Iehova a ajane tro la lue trefën a mele madrin ngöne la faipoipo, nge troa cile huti la faipoipo i nyidro uti hë epine palua. (Mat. 19:4-6) Maine epuni a ajane troa faipoipo, nemene la nyine troa kuca matre troa iöhnyi memine la ketre atr? Iehova la Atre Xupi së, matre atre hi Nyidrëti la nyine tro sa kuca matre troa kepe thangane ka loi qa ngöne la ijine easa iatre, me ngöne la faipoipo. Haawe, maine tro sa trongëne hnyawa la itre trepene meköti Iehova, tro hë sa kepe manathith. Hane hi la itre xaa trepene meköti Nyidrë.

Ame la hnaapan, tha tro kö sa thëthëhmine ka hape: “Ate nyipi iaö la hni hune la nöjei ewekë asëjëihë, nge nyipi ngazo ej.” (Iere. 17:9) Ame la ketre atr a thele föe, kola elë trootro la etrune la itre aliene hni angeic, nge celë hi ka ajolë angeic troa waiewekë hnyawa. Ame la itre atr a axecië mekun thenge la itre aliene hni angatr, angatr a hleuhleu me akötr e thupen. (Ite edomë 28:26) Celë hi matre, tha ka inamacane kö la lue ka xötrei iöhnyi me fe la aliene hni nyidro, me canga sisinyi ngacama tha ka iatre hnyawa palakö nyidro.

Kola qaja ngöne Ite Edomë 22:3, MN: “Ame la atre macamek, tre, kola goeëne la ngazo, me zae. Ngo ka pi nyi ka atreine a tro me xeni pun.” Nemene la ethanyine la itre sit Ëternet hna kuca matre troa iatre memine la ketre atr? Ame la itre xan, hna wangesixane la itre aliene hni angatr hnene la itre trenyiwa hnei angatr hna porotrik memin. Ketre, hnei itre xan hna thoi göne la itre ëje i angatr, matre troa atrekënö manie. Ame itre xaa ijin, angatr a thoi ka hape, ketre Temoë Iehova.

Hane hi la ketre ethanyine la itre site cili. Ame ngöne la itre xaa sit, kola ithele matre ce amë la lue atr ka ihmeku. Ngo pëkö ewekë ka jelenyipicine lai. Hapeu, tro kö sa mejiune kowe la itre hna ithele cili me axecië mekun, tune la troa faipoipo? Hapeu, ka nyipiewekë kö itre ej hune la itre trepene meköti ne la Tusi Hmitrötr?—Ite edomë 1:7; 3:5-7.

Kola qaja ngöne Ite Edomë 14:15, MN: “Ame la ka thatre koilo, angeic a kapa asë la itre hna qaja, ngo ame la maca mek, angeic a wang hnyawa la itre jë i angeic.” Qëmekene  troa faipoipo memine la ketre atr, easa thele troa pane atrepengöi angeice hnyawa. Ngo tha ka hmaloi kö troa atre la ketre atr jëne la itre sit Ëternet. Maine easë palahi a porotrik memine la ketre atr jëne Ëternet, ngo hapeu, atrepengöi angeic hnyawa kö hne së? Ame itre xan, hnei angatr hna mekun laka, angeice hi la ka troa faipoipo me angatr. Ngo angatr a sesëkötr e thupen la sipu pengöi angeice öhne la atr hnei angatr hna porotrik memin.

Önine la Salamo: “Tha hnenge kö hna ce lapa me itete thoi, nge tha tro kö ni a ce tro me angete iaö.” (Sal. 26:4) Ame la itre xan, hnei angatr hna majemine thoi ngöne Ëternet, matre alanyimu la itre atr ka troa pi nyisinee i angatr. Angatr a juetrëne la sipu pengöi angatr me itre thiina i angatr ka ngazo. Nge tune kaa e kola qaja hnei ketre ka hape, ketre atre Anyipici Iehova angeic? Hapeu, ka bapataiso kö angeic? Tune kaa la aqane imelekeu i angeic me Iehova? Hapeu, ketre trejin kö hna qaja aloin e hnine la ekalesia maine ketre “sinatro ka ngazo” pena angeic? (1 Kor. 15:33; 2 Tim. 2:20, 21) Nge hapeu, ijiji angeice kö troa faipoipo thenge la hna qaja hnei Tusi Hmitrötr? Eje hi, nyipiewekë troa pane atre la itre ithuemacanyi cili. Celë hi matre, nyipiewekë fe la ixatua ne la itre xaa trejin ka atre angeice hnyawa. (Ite edomë 15:22) Ketre, tha ajane kö la itre hlue i Iehova troa ‘isilekeu me itre ka tha lapaun.”—2 Kor. 6:14; 1 Kor. 7:39.

Eje hi, nyimutre la itre ethanyin e troa thele ka troa faipoipo me easë jëne Ëternet. Ketre, hetre itre xaa aqane troa iatre memine la ketre atr uti hë la kola faipoipo. Nemene la nyine tro sa kuca? Ijije hi troa iöhnyi elanyi memine la ketre trejin ngöne la itre icasikeu me asabele ne sirkoskripsio me asabele ka tru, me itre xaa icasikeu ju kö.

Nyipici laka, hna wathebo së troa itronyi ngöne la itre Uma Ne Baselaia, tune enehila pine la meci COVID-19, matre easa icasikeu jëne Ëternet. Ngo ijije hi tro sa iöhnyi memine la itre xaa trejin ka mel ngöne la itre götrane gaa nany. Jëne la aqane hamë mekune i angatr ngöne la hna icasikeu, easa öhne la etrune la lapaune i angatr. (1 Tim. 6:11, 12) Ketre, ijije hi troa kuca la itre neköi gurup thupene la icasikeu, matre troa porotrik. Jëne la itre icasikeu hna kuca ngöne Ëternet, ijije hi tro sa öhne la itre thiina ne la atr hne së hna ajane troa iatre memin, memine la aqane ujë i angeic kowe la itre xan. (1 Pet. 3:4) Ame hë la easa nyiqane iatre me angeic, tro hë sa öhne e caasi hi la itre hne së hna ajan me itre aqane waiewekë së me angeic.

Maine tro sa thele föe thenge la itre trepene meköti ne la Tusi Hmitrötr, tro ha eatr koi së la hna qaja ngöne Ite Edomë ka hape: “Ame la ate öhne la fö [maine trahmany], te, kola öhne la loi; nge hna hnime hnei Iehova.”—Ite edomë 18:22.