1-2. (a) Thenge la hna amekötin hnei Iesu ngöne Mataio 28:18-20, nemene la pane hnëqa ne la itre Keresiano? (b) Nemene la foa lao hnying hna troa sa ngöne la tane mekun celë?

MAINE jë, tru la madrin ne la itre aposetolo ngöne lo angatr asë e hune la wetr. Thupene lo kola amele Iesu hmaca, hnei nyidrëti hna upi angatr troa elë hune la wetr. (Mat. 28:16) Maine jë, kolo ijine “nyidrëti a aca mama pi kowe la ala 500 nge hetre munën.” (1 Kor. 15:6) Pine nemene matre hnei Iesu hna isapui me angatr e cili? Pine laka, kola troa ahnithe koi angatr la ketre hnëqa ka tru: “Tro jë nyipunie a inine la itre atr asë ne la nöjei nöj’ asëjëihë.”—E jë la Mataio 28:18-20.

² Ame la itretre dreng ka wangatrune la hna amekötin hnei Iesu, tre, angatre hi la itre pane atrene la ekalesia ekö. Nge pane hnëqa i angatr troa catre cainöj me inine la itre atr, matre troa hane xötrethenge Keriso. * Ketre tune mina fe enehila. Caasi hi la hnëqa ne la itre nyipi Keresiano e cailo fen. Tro sa ce wang ngöne la tane mekun celë, la foa lao hnying: Pine nemene matre nyipiewekë troa inine la itre atr? Nemene la nyine tro sa kuca? Hapeu, hnëqan asë hi la itre Keresiano troa inine la itre atr? Nge pine nemene matre nyipiewekë troa catre xomihni ahoeany ngöne la huliwa celë?

3. Thenge la hna qaja ngöne Ioane 14:6 me 17:3, pine nemene matre nyipiewekë troa inine la itre atr?

³ Pine nemene matre nyipiewekë troa inine la itre atr? Pine laka, itre sinee i Akötresieti hmekuje hi la itre ka drengethenge la itre hna amekötin hnei Keriso. Lolo la mele i angatr enehila, nge angatr a mejiune troa mel epine palua elany. (E jë la Ioane 14:6; 17:3.) Eje hi, hnei Iesu hna ahnithe koi së la ketre hnëqa ka tru. Ngo tha easë caasi kö la ka xome la huliwa cili. Hnei Paulo aposetolo hna qeje nyidrë me itre ka ce huliwa me nyidrë, ka hape: “Easë la itre ka ce huliwa me Akötresie.” (1 Kor. 3:9) Drei la ketre hnëqa ka tru hnei Iehova me Iesu hna hamën koi së, itre ka tha pexeje kö!

4. Nemene la ini hne së hna xom qa ngöne la hna melën hnei Ivan me Matilde?

⁴ Tru la madrine së ngöne la easa inine la itre atr. Hanawang la hna melën hnei Ivan me Matilde e Colombie. Hnei nyidroti hna cainöj koi Davier, ketre thöth ka qaja koi nyidro ka hape: “Eni a ajane troa saze la meleng, ngo thatreine kö ni.” Ame Davier ke, ka ijei angeic ekö me xomi dorog me iji menu la kahaitr, nge ka ce lapa angeic me Erika. Öni Ivan: “Hne huni hna nyiqane ini tusi me Davier. Nanyi catr la hnalapa i angeic, matre itre hawa ne ti velo hun ngöne la itre gojenyi gaa si trëtr. Kola saze trootro hnei Davier, matre hnei Erika hna hane ini tusi me angeic.” Tha xomi dorog hmaca kö Davier me iji menu la kahaitr me isi. Hnei angeic hna faipoipo me Erika. Öni Matilde: “Ame ngöne lo kola bapataiso Davier me Erika lo 2016, hnei nyio hna mekune hmaca la hna qaja hnei Davier, ka hape: ‘Eni a ajane troa saze la meleng, ngo thatreine kö ni.’ Tru catre la madrine i nyio, matre hnei nyio hna treij.” Nyipici, easa madrine ngöne la easa xatuane la itre atr troa hane xötrethenge Keriso.

5. Nemene la nyine tro sa pane kuca?

⁵ Ame la nyine troa pane kuca, tre, ene la troa thele la itre atr ka hetre hni ne aja troa atre Iehova. (Mat. 10:11) Loi e tro sa cainöj koi angatr. Ame la easa qeje Iehova kowe la nöjei atr, easë hi lai a amamane laka, Itretre Anyipici Iehova së. Ame la easa cainöj tune la hna amekötin hnei Keriso, easë hi lai a amamane laka, itre nyipi Keresiano së.

6. Nemene la nyine tro sa kuca matre troa drei së hnene la itre atr?

⁶ Ame itre xan, pëkö aja i angatr ngöne lo xötrei, troa inine la nyipici qa hnine la Tusi Hmitrötr. Ngo ame hë e thupen, madrine catre angatr troa ini tus. Nyipiewekë tro sa ithuecatr me thue aja koi angatr troa sine ajuine la hnei angatr hna inin. Ketre, loi e tro sa hnëkë hnyawa, matre troa hetre thangane la aqane cainöje së. Ame la easa cainöj, nyipiewekë tro sa thele la itre mekun hna ajane troa ithanatane hnene la itre atr. Thupene lai, eköthe jë hë la aqane troa nyiqane ithanata.

7. Nemene la itre aqane tro sa nyiqane ithanata, nge pine nemene matre nyipiewekë troa dreng me metrötrëne la itre atr?

⁷ Maine jë, tro sa qaja kowe la ketre atr, ka hape: “Ame la itre jol hne së hna cile kow, tre, hna traqa tune fe kowe la nöjei atr e cailo fen. Nemene fe la mekuna i nyipë? Atreine kö la ketre mus troa nyinyine la itre jol?” Thupene lai, ithanatane jë la itre mekun ngöne Daniela 2:44. Maine jë,  tro sa hnying, ka hape: “Ame koi nyipë, nemene la aqane tro sa inine la itre nekönatr troa thiina ka loi?” E cili, ithanatane jë la hna qaja ngöne Deuteronomi 6:6, 7. Eje hi, maine tro sa iëne hnyawa la itre mekun hne së hna troa ce ithanatan, tro hë la itre atr a drei së. Loi e tro fe sa mekune la thangan, e tro angatr a inine la Tusi Hmitrötr. Ame la easa ithanata me angatr ke, nyipiewekë tro sa drei angatre hnyawa me metrötrëne la itre mekuna i angatr. E cili, tro hë sa trotrohni angatr, nge tro hë angatr a hmala troa drei së.

8. Pine nemene matre nyipiewekë troa iwai hmaca?

⁸ Qëmekene troa ini Tusi Hmitrötr memine la ketre atr, loi e tro sa pane xomi traem me nue trengecatr, matre troa iwai hmaca. Pine nemen? Pine laka, ame itre xaa ijin, paatre kö angeic ngöne la hnalapa. Ketre, maine tro sa anyimua traqa, tha tro hë angeice lai a xou troa inine la Tusi Hmitrötr. Pane mekune jë la ketre feja. Tro ej a cia hlöeë, e hne së hna fie lapan. Eje hi, maine tro sa traqa lapa troa inine la Tusi Hmitrötr memine la ketre atr, tro ha kökötr la ihnimi angeic koi Iehova me Iesu Keriso.

9-10. Pine nemene matre hnëqa ne la nöjei Keresiano troa xatuane la itre atr troa hane xötrethenge Iesu?

⁹ Hnëqa ne la nöjei Keresiano troa thele la itre atr ka hetre hni ne aja troa inine la Tusi Hmitrötr. Ceitune hi la hnëqa së memine la itre ka thele la nekönatr ka paatr. Pane mekune jë laka, kola paatre la ketre nekönatr ka köni macatre. Kola e la 500 lao atr ka ithel. Thupene la 20 lao hawa, hnene la ketre atr hna öhnyi nyën ngöne la ketre hlapa. Xele kö la atr troa  atrunyi angeic. Öni angeic: “Öhne hmaca ha së la nekönatr ke, hne së hna ce ithel.”

¹⁰ Nyimutre la itre atr ka tune la nekönatr ka paatr. Pëkö mejiune i angatr, matre angatr a aja ixatua. (Efe. 2:12) Kola e la 8 milio nge hetre munën la itre atr ka ce huliwa, matre troa thele angatr. Maine jë, pëkö atr hne së hna öhn ka ajan troa ini Tusi Hmitrötr. Ngo ame la itre xaa trejin ka cainöj ngöne la teritoare së, hetre atr hnei angatr hna öhn, ka ajane troa inine la Wesi Ula i Akötresie. Easa ce madrin me angatr ke, hetre thangane la hne së hna ce huliwa.

11. Nemene la aqane tro sa ixatua, e pëkö ka ini Tusi Hmitrötr me easë?

¹¹ Ngacama pëkö ka ini Tusi Hmitrötr me easë, ngo ame pe, ijije hi tro sa hane ixatua. Ame la easa öhne la ketre atr ka xötrei traqa ngöne la Uma Ne Baselaia, loi e tro sa kepe angeic hnyawa me xatua angeic. Celë hi aqane tro sa amamane la ihnimi së. Tro hë angeic a wangatrehmekun laka, itre nyipi Keresiano së. (Ioane 13:34, 35) Ketre, ngacama hopatre hi la itre mekun hne së hna hamën ngöne la hna icasikeu, ngo ame pe, easa ithuecatr kowe la itre ka xötrei traqa, troa hamë mekun qa kuhu hni angatr. Ijije fe tro sa ce cainöj memine la itre ka xötrei xome la huliwa ne cainöj. Loi e tro sa amamane koi angatr la aqane troa hamë ini jëne la Tusi Hmitrötr. Celë hi aqane tro sa xatua angatr troa nyitipu Keriso.—Luka 10:25-28.

12. Pine nemene matre tha ka nyipiewekë kö troa maca hnyawa matre troa inine la itre atr? Qejepengöne jë.

¹² Tha tro kö sa mekun ka hape, loi e troa maca hnyawa matre troa inine la itre atr. Pine nemen? Hanawang la tulu i Faustina, ketre trejin ka mel e Bolivie. Ame la angeic a xötrei iöhnyi memine la Itretre Anyipici Iehova, thatreine kö angeic e tus. Ngo ame enehila, nango atreine hë angeic e tus. Hnei angeic hna xomi bapataiso, nge ajane catr angeic troa ini Tusi Hmitrötr memine la itre atr. Angeice ha ini Tusi Hmitrötr memine la faifi lao atr. Ngacama thatreine palakö Faustina e tusi hnyawa, ngo sikisi lao atr hnei angeic hna xatuane troa xomi bapataiso.—Luka 10:21.

13. Ngacama tru catre hnei huliwa së, ngo nemene la thangan e tro sa thele ijin, matre troa ini Tusi Hmitrötr memine la itre atr?

¹³ Ame la itre xaa Keresiano ke, tru catr hnei huliwa i angatr. Ngo angatr a thele ijine matre troa ini Tusi Hmitrötr memine la itre atr. Celë hi matre, tru catre la madrine i angatr. Hanawang la tulu i Mélanie, ketre trejin ka mel e Alaska. Tha ka faipoipo kö angeic, nge caa nekö i angeic ka 8 lao macatre. Angeic a huliwa ngöne la drai ka pexej, matre troa thupëne la keme i angeic ka meci kaser.  Mélanie hmekuje hi la Temoë Iehova ngöne la traon. Hnei angeic hna catre thith, matre hetre trengecatr troa cainöj, ngacama tru la hnötr. Tru la aja i angeic troa ini tus memine la ketre atr. Hnei Mélanie hna ithanata me Sara. Tru la madrine i Sara la angeic a atre la sipu ëje i Akötresie. Thupene lai, hnei Sara hna nyiqane inine la Tusi Hmitrötr. Öni Mélanie: “Ngacama kucakuca catre ni e nöjei heji ne Draikatru, ngo hnenge palahi hna ce tro memine la neköng jajiny, troa ini tusi me Sara. Madrine catre nyio troa ithel me hnëkë, matre troa sa la itre hnyinge i Sara. The qaja palaha la madrine i nyio, ngöne la Sara a iëne troa sinee i Iehova.” Hnei Sara hna cile catr ngöne la icilekeu. Hnei angeic hna trotrije la hmi angeic ekö me xomi bapataiso.

14. (a) Pine nemene matre kola aceitunëne la itre ka cainöj memine la itre ka nyi ie? (b) Nemene la thangane koi së la hna qaja hnei Paulo ngöne 2 Timoteo 4:1, 2?

¹⁴ Ngacama pëkö ka ini tusi me easë, ngo loi e tro palahi sa catre cainöj. Hnei Iesu hna aceitunëne la itre ka cainöj memine la itre ka nyi ie. Ame la itre ka nyi ie ke, itre hawa ne angatr a thiny, matre troa hetre ie. Ame itre xaa ijin, angatr a nyi ie ngöne la jidri ka pexej, maine ilë pena e sine hmakany. Ketre, nanyi catre la hnei angatr hna nyi ie. (Luka 5:5) Ka ceitu hi memine la itre Keresiano. Angatr a catre cainöj, e nöjei hawa, e nöjei drai me ngöne la nöjei götran. Pine nemen? Pine laka, angatr a ajane troa cainöj kowe la nöjei atr. Hetre thangane catr la aqane cainöje  i angatr ke, angatr a iöhnyi memine la itre atr ka kapa la maca. Hapeu, easë kö a thele troa cainöj ngöne la itre hawa me götran laka, tro sa iöhnyi memine la itre atr?—E jë la 2 Timoteo 4:1, 2.

15. Pine nemene matre troa xomihni ahoeany, ngöne la easa inine la itre atr?

¹⁵ Pine nemene matre troa xomihni ahoeany, ngöne la easa inine la itre atr? Pine laka, easa xatuane la itre ka ini tus, troa hniin la itre ini qa hnine la Tusi Hmitrötr. Easë fe a xatua angatr troa atrepengöi Iehova hnyawa me hnimi Nyidrë, Atrekë Ewekëne la Tusi Hmitrötr. Ketre, tha easë hmekuje kö a ini angatr la itre hna amekötin hnei Iesu kowe la itretre drei nyidrë. Ngo easa ini angatr la aqane troa drengethenge la itre hna amekötin. Loi e tro sa xomihni ahoeanyi me xatua angatr, ngöne la angatr a thele troa trongëne la itre trepene meköti ne la Tusi Hmitrötr. Ame la itre xaa ka ini tus ke, itre treu ne saze hi angatr la itre mekuna i angatr me itre hna majemin. Ngo hmitre me jol koi itre xan.

16. Nemene la ini hne së hna xom, qa ngöne la hna melën hnei Raúl?

¹⁶ Hnene la ketre trejin ka mesinare e Pérou hna öhne la thangan e troa xomihni ahoeany. Öni nyidrë: “Ase hë ni inine la lue itusi me Raúl. Ngo nyimutre la itre jol ka traqa ngöne la mele i Raúl. Hetre jol e hnine la faipoipo i angeic. Tha eatrëne kö angeic la hnei angeic hna qaja kowe la itre nekö i angeic, matre tha metrötrë angeice hë hnei nyudren. Ngo ame pe, Raúl palahi a sine la itre icasikeu. Celë hi matre, hnenge palahi hna tro troa wai angeic, me xatua angeic me hnepe lapa i angeic. Köni macatre thupen, kola bapataiso angeic.”

17. Nemene la hne së hna troa ce wang ngöne la ketre tane mekun?

¹⁷ Öni Iesu: “Tro jë . . . a inine la itre atr asë ne la nöjei nöj’ asëjëihë.” Nyipici laka, easa cainöj kowe la itre atr ka mejiune kowe la itre ini ka isapengöne kö memine la itre ini hne së hna mejiune kow. Ame la itre xan, tha ka hmi kö angatr, maine pena tha ka mejiune kö koi Akötresie. Ame ngöne la ketre tane mekun, tro sa ce wang la aqane tro sa cainöj kowe la itre atr cili.