asë! Nemene jë la hne së hna troa hamëne koi Iehova? Pane mekune jë la ketre trahmanyi ka tra engen. Ame ju hi la ketre ijin, tro pi hi la nekö i nyidrëti jajiny a jeane la caas, me tro fë koi nyidrë. Ngacama ewekë i nyidrëti la iengen, ngo tru la madrinene la kem. Kola mama la etrune la ihnimine la nekön kowe la kem. E cili, kösë ame kowe la kem ke, sisitria catre kö la iengen cili hune la itre xan. Ketre tui Iehova, madrine catre Nyidrëti la easa nue xanëne la mele së koi Nyidrë.—Esodo 34:14.

7. Nemene la aqane xatua së hnei Malaki, troa trotrohnine la mekuna i Iehova göne la itre hlue i Nyidrë ka nue mele koi Nyidrë?

⁷ E jë la Malaki 3:16. Pine nemene matre ka nyipiewekë catr tro sa nue la mele së koi Iehova me xomi bapataiso? Eje hi laka, qaane lo kola hnaho së, itre atre i Iehova hë së ke, Nyidrëti lo Atre Xupi së. Ngo pane mekune jë së la etrune la madrine i Nyidrë,  ngöne la easa nue Nyidrëti troa musinëne la mele së me mele thatraqai Nyidrë! (Ite Edomë 23:15) Atre hi Iehova la itre ka ajane troa nyihlue i Nyidrë. Hnei Nyidrëti hna cinyihane la itre ëje i angatr e hnine la “tusi ne amekunën.”

8, 9. Nemene la nyine tro sa kuca matre troa cile huti la ëje së e hnine la “tusi ne amekunën”?

⁸ Hetre nyine tro sa kuca, maine easa ajane troa cile huti la ëje së e hnine la “tusi ne amekunën.” Hnei Malaki hna qaja ka hape, loi e tro sa xoue Iehova me mekun ajuine la ëje i Nyidrë. Ngo, maine tro sa nyihluene la ketre atr maine ketre ewekë pena, tro ha köletrije la ëje së qa hnine la itusi Iehova!—Esodo 32:33; Salamo 69:28.

⁹ Celë hi matre, tha tro hmekuje kö sa nue mele me xomi bapataiso. Lue ewekë lai hne së hna aca kuca ngöne la mele së. Ngo loi e tro sa mele nyipici koi Iehova, ngöne la nöjei drai ne la mele së. Nge nyipiewekë troa mama ngöne la nöjei huliwa së laka, easa kuca la aja i Iehova.—1 Peteru 4:1, 2.

10. Nemene la eisapengönene la itre ka nyihlue i Akötresie memine la itre ka tha nyihlue i Nyidrëti kö?

¹⁰ Hne së lo hna ce wange ngöne lo tane mekun hnapan laka, hnei Kaina me Solomona me angetre Isaraela hna mekun ka hape, angatr a nyihlue i Iehova. Ngo ame pe, tha hnei angatre kö hna mele nyipici koi Nyidrë. Kola amamane hnyawa e celë laka, tha tro hmekuje kö a qaja ka hape, easa nyihlue i Iehova. Loi e tro fe sa sisine la itre ewekë ka ngazo me hniine la itre ewekë ka loi. (Roma 12:9) Öni Iehova ka hape, troa mama hnyawa la eisapengönene la itre “ate ka meköti me ate ka ngazo, nge ate nyi hlue i Akötesie me ate tha nyi hlue i nyidë.”—Malaki 3:18.

11. Pine nemene matre loi e troa canga mama koi itre xan laka, itre hlue i Iehova së?

¹¹ Drei la etrune la hni ne ole së koi Iehova ke, hnei Nyidrëti hna ië së troa hane sine la nöje i Nyidrë! Loi e troa canga mama kowe la nöjei atr laka, easa ce xöle me Iehova. (Mataio 5:16; 1 Timoteo 4:15) Celë hi matre, loi e tro sa isa hnying ka hape: ‘Hapeu, canga mama hi kowe la nöjei atr laka, ka pexeje la aqane mele nyipicing koi Iehova? Madrine kö ni troa qaja ka hape, ketre Atre Anyipici Iehova ni?’ Pane mekune jë së la akötre ka eje thei Iehova, e tro sa hmahma troa qaja ka hape, itre hlue i Nyidrëti së.——Salamo 119:46; e jë la Mareko 8:38.

12, 13. Nemene la hna kuca hnene la itre xa Keresiano, matre tha mama kö la eisapengöi angatr memine la itre atr ne fen?

¹² Hetre itre ka nyihlue i Iehova ka nyitipune la “u ne la fen.” Celë hi matre, tha öhne kö së la eisapengöi angatr memine la itre atr ka tha nyihlue i Iehova kö. (1 Korinito 2:12) Hnene la “u ne la fen,” matre itre atr pe hi a mel göi troa kuca la itre sipu aja i angatr. (Efeso 2:3) Drei la ketre ceitun. Nyimutre la itre eamo hna hamën göne la aqane heetr, ngo hetre itre xan ka tha trongëne kö itre ej. Ame la angatr a heetre ne tro troa icasikeu,  tre, ka fedre koi ngönetrei nge hmelele la itre iheetre i angatr. Ketre, ka ketrepengöne kö la aqane iseji angatr maine aqane xötrei he. (1 Timoteo 2:9, 10) E cili, tha canga mama kö kowe la itre atr laka, itre ka nyihlue i Akötresieti angatr maine tha ka nyihlue i Nyidrëti kö.—Iakobo 4:4.

¹³ Ame ngöne la ketre götran, tha mama kö la eisapengönene la itre hlue i Akötresie memine la itre atr ne fen. Ame la itre aqane fia me aqane ujë ne la itre xa Keresiano ngöne la itre feet, tre, ka ceitu hi memine la itre atr ne fen. Ame pena itre xan, angatr a amë hnine ëternet la itre sipu foto me video i angatr, me qejepengön. Maine jë, tha hna haji angatre kö e hnine la ekalesia pine la huliwa i angatr ka ngazo. Ngo ijije hi tro angatr a ajojezine la mekuna ne la itre trejin ka thele troa iananyi me fen.—E jë la 1 Peteru 2:11, 12.

14. Nemene la nyine tro sa kuca matre troa thupëne la aqane imelekeu së me Iehova?

¹⁴ Ame la nöjei ewekë ne fen, tre, hna kuca matre tro sa “meciunyi ewekë i ngönetei, memine la meciune ne la lue mek, memine la nyi döne la mele celë.” (1 Ioane 2:16) Eje hi, isapengö së kö memine la fen ke, itre atre i Iehova së. Celë hi matre, loi e tro sa “xelene la thina ka tha ijiji Akötesie me nöjei aja ne la fen, ngo tro sha lapa mekun, me thina meköt, me thina ka ijiji Akötesie ngöne la mele celë.” (Tito 2:12) Haawe, loi e troa öhne hnei nöjei atr laka, itre atre i Iehova së. Troa canga mama lai ngöne la mele së, tune la aqane ithanata së me xen me heetr me huliwa.—E jë la 1 Korinito 10:31, 32.

15. Pine nemene matre loi e tro sa thiina ka menyik me hnime la itre xa Keresiano?

¹⁵ Easa amamane la ecatrene la aqane imelekeu  së me Iehova, ngöne la aqane hnime së la itre trejin me easë trahmanyi me föe. Itre atre i Iehova mina fe angatr. Maine tro sa mekune hnyawa lai, tro palahi sa thiina ka menyik me hnimi angatr. (1 Thesalonika 5:15) Pine nemene matre ka nyipiewekë lai? Öni Iesu kowe la itretre drei nyidrë: “Celë hi mate tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.”—Ioane 13:35.

16. Nemene la hna amamane hnene la Wathebo i Mose göne la etrune la ihnimi Iehova kowe la nöje i Nyidrë?

¹⁶ Kola mama ngöne la Wathebo i Mose, la aqane troa thiina ka loi kowe la itre trejin e hnine la ekalesia. Ame e hnine la ēnē i Iehova ekö, tre, hetrenyi la itre ewekë ka hmitrötr thatraqane la itre huuj hna troa kuca. Hna qejepengöne hnyawa e hnine la Wathebo, la aqane tro la itre nekö i Levi a nyihnyawane la itre ewekë cili. Nge ame la ka tha trongëne hnyawa la itre hna amekötin ke, troa humuthi angeic. (Numera 1:50, 51) Eje hi, Iehova a wangatrun ekö la aqane troa nyihnyawane la itre ewekë ka hmitrötr e hnine la ēnē. Ketre tune enehila, Iehova a wangatrune la aqane thiina ka loi kowe la itre hlue i Nyidrëti ka nue mel me nyipici! Iehova a amamane la etrune la ihnimi Nyidrëti koi së ngöne lo kola hape: “Ame la ate kete nyipunie, te, kola kete la wene demune alameke i nyidë.”—Zakaria 2:8.

17. Nemene la hnei Iehova hna “qatixenyëne me shamatin”?

¹⁷ Hnei Malaki hna qaja ka hape, Iehova palahi a “qatixenyëne me shamatin” la aqane iwangatrunyi ne la itre atrene nöj. (Malaki 3:16) Öni Tusi Hmitrötr: “Wangate hmekunë hë Joxu la nöjei ate i nyidë.”  (2 Timoteo 2:19) Eje hi, öhn asë hi Iehova la itre hne së hna kuca me qaja. (Heberu 4:13) Öhne hi Iehova la easa thiina ka ngazo kowe la itre trejin me easë. Ngo öhne fe hi Nyidrëti la easa ikep, me hetre hni ne ham, me nue la ngazo hna kuca, me thiina ka menyik.—Heberu 13:16; 1 Peteru 4:8, 9.

18. Nemene la aqane tro sa amamane la hni ne ole së koi Iehova, qa ngöne la hna aijijë së troa itre atre i Nyidrë?

¹⁸ Itre atre i Iehova së, matre easa ajane troa amamane la hni ne ole së koi Nyidrë. Ame lo easa nue xecie la mele së koi Iehova ke, celë hi mekune ka sisitria hne së hna xom. Ngacama easa ce mele memine “la xöte ka qaliqali me ka ena,” ngo ijije hi tro sa “pë gelen me pë engazon” me hudrum “tune la ite lai ne la fen.” (Filipi 2:15) Celë hi matre, xecie hnyawa koi së troa thipetrije la itre ewekë hna sisine hnei Iehova. (Iakobo 4:7) Ketre, easa hnime me metrötrëne la itre trejin me easë trahmanyi me föe ke, itre atre i Iehova fe angatr.—Roma 12:10.

19. Nemene la aqane amanathithine Iehova la itre atre i Nyidrë?

¹⁹ Tusi Hmitrötr a thingehnaean ka hape: “Tha tro kö Iehova a nue tije la nöje i nyidë.” (Salamo 94:14) Easa mejiune kowe la hna qaja e celë. Tha tro jë kö Iehova a nue së, ngacama troa traqa la nöjei pengöne jol. Ketre, maine meci pi së, tha tro jë kö Nyidrëti a thëthëhmi së. (Roma 8:38, 39) “E mele shë, eësha mele kowe la Joxu; nge e meci shë, eësha meci kowe la Joxu; celë hi mate e mele shë, nge e meci shë, te, ite ate i Joxu shë.” (Roma 14:8) Easa trengeneune la ijine tro Iehova a amelene hmaca la itre hlue i Nyidrëti ka mele nyipici. (Mataio 22:32) Ame fe enehila, easa kapa la itre manathithi ka tru qaathene la Tretretro së. Öni Tusi Hmitrötr: “Manathithi la nöj’ e Iehova la Akötesi angat; ene la nöjei ate hna iëne hnei nyidëti nyine edö i nyidë.”—Salamo 33:12.