1-2. Nemene la hnei Iehova hna thingehnaean ngöne Isaia 65:16, 17?

 “THE HMACAHMACA KÖ!” Celë hi lai taane la asabele katru 2017. Hnene la itre cainöj hna ithuecatre koi së troa xomihni aqean, ngacama kola traqa itrai la itre jol. Traqa koi foa lao macatre enehila, nge easë palahi a mel ngöne la fene ka ngazo.

² Nemene la itre jol hnei epuni hna cile kow enehila? Hapeu, hna meci la ketre atrene la fami maine ketre sinee i epun pena? Hna tithi epuni kö hnei ketre mec ka pë nyin? Epuni kö a hleuhleu me akötr ke, kola uti ipië trootro? Hapeu, hna lepe la nöje i epun hnene la ketre hulö? Hna akötrë epuni kö me qanangazo epun? Hna ketri epuni kö hnene la meci COVID-19? Eje hi, easa lapa treqene la ijine kola troa apatrene palua la itre jol cili!​—E jë la Isaia 65:16, 17.

3. Nemene la nyine tro sa kuca, nge pine nemen?

³ Nyipici, tha ka hmaloi kö la mele së ngöne la fene celë. Nge tro palakö a traqa la itre jol ka tru. (Mat. 24:21) Celë hi matre, nyipiewekë tro sa xomihni aqean. Pine nemen? Öni Iesu: “Pine la hnei nyipunieti hna cile hut, tro hë nyipunieti a mel.” (Luka 21:19) Haawe, tro sa ce wang la hna kuca hnei itre xan matre troa cile catr ngöne la itre jol. Celë hi ka troa xatua së troa xomihni aqean.

4. Pine nemene matre Iehova la tulu ka sisitria göne la troa xomihni aqean?

⁴ Drei la tulu ka sisitria göne la troa xomihni aqean? Iehova Akötresie. Eje hi, easa mel ngöne la fen hna musinën hnei Diabolo, matre nyimutre la itre jol ka traqa. Maine ju, ijije hi tro Iehova a apatrene la itre jol cili. Ngo Nyidrëti a treqene la nyipi ijin. (Rom. 9:22) Eje hi, Iehova palahi a xomihni aqean. Tro sa ce wang la 9 lao ewekë hna xomihnin hnei Iehova.

5. Tune kaa la aqane adrone la ëje i Akötresie, nge nemene la mekuna i epuni göne lai?

⁵ Kola adrone la ëje i Nyidrë. Ka tru koi Iehova la ëje i Nyidrë, matre aja i Nyidrëti tro la nöjei atr a metrötrëne ej. (Is. 42:8) Ngazo pe, traqa koi 6 000 hë lao macatre enehila ne kola adrone la ëje i Nyidrë. (Sal. 74:10, 18, 23) Hnei Diabolo (maine “Atre ixöjetrij”) hna silitrengathoi Akötresie e Edrena. Öni angeic ka hape, Iehova a cipane koi Adramu me Eva la ketre ewekë ka loi, matre tha tro kö nyidroti a mele madrin. (Gen. 3:1-5) Ame fe enehila, Satana a silitrengathoi Iehova ka hape, Nyidrëti a cipane kowe la itre atr la itre ewekë ka loi thatraqane la mele i angatr. Tha madrine kö Iesu pine laka, kola aqane adrone la ëje ne la Keme i nyidrë. Celë hi matre, hnei Iesu hna inine la itretre drei nyidrë troa thithi ka hape: “Kakati fe e koho hnengödrai, epi hmitrötr la ëje i nyipë.”​—Mat. 6:9.

6. Pine nemene matre hnei Iehova hna pane nue ijin qëmekene troa nyinyine la jol göne la musi cile i Nyidrë?

⁶ Kola icilekeu memine la musi cile i Nyidrë. Iehova hmekuje hi la ka ijij troa musi e hnengödrai me e celë fen, nge ka draië catre kö la musi Nyidrë. (Hna ama. 4:11) Ngo hnei Diabolo hna iaöne la itre angela me itre atr ka hape, tha meköti kö tro Nyidrëti a mus. Nge tha ijije kö troa canga jelethoine la itre trengathoi cili. Eloine pe, ka inamacane Iehova, matre hnei Nyidrëti hna pane nue ijin, matre tro la itre atr a öhne laka, tha qa i atr kö troa sipu amekötine la itre jë i angeic. Nyipiewekë tro angatr a drengethenge Akötresie, matre tha tro kö a hetre ethane koi angatr. (Iere. 10:23) Eje hi, calemi hë la ijine troa nyinyine la jol göne la musi cile i Iehova Akötresie. E cili, tro ha wië la ëje i Nyidrë. Nge tro fe ha anyipicine laka, Baselaia i Akötresie hmekuje hi la ka troa hamë mele ka loi me tingeting kowe la fen.

7. Drei la ka icilekeu me Iehova, nge nemene la pune kowe la itre ka tha idrei?

⁷ Kola icilekeu hnene la itre xaa nekö i Akötresie. Hnei Iehova hna xupe la itre angela me itre atr ka pexej. Ngo hnene la ketre angela hna icilekeu me Akötresie, matre hna hë angeic ka hape, Satana (maine “Atre Icilekeu”). Hnei angeic hna ajojezi Adramu me Eva, lue atr ka pexej, matre hnei nyidroti hna tha idrei. Ketre tune fe la itre xaa angela me itre atr. (Iudra 6) Ketre, hnene la angetre Isaraela, nöj hna iën hnei Akötresie, hna nuetriji Nyidrë matre nyihluene la itre xaa haze. (Is. 63:8, 10) E cili, akötr me hleuhleu la hni Iehova, ngo hnei Nyidrëti hna xomihni. Iehova a treqene la ijine tro Nyidrëti a apatrene la itre atr ka tha idrei me ka icilekeu. Drei la ketre madrin ka tru kowe la itre hlue i Iehova, ka catre xomihni ngöne la fene celë ka ngazo!

8-9. Nemene la itre trengathoi hna sile göi Iehova, nge nemene la nyine tro sa kuca matre troa jelethoine itre ej?

⁸ Kola silitrengathoi Nyidrë me itre hlue i Nyidrë. Öni Satana ka hape, Iobu me itre xaa hlue i Iehova a nyihlue i Nyidrë göi thupen. (Iobu 1:8-11; 2:3-5) Nge angeic palahi a silitrengathoi së enehila. (Hna ama. 12:10) Ngo maine tro sa xomihnine la itre jol me mele nyipici me hnimi Iehova, tro hë sa jelethoi Satana. E cili, tui Iobu ekö, tro hë Iehova a amanathithine la aqane xomihnine së la itre jol.​—Iako. 5:11.

⁹ Ketre, jëne la itre ini ka thoi, Satana a thele matre tro sa upezö Akötresie la itre akötre së. Ame la kola meci la ketre nekönatr, itre xan a qaja ka hape, hnei Akötresie hna xomi nyën matre troa ketre angela i Nyidrë. Drei la ketre trengathoi ka tru! Atre hnyawa hi së laka, ketre Keme ka tru  ihnimine Iehova. Tha easë kö a upezö Akötresie ngöne la kola tithi së hnei mec, maine meci pena la ketre sinee së. Xecie koi së laka, tro Nyidrëti elanyi a aloine la itre sine mec me amelene hmaca la itre ka mec. Easë fe a cainöje kowe la itre atr ka hape, Akötresieti ka ihnimi Iehova. Celë hi lai ka aijijë Iehova troa sa mekötine koi Satana, atre upezö Nyidrë.​—Ite edomë 27:11.

10. Nemene la hna qaja göi Iehova ngöne Salamo 22:23, 24?

¹⁰ Kola akötr la itre hlue i Nyidrëti hna hnim. Iehova la Akötresieti ka tru ihnimin me utipin. Nyidrëti a treij me hleuhleu ngöne la kola qanangazo së, me ngöne la kola tithi së hnei mec. Ketre, Nyidrëti a akötr ke, itre atr ka ngazo së. (E jë la Salamo 22:23, 24.) Nyipici, trotrohni së hi hnei Iehova, nge Nyidrëti a ajane troa akeukawane la hni së ka akötr. Calemi hë la ijine tro Nyidrëti a apatrene la itre akötr cili. (Wange ju fe la Esodo 3:7, 8; Isaia 63:9.) Xecie koi së laka, easenyi hë la ijine tro Iehova a “köletrije la itre trenge timidra qa ngöne la itre lue meke [së] nge pë hmaca kö mec, me hleuhleu, me treij, me akötr.”​—Hna ama. 21:4.

11. Nemene la mekuna i Iehova göne la itre hlue i Nyidrëti ka mec?

¹¹ Hna meci la itre xaa sinee i Nyidrëti hna hnim. Nemene la mekuna i Iehova göne la itre hlue i Nyidrëti ka mec? Nyidrëti a lapa treqene la ijine tro Nyidrëti a amele angatre hmaca! (Iobu 14:15) Nyidrëti a ajane troa amele Aberahama, sinee i Nyidrë. (Iako. 2:23) Ketre tui Mose, hnei Iehova “hna itö ineqë” me angeic me ithanata meköti koi angeic. (Eso. 33:11) Iehova fe a lapa treqene la ijine tro Nyidrëti a drenge hmaca la itre nyima i Dravita me itretre cinyihane la salamo! (Sal. 104:33) Ngacama meci hë angatr ekö, ngo tha hnei Iehova kö  hna thëthëhmine la itre sinee i Nyidrë. (Is. 49:15) Eje hi, mekun palahi Iehova la itre thiina ka lolo i angatr. Ame koi Nyidrë, “itre ka mel asë hi angatr.” (Luka 20:38) Calemi hë la ijine tro Iehova a amele angatre hmaca. Tro hë Nyidrëti a dreng la itre thithi angatr me madrine troa kapa la aqane atrunyi Nyidrëti hnei angatr. Haawe, maine hna meci la ketre sinee së, tro la itre mekun celë a xatua së me akeukawane la hni së.

12. Nemene la ka akötrëne la hni Iehova enehila?

¹² Kola qanangazone la itre atr hnene la itre atr ka ngazo. Qaane lo kola icilekeu e Edrena, atre hi Iehova laka, troa pane ngazo catre la fen, qëmekene troa tingeting. Methi Nyidrëti la iakötrë, me huliwa ka tha meköti kö, me isi. Nyidrëti palahi a mekun la itre ka akötr, tune la itre sine föe me neköeng. (Zaka. 7:9, 10) Ketre, Iehova a akötr ngöne la Nyidrëti a öhne la kola qanangazon me akalabusine la itre hlue i Nyidrë. Xecie koi së laka, Iehova a hnimi së, itre ka xomihni ahoean tui Nyidrë.

13. Nemene la itre huliwa hna sisine hnei Iehova, nge nemene la hnei Nyidrëti hna troa kuca?

¹³ Kola kuca la itre huliwa ka sis. Hnei Iehova hna xup la itre atr hnaiji Nyidrë. Ngo Satana a ajane tro sa kuca la itre huliwa ka sis. Ame ngöne lo hneijine i Noa, hnei Iehova hna öhne laka, “atraqate la ngazo i ate e celë fen.” E cili, hnei Nyidrëti “hna ijigöi fë la hnei nyidëti hna xupe la ate e celë fen, nge kola teije la hni nyidë.” (Gen. 6:5, 6, 11) Tune kaa enehila? Tha saze kö la itre atr! Eje hi, madrine catre Diabolo ngöne la kola kuca la itre huliwa ka sis hnene la itre trefën, me ngöne la kola ce lapa la lue föe maine lue trahmany! (Efe. 4:18, 19) Nge drei jë kö la madrine i Satana ngöne la angeic a upe la ketre hlue i Iehova troa kuca la ngazo. Ngo maine thatreine hë Iehova xomihnine elanyi la itre huliwa ka sis cili, tro hë Nyidrëti a amamane la aqane methinëne Nyidrë itre ej.

14. Nemene la hna kuca hnene la itre atr kowe la itre hna xup hnei Akötresie?

¹⁴ Kola angazone la ihnadro. Eje hi, “kete ate a musinëne la kete mate angazo nyëne kö,” me angazone fe la ihnadro. Ketre, nyimutre la itre atr ka akötrëne la itre öni, lo hnei Iehova hna upi së troa thupën. (Ate cai. 8:9; Gen. 1:28) Önine la itre ka inamacan ka hape, alanyimu la itre öni me itre feja ka troa paatre palua elany. Easa trotrohnine la kepin matre kola hnehengazo hnene la itre atr! Eloine pe, hnei Iehova hna thingehnaean laka, tro Nyidrëti a “të kowe la itre ka qanangazone la ihnadro” me aparadraison ej.​—Hna ama. 11:18; Is. 35:1.

15-16. Nemene la ka ithuecatre koi së troa xomihni aqean tui Iehova? Qaja jë la ketre ceitun.

¹⁵ Pane mekune jë la itre macatre ne xomihnine Iehova la ngazo hna kuca qaane ekö. (Wange ju fe la hna eköhagen hna hape, “ Itre Hnei Iehova Hna Xomihnin.”) Maine ju, ijije hi tro Iehova a apatrene la fene celë ka ngazo ngöne la ijine hnei Nyidrëti hna mekun. Ame pe, Iehova a xomihni aqean ke, tru la ihnimi Nyidrëti koi së! Hanawang la ketre ceitun. Pane mekune jë la lue trefën, nge kola upune la föe. Kola qaja hnene la droketre, ka hape, kola wezipo la nekönatr e kuhu hni nge tro nyën elanyi a akötr me mec. Ngacama atre hi nyidroti la nöjei jole cili, ngo tru la madrine i nyidro ngöne la kola hnaho nyën. Hnene la ihnimi ne la lue trefën kowe la nekö i nyidro, matre atreine hi nyidroti xomihnine la itre jol me xatua nyën troa hetre mele ka loi.

 ¹⁶ Ketre tune la itre matra i Adramu me Eva. Tha pexeje kö angatr ngöne la kola hnaho angatr. Ame pe, Iehova a hnimi angatr me thupëne la mele i angatr. (1 Ioane 4:19) Ketre, tha ceitu i Nyidrëti kö memine lo lue trefën ke, ijiji Nyidrëti hi troa apatrene la itre akötr ne la itre nekö i Nyidrë. Eje hi, hnei Iehova hna sa ijin matre troa apatrene palua la itre akötre së. (Mat. 24:36) Hapeu, tha kolo kö a ithuecatre koi së hnene la ihnimi Iehova troa xomihni aqean?

17. Thenge la Heberu 12:2, 3, nemene la ka troa ithuecatre koi së troa xomihni aqean?

¹⁷ Iehova la tulu ka sisitria göne la aqane troa xomihni aqean. Nge hnei Iesu hna nyitipune la Keme i nyidrë. Ame lo Iesu e celë fen, hna qanangazo nyidrë me thaipiën me ahmahmanyi nyidrë. Ketre, hna athipi nyidrëti hune la sinöe ne iaxösisi me humuthi nyidrë. (E jë la Heberu 12:2, 3.) Ngo hnene la aqane xomihni aqeanyi Iehova, hna ithuecatre koi Iesu troa xomihnine la itre jole cili. Nge ijije fe hi troa hane ithuecatre koi së.

18. Thenge la 2 Peteru 3:9, nemene la hna aijijëne hnene la aqane xomihni aqeane i Iehova?

¹⁸ E jë la 2 Peteru 3:9. Atre hnyawa hi Iehova la ijine ka loi tro Nyidrëti a apatrene la fene celë ka ngazo. Hnei Nyidrëti hna xomihni aqean matre aijijëne la itre milio lao atr troa hane atrun me nyihlue i Nyidrë. Celë hi matre, tru la hni ne ole i angatr koi Iehova. Hnei Nyidrëti hna aijijë angatr troa hane mel, me atrepengöi Nyidrë, me nue la mele i angatr koi Nyidrë. Eje hi, tro kö a traqa la ijine tro Iehova a amanathithi së ke, hne së hna catre mele nyipici uti hë la pun. E cili, tro ha mama koi së la itre eloin la aqane xomihni aqeane i Iehova!

19. Nemene la nyine tro sa isa kuca, nge nemene la thangane koi së?

¹⁹ Jëne la tulu i Iehova, easa atreine xomihnine la itre jol cememine la madrin. Ngacama nyimutre la itre jol me akötr qaathei Satana, ngo Iehova la “Akötresie ka madrin.” (1 Tim. 1:11) Ijije hi tro sa madrin me xomihni uti hë la tro Iehova a ahmitrötrëne la ëje i Nyidrë, me anyipicine la musi cile i Nyidrë, me apatrene la itre atr ka ngazo me nöjei akötr qa la fen. Haawe, loi e tro sa catre xomihni aqean. Tha tro kö sa thëthëhmine laka, kolo fe a xomihni aqean hnene la Keme së e hnengödrai. E cili, tro ha eatr la hna qaja e celë ka hape: “Manathith la atr ka catre xomihni nyipine la itupath, ke thupene lai, tro ha kepe angeic, me hamë angeic la korona ne mel, lo hnei Iehova hna thingehnaean thatraqane la itre ka catre hnimi Nyidrë.”​—Iako. 1:12.