Utipine Jë “La Nöjei Ate Asëjëihë”
AME lo Iesu a inine la itretre drei nyidrë troa cainöj, hnei nyidrëti hna thuemacanyi angatr ka hape, troa hetre atr ka xele ma drei angatr. (Luka 10:3, 5, 6) Ceitune hi lai me enehila. Kola qaqa së me akötrë së, matre tha ka hmaloi kö tro sa hetre hni ne utipin me hetre aja troa cainöj koi angatr.
Ame la atr ka hetre hni ne utipin, tre, canga mama hi koi angeic la itre hna ajan memine la itre jol ka ej thene la itre xan. Ngo tune kaa e pëkö hni ne utipine së ngöne la easa cainöj? Tro hë sa nanazij troa cainöj, nge thatreine hë së troa xatuane la itre atr. Ceitune hi la ajane troa catre cainöj memine la eë. Maine easa ajane tro palahi a mele catre la eë, nyipiewekë tro sa ipicon. Ceitune hi lai memine la ajane troa cainöj laka, nyipiewekë troa hetrenyi la utipin!—1 Thesalonika 5:19.
Nemene la ka troa xatua së troa utipin, ngacama jol e itre xa ijin? Tro sa ce wange la köni tulu ka lolo: Iehova, Iesu, me Paulo aposetolo.
NYITIPUNE JË LA AQANE UTIPINE I IEHOVA
Kolo palahi a silitrengathoi Iehova hnene la itre atr, itre thauzane hë lao macatre. Ngo hnei Nyidrëti palahi hna ‘menyike koi angete tha ole kö, me ite ka ngazo.’ (Luka 6:35) Nemene la aqane utipi së hnei Nyidrë? Hnei Nyidrëti hna xomihni së isa ala cas. Iehova a ajane troa mele “la nöjei ate asëjëihë.” (1 Timoteo 2:3, 4) Ngacama Akötresieti a sisine la ngazo, ngo ame pe ka tru koi Nyidrëti la atr. Tha ajane kö Nyidrëti troa meci la ketre atr.—2 Peteru 3:9.
Atre hnyawa hi Iehova laka, atreine hi Satana silitrengathoi matre troa iaöne la itre atr. (2 Korinito 4:3, 4) Nyimutre la itre atr ka drenge la itre trengathoi göi Akötresie, qane la angatr a co. Celë hi matre, hetre ethane kowe la mekune i angatr, nge jole hë koi angatr troa kapa la nyipici. Ngo atraqatre la aja i Iehova troa xatua angatr. Kola mama tune kaa?
Pane mekune jë la aqane goeëne Iehova la angetre Nineve. Ngacama ka iakötrë catr angatr, ngo öni Iehova koi Iona: “Hape u, tha tro kö ni a hnimi Nineve, la lapa atraqat, lo ka hete ate shashaithe la hadede nge caate la o thausane itete tha ’te la ime maca me mi angat?” (Iona 4:11) Hnei Iehova hna utipine la itre atr ka thatre Nyidrë. Celë hi matre, hnei Nyidrëti hna upi Iona troa hmekë angatr.
Easa thele troa goeëne la itre atr tui Iehova. Ka sisitria angatr koi Nyidrë. Haawe, loi e tro sa catre thele troa xatua angatr, ngacama tha kepe së kö hnei angatr.
NYITIPUNE JË LA AQANE UTIPINE I IESU
Hnei Iesu hna utipine la itre atr tui Iehova, Tretretro i nyidrë. Hnei nyidrëti hna utipine la itre atr ke, “kucakuca ha angat, me isa ije hë, tune la nöjei mamoe ka pa ate thupën.” (Mataio 9:36) Öhne hnyawa hi Iesu la kepin matre angatr a akötr. Hna qanangazo angatr hnene la itre hene ne hmi, nge hna ini angatr la itre trengathoi. Ketre, atre hnyawa hi Iesu laka, ame la nöjei atr ka traqa troa drei nyidrë, tre, tha angatr asë kö la ka troa xötrethenge nyidrë. Ngo ame pe, nyimu ewekë hnei nyidrëti hna ini angatr.—Mareko 4:1-9.
Tha tro pi kö sa kucakuca, e tha canga drei së kö hnene la ketre atr
Hnene laka, hetre ewekë ka saze ngöne la mele ne la atr, matre angeic a kapa la nyipici
Nyipiewekë tro sa pane thele la kepin matre itre xan a thipetrije la maca. Maine jë, ngazo la aqane goeën angatr la Tusi Hmitrötr. Maine pena, hnei angatre hna öhne la kola kuca la itre ewekë ka ngazo hnene la itre xa Keresiano. Ame itre xan, hnei angatre hna drenge la kola qaja angazone la itre ini hne së hna mejiune kow. Ame fe la itre xan, angatr a xou troa ithanata me easë ke, hnyimasai angatre jë hnene la itre atrene la hnepe lapa i angatr memine la itre atrene la nöje i angatr.
Ame la itre atr hne së hna cainöje kow, ke hetre itre hna akötrën. Hnei Kim ketre föe mesinare hna qaja ka hape, ame la itre atrene la teritoare i angeic, tre, hnei angatre hna mel e hnine la itre isi, matre luzi hë la itre ewekë i angatr. Ketre, pëkö mejiune i angatr kowe la mel elany. Hleuhleu catre angatr, matre pëkö hnei angatr hna mejiune kow. Nyimutre la itre ka thele troa sawa la Itretre Anyipici Iehova troa cainöj. Ame la ketre ijin, hna lepi Kim ngöne la hna cainöj.
Pine nemene matre hetre hni ne utipine i Kim, ngacama hna qanangazo angeic? Hnei angeice palahi hna lapa mekune la tusi Ite Edomë 19:11, lo kola hape: “Ame la inamacane ne la ate, te, ate ahmitene la elëhni angeic.” Hnei angeice hna mekune la itre hna melën hnene la itre atr, matre angeic a utipi angatr. Nge, tha ka ngazo asë kö la itre atr e cili. Hetre itre xan hnei angeic hna wange hmaca.
Loi e tro sa isa hnying ka hape: ‘Maine tha eni ju e hnine la nyipi hmi ke, nemene la aqane tro ni a ujë kowe la Itretre Anyipici Iehova? Tune kaa e silitrengathoi angatre ju?’ Maine jë, tro fe sa hane xele ma drei angatr, me ajane pena troa utipi së. Hnei Iesu hna qaja ka hape, loi e tro palahi sa kuca la loi koi itre xan, tune la aqane ajane së troa kuca koi së. Haawe, loi e tro palahi sa thele troa trotrohnine la itre xan, ngacama jole koi së e itre xa ijin.—Mataio 7:12.
NYITIPUNE JË LA AQANE UTIPINE I PAULO
Ngacama hetre itre ka elëhni ngöne la Paulo a cainöj, ngo hnei angeice palahi hna amamane la utipine i angeic. Tha thëthëhmine kö angeice lo pengöi angeic ekö. Öni angeic: “Ame ekö ini la ate nyi tru, me iaxösisi, me cate mek; ngo hna hnimi ni, qa ngöne la hnenge hna kuca tha’te pengönëne ngöne la tha lapaun.” (1 Timoteo 1:13) Atre hnyawa hi Paulo aposetolo laka, hnei Iehova me Iesu hna kepe angeic. Nge trotrohnine hi angeic la itre ka thele troa sewe angeic troa cainöj ke, ka tune fe angeic ekö.
Hnei Paulo mina fe hna cainöj kowe la itre atr ka catre lapaune kowe la itre ini ka thoi. Nemene la aqane ujë i angeic e cili? Kola qaja ngöne Ite Huliwa 17:16 ka hape, ame lo ijin angeic e Athenia, “elëpi hë la hni nyidë ngöne laka nyidëti a goeëne la lapa a tiqa hnei nöjei idola.” Ngo hnei Paulo palahi hna xome la itre ewekë ka aciane la elëhni, matre troa catre cainöj. (Ite Huliwa 17:22, 23) Hnei angeice hna saze la aqane cainöj me aqane ithanata i angeic kowe la itre atr ka puafala maine ka trenamo, matre troa “amele ite xan.”—1 Korinito 9:20-23.
Ijije hi tro sa tui Paulo ngöne la easa cainöj kowe la itre atr ka elëhni, maine ka catre lapaune pena kowe la itre ini ka thoi. Loi e tro sa xome la itre hnei angatre hna atre, matre troa “tro fë la loi.” (Isaia 52:7) Öni Dorothée, ketre trejin: “Nyimutre la itre atr ngöne la teritoare hun ka qaja ka hape, ka iakötrë me ka iameköti Akötresie. Eni a madrin ke, ka lapaun angatr koi Akötresie. E cili, eni a amaman jëne la Tusi Hmitrötr, la itre thiina ka lolo i Iehova memine la itre hnei Nyidrëti hna thingehnaean, thatraqane la mel elany.”
“NGANEPI LA NGAZO HNENE LA LOI”
Eje hi, pine laka easenyi trootro hë la pune la fene celë, tha sesëkötre kö së laka, tro fe a ngazo trootro la itre atr, nge “tro pala kö angat’ a ngazo.” (2 Timoteo 3:1, 13) Ame pe, ngacama angatr a ujë tune lai, ngo loi e tro palahi sa utipin me madrin. Tro kö Iehova a hamëne koi së la trengecatr, matre troa ‘ngane la ngazo hnene la loi.’ (Roma 12:21) Hnei Jessica, ketre pionie, hna qaja ka hape, hnei angeice palahi hna cainöj kowe la itre atr ka iakötrë me hnyima fë la Itretre Anyipici Iehova, memine la maca hne së hna tro fë. Öni angeic: “Ka ijeletrengehni. Celë hi matre, qëmekene tro ni a ithanata memine la ketre atr, eni a pane thithi e kuhu hning. Eni a sipo Iehova troa xatua ni troa goeë angeic tune la aqane goeëne Nyidrë.” Celë hi ka xatua Jessica troa xomehnöthe la elëhni, me catre xatuane la itre xan.
Catre jë së cainöj me thele la itre atr ka ajane la nyipici
Tro kö a traqa la ijine tro la itre atr a kepe së me hane inine la nyipici
Ame ngöne la easa ce cainöj memine la itre trejin, tro sa thele troa ithuecatre koi angatr. Öni Jessica ka hape, ame la angeic a ce cainöj memine la itre xa trejin, nge tha kepe angatre hnyawa kö hnene la ketre atr ke, tha Jessica kö a goeën atrune lai jol. Angeice pe a qaja la itre thangane ka loi hna kapa qa ngöne la huliwa ne cainöj.
Trotrohnine hi Iehova laka, tha ka hmaloi kö e itre xa ijin troa cainöj. Ngo ame pe, tru la madrine i Nyidrë la easa thele troa nyitipu Nyidrë, me utipine la itre atr! (Luka 6:36) Eje hi laka, tha tro kö Iehova a utipin me xomihnine la atr epine palua. Troa traqa la ijine tro Nyidrëti a nyipune la fene celë. Celë hi matre, ijine tro palakö së la a cainöj. (2 Timoteo 4:2) Haawe, catre jë së cainöj me utipine la “nöjei ate asëjëihë.”
