TANE MEKUN 28
Cile Hë La Baselaia!
“Ame la baselaia ne la fen, tre Baselaia ha ne la Joxu së me Keriso i nyidrë.”—HNA AMA. 11:15.
NYIMA 22 Cile Hë La Baselaia—Epi Traqa Pi!
MEKUN KA TRU *
1. Nemene la ka xecie koi së, nge pine nemen?
AME la epuni a goeëne la pengöne la fen enehila, maine jë, jole koi epun troa mekun laka, troa hetre mel ka loi elany. Akötre catr la itre fami enehila. Nge ame la itre atr, angatr a pi isi, me mele cas, me pi ihumuth. Tha mejiune hë la itre atr kowe la itre mus. Ngo itre ewekë lai ka thue mejiune së. Pine nemen? Pine laka, itre aqane ujë lai ka eatrëne la ketre hna perofetan göne la “itre drai ne la pun.” (2 Tim. 3:1-5) Ame la kola eatr la itre hna perofetane cili, ke hatrene hi lai kowe la itre atr ka lapaun laka, Joxu hë Iesu ngöne la Baselaia i Akötresie. Ngo hetre itre xaa hna perofetan göne la Baselaia. Nyipiewekë tro sa ce wang la itre xaa hna perofetan ka eatr enehila matre acatrene la lapaune së.
Ceitune hi la itre hna perofetan ngöne la tusi Hna Amaman me Daniela memine la ketre puzzle. Itre ej a ce tro matre amamane hnyawa koi së la aqane troa eatr la aja i Akötresie, memine la nyine tro sa kuca (Wange ju la paragarafe 2)
2. Nemene la hne së hna troa ce wang ngöne la tane mekune celë, nge pine nemen? (Ithanatane jë la pane iatr.)
2 Ame ngöne la tane mekune celë, tro sa ce wang la (1) hna perofetane ka xatua së troa atre la ijine kola acile la Baselaia, (2) itre hna perofetan ka xatua së troa atre laka, Joxu hë Iesu ngöne la Baselaia i Akötresie, nge (3) itre hna perofetan ka amamane la pun kowe la itre ithupëjia ne la Baselaia. Tro sa öhne e cili ka hape, ka ce tro hi la itre hna perofetan, tune la ketre puzzle ka amamane laka, easenyi hë la drai i Iehova.
AQANE TROA ATRE LAKA, CILE HË LA BASELAIA
3. Nemene la hna perofetane ngöne Daniela 7:13, 14 göne la Joxu ne la Baselaia i Akötresie?
3 Kola amamane ngöne la hna perofetan hnei Daniela 7:13, 14 laka, Iesu Keriso hi la ka ijiji troa Joxu ne la Baselaia i Akötresie. Nge tro la itre nöj a madrin troa “nyi hlue i anganyidë,” nge pëkö ka troa nyihnai nyidrë. Kolo mina fe a qaja ngöne la ketre hna perofetan hnei Daniela laka, tro Iesu a kapa la Baselaia ngöne la pun la seven lao ijin. Ijije kö tro sa atre la ijine kola acili Iesu?
4. Qejepengöne jë la aqane amamane Daniela 4:10-17 la ijine troa acili Iesu ngöne la Baselaia i Akötresie. (Wange ju la ithuemacany.)
4 E jë la Daniela 4:10-17. Ame la ‘seven lao ijine’ ke, kola qaja la 2 520 lao macatre. Kola nyiqane la ijine cili lo macatre 607 M.P.K. ngöne lo angetre Babulona a apatrene la joxu hna acile hnei Iehova e Ierusalema. Nge kola nyipune lo macatre 1914 M.K. ngöne lo Iehova a acili Iesu, ene lo “ate [ka ijij] troa amekötin,” troa Joxu ne la Baselaia. *—Ezek. 21:25-27.
5. Kola xatua së tune kaa hnene la hna perofetane göne la ‘seven lao ijine’?
5 Kola xatua së tune kaa hnene la hna perofetane celë? Ame la easa atre la pengöne la ‘seven lao ijine’ ke, kola akeukawanyi së laka, tro kö Iehova a eatrëne la itre hnei Nyidrë hna thingehnaean ngöne la nyipi ijin. Hnei Iehova hna eatrëne la aja i Nyidrë göne la ijine troa acile la Baselaia. Haawe, tro kö Nyidrë a eatrëne la itre xaa hna perofetane ngöne la nyipi ijin. Eje hi, “tha tro kö a hmit” la drai i Iehova.—Hab. 2:3.
AQANE TROA ÖHNE LAKA, JOXU HË IESU NGÖNE LA BASELAIA I AKÖTRESIE
6. (a) Nemene la ka amamane laka, musi hë Keriso e hnengödrai? (b) Tune kaa la aqane anyipicine lai hnei Hna Amaman 6:2-8?
6 Ame lo itre drai tixenuë i Iesu e celë fen, hnei nyidrë hna qaja la itre ewekë ka troa traqa e celë fen. Itre ewekë lai ka troa xatuan la itretre dreng troa atre laka, nyidrëti ha nyiqane mus e hnengödrai. Kola qaja la itre isi, me jin, me itre sa atraqatr. Hnei nyidrëti fe hna qaja laka, tro fe a hetre itre mec ka ixötrekeu “ngöne ketre götran me ketre götran.” Tune hi la COVID-19, itre ewekë lai hna qaja hnei Tusi Hmitrötr ka hape, “hatrene” laka, Iesu hë la. (Mat. 24:3, 7; Luka 21:7, 10, 11) Thupene la 60 lao macatre ne meci Iesu, me elë a tro hnengödrai, hnei nyidrë hna qaja koi Ioane laka, tro kö a eatr itre ewekë cili. (E jë la Hna Amaman 6:2-8.) Hna nyiqane traqa la itre ewekë cili ngöne lo Iesu a mus lo 1914.
7. Pine nemene matre kola ngazo catr la fen qaane lo kola acili Joxu Iesu?
7 Pine nemene matre kola ngazo catre la fen qaane lo kola acili Joxu Iesu? Hna Amaman 6:2 a hamëne la ketre ithuemacanyi ka nyipiewekë. Ame la pane hnëqa i Iesu la nyidrë a Joxu, ene la troa isi. Isi me drei? Kola isi me Diabolo me itre dremoni angeic. Ame ngöne Hna Amaman mekene 12, hna ngaa Satana me ukapië angeic me itre dremoni angeic kowe la ihnadro. Matre “ekölö hi ni la ihnadro” ke, atraqatr la trenge elëhni Satana, nge angeic a akötrëne la fen.—Hna ama. 12:7-12.
Tha madrine kö së kowe la itre ewekë ka traqa enehila. Ame pe, jëne la aqane eatr la itre hna perofetan, xecie koi së laka, cile hë la Baselaia i Akötresie (Wange ju la paragarafe 8)
8. Kola xatua së tune kaa ngöne la easa öhne la kola eatr la itre hna perofetan göne la Baselaia?
8 Kola xatua së tune kaa hnene la itre hna perofetane celë? Ame la kola saze la aqane ujë ne la itre atr memine la aqane trongene la fen, kolo hi lai a amamane koi së laka, Joxu hë Iesu. Haawe, tha tro kö sa wesitr la easa öhne la itre atr a pi tru me xele ma iwai ke, itre aqane ujë lai ka eatrëne la ketre hna perofetan. Eje hi, cile hë la Baselaia! (Sal. 37:1) The sesëkötre kö së laka, tro kö a elë catre la ngazo, ke easenyi hë la isi Amagedro. (Mar. 13:8; 2 Tim. 3:13) Haawe, olene jë së kowe la Keme së e hnengödrai la hna amamane koi së la kepine matre easa melëne la hneijine celë ka ngazo.
AQANE TROA APATRENE LA ITRE ITHUPËJIA ME AKÖTRESIE
9. Kola qejepengöne tune kaa hnei Daniela 2:28, 31-35 la mus tixenuë, nge eu la ej a mama?
9 E jë la Daniela 2:28, 31-35. Kola eatr enehila la hna perofetane celë. Hnei Nebukaneza hna puj la “ite ewekë [ka] troa xulu epin,” thupene la kola acili Joxu Iesu. Ame la ketre ithupëjia me Iesu e celë fen, ke kolo ketre mus hna qaja hnei Tusi Hmitrötr. Hna nyihatrene la musi cili hnei “lue iwaca fao me dro ka fede.” Ej a mama lo ijine Pane Isi Ka Tru ngöne la kola ce huliwa la musi Agele me Amerika. Kola mama ngöne la pu i Nebukaneza laka, lue ewekë ka aisapengönëne la musi cili memine la itre musi hnapan.
10. (a) Tune kaa la aqane qejepengöne Daniela la musi Agele me Amerika? (b) Nemene la nyine tro sa neën? (Wange ju la hna eköhagen “ Wange Pala Kö La Dro Ka Fedr!”)
10 Ame la pane ewekë ka mama ngöne lo pu, ke tha ka ceitu kö la musi Agele me Amerika memine la itre xaa mus. Eje hi, ceitu ej memine la fao hna ithuenyikön me dro ka fedr, matre tha ka catre kö ej tune la gool me sileva. Ame hi lai dro ka fedr ke, kolo “ite matra ne la ate.” (Dan. 2:43) Tune la hne së hna öhne enehila, pëkö ecatrene la musi Agele me Amerika pine laka, kola icilekeu la itre atrene la nöje tune la itre syndicats, me itre campagnes de défense des droits des citoyens me itre manifestations ka tru.
11. Nemene la ketre ewekë ka acatrene la mejiune së laka, easa melën la itre drai ne la pun?
11 Ame la hnaaluene ewekë, musi Agele me Amerika la mus tixenuë hna qaja hnei Tusi Hmitrötr, ke hna nyihatrene ej hnene la lue iwaca ne la hnasaatr. Pëkö xaa mus ka troa cil e thupen. Ame pe, troa canga apatrene la musi cili ngöne la isi Amagedro. Nge Baselaia i Akötresie la ka troa apatrene ej, memine ju kö la itre xaa mus. *—Hna ama. 16:13, 14, 16; 19:19, 20.
12. Nemene la itre xaa ithuemacany hna perofetan hnei Daniela ka akeukawanyi së?
12 Kola xatua së tune kaa hnene la itre hna perofetane celë? Hetre xaa ithuemacanyi ngöne la hna perofetan hnei Daniela göne la itre drai ne la pun. Hnei Daniela hna perofetane a 2 500 lao macatre enehila ka hape, thupei Babulona, 4 lao mus ka troa cil e thupen, nge ka hetre thangan kowe la nöje i Iehova. Ketre, ame la musi Agele me Amerika, ke celë hi musi tixenuë ka troa cil. Celë hi ka akeukawanyi së me thue mejiune koi së laka, easenyi catre hë tro la Baselaia i Akötresie a apatrene la nöjei musi ne fen, nge tro ej a mus kowe la ihnadro epine palua.—Dan. 2:44.
13. (a) Drei la “hnaaeitrene joxu”? Nge drei la “treene lao joxu,” hna qaja ngöne Hna Amaman 17:9-12? (b) Nge hna eatr tune kaa la hna perofetane celë?
13 E jë la Hna Amaman 17:9-12. Hnene la Pane Isi Ka Tru hna eatrëne la ketre hna perofetane göne la itre drai ne la pun. Itre mus a ajan troa acil la tingeting ngöne la fen. Matre ame lo Januare 1920, hna acil la Société des Nations, nge hna nyihnane pë hë lo Okotropa 1945 hnene la Nations unies. Hna hëne la organizasio cili ka hape, “hnaaeitrene joxu.” Ame pe, tha ketre musi kö lai, ke ej a catr hnene la ixatua ne la itre xaa mus. Tusi Hmitrötr a hëne la itre musi cili ka hape, “treene lao jian,” me “treene lao joxu.”
14-15. (a) Nemene la hna qaja hnei Hna Amaman 17:3-5 göi “Babulona Atraqatr”? (b) Nemene la ka traqa kowe la hmi ka thoi enehila?
14 E jë la Hna Amaman 17:3-5. Jëne la mene i Akötresie, hnei Ioane aposetolo hna meköle goeën la ketre föe ne gojeny, ene “Babulona Atraqatr.” Ej a nyihatrene la itre hmi ka thoi. Nemene la aliene la hna meköle goeëne hnei Ioane? Ame ekö, itre hmi a ce huliwa memine la itre musi ne fen me thithi sai angatr. Ngo, easenyi hë tro Iehova a amë e kuhu hni ne la itre ka cilëne la itre mus troa “sajuëne la mekuna i nyidrë.” Matre nemene hë la pun? Tro la itre mus, ene lo “treene lao joxu,” a lep apatrene la itre hmi ka thoi.—Hna ama. 17:1, 2, 16, 17.
15 Nemene la ka amamane koi së laka, easenyi hë troa apatrenyi Babulona Atraqatr? Loi e tro sa mekune hmaca la pengöne lo traon e Babulona ekö. Ame ekö, hna thupë ej hnene la hneopegejë, Euferata. Tusi Hna Amaman a aceitunëne la itre ka ce xöl me Babulona Atraqatr me “itre tim” ka thupëne ej. (Hna ama. 17:15) Ame pe, troa “pë tim” la hneopegejë cili. Kolo lai a hape, troa pë aliene la itre uma hmitrötr. (Hna ama. 16:12) Eatre hë la hna perofetane cili. Ame enehila, alanyimu la itre atr ka trotrij la hmi ka thoi, me thele la nyipi hmi.
16. Nemene la hna amamane hnene la hna acile la ONU memine la aqane tro ngazo ne la hmi ka thoi? Pine nemene matre tro sa madrin elany?
16 Kola xatua së tune kaa hnene la itre hna perofetane celë? Kola amamane hnene la hna acile la ONU memine la aqane tro ngazo ne la hmi ka thoi laka, easë hnyawa ha melëne la itre drai ne la pun. Ngacama pëhë timi Babulona, ngo tha celë kö lai ka troa apatrene ej. Tune lo hne së hna ce wang, tro Iehova a amë e kuhu hni ne la “treene lao joxu,” ene lo itre musi ka ce huliwa me ONU, troa eatrëne la mekuna i Nyidrë. Eje hi, troa sesëkötr elanyi la fene hnengödrai la kola apatrene la itre hmi ka thoi. * (Hna ama. 18:8-10) Nyipici, tro la fen a hokötre ngöne la ijine cili. Ngo tro kö a madrine la nöje i Akötresie, ke pëhë hmi ka thoi e celë fen, nge calemi hë la iamele koi së!—Luka 21:28.
CATRE JË UTIHË LA PUN!
17-18. (a) Tune kaa la aqane tro sa acatrene la lapaune së? (b) Nemene la hne së hna troa ce wang ngöne la tane mekun ka troa xulu?
17 Hnei Daniela hna perofetane laka, troa kökötre lolo la nyipi “inamacan.” Nge celë hi hne së hna öhne enehila! Matre jëne la nyipi inamacan, trotrohnine hë së la itre hna perofetane göne la hneijine së. (Dan. 12:4, 9, 10) Eje hi, easa atrunyi Iehova, me wangatrune la Trengewekë i Nyidrë ngöne la easa öhne la aqane eatr la itre hna perofetan. (Is. 46:10; 55:11) Haawe, acatrene jë së la lapaune së, jëne la hne së hna ini Tusi Hmitrötr o drai, me xatuane la itre atr troa hnimi Iehova. E cili, tro Iehova a thupëne la itre ka mejiune koi Nyidrë me hamë angatr la “nyipi tingetinge.”—Is. 26:3.
18 Ame ngöne la tane mekun ka troa xulu, tro sa ce wang la itre hna perofetan göne la ekalesia ngöne la ijine la pun. Celë hi lai ka anyipicine laka, easa melën la itre drai ne la pun. Ketre, tro mina fe sa ce wang la itre xaa hatren laka, Iesu a catre huliwa memine la itre hlue i nyidrë.
NYIMA 61 Temoë, Cile Jë!
^ Easa melën la ketre hneijin ka ketrepengön! Cile hë la Baselaia i Akötresie tune lo hna qaja ngöne la itre hna perofetan. Ame ngöne la tane mekune celë, tro sa ce wang la itre hna perofetan ka troa acatrene la lapaune së koi Iehova. Celë hi ka troa xatua së matre tha tro kö sa xou enehila me elany.
^ Wange ju la mekene 32 ini 4 ne la itus Gojenyi Kowe La Nyipi Mel!, nge goeëne ju la video Le royaume de Dieu a commencé à gouverner en 1914 ngöne jw.org.
^ Maine epuni a aja itre xaa ithuemacanyi göne la hna perofetane hnei Daniela, wange ju la Ita Ne Thup 15 Juun 2012 g. 5-8 me g. 19 (Qene Wiwi).
^ Maine epuni a aja itre xaa ithuemacanyi göne la itre ewekë ka troa traqa elany, wange ju la mekene 21 ne la itus Musi Hë La Baselaia i Akötresie!