1. Nemene la hnei Iehova hna kuca koi epun?

 HNEI epuni hna atre tune kaa la nyipici? Maine jë, hnei epuni hna dreng “la maca ka loi” jëne la kem me thine i epun, itre sine huliwa maine sine ini, maine pena hna cainöj ngöne la hnalapa i epun. (Mar. 13:10) Thupene lai, hnene la ketre trejin hna nue traem me trengecatr, matre troa ini tusi me epun. E cili, kola kökötr la ihnimi epun koi Iehova ke, öhne hë epun laka, Nyidrëti a hnimi epun. Hnei Iehova hna eatrongë epun kowe la nyipici, matre ketre atre drei Iesu hë epuni enehila, nge epuni a mejiun kowe la mele ka pë pun. (Ioane 6:44) Tru la hni ne ole i epun koi Iehova ke, hnei Nyidrëti hna kepe epun, me upe la ketre trejin troa ini epun la nyipici.

2. Nemene la hne së hna troa ce wang ngöne la tane mekun celë?

² Pine laka, atre hë së la nyipici, matre hnëqa së troa xatuane la itre xan troa tro ngöne la gojenyi ne mel. Maine jë ka hmaloi koi së troa cainöj ngöne la itre hnalapa trootro, ngo jole pe troa nyiqane ini tus memine la ketre atr. Celë kö la mekuna i epun? Maine eje hi, troa xatua epun hnene la tane mekun celë. Tro sa ce wang la enyipiewekëne la troa cainöjëne la maca ka loi me inine la itre atr. Thupene lai, tro sa ce wang la ka troa hamë aja me trengecatre së troa xom la huliwa cili. Nge tro fe sa ce wange la aqane tro sa elë hun la itre jol ka sewe së troa ini tus memine la ketre atr.

3. Pine nemene matre easa cainöj?

³ Ame lo Iesu e celë fen, hnei nyidrëti hna ahnith kowe  la itretre drei nyidrë, la lue huliwa. Ame la hnapan, hnei nyidrëti hna upi angatr troa cainöjëne la maca ka loi ne la Baselaia, me amamai angatr la aqane troa kuca. (Mat. 10:7; Luka 8:1) Hnei Iesu hna amamane koi angatr la aqane troa sa ngöne la kola kapa maine thipëne la maca ne la Baselaia. (Luka 9:2-5) Ketre, öni nyidrëti ka hape, tro angatr a cainöjëne la maca cili “nyine anyipicine kowe la nöjei nöj.” (Mat. 24:14; Itre hu. 1:8) Ngacama tha kapa kö itre xan la maca ka loi, ngo hnëqa ne la itretre drei Iesu troa cainöjëne la Baselaia i Akötresie me itre hnene ej hna troa eatrën.

4. Thenge la Mataio 28:18-20, nemene la ketre huliwa hnei Iesu hna ahnithe koi së?

⁴ Nemene la hnaaluene huliwa hnei Iesu hna ahnithe koi së? Hnei nyidrëti hna upe la itretre drei nyidrë troa inine la itre atr troa trongëne la itre hnei nyidrëti hna amekötin. Öni itre xan, ame la huliwa cili, tre, thatraqane hmekuje hi ekö la itre pane Keresiano. Ngo hapeu, ka nyipici kö lai? Waea, öni Iesu ka hape, troa eatrëne la huliwa cili uti hë enehila, me “uti hë la troa nyipune la fene celë.” (E jë la Mataio 28:18-20.) Maine jë, hnei Iesu hna hamën la huliwa cili ngöne lo nyidrëti a mama kowe la ala 500 lao trejin. (1 Kor. 15:6) Ketre, hnei Iesu hna amamane koi Ioane laka, hnëqa ne la itretre drei nyidrë troa xatua itre xan troa atrepengöi Iehova hnyawa.​—Hna ama. 22:17.

5. Thenge la 1 Korinito 3:6-9, nemene la aqane aceitunëne Paulo la huliwa ne cainöj memine la troa eëny?

⁵ Hnei Paulo aposetolo hna aceitunëne la huliwa ne cainöj memine la kola eëny, me amamane laka, tha tro hmekuje kö sa traan. Öni nyidrëti koi angetre Korinito: “Hnenge hna traan, nge hnei Apolo hna fi . . . nyipunie la hlapa i nyidrë, hna nyidrawan hnei nyidrë.” (E jë la 1 Korinito 3:6-9.) Easa huliwa ngöne la ‘hlapa i Akötresie,’ matre tha easë hmekuje kö a traan, ngo easë mina fe a goeëne la thangane la huliwa së. (Ioane 4:35) Ngo atre hi së laka, Akötresieti kö la ka acian.

6. Nemene la köni ewekë nyine troa kuca hnene la ka hamë ini?

⁶ Easa thele la itre atr “ka hmalahnine troa kapa la mele ka pë pun.” (Itre hu. 13:48) Eje hi, easa xatua angatr troa xötrethenge Iesu ngöne la easa ithuecatr koi angatr troa (1) trotrohnin, (2) kapa, me (3) trongëne la hnei angatr hna inin. (Ioane 17:3; Kol. 2:6, 7; 1 Thes. 2:13) Ketre, ijije hi tro la itre atrene la ekalesia a xatuane la itre ka ini tus. Angatr a amamai tulu ka loi me hnime la itre ka ini tus me ikepe hnyawa ngöne la hna icasikeu. (Ioane 13:35) Loi e tro fe la ka hamë ini a nue traem me trengecatr, matre xatuane la ka ini tusi troa thipetrije la itre ini ka thoi me akeine la “itre itra etë atraqatr.” (2 Kor. 10:4, 5) Maine jë, itre treu ne tro la trejin a xatuane la ka ini tus troa kökötr ngöne la götrane u uti hë la troa xomi bapataiso. Ngo tha ka gufa kö la itre trengecatr ne lai trejin.

7. Pine nemene matre easa cainöje trootro me inine la itre atr?

⁷ Pine nemene matre easa cainöje trootro me inine la itre atr? Ame la hnapan ke, easa hnimi Iehova. Ame la easa  kuca la hne së hna atrein matre troa cainöj me inine la itre atr, easë hi lai a amamane la ihnimi së koi Akötresie. (1 Ioane 5:3) Maine jë, hnene la ihnimi së koi Iehova matre easa cainöj ngöne la itre hnalapa trootro. Hapeu, ka hmaloi kö ngöne la xötrei? Waea. Hnei easë asë hi hna xou. Ame pe, easa drengethenge ke, hnei Iesu hna ahnithe koi së la huliwa cili. Maine jë, tha jole hë koi së enehila troa cainöje trootro. Ngo tune kaa göi troa ini tusi me ketre atr? Maine jë, easa xou. Ngo loi e tro sa sipo Iehova troa xatua së matre tha tro kö sa xou me nyiqane ini tus memine la ketre atr. E cili, tro hë Nyidrëti a acatrene la aja së troa cainöj me inine la itre atr.

8. Thenge la Mareko 6:34, pine nemene matre easa inine la itre atr?

⁸ Ame la hnaaluen ke, easa hnime la atr ka lapa easenyi së matre, easa ini angatr la nyipici. Ame lo ketre ijin, hnei Iesu me itretre drei nyidrë hna thele götran matre troa pane mano. Angatr a kucakuca thupene la hna cainöj. Ngo hna traqa hnene la ka alanyim. E cili, hnei Iesu hna utipi angatr me ini angatr “la itre ewekë ka nyimutre.” (E jë la Mareko 6:34.) Ngacama kucakuca catre Iesu, ngo hnei nyidrëti hna xatua angatr. Pine nemen? Hnei Iesu hna utipi angatr me trotrohni angatr, nge öhne hnyawa hi nyidrëti la akötre ka eje thei angatr. Hnei nyidrëti hna xatua angatr me hamë mejiun koi angatr. Ame enehila, hna aceitunë la itre atr me itre mamoe ka pë atre thupën. Öni Paulo aposetolo, pëkö Akötresi angatr me mejiun. (Efe. 2:12) Eje hi, angatre ngöne la “jë ne tro kowe la mec”! (Mat. 7:13) Haawe, pine laka easa hnim me utipine la itre atrene la teritoare së, loi e tro sa xatua angatr me ini tusi me angatr.

9. Thenge la Filipi 2:13, nemene la aqane xatua së hnei Iehova?

⁹ Maine jë, easa xou troa sipone la ketre atr troa ini tusi ke, atre hi së laka, tro sa nue traem göne lai. Ngo loi e tro sa fe la aliene hni së koi Iehova. Ketre, loi e tro sa sipo Nyidrë matre hetre aja së me trengecatr troa ini tusi kowe la ketre atr. (E jë la Filipi 2:13.) Hnei Ioane aposetolo hna qaja ka hape, tro Iehova a sa la itre thithi ka ihmeku memine la aja i Nyidrë. (1 Ioane 5:14, 15) Celë hi matre, xecie koi së laka, tro kö Iehova a thue aja koi së troa inine la itre atr.

10-11. Nemene la ka troa ajolë së troa ini tus memine la ketre atr?

¹⁰ Nyipici laka, easa wangatrune la huliwa ne cainöj me ajane troa inine la itre atr. Ngo nyimutre la itre jole hne së hna cile kow matre kola sewe së troa eatrëne hnyawa la hnëqa hna ahnithe koi së. Tro sa ce wange la itre jole cili memine la aqane tro sa cile kow.

¹¹ Tha ijiji së hë ke, hetre ifego së. Maine jë, qatre hë la itre xaa trejin maine hna tithi angatr pena hnei mec. Ame pe, loi e tro sa xomi ini qa ngöne la ka traqa göne la meci, hna hape, COVID-19. Easa öhne laka, ijije hi tro sa ini tusi memine la ketre atr qa ngöne la hnalapa së jëne Ëternet! Ngo hetre ketre eloin. Ame itre xan, ke angatr a ajane troa ini Tusi Hmitrötr ngo tha ngöne kö lo hawa ne cainöj ne la itre trejin. Angatr a ajane troa ini tusi e hmahmakany maine e jidri  pena. Hapeu, ijiji së kö troa kapa la aja i angatr? Thenge la aja i Nikodemo, hnei Iesu hna hamë ini koi angeic e jidr.​—Ioane 3:1, 2.

12. Nemene la ka troa xatua së ngöne la easa luelu e thatreine kö së hamë ini kowe la ketre atr?

¹² Easa luelu laka, thatreine kö së hamë ini kowe la ketre atr. Maine jë, ame koi së, loi e troa pane hetre atrehmekun me inamacan qëmekene troa inine la ketre atr. Ngo tro sa ce wange la köni mekun ka troa ixatua. Ame la hnapan, ke, atre hi Iehova laka, ijiji së hi troa hamë ini koi itre xan. (2 Kor. 3:5) Ame la hnaaluen, hnei Iesu, ene lo atre “musi hune la nöjei ewekë e hnengödrai me e celë fen,” hna aijijë së troa cainöj. (Mat. 28:18) Nge ame la hnaakönin, ijije hi troa sipo ixatua koi itre xan. Hnei Iesu hna ithanata thenge la itre ini hnei nyidrëti hna kapa qaathene la Keme i nyidrë. (Ioane 8:28; 12:49) Ketre tu së fe, ijije hi tro sa sipo ixatua kowe la atre thupëne la gurupe së me ketre pionie, maine ketre trejin pena ka macaj. Ijije fe tro sa ce tro me angatr ngöne la kola ini tus. Tro hë lai a xatua së matre tha tro kö sa xou troa nyiqane ini tusi memine la ketre atr.

13. Pine nemene matre loi e tro sa saze la aqane hamë ini së?

¹³ Thatreine kö së huliwane la itre jia ne huliwa ka hnyipixe. Nyipici laka, easa saze la aqane hamë ini së kowe la itre atr. Celë hi matre, loi e tro sa hnëkëne hnyawa la itus, hna hape, Vivez pour toujours ! Eje hi, tha tru kö hnei paragarafe nyine tro sa e, matre kola aijijë së troa porotrik memine la ka ini tus. Easë fe a huliwane la itre video me itre xaa jia ne huliwa, tune la JW Library. Maine thatreine kö së huliwane itre ej, loi e tro sa sipo ixatua. Ketre, ngacama tha ka hmaloi kö troa nue la itre hna majemin me saze aqane huliwa, ngo tro kö a xatua së hnei Iehova me itre xan. E cili, tro hë sa madrine troa inine la itre atr. Önine la ketre pionie, aqane ini tusi lai “ka ithuecatre kowe la ka ini tus me kowe fe la ka hamë ini.”

14. Nemene la nyine tro sa kuca, ngacama tha kapa kö la maca maine kola icilekeu hnene la itre atr, nge nemene la ithuecatre hna hamën ngöne 1 Korinito 3:6, 7?

¹⁴ Jole troa nyiqane ini tus memine la itre atrene la teritoare së. Nemene la nyine tro sa kuca, ngacama tha kapa kö la maca maine kola icilekeu hnene la itre atr? Tha tro kö sa thëthëhmine laka, ijije hi troa saze la mele ne la itre atr ngöne la fene celë. Celë hi matre, ame lo itre ka icilekeu ke, tro hë angatr a hetre aja troa drei së. (Mat. 5:3) Eje hi, ngacama tha aja i angatr kö ekö troa xome la itre itus, ngo itre macatre e thupen, angatre hë a ini tus. Ketre, Iehova la Maseta ne la huliwa cili. (Mat. 9:38) Nyidrëti a ajane tro sa traan me fie, ngo Nyidrëti kö la ka troa acian. (1 Kor. 3:6, 7) Haawe, maine jë, pëkö ka ini tusi me easë. Ngo ame la ka sisitria catre koi Iehova ke, ene la itre trengecatre së. Tha ene kö la etrune la itre ka ini tusi me easë! *

15. Nemen la aliene hni Iehova ngöne la ketre atr a ini tus me trongëne la hna inin?

¹⁵ Iehova a madrin ngöne la kola kapa  me tro fë hnene la itre atr la nyipici koi itre xan. (Ite edomë 23:15, 16) Nge drei jë kö la madrine i Iehova troa goeëne la huliwa ne cainöj enehila! Ngacama hna traqa la meci ka ixötrekeu ngöne lo macatre 2020, ngo traqa koi 7 705 765 lao atr ka ini Tusi Hmitrötr. Ketre, traqa koi 241 994 lao atr ka sa xepu koi Iehova me xomi bapataiso. Nge angatre fe hë a hamë ini me xatua itre xan troa hane xötrethenge Iesu. (Luka 6:40) Eje hi, easa amadrinëne la hni Iehova ngöne la easa cainöj me inine la itre atr.

16. Nemene la nyine tro sa thele troa kuca?

¹⁶ Tha huliwa ka hmaloi kö la troa inine la itre atr. Ngo jëne la ixatua i Iehova, ijije hi tro sa xatua angatr troa hnimi Nyidrë, Keme së e koho hnengödrai. Haawe, catre jë së thele troa nyiqaane ini tus memine la ketre atr. Maine jë tro sa sesëkötre ngöne la easa hnyingëne kowe la ketre atr troa ini tus. Tha tro kö sa thëthëhmine laka, tro Iehova a amanathithine la itre trengecatre së.

17. Nemene la thangan e tro sa ini Tusi Hmitrötr memine la ketre atr?

¹⁷ Drei la ketre manathith ka tru troa cainöj me inine la nyipici koi itre xan! Ketre huliwa lai ka hamë madrine koi së. Hnei Paulo aposetolo hna xatuane la itre xaa atr ne Thesalonika troa xötrethenge Iesu. Öni nyidrë: “Nemene mejiun, me madrin, me korona la hne huni hna troa selëne qëmekei Iesu Joxu së ngöne la ijine celë hë nyidrë? Hapeu, tha nyipunieti kö? Nyipici, nyipunie la lolo me madrine hun.” (1 Thes. 2:19, 20; Itre hu. 17:1-4) Nyimutre la itre ka mekun tui Paulo enehila. Hnei Stéphanie me föi angeic hna xatuane la ka alanyimu troa xomi bapataiso. Öni angeic: “Pëkö madrin ka tru hune la troa xatuane la ketre atr troa nyihlue i Iehova.”