1. Nemene la hnei Iehova hna kuca thupene la hnei Adramu me Eva hna eni wathebo? (Genese 3:15)

 THUPENE la hnei Adramu me Eva hna eni wathebo, hnei Iehova hna hamë mejiune kowe la itre matra i nyidro, jëne la ketre hna perofetan. Kolo hi lo ka ej ngöne Genese 3:15.—E jë.

2. Nemene la elolone ngöne la hna perofetane ngöne Genese 3:15?

² Kola mama la hna perofetane cili ngöne la pane itus ne la Tusi Hmitrötr. Ngo ame asë hi la itre xaa itus ne la Tusi Hmitrötr ke, ka ce tro memine la hna perofetane cili. Ceitune hi la hna qaja ngöne Genese 3:15 memine la ketre otretre ka iothekeune la itre sinöe. Ej a iothekeune la itre itus ne la Tusi Hmitrötr. Casi hi la maca ka mama ngöne itre ej, ene la troa upe la ketre atre iamele ka troa apatrenyi Diabolo me itre sinexöle i angeic. Drei la ketre manathithi ka tru kowe la itre ka hnimi Iehova!

3.Nemene la itre hnying hne së hna troa sa ngöne la tane mekune celë?

³ Ame ngöne la tane mekune celë, tro së a sa la köni hnying göne la hna perofetane ngöne Genese 3:15: Drei la itre atr hna qaja ngöne lai hna perofetan? Troa eatre tune kaa la hna perofetane cili? Nge nemene la thangane koi së?

4. Drei la “un,” nge hne së hna atre tune kaa?

⁴ Tusi Genese 3:14, 15 a qaja la ketre “un,” me “matra”  ne la un, me “föe,” me “matra” ne la föe. Tro la Tusi Hmitrötr a xatua së troa atrepengöi angatr. * Tro sa pane ce wang ka hape, drei la un. Eje hi, thatreine kö la un troa trotrohnine la hnei Iehova hna qaja ngöne lo hlapa e Edrena. Kolo hi lai a hape, Iehova a ithanata kowe la ketre hna xup ka inamacan. Nga drei jë angeice lai? Hna Amaman 12:9 a qaja laka, kolo “un ekö,” hna hëne ka hape, Satana Diabolo. Drei la matra ne la un?

5. Drei la matra ne la un?

⁵ Ame la Tusi Hmitrötr a qeje matran, ej a qaja la itre ka nyitipune la ketre atr ngöne la aqane mekun me aqane ujë, matre kösë itre neköi angeice hë angatr. Haawe, ame la matra ne la un, ke kola qaja la itre angela me itre atr ka icilekeu me Iehova me nöje i Nyidrë. Kolo hi lai a qaja la itre angela ka trotrij la göhnë i angatr e hnengödrai ngöne lo hneijine Noa, memine fe la itre atr ka icilekeu tui Satana.—Gen. 6:1, 2; Ioane 8:44; 1 Ioane 5:19; Iudra 6.

6. Hnauëne laka, tha Eva kö “la föe?”

⁶ Drei “la föe?” Tha Eva kö. Pine nemen? Pine laka, kola qaja ngöne lo hna perofetane ka hape, tro la matra ne la föe a “waja fica” la he ne la un. Atre hi së ka hape, ame lo un ke, ketre angela, ene Satana. Easë hi lai a trotrohnine ka hape, thatreine jë kö troa waja fica la he i Satana hnene la ketre matra i Eva. Haawe, nga troa apatrenyi Satana tune kaa?

7. Thenge la tusi Hna Amaman 12:1, 2, 5, 10, drei la föe ngöne Genese 3:15?

⁷ Hna amamane koi së ngöne la pune la Tusi Hmitrötr, la pengöne la föe ka eje ngöne lo Tusi Genese 3:15. (E jë la Hna Amaman 12:1, 2, 5, 10.) Tha ketre föe  menu kö la föe cili! Pine laka, ame la treu, ej fene la lue ca i eahlo, nge ej ngöne la he i eahlo la korona ka 12 lao wëtresij. Ketre, hetre medreng ka ketrepengön hnei eahlo hna hnahon, ene la Baselaia i Akötresie. Pine laka, ej e hnengödrai la Baselaia, haawe, föe fe e hnengödrai. Kolo hi a qaja la organizasio Iehova e hnengödrai, hna nyiatrene hnene la itre angela ka mele nyipici.—Gal. 4:26.

8. Drei la götrane ka tru ne la matra ne la föe, nge eu la nyidrë a nyiqane xome la hnëqa cili? (Genese 22:15-18)

⁸ Tusi Hmitrötr a xatua së troa atre la götrane ka tru ne la matra ne la föe. Eje hi, tro ej a fetra qaathei Aberahama. (E jë la Genese 22:15-18.) Nge ame Iesu ke, ketre matra i Aberahama. (Luka 3:23, 34) Ketre, loi e tro fe a trene men la matra ne la föe, ke angeice hi lai ka troa apatrenyi Satana. Ame lo kola 30 lao macatre Iesu, hna sië nyidrë hnei uati hmitrötr, matre ketre nekö i Akötresieti hë nyidrë. E cili hi la nyidrëti a ketre götrane ka tru ne la matra ne la föe. (Gal. 3:16) Thupene lo kola amele Iesu qa hna mec, hnei Akötresie hna “hamëne la lolo me iatruny nyine korona i [nyidrë.]” Ketre, hnei Akötresieti fe hna “nue koi Iesu troa musi hune la nöjei ewekë e hnengödrai me e celë fen,” nge tro nyidrë “a lepe apatrene la itre huliwa i Diabolo.”—Heb. 2:7; Mat. 28:18; 1 Ioane 3:8.

9-10. (a) Drei la hnaaluene götrane ne la matra ne la föe, nge eu la angatr a nyiqane xome la hnëqa cili? (b) Nemene la hne së hna troa ce wang?

⁹ Tro sa ce wang la hnaaluene götrane la matra ne la föe. Hnei Paulo aposetolo hna qaja la götrane la matrane cili lo angeic a qaja kowe la itre keresiano hna iën ka hape: “Maine tro pala hi nyipunieti a casi me Keriso, nyipunieti hnyawa hi la matra i Aberahama, itre ka troa kepe edrö pine lo isisinyikeu.” (Gal. 3:28, 29) Ame la Iehova a iëne la ketre keresiano hnei uati-hmitrötr, angeice hë lai a ketre matra ne la föe. Matre, ame la matra ne la föe ke, Iesu memine lo ala 144 000 lao hna iën. (Hna ama. 14:1) Angatre a isine tro palahi a ujë me ca mekun memine la Keme i angatr, Iehova Akötresie.

¹⁰ Ase hë së ce wang la ka itre atr hna qaja ngöne Genese 3:15. Tro pena sa wang la aqane eatrëne Iehova la hna perofetane cili, memine la aqane tro sa kepe thangane qa ngön.

11. Nemene la aqane eatr “la tidöca” ne la matra ne la föe?

¹¹ Ame ngöne Genese 3:15, tro la un a eatrëne la “tidöca” ne la matra ne la föe. Hna eatr la hna perofetane cili, ngöne lo Satana a ukune la angetre Iudra me Roma, troa humuthe la nekö i Akötresie. (Luka 23:13, 20-24) E traqa eatr la tidöca ne la ketre atr, tro angeice lai a thatreine tro koi hnepe ijine hi. Kolo hi lo ka traqa koi Iesu lo nyidrëti a mec. Eje hi, hnei nyidrë hna pane meköle koi köni drai hnine la hua. Matre pëkö hnei nyidrëti hna kuca ngöne la hnepe ijine cili.—Mat. 16:21.

12. Tune kaa, nge eu la troa waja fica la he ne la un?

¹² Thenge la hna perofetane ngöne Genese 3:15, tha tro kö Iesu a meköle palua hnine la hua. Pine nemen? Pine laka, thenge lo hna perofetan, matra ne la föe la ka troa waja fica la he ne la un. Matre, easë hi lai a trotrohnine laka, troa meu la tidöca i Iesu. Ame hë lo Iesu a mejë qa hna mec, ketre angela ha nyidrë, nge tha tro hmaca kö nyidrëti a mec. Nge ame ngöne  la ijine hna sa hnei Iehova, tro Iesu a apatrene palua Satana. (Heb. 2:14) Eje hi, tro la itre ka ce musi me nyidrë a xatua nyidrë troa apatrene la itre ithupëjia i Akötresie, ene lo matra ne la un.—Hna ama. 17:14; 20:4, 10. *

13. Nemene la itre manathith hne së hna kapa qa ngöne la hna eatrëne la hna perofetane ngöne Genese 3:15?

¹³ Maine ketre hlue i Iehova epun, tru la itre manathith hnei epuni hna troa kapa qa ngöne la hna perofetane ngöne Genese 3:15. Ame lo Iesu e celë fen, hnei nyidrë hna tu së itre atr. Nge hnei nyidrëti hna amamane la itre thiina ne la Keme i nyidrë. (Ioane 14:9) Jëne itre ej, hne së hna inine troa hnimi Iehova. Nge ame enehila, tru la itre manathith hne së hna kapa qa ngöne la itre ini me aqane iujine nyidrë la itre ekalesia. Nyidrë a ini së la aqane tro sa amadrinë Iehova, me kepe eloine qa ngöne la meci nyidrë, ene lo aqane eatr la tidöca i nyidrë. Eje hi, thupen lo kola amele nyidrëti hmaca, hnei nyidrë hna tro fë la madra i nyidrë koi Iehova. Nge hnei Iehova hna kapa la huuj ka pexeje i Iesu. Nge celë hi lai ka “ahmitrötrë së qa ngöne la nöjei ngazo së.”—1 Ioane 1:7.

14. Hna canga eatre kö lo hna perofetane e Edrena? Qejepengöne jë.

¹⁴ Ame lo hnei Iehova hna qaja e Edrena, ke kola amamane ka hape, troa hetre hnepe ijine troa eatr asë lo lai hna perofetan. Kolo hi matre troa nue ijine kowe la föe troa hetre matran, nge tro fe Satana a acasine la itre sinexöle i angeic. Nge e cili, troa ha icilekeu hnene lai lue matran. Hnauëne la tro sa atre hnyawa la hna perofetane cili? Ke eje hi lai ka qaja koi së ka hape, tro la fene i Satana a icilekeu memine la itre hlue Iehova. Celë hi lai hnei Iesu hna qaja e thupen kowe la itretre drei i nyidrë. (Mar. 13:13; Ioane 17:14) Haawe, hna eatre hnyawa la hna perofetane ngöne Genese 3:15 ngöne lo itre drai ne la pun. Tune kaa?

15. Hnauëne la fen a elëhni koi së, nge hnauëne laka tha tro kö sa xoue Satana?

¹⁵ Thupene lo kola acili Iesu troa joxu lo 1914, hna ukapië Satana a tro celë fen. Nge angeic a kanothe la fen me treqene troa apatrenyi angeic. (Hna ama. 12:9, 12) Ame pe, angeic a elëhni, me axösisine la itre hlue i Iehova. (Hna ama. 12:13, 17) Celë hi lai matre, kolo fe a elëhni koi së hnene la fene i angeic. Ngo tha xou Satana kö së me itre sinexöle i angeic. Nge casi hi la mekuna së me Paulo, lo öni angeic: “Maine ce Akötresie me easë, drei la sa i easë?” (Rom. 8:31) Tune lo hne së hna ce wang, eatre hë la itre xaa götran ne lo hna perofetane ngöne Genese 3:15. Matre tha luelue kö së laka, tro kö Iehova a xatua së.

16-18. Nemene la thangane koi Curtis, Ursula, me Jessica la hnei angatr hna trotrohnine la hna perofetane ngöne Genese 3:15?

¹⁶ Ijije hi tro la hna perofetane ngöne Genese 3:15 a xatua së ngöne la itre ijine jol. Öni Curtis, ketre trejin ka mesinare e Guam ka hape: “Hna traqa la jol koi ni, nge tha pexeje hë la hning koi Iehova. Matre hnenge e cili hna lapa mekune lo hna perofetane ngöne Genese 3:15. Nge celë hi lai ka xatua ni troa acatrene la mejiuneng koi Kakati Iehova.” Curtis a lapa treqene la ijine tro Iehova a apatrene paluane la itre jol.

 ¹⁷ Hnei Ursula, ketre trejine föe qa Bavière hna qaja mina fe ka hape, ame la ka xatua angeic troa mejiune kowe la Tusi Hmitrötr, ke hnene la hna perofetane ngöne Genese 3:15. Angeic a sesëkötre laka, ame asë hi la itre hna perofetane ke, ka ce tro hnyawa hi memine lo hna qaja ngöne la hna perofetane cili. Öni angeic: “Kola ketr la hning la eni a öhne laka, hnei Iehova hna canga nyinyine la jol ekö e Edrena. Nge göi tha hnei nyidrëti fe hna nue la itre atr troa pane mele menu.”

¹⁸ Öni Jessica, trejine föe qa Micronésie ka hape: “Eni hmaca mekune lo eni a xötrei atre la nyipici. Kola eatre hnyawa lo Genese 3:15! Celë hi lai ka xatua ni troa lapa mekune ka hape, ame la mele së enehila ke, tha nyipi mele kö. Nge xecie fe koi ni laka, nyipi mele hi la thei Iehova, nge easenyi hë tro ni a kapa la nyipi mel ngöne la fene ka hnyipixe!”

19. Pine nemene matre xecie koi së laka, tro kö a eatr la götrane tixenuë ne lo hna perofetan?

¹⁹ Tune la hne së hna ce wang, eatre hë la itre xaa götran ne lo hna perofetane ngöne Genese 3:15. Atre hë së la matra ne la föe me matra ne la un. Iesu la götrane ka tru ne la matra ne la föe. Ketre, meu hë lo tidöca i nyidrë. Nge joxu hë nyidrë, nge tha tro hmaca kö nyidrëti a mec. Ketre, easenyi hë matre pexeje jë la hnaaluene götrane ne la matra ne la föe, ene lo itre atr hna iën qaa la fen. Easë pe hi a lapa treqen matre eatre jë lo götrane tixenuë ne lo hna perofetan, ene la troa waja fica la he ne la un. E cili, troa apatrene palua Satana. Drei jë kö la madrine së ngöne la ijine cili, e tro sa mele nyipici koi Iehova! Haawe, catre jë së uti hë la pun. Ame la Akötresi së, ke tha ka thoi kö. Nge jëne la matra ne la föe, tro Iehova a amanathithine la “itre nöj e cailo fen.”—Gen. 22:18.