TANE MEKUN 28
Loi e Xecie Koi Së Laka Easë Hnyawa Hi Ngöne La Nyipici
“Cile huti ju ngöne la itre ini hna hamë eö, lo hna ahmalane la hni eö troa mejiun.”—2 TIM. 3:14.
NYIMA 56 Melëne Jë Së La Nyipici
MEKUN KA TRU *
1. Nemene la aliene la “nyipici”?
“HNEI epuni hna atre tune kaa la nyipici? Hnei epuni kö hna tru ngöne la nyipici? Ije macatre hë i epun ngöne la nyipici?” Maine jë hna qaja koi së la itre hnying celë. Maine pena, easë la ka hnyingëne koi itre xan. Ngo nemene la aliene la “nyipici”? Easë palahi a xome la hnaewekë celë, matre troa qaja la itre hne së hna mejiune kow, maine hmi së koi Iehova, maine aqane mele së pena. Ame la itre ka lapa “ngöne la nyipici,” tre, atre hi angatre la itre ini qa hnine la Tusi Hmitrötr nge angatr a trongëne itre ej. Eje hi, hna thepe angatr qa ngöne la itre ini thoi, nge angatr a mele madrin, ngacama itre ka tha pexeje kö.—Ioane 8:32.
2. Thenge la Ioane 13:34, 35, nemene la ka pane thue aja kowe la itre atr troa atre la nyipici?
2 Nemene la ka pane thue aja së troa atre la nyipici? Maine jë, hnene la aqane ujë ka lolo ne la itre hlue i Iehova. (1 Pet. 2:12) Maine pena, hnene la ihnimi angatr. Ame la itre xan ka xötrei sine la itre icasikeu, thëthëhmine hë angatr la aliene la itre cainöj hna cile fë. Ngo ame pe, hna ketri angatr hnene la ihnimine la itre trejin. Tha sesëkötre kö së ke, öni Iesu ka hape, troa wangatrehmekune la itretre drei nyidrë hnene la ihnimi angatr. (E jë la Ioane 13:34, 35.) Ngo maine easa ajane troa acatrene la lapaune së, tha tro hi sa haine la ihnimine la itre hlue i Akötresie.
3. Nemene la ka troa traqa e hna nyitrepene la lapaune së hnene la ihnimine la itre trejin?
3 Tha tro hi a nyitrepene la lapaune së hnene la ihnimine la itre trejin. Pine nemen? Pane mekune jë laka, kola tria hnene la ketre trejin, ketre qatre thup maine ketre pionie. Maine pena, kola akötrë epun hnene la ketre trejin. Maine pena, kola nyiqane iamenumenu hnene la ketre atr me qaja ka hape, tha easë kö ngöne la nyipici. Hapeu, tro kö sa trotrije la nyipici? Maine tro sa nyitrepene la lapaune së hnene la aqane ujë ne la itre xan, ngo tha hnene pe la aqane imelekeu së me Iehova, tha tro hë sa cile hut ngöne la nyipici. Tro ha canga nanazije la lapaune së. Eje hi, ihnim la ka acatrene la lapaune së. Ngo nyipiewekë fe tro sa kapa la itre ini ka nyipici me meköt, matre xecie koi së laka, easë ngöne la nyipici. Loi e tro sa “isa tupathe” la Tusi Hmitrötr laka, eje hi a qatreng la nyipici göi Iehova.—Rom. 12:2.
4. Thenge la Mataio 13:3-6, 20, 21, nemene la aqane ujë itre xan ngöne la kola tupath la lapaune i angatr?
4 Öni Iesu ka hape, tro la itre xan a kapa “madrin” la nyipici, ngo ame hë la kola tupathi angatr, tre, canga nanazije pi hi la lapaune i angatr. (E jë la Mataio 13:3-6, 20, 21.) Maine jë, tha trotrohnine kö angatr laka, tru la itre jol ka traqa kowe la itre ka xötrethenge Iesu. (Mat. 16:24) Maine pena, angatr a mekun laka, itre manathithe hi la hna troa kapa hnene la itre Keresiano, nge pëkö jol ka troa traqa koi angatr. Ngo easa mel ngöne la fene ka ngazo, matre tru la itre jol ka traqa. Ijije hi troa saze la mele së me paatre trootro la madrine së.—Sal. 6:6; Ate cai. 9:11.
5. Nemene la aqane amamane la itre trejin laka, angatre hi ngöne la nyipici?
5 Alanyimu la itre trejin ka amamane laka, angatre hi ngöne la nyipici. Tune kaa? Maine jë, hna akötrë angatr hnene la ketre trejin, maine pena ka ngazo la aqane ujë ne lai trejin. Ngo ame pe, ka catr palahi la lapaune i angatr. (Sal. 119:165) Tha nanazije kö la lapaune i angatr ngöne la itupath, ngo kolo pe a catr. (Iako. 1:2-4) Nemene la aqane tro sa acatrene la lapaune së?
LOI E HETRENYI SË LA “ATREHMEKUNYI AKÖTRESIE”
6. Nemene la ka nyitrepene la lapaunene la itre pane Keresiano?
6 Ame ekö, hnene lo itre pane Keresiano hna nyitrepene la lapaune i angatr hnene la atrehmekune qa hnine la Tusi Hmitrötr me itre ini qaathei Iesu Keriso, ene la “nyipici ne la maca ka loi.” (Gal. 2:5) Kola qaja la nöjei ini ne la itre Keresiano, tune la itre ini göne la mele hna huujën hnei Iesu me melehmaca i nyidrë. Xecie koi Paulo aposetolo laka, ka nyipici la itre ini cili. Nemene la ka anyipicine lai? Hnei angeic hna xome ‘la itre hna Cinyihan’ matre troa ‘anyipicine laka, nyipiewekë tro Keriso a pane akötr me mele hmaca.’ (Itre hu. 17:2, 3) Hnene la itre pane Keresiano hna kapa la itre ini me sipo uati hmitrötr matre trotrohnine la itre trengewekë i Akötresie. Hnei angatr hna ithel matre wang laka, hna nyitrepene la itre ini cili hnene la itre hna Cinyihan. (Itre hu. 17:11, 12; Heb. 5:14) Eje hi, tha hna nyitrepene kö la lapaune i angatr hnene la ihnimine la nöje i Akötresie. Nge tha angatre kö a nyihlue i Iehova ke, ka lolo la aqane imelekeu i angatr memine la itre trejin. Angatre pe a nyitrepene la lapaune i angatr hnene la “atrehmekunyi Akötresie.”—Kol. 1:9, 10.
7. Nemene la aqane troa xatua së hnene la lapaune kowe la itre ini qa hnine la Tusi Hmitrötr?
7 Tha ka saze kö la nyipici qa hnine la Tusi Hmitrötr. (Sal. 119:160) Ngacama akötrë së ju hë maine tupathi së, maine pena kola tria hnene la ketre trejin, ngo tha saze kö la nyipici. Haawe, loi e tro sa atrepengöne hnyawa la itre ini qa hnine la Tusi Hmitrötr. Nge loi e troa xecie koi së laka, ka nyipici itre ej. Maine ka catr la lapaune së, tro hë sa cile catr ngöne la itupath, tune la aqane cile catr la he hnene la iuhni ngöne la kola wene. Nemene la nyine tro sa kuca matre xecie koi së laka, easë hi ngöne la nyipici?
LOI E TRO SA ‘MEJIUNE’ KOWE LA ITRE EWEKË CELË
8. Thenge la 2 Timoteo 3:14, 15, pine nemene matre xecie hnyawa koi Timoteo laka, angeice hi ngöne la nyipici?
8 Ka xecie hnyawa koi Timoteo laka, angeice hi ngöne la nyipici. Pine nemen? (E jë la 2 Timoteo 3:14, 15.) Hnene la thin me qaaqa i Timoteo hna ini angeic la “itre hna cinyihane ka hmitrötr.” Ngo hnei angeic hna xomi ijin me nue trengecatr, matre troa inine itre ej. Celë hi ka xatua angeic troa mejiun laka, ka nyipici la itre hnei angeic hna inin. Thupene lai, hnei Timoteo me thine i angeic me qaaqa i angeic hna kapa la hmi Keresiano. Hnei Timoteo hna haine la ihnimi ne la itretre drei Iesu. Nge aja i angeic troa atrepengöi angatre hnyawa me xatua angatr. (Fil. 2:19, 20) Ngo tha hna nyitrepene kö la lapaune i angeic hnene la ihnimi angeic koi itre xan. Hna nyitrepene pe hnene la itre ini ka acatrene la aqane imelekeu i angeic me Iehova. Ketre tu së fe, loi e tro sa catre ini Tusi Hmitrötr me xomi ini göi Iehova.
9. Nemene la köni ini qa hnine la Tusi Hmitrötr nyine tro sa mejiune kow?
9 Loi e tro sa pane mejiune kowe la köni ini celë. Ame la hnapan, Iehova la Atre Xup la nöjei ewekë asë. (Eso. 3:14, 15; Heb. 3:4; Hna ama. 4:11) Ame la hnaaluen, Tusi Hmitrötr la maca qaathei Iehova kowe la itre atr. (2 Tim. 3:16, 17) Nge ame la hnaakönin, hetre organizasio i Iehova hna elemeken hnei Keriso, nge itre Temoë Iehova hi la itre atren. (Is. 43:10-12; Ioane 14:6; Itre hu. 15:14) Maine easa ajane troa mejiun kowe la köni ini cili, tha nyipiewekë kö troa atre asë la aliene la Tusi Hmitrötr. Ame la ka sisitria, tre, troa huliwane la “mekune” së matre xecie koi së laka, easë hi ngöne la nyipici.—Rom. 12:1.
XATUANE JË LA ITRE HNAININ TROA HULIWAN LA MEKUNA I ANGATR
10. Nemene la nyine tro sa kuca, e xecie hë koi së laka, easë hi ngöne la nyipici?
10 Ame hë la kola xecie koi së lo köni ini hne së hna wang, loi e tro sa qejepengöne itre ej koi itre xan jëne la Tusi Hmitrötr. Pine nemen? Pine laka, hnëqa së itre Keresiano, troa tro fë la itre hne së hna inin e hnine la Tusi Hmitrötr. * (1 Tim. 4:16) Ketre, ame la easa xatuane la itre xan troa mejiune kowe la itre ini cili, easë fe hi lai a acatrene la mejiune së koi itre ej.
11. Nemene la aqane tro sa nyitipu Paulo ngöne la easa hamë ini?
11 Hnei Paulo aposetolo hna inine la itre xan jëne la “Trenge Wathebo i Mose, me itre Perofeta” matre troa “anyipici Iesu.” (Itre hu. 28:23) Nemene la aqane tro sa nyitipu nyidrë? Tha tro hi sa qaja la itre ini kowe la itre atr. Loi e tro fe sa xatua angatr troa lapa mekun la Tusi Hmitrötr. Ame la aja së, tre, tro angatr a kapa la itre ini ke, hnei angatr hna ketre sipu thele la nyipici göi Iehova, Akötresi së ka tru ihnimin. Ngo tha hnene kö laka, angatr a wangatrunyi së.
Itre kem me thin, xatuane jë la itre nekönatr troa catre lapaun me ini nyudren “la itre ewekë ka jui i Akötresie” (Wange ju la paragarafe 12-13) *
12-13. Tro la itre kem me thin a xatuane tune kaa la itre nekönatr troa lapa ngöne la nyipici?
12 Itre kem me thin, eje hi laka, epuni a ajane tro la itre nekö i epun a lapa ngöne la nyipici. Ame koi epun, ka loi e tro nyudreni a hetre nyipi sinee e hnine la ekalesia matre kökötre ngöne la nyipici. Ngo tha eje hmekuje kö lai. Loi e tro fe nyudreni a acatrene la aqane imelekeu i nyudren me Akötresie, me mejiun laka, ka nyipici la itre ini qa hnine la Tusi Hmitrötr.
13 Maine itre kem me thin a ajane troa inine la nyipici kowe la itre nekönatr, loi e tro angatr a amamai tulu. Loi e tro angatr a xomi ijin matre troa ini Tusi Hmitrötr me lapa mekun la itre hnei angatr hna inin. Tro hë la itre nekönatr a nyitipu angatr. Tro fe a ini nyudren troa ithel ngöne la itre itusi së, tune la aqane kuca kowe la ketre hnainin. Celë hi aqane troa xatua nyudren troa hnimi Iehova, me amamane la hni ne ole i nyudren kowe “la hlue ka nyipici me ka inamacan” lo hna acil, matre troa hamë xen ngöne la götrane u. (Mat. 24:45-47) Haawe itre kem me thin, tha tro hi a ini Tusi Hmitrötr memine la itre nekönatr. Loi e tro fe a xatua nyudren troa acatrene la lapaune i nyudren, me ini nyudren “la itre ewekë ka jui i Akötresie” thenge la macatre i nyudren me itre hnei nyudren hna atre.—1 Kor. 2:10.
ININE JË LA ITRE HNA PEROFETAN HNEI TUSI HMITRÖTR
14. Pine nemene matre nyipiewekë troa inine la itre hna perofetan e hnine la Tusi Hmitrötr? (Wange ju fe la hna eköhagen hna hape, “ Atreine Hi Epun Qejepengöne La Itre Hna Perofetan Celë?”)
14 Ka nyipiewekë la itre hna perofetan hnei Tusi Hmitrötr. Itre ej a xatua së troa acatrene la lapaune së koi Iehova. Nemene la itre hna perofetan cili? Maine jë, easa mekun la itre hna perofetan göne la “itre drai ne la pun.” (2 Tim. 3:1-5; Mat. 24:3, 7) Nemene la itre xaa hna perofetan ka acatrene la lapaune së? Hapeu, atreine kö së qaja la aqane eatr ekö me aqane troa eatr elany la itre hna perofetan ngöne Daniela mekene 2 me 11? * Maine hna nyitrepene la lapaune së hnene la Tusi Hmitrötr, tro hë sa cile catr. Tro sa pane ce wang la ka traqa kowe la itre trejin hna qanangazon e Alema, ngöne lo Hnaaluene Isi Ka Tru. Tha trotrohnine hnyawa kö angatr la itre hna perofetan göne la itre drai ne la pun, ngo catrecatre la lapaune i angatr kowe la itre trengewekë i Akötresie.
Maine tro sa catre ini Tusi Hmitrötr me inine la itre hna perofetan, tro hë sa cile catr ngöne la itupath (Wange ju la paragarafe 15-17) *
15-17. Nemene la aqane xatuane la itre trejin hna qanangazon hnene la itre Nazi, hnene la hnei angatr hna ini Tusi Hmitrötr?
15 Ame lo kola musi ekö hnei angetre Nazi e Alema, nyimutre la itre trejin hna akalabusin ngöne la itre uma ne iaxösisi. Hnei Hitler me Himmler (tan ne la SS) hna methinëne la itre Temoë Iehova. Önine la ketre trejin ka hape, hnei Himmler hna qaja kowe la itre trejine föe hna akalabusin ka hape: “Iehova i epun a musi e hnengödrai, ngo ame e celë fen, eahuni la ka mus! Easa troa wang ka hape, drei la ka troa cile hut, epun maine eahun!” Nemene la ka xatuane la itre hlue i Iehova troa mele nyipici?
16 Atre hnyawa hi la Itretre Ini Tusi Hmitrötr laka, musi hë la Baselaia i Akötresie lo 1914. Celë hi matre, tha sesëkötre kö angatr la kola icilekeu. Xecie koi angatr laka, thatreine kö la itre musi atr troa sewe Akötresie troa kuca la aja i Nyidrë. Thatreine kö Hitler troa apatrene la hmi ka wië maine acile la ketre mus ka draië catre kö hune la Baselaia i Akötresie. Atre hi la itre trejin laka, troa paatre la musi Hitler.
17 Hna eatre hnyawa la hnei angatr hna mejiune kow. Paatre hë la musi Nazi. Nge ame Himmler, lo ka qaja ka hape: “Ame e celë fen, eahuni la ka mus!,” tre, hnei angeic hna kötre kowe la ketre nöj. E cili, hnei angeic hna iöhny me trejin Lübke hna akalabusin ekö. Hleuhleu catre Himmler, matre öni angeic koi trejin Lübke: “Nemene hë la ka troa traqa enehila?” Öni trejin Lübke ka hape, tha sesëkötre kö la itre Temoë Iehova laka, troa paatre la musi Nazi, nge troa nue hmaca la itre hlue i Iehova. Pë ju hi hna sa hnei Himmler. Thupene lai, hnei angeic hna hnöjua. Nemene la ini? Maine tro sa catre ini Tusi Hmitrötr me inine la itre hna perofetan, tro ha catr la lapaune së koi Akötresie, nge tro hë sa cile catr ngöne la itupath.—2 Pet. 1:19-21.
18. Thenge la Ioane 6:67, 68, pine nemene matre nyipiewekë troa hetrenyi la “nyipi inamacan, me atrehmekun”?
18 Loi e tro sa ihnim ke, celë hi hatrene la itre nyipi Keresiano. Ketre, loi e tro fe sa hetrenyi la “nyipi inamacan, me atrehmekun.” (Fil. 1:9) Maine tha hmeke kö së, tro ha ajojezi së hnene la “nöjei ini thenge la nyinyithiina i atr,” tune la itre ka iamenumenu. (Efe. 4:14) Ame ekö, alanyimu la itretre dreng ka nuetriji Iesu. Ngo hnei Peteru aposetolo hna amamane la lapaune i angeic me hape, “thei [Iesu] la itre trengewekë ne mele ka pë pun.” (E jë la Ioane 6:67, 68.) Tha trotrohnine kö Peteru la itre trengewekë celë. Ngo hnei angeic hna mele nyipici ke, mama ha koi angeic la nyipici göi Keriso. Ketre tu së fe, loi e tro sa mejiune kowe la hna qaja hnei Tusi Hmitrötr. E cili, tro ha catre la lapaune së ngacama kola traqa la itre itupath. Nge tro hë sa xatuane la itre xan troa acatrene la lapaune i angatr.—2 Ioane 1, 2.
NYIMA 72 Ahlemune Jë La Nyipici Göi Baselaia
^ Ame ngöne la tane mekun celë, tro sa ce wang la itre nyipici qa hnine la Tusi Hmitrötr. Kola troa amamai së la aqane tro sa acatrene la mejiune së kowe la itre ini cili.
^ Maine epuni a ajane troa qejepengöne koi itre xan la itre ini ka tru ne la Tusi Hmitrötr, tro jë kowe la hna hape, “Kola Porotrik Memine La Ketre Atr,” ngöne lo Ita Ne Thup ne 2015, qene Wiwi. Hetrenyi fe la itre hnying celë: “Jésus est-il Dieu?,” “Quand le Royaume de Dieu a-t-il commencé à régner?,” me “Dieu punit-il les gens en enfer?”
^ Maine epuni a aja itre xaa ithuemacany göne la itre hna perofetan celë, wange ju la Ita Ne Thup ne 15 Juun 2012 qene Wiwi, me Ita Ne Thup ne Mei 2020.
