TANE MEKUN 29
Ce Huliwa Jë Së Fene La Musi Iesu
“Ase hë Akötresieti nue koi ni troa musi hune la nöjei ewekë e hnengödrai me e celë fen.”—MAT. 28:18.
NYIMA 13 Keriso, La Tulu Së
MEKUN KA TRU *
1. Nemene la aja i Iehova enehila?
AME la aja i Iehova enehila, ke tro sa cainöjëne la maca ka loi ne la Baselaia ngöne la nöjei nöj asë. (Mar. 13:10; 1 Tim. 2:3, 4) Ketre huliwa lai ka sisitria catr koi Nyidrë, matre hnei Nyidrë hna ahnith la huliwa cili kowe la nekö hnimina i Nyidrë. Pine laka, Iesu la ka elemekene la huliwa cili, xecie koi së laka, tro kö a eatr la aja i Iehova, qëmekene troa traqa la pun.—Mat. 24:14.
2. Nemene la hne së hna troa ce wang ngöne la tane mekune celë?
2 Ame ngöne la tane mekune celë, tro sa ce wang la aqane huliwane Iesu la “hlue ka nyipici me ka inamacan” matre hamëne la xen kowe la itretre drei nyidrë, me hnëkë angatr kowe la huliwa ne cainöj. (Mat. 24:45) Tro fe sa ce wang la aqane tro së isa ala cas a xatua Iesu, memine la hlu.
IESU A XOMIUJINE LA HULIWA NE CAINÖJ
3. Nemene la hnëqa hna ahnith koi Iesu?
3 Iesu la ka xomiujine la huliwa ne cainöj. Easa atre tune kaa? Qëmekene tro Iesu a elë hnengödrai eë, hnei nyidrë hna qaja kowe la itretre dreng hune la Wetre Galilaia ka hape: “Ase hë Akötresieti nue koi ni troa musi hune la nöjei ewekë e hnengödrai me e celë fen.” Nge öni nyidrë hmaca jë hi: “Qa ngöne lai, tro jë nyipunie, nge inine jë la nöjei atr qa ngöne la nöjei nöj troa xötrethenge ni.” (Mat. 28:18, 19) Haawe, Iesu hi la hna ahnith kow la hnëqa ne xomiujine la huliwa ne cainöj.
4. Pine nemene matre xecie koi së laka, Iesu palahi a xomiujine la huliwa ne cainöj?
4 Hnei Iesu hna qaja ka hape, troa ketr “la nöjei nöj” hnene la huliwa ne cainöj, nge tro kö nyidrë a ce memine la itretre dreng “uti hë la troa nyipune la fene celë.” (Mat. 28:20) Kolo lai a hape, Iesu palahi enehila a xomiujine la huliwa ne cainöj.
5. Easa eatrëne tune kaa la hna perofetane ngöne Salamo 110:3?
5 Xecie koi Iesu laka, tro kö a alanyim la itre ka cainöj ngöne la itre drai ne la pun. Ketre, atre hi nyidrë laka, tro kö a eatr la hna perofetane celë, hna hape: “Tro la nöje i cilie a hujë angate xane kö ngöne la drai ne mene i nyipë.” (Sal. 110:3) Matre ame la epuni a cainöjëne la maca ka loi, epuni hi lai a xatua Iesu memine la hlue ka nyipici me ka inamacan. Ketre, epuni fe hi lai a eatrëne la hna perofetane celë. Haawe, kolo kö a tro loi la huliwa ne cainöj, ngo hetre itre jol hne së hna troa cile kow.
6. Nemene la ketre jol hne së hna ixelë memin?
6 Ame la ketre jol hne së hna ixelë memin ke, ene la icilekeu. Itre ka iamenumenu me itre hene ne hmi, me itre mus a sili trengathoi së, matre itre fami së, me itre sinee së, me itre sine huliwa së a sewe së troa nyihlue i Iehova me catre cainöj. Ame ngöne la itre xaa nöj, itre ithupëjia a axouene me qanangazone la itre trejin me easë, me othi angatr me akalabusi angatr. Ngo tha sesëkötre kö easë, ke öni Iesu lo: “Tro la nöjei nöj a methinë nyipunie pine la ëjeng.” (Mat. 24:9) Matre ame la kola akötrë së, ke kolo hi lai a hape, Iehova a kepe së. (Mat. 5:11, 12) Diabolo la qaane la icilekeu cili, ngo ka pë pengöne lai koi Iesu! Ce nyidrëti palahi me easë matre kolo palahi a catre cainöjëne la maca ka loi ngöne la nöjei nöj.
7. Pine nemene matre xecie koi së laka, kola eatr la hna qaja ngöne Hna Amaman 14:6, 7?
7 Hetrenyi fe la ketre jol hne së hna ixelë memin, ene la itre qene hlapa. Ame ngöne la ketre hna meköle goeën, öni Iesu koi Ioane aposetolo laka, tro la itre ka cainöjëne la maca ka loi a elë hune la jole cili. (E jë la Hna Amaman 14:6, 7.) Troa tune kaa? Tro angatr a aijijëne la ka alanyim troa hane atre la maca ne la Baselaia. Ame enehila, hna ujëne la site jw.org ngöne la 1 000 lao qene hlapa me sin. Matre ngacama isa nöje i angatre kö, ngo ijije hi tro la itre atr a inine la Tusi Hmitrötr me itre xaa itusi së ngöne la sipu qene hlapa i angatr! Ketre, hna mekun troa ujën koi 700 lao qene hlapa la itus Gojenyi Kowe La Nyipi Mel!—matre ini Tus memine la itre atr. Hetrenyi fe hnine la site së la itre video kowe la itre ka simi hnangenyë me itre itus kowe la itre ka timek. Mama hnyawa hi laka, kola eatr lo itre hna perofetan! Itre atr “qa ngöne la ite qene hlapa asë” a inine la “aqane ewekë ka wië,” ene la itre ini qa hnine la Tusi Hmitrötr. (Zak. 8:23; Zef. 3:9) Eje hi, kola tro loi la itre huliwa cili, ke easa ce huliwa fene la musi Iesu.
8. Nemene la itre thangane ka lolo hne së hna kapa qa ngöne la huliwa ne cainöj?
8 Ase hë sasaith la 8 000 000 lao atr ka sine la nöje i Iehova, nge ka traqa qa ngöne la 240 lao nöj. Nge e nöjei macatre, alanyimu catr la ka xomi bapataiso! Ngo ame kö la ka nyipiewekë catr ke, itre ka nyipi xomi bapataiso a huliwan la itre thiina i Iehova hna qaja hnei Tusi Hmitrötr ka hape, “itre thiina ka hnyipixe.” (Kol. 3:8-10) Hnei angatr hna nuetriji la itre huliwa ka sis, me isi, me ixele ma iwai, me isigöli nöj. Ketre, kola eatr la hna perofetan ngöne la tusi Isaia 2:4 hna hape, “tha tro hmaca kö angat’ a ini ishi.” Hnene la hne së hna isin troa hetrëne la thiina ka hnyipixe, matre kola ea la itre atr kowe la organizasio i Iehova. Öhne hi angatr ka hape, easë a xötrethenge Keriso. (Ioane 13:35; 1 Pet. 2:12) Easa kapa la itre thangane ka lolo cili, ke easa ce huliwa fene la musi Iesu.
IESU A ACIL LA HLU
9. Thenge la tusi Mataio 24:45-47, nemene la hnei Iesu hna troa kuca ngöne la itre drai ne la pun?
9 E jë la Mataio 24:45-47. Hnei Iesu hna qaja ka hape, ame ngöne la itre drai ne la pun, tro nyidrëti a acil la “hlue ka nyipici me ka inamacan” matre hamëne la xen qaathei Akötresie kowe la itretre drei nyidrë. Eje hi, kola huliwa catr la hlue enehila, matre eatrëne la hnëqa i angatr. Iesu a nyijëne la ketre neköi gurup hna iën hnei uati hmitrötr matre thawa la “xeni ngöne la nyipi ijin” kowe la nöje i Akötresie, me kowe la itre atr ka ajan troa atre Nyidrë. Ame pe, tha angatre kö a musinëne la lapaune i itre xan. (2 Kor. 1:24) Ngo, atre hi angatre laka, Iesu la “mekene me ate musi” kowe la itretre drei nyidrë.—Is. 55:4.
10. Nemene la itus ka mama ngöne la iatr ka xatua epun troa nyihlue i Iehova?
10 Qaane lo 1919, hnene la hlue ka nyipici me ka inamacan hna hnëkëne la itre itus matre xatuane la itre atr troa atre la nyipici qa hnine la Tusi Hmitrötr. Ame lo 1921 (1923 ngöne la qene Wiwi), hna mama la itus La Harpe de Dieu matre xatuane la itre atr troa atre la itre ini ka tru qa hnine la Tusi Hmitrötr. Ame e thupen, tru catr la itre itus hna kuca hnene la hlu. Nemene la itus ka xatua epun troa easenyi koi Iehova me hnimi Nyidrë? Maine jë kolo itus “Que Dieu soit reconnu pour vrai !,” maine La vérité qui conduit à la vie éternelle, maine Vous pouvez vivre éternellement sur une terre qui deviendra un paradis, maine Atrehmekune Ka Eatrongë Nyipunie Kowe La Mele Ka Pë Pun, maine Nemene La Nyipi Ini Hna Hamën Hnei Tusi Hmitrötr?, maine Nemene La Hna Ini Së Hnei Tusi Hmitrötr?, maine pena, Gojenyi Kowe La Nyipi Mel! lo itus ka hnyipi mama. Hna hnëkëne la itre itusi cili matre xatuane la itre atr ngöne la nyipi ijin.
11. Pine nemene matre nyipiewekë tro së asë a atre Iehova hnyawa memine la Tusi Hmitrötr?
11 Nyipiewekë troa atre Iehova hnyawa memine la Tusi Hmitrötr hnene la itre ka xötrei atre Nyidrë. Ngo tha angatr hmekuje kö. Öni Paulo aposetolo: “Ame la nyipi xen, tre thatraqane la itre ka macaj, itre ka majemine huliwane la atreine i angatr.” Kolo itre atre lai ka majemine trongëne la itre hnei angatr hna inin. Tro angatr a atreine wangatrehmekun la loi me ngazo. (Heb. 5:14) Ame enehila, ngazo catr la thiina ne la itre atr, matre jole koi së troa trongëne la itre trepene meköti Iehova. Ngo Iesu a isine matre tro palahi sa kapa la itre ini ka tru ka troa acatrene la lapaune së. Itre ini lai hna nyitrepene hnene la Trengewekë i Akötresie, ene la Tusi Hmitrötr. Hnei Iesu hna acil la hlue ka nyipici matre hnëkën me thawa la itre ini cili koi së.
12. Tui Iesu, easa metrötrëne tune kaa la ëje i Akötresie?
12 Tui Iesu, easa metrötrëne la ëje i Akötresie. (Ioane 17:6, 26) Ame lo 1931, hnei easë hna xom la ëj Itretre Anyipici Iehova qa hnine la Tusi Hmitrötr. Hnei easë e cili hna amamane ka hape, easa wangatrune la ëje ne la Keme së, Iehova. (Is. 43:10-12) Qaane lo treu Okotropa ne la macatre cili, kola mama la ëje i Akötresie ngöne la icetrön ne la Ita Ne Thup. Ketre, hnene la Tusi Hmitrötr Fene Ka Hnyipixe hna amë hmaca la ëje i Nyidrë ngöne la sipu göhnene ej. Celë hi ka aisapengönë së memine la itre hmi ka thoi, ka xometrij la ëje i Iehova qa ngöne la itre Tusi Hmitrötre i angatr!
IESU A XOMIUJIN LA ITRETRE DREI NYIDRË
13. Pine nemene matre xecie koi së laka, Iesu a huliwan la “hlue ka nyipici me ka inamacan” enehila? (Ioane 6:68)
13 Jëne la “hlue ka nyipici me ka inamacan,” hnei Iesu hna acil la ketre organizasio e celë fen ka troa cilëgöline la hmi ka wië. Nemene fe la mekuna i epun göne la organizasio cili? Ma casi fe la mekuna i epun memine la hnei Peteru aposetolo hna qaja koi Iesu. Öni angeic: “Thei nyipëti la itre trengewekë ne mele ka pë pun, matre tro pe kö huni a tro ië.” (Ioane 6:68) Maine patre ju la organizasio i Iehova, ekaa easë enehila? Eje hi, Iesu a isine matre tro palahi sa kapa la xen qaathei Iehova. Nyidrëti fe a ini së matre tro sa atreine tro fë hnyawane la maca ka loi. Ketre, nyidrëti a xatua së troa hetrëne “la thiina ka hnyipixe,” nge ka amadrinë Iehova.—Efe. 4:24.
14. Nemene la itre hna amekötin hne së hna kapa qaathene la organizasio i Iehova ngöne la ijine COVID-19?
14 Nyipici, Iesu fe a xatua së ngöne la kola traqa la itre jol ka tru. Kola mama lai ngöne lo kola traqa la mec COVID-19. Ame la itre xan, angatr a nyinyape hmohmo, ngo ame kö së, hnei Iesu hna hamëne la itre hna amekötine matre thupëne la mele së. Eje hi, hna amekötine koi së troa ami mask ngöne la itre götran gaa tru atr, me cile iananyi. Ketre, hna amekötin kowe la itre qatre thup troa hëne la itre atrene la ekalesia, me wang ka hape, hetre hnei angatre kö hna ajan. (Is. 32:1, 2) Ketre, hetrenyi fe la itre hna amekötin hna hamëne hnene la Lapa Ne Xomi Meköt jëne la itre maca ka hnyipixe.
15. Nemene la itre hna amekötin ka hnyipixe hne së hna kapa göne la aqane troa icasikeu me cainöj ngöne la ijine COVID? Nge nemene la itre manathith hne së kapa?
15 Ame ngöne la ijine COVID, hne së fe hna kapa la itre hna amekötin ka hnyipixe göne la aqane troa icasikeu me cainöj. Tha qea ju kö, nge easë fe hë a hane sine la itre icasikeu, me itre asabele jëne visioconférence. Ketre, ame fe enehila, easë hi a cainöje jëne telefon me cinyanyi tus. Nge hnei Iehova hna amanathithi së. Alanyim la itre filial ka öhne laka, tiqa catr hnei itre ka xome la huliwa ne cainöj. Nge alanyim thei easë ka öhne la iwanakoime i Iehova ngöne la huliwa cili.—Wange ju la hna eköhagene hna hape, “ Iehova a Amanathithine La Huliwa Ne Cainöj.”
16. Nemene la ka xecie koi së?
16 Maine jë, itre xan a mekun ka hape, catre palaha la itre hna amekötine hna hamën hnene la organizasio i Iehova ngöne la ijine COVID. Ngo hnei easë palahi hna öhn e thupëne laka, ka inamacan la itre mekune hna axeciëne hnene la hlu. (Mat. 11:19) Ame la easa öhne la aqane eatrongë së hnei Iesu, kola acatrene la mejiune së laka, tro palahi nyidrë me Iehova a ce me easë ngöne la itre xaa jol ka troa traqa elany.—E jë la Heberu 13:5, 6.
17. Pine nemene matre madrine catre së troa ce huliwa fene la musi Iesu?
17 Manathithi ka tru la troa ce huliwa fene la musi Iesu. Easa sine la ketre organizasio ka acasine la itre atr ka isa qene hlapan, ka isa nöje kö, nge ka isa qenenöje kö. Eje hi, easa kapa la itre ini qaathei Iehova, nge ka hnëkë së hnyawa kowe la huliwa ne cainöj. Ketre, easa isine troa hetrëne la thiina ka hnyipixe, me ihnimikeu. Celë hi matre madrine catre së troa ce huliwa fene la musi Iesu!
NYIMA 16 Atrunyi Iehova Jë Me Siana i Nyidrë
^ Ame enehila, itre milio lao trahmany, me föe, me nekönatr ka catre cainöjëne la maca ka loi. Ame epuni ke? Maine celë fe hi hnei epuni hna kuca, epuni lai a ce huliwa fene la musi Iesu Keriso. Ame ngöne la tane mekune celë, tro sa ce wang laka, Iesu la ka elemekene la huliwa ne cainöj. Nge celë hi ka troa acatrene la aja së troa catr nyihlue i Iehova fene la musi Iesu.
