Hna hnaho ni lo 1954 e Etazini (Saint Paul, Minnesota) nge hnenge hna tru ngöne la hmi katolik. Ala faifi eahun, nge eni la hnaaluen. Ame lo eni a co, hnenge hna tro kowe la uma ne ini katolik nge eni la ketre enfant de choeur. Tha trotrohnine kö ni la Tusi Hmitrötr. Ngo xecie koi ni laka, hetre Akötresie ka xup la nöjei ewekë. Ame pe, pëkö thangane la hmi koi ni.

Ame lo eni ngöne la ketre uma ne ini ka tru e William Mitchell College of Law, hnene la lue trefën ka Temoë Iehova hna fenafena la qëhnelöng. Ngo eni lo a wasi mano, matre öni nyidro ka hape, tro hmaca nyidroti a bëek. Ame hë la nyidroti a traqa, hnenge hna hnyingë nyidro ka hape: “Pine nemene matre lolo la mele ne la itre atr ka ngazo hune la itre atr ka loi?” nge “Nemene la nyine kuca matre troa madrin?” Hnei nyidroti hna hamë ni la itus, La vérité qui conduit à la vie éternelle me Tusi Hmitrötr ka vert hna hape, Les Saintes Écritures — Traduction du monde nouveau. Hnenge hna nyiqaane ini tus, nge trotrohnine hë ni la Tusi Hmitrötr! Trotrohnine hë ni laka, nyipiewekë  tro la Baselaia i Akötresie a musi e cailo fen. Eje hi, pëkö eloine la itre musi atr, easë pe hi a akötr me hleuhleu.

Ame lo 1982, hnenge hna nue la meleng koi Iehova me xomi bapataiso ngöne la asabele e Civic Center (Saint Paul). Ame la tane lai asabele ke, “La vérité du Royaume.” Caa wiik e thupen, hnenge hna bëek ngöne la batima cili, matre troa passer la examen matre huliwa ngöne la hna kootr ka tru e Minnesota. Ame lo treu Okotropa, kola thuemacanyi ni laka, ketre avocat hë ni, nge ijijinge hë troa huliwa ngöne la itre hna kootr ka tru.

Ame ngöne lo lai asabele, hnenge hna iöhnyi me Mike Richardson, ketre ka huliwa ngöne Bethela e Brooklyn Neweyok. Öni nyidrëti koi ni ka hape, hna fe la service juridique ngöne la Hnalapa Ne Xomi Meköt. E cili, hnenge hna mekun lo eunuka atre Aithiope ngöne Itre Huliwa 8:36. Öning: ‘Nemene la ka ajolë ni troa saen me huliwa e cili?’ Hnenge hna nyialiene la pepa matre troa huliwa ngöne Bethela.

Tha madrine kö kaka me nenë lo eni a xomi bapataiso, matre troa ketre Temoë Iehova. Hnei kaka hna hnyingën e troa hetre eloine koi ni la troa huliwa ngöne Bethela. Öning ka hape, tha hna nyithupene kö la huliwang; tro ni a kapa la 75 dollars (8 137 francs) e nöjei treu. Celë hi hna hamëne kowe la itre ka huliwa ngöne Bethela.

Hnenge hna nue la huliwa ngöne la hna kootr ka tru. Ame hë lo 1984, hnenge hna nyiqaane huliwa ngöne service juridique ngöne la Bethela e Brooklyn. Lolo catr la huliwang ngöne la Bethela ke, maca ha ni ngöne la huliwa ne avocat.

Ame lo nofeba 1983, hnene la itre Temoë Iehova hna itöne la ketre uma hna hape, théâtre Stanley, e Jersey City, New Jersey. Hnene la itre trejin hna sipone matre troa wange la tirisite me tim. Ame hë la angatr a icasikeu memine la itre ka huliwa i municipalité, hnene la itre trejin hna qaja ka hape, angatr a ajane troa saze lai théâtre Stanley, matre troa kuca la ketre hnë asabele. Ngo ej e nyipine la traon, matre hna wathebone troa acile la itre uma ne hmi. Ame fe lai théâtre Stanley ke, eje hnyawa nyipine la itre magazë. Celë hi matre, hnei municipalité hna thipëne la sipo ne la itre trejin. Nge hnei angatre hmaca hna sipon, ngo casi palahi.

Ame la pane wiike i eni ngöne Bethela, hnene la Hnalapa Ne Xomi Meköt hna iutisai koi hna kootr ka tru ke, hna thipëne la sipo ne  la itre trejin hnei municipalité. Atre hnyawa hi ni la aqane troa nyinyine la jole cili, pine laka, hnenge hna huliwa ngöne la hna kootr ka tru e Saint Paul. Hnene la ketre avocat hna qaja ka hape, nyimu ewekë hna kuca ngöne la théâtre cili, tune la troa goeë cinéma me hnë elo miuzik. Hnauëne laka, tha hna nue kö la götrane cili matre troa hmi? E cili, hnene la hna kootr ka tru hna wange hmaca la sipo ne la itre trejin me upe la traon ne Jersey City, troa kapa la aja ne la itre trejin. Nyipici, Iehova a sajuën me amanathithine la Hnalapa Ne Xomi Meköt, ngacama kola iutisai koi hna kootr ka tru. Drei la madrineng troa huliwa ngöne la ijine cili.

Hnene la itre trejin hna nyidrawane lai théâtre nge hna kuca la remise des diplômes ne la hnasemitre naen kalas ne la Ini Ne Gileada. Ame hë lo 8 Semitrepa 1985, ca macatre thupene la kola nyidrawane lai théâtre, ketre hnë asabele hë ej e Jersey City. Eni a madrin ke, hnenge hna sajuëne la musi cile i Iehova, jëne la huliwang ngöne la service juridique. Ketre, madrine catre ni ke, tha hna hane kö traqa lai ekö qëmekene tro ni a huliwa ngöne Bethela. Tha mekune kö ni laka, tro Iehova aijijë ni troa cilëgöline la huliwa i Nyidrë.

Ame lo itre macatre 1980, hnene la itre droketre hna thipëne la aja ne la itre trejin troa nyinyine la meci angatr ngacama tha angatre kö a xomi madra. Nge ketre jole ka tru lai kowe la itre trejine föe ka upune. Ame kowe la itre juge, tha meköti kö e tro angatr a thipëne troa xomi madra. Ame koi angatr, maine tha tro kö a xomi madra hnei thin, tro hë eahlo a mecitrije la medreng.

Ame la 29 Diseba 1988, thupene la hnei Denise Nicoleau hna hnahone la nekö i eahlo trahmany, hnei eahlo hna pë madra (hémorragie), matre hna uti la etrune hémoglobine i eahlo koi 5. Hnei itre droketre hna iele eahlo troa xomi madra, ngo xele kö eahlo. Ame hë lai drai thupen, hnei angatre hna iutisai, me sipone matre aijijë angatr troa hamë madra koi Denise. Tha hna thuemacanyi Denise kö me föi eahlo. Hnene la juge hna nue la itre droketre troa hamë madra koi Denise.

Ame hë la Draikatru 30 Diseba, hna hamë madra koi Denise, ngacama kola icilekeu hnene la föi eahlo me itre xaa sinee. Ame ju fe lai jidri cili, hna othe la itre xaa sinee i Denise me lue qatre thup, pine laka, hnei angatr hna icilekeu memine la itre droketre. Ame hë la drai thupen, Mecixen 31 Diseba, kola ithanatane lai jol ngöne la itre nuvel, tune la New York me Long Island.

Ame lai Thupenehmi, hnenge hna ithanata me Milton Mollen, perezida ngöne la hna kootr ka tru. Hnenge hna qaja ka hape, hnene la ketre juge hna nue kowe la itre droketre troa hamë madra koi Denise, nge tha ithanatane kö  ngöne la hna kootr ka tru. Hnei Milton Mollen hna upi ni troa bëeke lai hnaipajö ngöne biero i nyidrë, matre troa ce wange la itre wathebo thatraqane lai jol. Nge hnei Philip Brumley, trejin ka elemekene la huliwang ngöne Bethela hna ce tro me eni. Ketre, hnei Milton Mollen hna hane hëne la avocat ka qene qaja ne lai pital, matre tro huni a ce ithanata. Kola iwesitrë me sue ngöne la icasikeu. Nge hnei trejin Brumley hna cinyanyi ngöne la pepang ka hape, tha tro kö a ‘ithanata catr.’ Nyipici, ketre eamo ka lolo hna hamën hnei trejin Brumley. Eni hi a elëhni me ithanata catr ke, eni a ajane troa amamane kowe lai avocat laka, ka nyipici kö la hnenge hna qaja.

Thupene la ca hawa, hnei Milton Mollen hna qaja ka hape, ka loi e tro angatr a wange lai jol e thupen. Ame hë la eahuni a tro qa ngöne la biero, hnei nyidrëti hna qaja koi ni me trejin Philip Brumley, ka hape, tru la hnëqa ne la avocat ne pital. Eje hi, ka ngazo catre la hna kuca hnene la itre droketre koi Denise Nicoleau. Iehova a akeukawane la hning me qaja koi ni ka hape, tro kö a hune la nyipici. Drei la madrine ka tru laka, Iehova a upi së matre troa kuca la aja i Nyidrë.

Hne huni hna huliwa uti hë e hnenyipajidr. Tha nanyi kö la hna kootr ka tru qa ngöne la Bethela. Hnene la itre trejin ka ce huliwa me eni ngöne la service juridique hna nango trongë ihnadro kowe la hna kootr ka tru. Thupene la hna drei hun, hnene la foa lao juge hna qaja ka hape, tha meköti kö la hna kuca koi trejin Nicoleau. Celë hi matre, hnene la hna kootr ka tru hna kapa la iutisai eahlo. Nge jëne la iutisai cili, hna amekötine laka, maine hna axecië mekun nge patre kö la atr, maine ameköti ewekë pena nge tha hna iutisai kö koi hna kootr ka tru, haawe, ewekë lai ka tha ka meköti kö nge ijije hi troa iutisai.

Thupene lai, hnene la hna kootr ka tru e Neweyok hna amekötine laka, ijije hi troa nyinyine la meci trejin Nicoleau, ngacama tha ajane kö eahlo troa xomi madra. Eni a madrine troa cilëgöline la itre Temoë Iehova ka thipën troa xomi madra. Foa lao iutisai ngöne la itre xaa nöj e Etazini, ngo hune kö la itre trejin ka thipën troa xomi madra. (Wange ju la hna eköhagen, hna hape, “ Kola Hun Ngöne La Hna Kootr Ka Tru.”) Ame lai pane iutisai ke, ene la ka traqa koi trejin Nicoleau. Ame fe ngöne la Bethela tre, hnenge hna ce huliwa memine la itre  xaa avocat thatraqane la itre trejin ka ajane troa thupëne la itre nekö i angatr me itre uma me itre götrane hnë troa xupi uma.

Ame la eni a xötrei öhnyi Dawn ke, angeic a seihnacil memine la föi angeic, nge angeic a hetrune casi la köni nekö i angeic. Hnei angeic hna huliwa catr thatraqane la köni neköi angeic, ngo hnei angeice fe hna xome la huliwa ne pionie. Tha ka hmaloi kö la mele i angeic. Ngo eni a haine la aja me aqane catr angeic troa nyihlue i Iehova. Ame hë lai 1992, hnei angeic hna sine la asabele katru e Neweyok, hna hape, “Porteurs de lumière.” E cili, hnenge hna sipo angeic troa iatre me eni. Thupene la ca macatre, hnei nyio hna faipoipo. Ketre föe ka hnyimahnyima me catre lapaune koi Iehova. Ketre ahnahna ka tru qaathei Iehova. Hnei Dawn hna ‘kuca la loi’ ngöne la mele ne trefëne i nyio.—Ite edomë 31:12.

Ame la nyio a faipoipo ke, 11, 13 me 16 la macatre ne la itre nekönatr. Eni a ajane troa ketre kem ka lolo koi nyudren, matre hnenge hna thele la itre eamo ngöne la itre itusi thatraqane la itre kem me thin. Nge hnenge hna catre trongëne itre ej. Thupene lai, hna traqa la itre jole ka tru koi hun. Itre macatre thupen, eni a sesëkötre ke, aja i nyudren tro ni a ketre sinee me keme i nyudren ka ihnim. Hnenge me Dawn palahi hna kapa la itre sinee i nyudren ngöne la hnalapa. Aja i nyio troa traqa hnene la itre nekönatr me thöth matre troa madrine la hnalapa.

Ame lo 2013, hnenge me Dawn hna fek a tro Wisconsin matre troa thupëne la lue kem me thine i nyio ka qatre hë me wezipo. Ngo tha celë kö ka sewe ni troa huliwa kowe la Bethela. Hna sipo ni hnei angatr troa ixatua ngöne la service juridique.

Ame lo Semitrepa 2018, eni a öhne laka, kolo palahi a xoxo la nyinawang, ngo pëkö hna öhne hnei droketre. Thupene lai, hnene la ketre droketre hna upi ni troa wange la ketre neurologue, droketre ne la itre non. Ame hë la Januare 2019, hna tithi ni hnene la ketre meci ne non, nge hna thatre hnei itre droketre. Hna hën la meci cili ka hape, paralysie supranucléaire progressive (PSP).

Thupene la köni drai, hnenge hna kuci patin nge hnenge hna kei me eatr. Hna xecie la june wanakoimeng mi. Tha trotrohnine kö ni la kepin matre eni a eatr ke, tru jë hi ni ekö a kuci patin. Eni a wangatrehmekune laka, kola ngazo trootro la mecing. Thatreine hë ni troa ithanata me ulume la ketre xen me tro.

Ngo ame pe, eni a madrine pine laka, hnenge hna catre huliwa i Iehova me hane cilëgöline la Baselaia i Nyidrë. Hnenge hna hane cinyihane la itre tane mekun thatraqane la huliwang me hane cile fë cainöj ngöne la itre icasikeu ka tru, hna hape, colloques médico-légaux hna kuca e cailo fen. Hnenge hna catre cilëgöline la itre hlue i Iehova, matre tro palahi angatr a iëne la itre aqane inyië nge pëkö xomi madra. Ame pe, tune lo hna qaja ngöne Luka 17:10: ‘Eni la ketre hlue ka pë hnënyöngön ke, ame la hnenge hna kuca, tre, hnëqange kö lai.’