Itre Hnyinge Ne La Itre Ka e
Ketre trahmanyi me ketre föe a ce hnahag e jidr, ngo pë pe nyipi kepin. Hapeu, kolo kö lai a hape, ase hë nyidroti kuci ngazo nge nyipiewekë troa qaja kowe la komite ne iameköti?
Maine tro la lue atr a ce hnahag e jidr nge pë pe nyipi kepin, tre, ijije hi tro sa mekun ka hape, hetre ngazo hnei nyidroti hna kuca. Haawe, maine pëkö nyipi kepin, tre, ijije hi troa iameköti hnei komite.—1 Korinito 6:18.
Hnëqa ne la lapa ne la itre qatre thup troa pane ithanatan, maine ijije troa iameköti hnei komite. Drei la ketre ceitun: Lue ka ce lapa ha nyidro? Hna eamo nyidroti hë hnene la itre qatre thup? Pine nemene matre nyidroti a ce hnahage lai jidr? Hapeu, hnei nyidroti hë hna isapui? Hapeu, pëkö xa nyine troa kuca, maine ijije hi tro nyidroti a neëne lai? (Ate Cainöj 9:11) Hapeu, isa hnë meköle kö e hnine lai hnahag? Tha ceitune kö la itre hna melën. Celë hi matre, loi e tro la itre qatre thup a thele itre xa ithuemacany qëmekene troa axecië mekun.
Thupene la hna ithanatan hnene la itre qatre thup la itre ithuemacany, angatre hi lai a ce axeciëne jë ka hape, tro ha eköthe la ketre komite ne iameköti.
