TUSI HMITRÖTR a qaja la itre atr ka ‘casi hi la itre aliene hni së.’ (Iako. 5:17) Ijije hi tro sa trotrohnine la hna qaja hnei Paulo ngöne Roma 7:21-24: “Ame la eni a thele troa kuca la loi, ngazo la ka mama theng. . . . Ekölö pe ni atr ka ngazo!” Tro fe sa hane isi memine la ngazo ka ej e kuhu hni së. Celë hi matre, kola akeukawane la hni së ngöne la easa atre laka, hna hane fe traqa lai ekö koi Paulo.

Ngo hnei Paulo hna qaja fe la itre xaa mekun ne la hni nyidrë. Hnei Paulo hna qaja göi Iesu, ka hape: “Nekö i Akötresie, atre hnimi ni, me meci pi ni.” (Gal. 2:20) Celë hi ewekë ka xecie hnyawa koi Paulo. Tune kaa fe nyipunie? Maine jë, tha ka eje fe kö thei nyipunie e itre xaa ijin.

Maine jë, nyimutre la itre ewekë ka ngazo hne së hna kuca ekö, matre easa hnehengazo. Ame koi së, tha Akötresieti kö a hnimi së, nge tha hnei Nyidrëti kö hna nue la itre ngazo së. Celë hi matre, jole koi së troa mekun ka hape, ketre ahnahna ka tru la thupene mel. Hapeu, Iesu kö a ajane tro sa goeëne la thupene mel, tune la ketre ahnahna? Maine eje hi, nemene la ka troa xatua së? Tro sa ce wang la aqane troa sa la lue hnying celë.

Iesu a ajane tro sa goeëne la thupene mel, tune la ketre ahnahna koi së isa ala caas. Nemene la ka troa xatua së? Pane mekune jë la hna qaja ngöne Luka 23:39-43. Hna ce athipi Iesu hune la sinöe ne iaxösisi memine la ketre thupëtresij. Atre hi lai trahmany laka, hetre ewekë ka ngazo hnei angeic hna kuca. Ame ekö, kola athip me humuth hune sinöe ne iaxösisi, la itre atr ka kuca la itre ewekë ka ngazo catr. Kola hnehengazo hnene lai thupëtresij, matre hnei angeic hna sipo iele Iesu, ka hape: “Iesu, the thëthëhmi ni kö e lö jë nyipë kowe la Baselaia i nyipë.”

Nemene la hna kuca hnei Iesu? Pane mekune jë la akötr ka eje thei Iesu, ngöne la kola xei troa goeëne lai atr ka ngazo. Ngacama Iesu a akötr, ngo hnei nyidrëti hna hnyimahnyima me akeukawane la hni angeic. Öni Iesu: “Nyipici, eni a qaja hnyawa koi eö enehila, tro hë eö a ce me eni ngöne la Paradraiso.” Maine ju, tro hi Iesu a amexeje ka hape, “Hna traqa la Nekö i atr troa . . . hamëne la u i angeice nyine thupene mele ne la nöjei at ka kösau.” (Mat. 20:28) Ngo hnei Iesu pe hna qaja ka hape, thatraqai angeice fe la thupene mel. Kola mama la aqane menyik me ihnimi Iesu, jëne la itre hnaewekë hna hape, “eö” me “eni.” Ketre, hnei Iesu hna qaja koi angeic ka hape, tro kö angeic a mel ngöne la Paradraiso e celë fen.

Eje hi, Iesu a ajane tro lai atr ka ngazo a trotrohnine laka, thatraqai angeice fe la thupene mel. Maine hnei Iesu hna hnime la atr ka ngazo, nge ka tha nyihlue i Akötresieti kö, hapeu la ketre trejin ka bapataiso, nge ka ietrane la itre ngazo i angeic? Nemene la ka troa xatua së troa mejiune kowe la thupene mel, ngacama nyimutre la itre hne së hna kuca ka ngazo ekö?

Hnei Iesu hna ahnithe koi Paulo la ketre hnëqa, ene la troa cainöj. Nge Paulo a trotrohnine laka, hnei Iesu hna meci pi angeic. Tune kaa? Öni Paulo: “Eni a olene koi Iesu Keriso Joxu së, atre hamë mene koi  ni, ke hnei nyidrëti hna mekune ka hape, ka mele nyipici ni matre ijije troa thue hnëqang. Hnei nyidrëti hna kuca tune lai, ngacama eni ekö la ketre ka silitrengathoi Akötresie, me iaxösisi, me pi tru.” (1 Tim. 1:12-14) Eje hi, hnei Iesu hna ahnithe koi Paulo la hnëqa cili, ngacama nyimutre la itre ewekë ka ngazo hnei angeic hna kuca. Kola mama hnyawa koi angeic, laka, Iesu a utipin me hnim, me mejiune koi angeic. Nge hnei Iesu mina fe hna upi së, troa cainöjëne la maca ka loi. (Mat. 28:19, 20) Hapeu, ijije hi tro sa trotrohnine laka, hnei Iesu hna meci pi së, matre nyipiewekë tro sa catre cainöj?

Albert la ketre trejin ka trotrije ekö la nyipici, koi 34 lao macatre. Ame hmaca la angeic a bëek, öni angeic: “Thatreine kö ni thëthëhmine la itre ewekë ka ngazo hnenge hna kuca. Ngo ame la eni a cainöj ke, eni a eatrëne la hnëqa hna ahnith hnei Iesu. Celë hi ka hamë madrineng, nge ka xatua ni tro palahi a mekun la itre ewekë ka lolo enehila me elany.”—Sal. 51:3.

Qëmekene tro Allan a atre la nyipici, nyimutre la itre ewekë ka ngazo hnei angeic hna kuca. Hnei angeic hna ihumuth me isi. Öni angeic: “Ame itre xaa ijin, eni a kucakuca ke, eni hmaca a mekun la itre ewekë ka ngazo hnenge hna kuca ekö. Ngo tru la hni ne oleng koi Iehova ke, hnei Nyidrëti hna aijijë ni, ketre atr ka ngazo, troa hane tro fë la maca ka loi. Ame la eni a öhne la itre atr kola kapa la nyipici ke, canga mama hi koi ni laka, Akötresieti ka lolo nge ka tru ihnimin Iehova. Ame hë enehila, Nyidrëti a upi ni troa xatuane la itre ka kuca la itre ewekë ka ngazo.”

Ame la easa cainöj, easë hi lai a kuca la ketre ewekë ka loi, nge lolo la itre mekuna së. Celë hi ka akeukawane la hni së ke, easa öhne la utipin, me ihnim me mejiune i Iesu koi së, isa ala caas.

Easë palakö a mel ngöne la fene i Satana, matre tro palahi sa kucakuca, pine la itre ewekë ka ngazo hne së hna kuca. Ngo nemene la ka troa xatua së troa xometrije la itre mekun ka ngazo cili?

Öni Jeanne: “Eni a madrin la kola qaja ka hape, ‘Ka draië kö Akötresie hune la itre hni së.’ ” Eni palahi a isi memine la itre mekun ka ngazo. Eni la ketre thöth ekö ka lue ialamek. Lolo la thiinang qëmeke i kakaa me nenë me ngöne la hnë icasikeu. Ngo ame hë e thupen, kola saze la itre thiinang. (1 Ioane 3:19, 20) Eje hi, tui Jeanne, kola akeukawane la hni së ngöne la easa atre ka hape, trotrohni së hi hnei Iehova me Iesu. Atre hnyawa hi nyidroti laka, itre atr ka ngazo së. Ketre, tha tro kö sa thëthëhmine laka, hnei Iehova me Iesu hna hnimi së. Ame la thupene mel, tre, tha thatraqane kö la itre atr ka pexej, ngo thatraqane pe la itre atr ka ngazo, nge ka ietra.—1 Tim. 1:15.

Xecie hnyawa koi së laka, thatraqai së isa ala caasi la thupene mel. Celë hi matre, nyipiewekë tro palahi sa mekune la ahnahna cili ngöne la thith. Loi e tro sa mekun la aqane ujë i Iesu kowe la itre atr ka tha pexeje kö. Loi e tro fe sa kuca hnyawa la hnëqa hnei Iesu hna ahnith koi së. E cili, tro hë sa qaja tui Paulo, ka hape, Iesu la “atre hnimi ni, me meci pi ni.”