1. Pine nemene matre ketre manathith ka tru la troa thithi koi Iehova?

 KETRE manathithi ka tru la tro sa easenyine jëne la thith la Atre Xup la hnengödrai me fen. Ijije hi tro sa thithi koi Iehova ngöne la nöjei qene hlapa, me ngöne la nöjei ijin. Iehova a drei së ngacama easë e pital, maine hnine la kalabus. Matre, tru la ole së koi Iehova göne la ahnahna cili!

2. Nemene la aqane amamane Dravita joxu laka, ka tru koi angeic la troa thith koi Iehova?

² Ka tru koi Dravita joxu la troa thith koi Iehova. Öni angeic: “Loi e cile huti la thithinge xajawa i cilie tune la sinöe ka pui loi.” (Sal. 141:1, 2) Ame ngöne la hneijine i Dravita, hetre aqane hnëkën la sinöe ka pui loi hnene la itretre huuj. (Eso. 30:34, 35) Ame hi la Dravita a qaja la itre sinöe ka pui loi, ke göne hi troa amamane ka hape, hnei angeic hna hnëkën la nyine tro angeic a qaja kowe la Keme i angeic, ene Iehova. Eje hi, aja së fe hi lai. Aja së tro Iehova a kapa la itre thithi së.

3. Nemene la aqane tro sa ujë ngöne la easa thith, nge pine nemen?

³ Ame la easa thithi koi Iehova, loi e troa mama la metrötre së koi Nyidrë. Pane mekune jë la itre hna meköle goeëne hnei Isaia, Ezekiela, Daniela me Ioane. Isapengöne kö la hnei angatr hna meköle goeën. Ame pe, itre ej a amamai Iehova a lapa hune la therone i Nyidrë. Hnei Isaia hna öhnyi Iehova a“[të] hune la therone ka  draië me sisitia.” (Is. 6:1-3) Nge hnei Ezekiela hna öhnyi Iehova a të hune la ikariota i Nyidrë kola “hadehadeu xöteith, te, tune la ngöne la lewene.” (Ezek. 1:26-28) Hnei Daniela hna öhne la “qate ate ka hekö,” ka wië la iheetre i Nyidrë, nge tune la ukahlokin eë la therone i Nyidrë. (Dan. 7:9, 10) Nge hnei Ioane hna öhnyi Iehova a të hune la therone i Nyidrë, nge “hetre lewen xötreithe la theron, nge kösë semerado.” (Hna ama. 4:2-4) Ame la easa mekun la lolo i Iehova, kolo hi lai a upi së troa thithi koi Nyidrë cememine la metrötr. Matre nemene la aqane tro sa thith?

4. Nemene la ini hne së hna xom qa ngöne la itre pane hnëewekë ka ej ngöne Mataio 6:9, 10?

⁴ E jë la Mataio 6:9, 10. Ame ngöne la Cainöj Hune La Wetr, hnei Iesu hna amamane kowe la itretre dreng la aqane troa thith koi Akötresie. Thupene la Iesu a qaja ka hape, “thithi jë tune la,” hnei nyidrë hna pane sipone troa hmitrötr la ëje i Akötresie, me troa traqa la Baselaia ka troa apatrene la itre ithupëjia me Nyidrë, nge troa ej la aja i Nyidrë e celë fen. E tro sa qaja la itre ewekë cili, easë hi lai a amamane ka hape, ka tru koi së la aja i Akötresie.

5. Ijije kö tro sa thith koi easë?

⁵ Ame ngöne la hnaaluene götran ne la thith, hnei Iesu hna amamane laka, ijije fe tro sa thith koi easë. Loi e tro sa sipo Iehova troa hamë së la xen göne la drai, me seng la itre ngazo së, me thupë së qa ngöne la itre itupath, me thepe së qaathei Diabolo. (Mat. 6:11-13) Ame la easa sipone lai koi Nyidrë, easë hi lai a amamane ka hape, Nyidrëti hi la jëne mel koi së, nge easa ajan tro Nyidrëti a kepe së.

6. Tro kö sa e gufan la tulu ne thith? Qejepengöne jë.

⁶ Tha hnei Iesu kö hna amekötine tro la itretre drei nyidrë a e gufan la tulu ne thith. Ame ngöne la itre xaa thithi Iesu, hnei nyidrëti hna qaja koi Iehova la itre mekun ka ajolë nyidrë. (Mat. 26:39, 42; Ioane 17:1-26) Ketre tun, ijiji hi tro sa fe  la hni së koi Iehova. Qëmekene tro sa axecië mekun, loi e tro sa sipo inamacan koi Iehova. (Sal. 119:33, 34) Ketre, qëmekene troa kuca la ketre huliwa ka tru ejolen, sipone jë koi Iehova la trotrohnin me atrehmekun. (Ite edomë 2:6) Loi e tro fe la itre keme me thin a thithi san la itre nekö i angatr, ketre tune fe kowe la itre nekönatr. Nge loi e tro fe sa thithi san la itre ka ini Tus me easë, me itre hnei easë hna cainöje kow. Ngo, ame la easa thith, tha tro hmekuje kö sa sipo.

7. Hnauëne la tro sa atrunyi Iehova ngöne la itre thithi së?

⁷ Nyipiewekë tro fe sa atrunyi Iehova ngöne la itre thithi së. Iehova hmekuje hi la nyine tro sa atrun. “Ka loi” la thiina i Nyidrë nge Nyidrëti la “ate sheng” la itre ngazo. Ketre, “ka ihnimi me utipin [Nyidrë], ate xomi hnin, me ka tru ihnimi me nyipici.” (Sal. 86:5, 15) Celë hi lai ka upi së tro palahi a atrunyi Iehova pine la itre thiina me itre huliwa i Nyidrë.

8. Nemene la itre hne së hna troa olene koi Iehova? (Salamo 104:12-15, 24)

⁸ Loi e tro mina fe sa olene koi Iehova la itre ewekë ka mingöming hnei Nyidrë hna xup. Tune la itre hane iengen, memine la ehnyapane la itre xen, me itre trejin ne la ekalesia. Hnei Iehova hna hamë së la itre ewekë cili me itre xane ju kö, göne hi matre tro sa madrin. (E jë la Salamo 104:12-15, 24.) Ngo ame kö la ka nyipiewekë, ke ene la tro sa olene koi Iehova la itre ini qaathei Nyidrë, memine la mejiune ka mingöming hnei Nyidrëti hna hamë së.

9. Nemene la nyine tro sa kuca matre tro palahi sa olene koi Iehova? (1 Thesalonika 5:17, 18)

⁹ Ame itre xaa ijin, canga tro hi sa thëthëhmine troa olene koi Iehova la itre hnei Nyidrëti hna kuca koi së. Nemene la nyine tro sa kuca? Makëne jë ngöne la sine pepa la itre hnei epuni hna sipone koi Iehova. Nge e nöjei drai, goeëne hmaca jë la pepa matre wange la aqane sa Iehova la itre thithi epun. Thupene lai, olene jë koi Nyidrë la ixatua. (E jë la  1 Thesalonika 5:17, 18.) Pane mekune jë la madrine i epun la ketre a olene koi epun. Ketre tun, ame la easa olene koi Iehova la hna sa la itre thithi së, Nyidrëti a madrin. (Kol. 3:15) Ngo, nemene la ketre ewekë ka sisitria nyine tro sa olene koi Iehova?

10. Thenge la 1 Peteru 2:21, hnauëne la tro sa olene koi Iehova la hna upi Iesu kowe la fen?

¹⁰ E jë la 1 Peteru 2:21. Nyipiewekë tro sa olene koi Iehova la hnei Nyidrëti hna upi Iesu kowe la fen matre ini së. Jëne la aqane mele i Iesu e celë fen, easa atrepengöi Iehova hnyawa me atre la aqane tro sa amadrinë Nyidrë. Maine tro sa lapaune kowe la huuje i Iesu, ijije hi tro sa imelekeu hnyawa me Iehova, me mele tingeting me Nyidrë.—Rom. 5:1.

11. Nemene la hnëqa i Iesu la easa thith koi Iehova?

¹¹ Easa olene koi Iehova la hna aijijë së troa thithi koi Nyidrë jëne Iesu. Hnei Iehova hna acili Iesu matre troa kapa la itre thithi së. Tro hi Iehova a dreng me sa la itre thithi së e hna jëne Iesu. Öni Iesu: “Ame la nöjei ewekë hnei nyipunieti hna troa sipon ngöne la ëjeng, tro ni a eatrën, nge qa ngöne lai, tro ha atrune la Kem jëne la Nekön.”—Ioane 14:13, 14.

12. Nemene la ketre kepin matre tro sa olene koi Iehova la hna upi Iesu kowe la fen?

¹² Huuje i Iesu la ka aijijë Iehova troa seng la itre ngazo së. Tusi Hmitrötr a qeje Iesu ka hape, ’atre huuje ka lapa ngöne la götrane maca ne la theron ne la Akötresie ka draië e hnengödrai.’ (Heb. 8:1) Iesu fe la “ixatua thene la Kem.” (1 Ioane 2:1) Matre easa olene koi Iehova la hnei Nyidrëti hna acile la Atre Huuj Ka Sisitria ka atreine trotrohni së me “xëwe sai së”! (Rom. 8:34; Heb. 4:15) Itre atr ka ngazo së, matre maine patre ju la huuje i Iesu, thatreine kö së easenyi koi Iehova jëne la thith. Haawe, tro sa olene tune kaa koi Iehova la ahnahna ka tru celë, ene la mele ne la Nekö hnimina i Nyidrë?

13. Ame lo jidr tixenuë i Iesu, hnei nyidrë hna amamane tune kaa la ihnimi nyidrë kowe la itre aposetolo?

¹³ Ame lo jidr tixenuë i Iesu e celë fen, hnei nyidrë hna thithi san la itretre dreng. Hnei nyidrëti hna sipo Iehova troa “thupë angatr pine la atre ka ngazo.” (Ioane 17:15) Hnime catre Iesu la itretre dreng! Easenyi hë troa humuthi nyidrë, ngo nyidrëti a hnehengazone la itre aposetolo.

14. Tro sa amamane tune kaa la ihnimi së kowe la itre trejin?

¹⁴ Tui Iesu, tha easë hmekuje kö a thith kowe la itre sipu aja së. Ngo tro fe sa thithi san la itre trejin. Easë hi lai a trongëne la hna amekötin hnei Iesu troa ihnimikeu, me amamane koi Iehova laka, easa hnim la itre trejin. (Ioane 13:34) Tha easë kö a aluzi traem la easa thithi sai angatr. Önine la Tusi Hmitrötr, “ka hetre thangane catre la thithi ne la atre ka meköt.”—Iako. 5:16.

15. Pine nemene matre nyipiewekë tro sa thithi san la itre trejin?

¹⁵ Ame la itre xaa trejin, ke angatr a cil kowe la nöjei pengöne itupath. Loi e tro sa sipo Iehova troa xatua angatr troa xomihnine la itre sine mec, maine itre  hulö, maine itre isi, maine iaxösisi, me itre xaa jole ju kö. Ketre, loi e tro sa thithi san la itre trejin ka saen troa hamë ixatua. Ma atre hi epun la itre xaa trejin ka hane melëne la itre jole cili. Qaja jë la itre ëje i angatr la epuni a thith. Easa amamane la ihnimi easë, la easa sipo Iehova troa xatua angatr troa cil kowe la itre jol.

16. Hnauëne la tro sa thithi san la itre trejin ka elemekene la ekalesia?

¹⁶ Madrine catr la itre trejin ka elemekene la ekalesia la easa thithi sai angatr. Nge hetre thangane hnei angatr hna kapa qa ngöne la itre thithi së. Celë hi hna qaja hnei Paulo aposetolo. Öni angeic: “Thithi sai ni jë matre hamë trengewekë koi ni e fe pi ni la qëng. Haawe, tro hë ni a atreine qaja catrëne la ini ka hmitrötr nge hna juetrën göne la maca ka loi.” (Efe. 6:19) Ame fe enehila, tru catr la itre trejin trahmany ka catre huliwa kowe la ekalesia. Easa amamane la ihnimi së koi angatr la easa sipo Iehova troa amanathithine la itre huliwa i angatr.

17-18. Eu la itre ijine kola upi së troa thith, nge nemene la nyine tro sa thupën?

¹⁷ Ame itre xaa ijin, ijije hi troa upi së troa thith. Maine jë, tro la trejin föe ka xomiujine la ini Tus a sipone kowe la trejin föe ka ce tro me eahlo troa thith. Maine thatre hnyawa kö angeic la atr ka ini Tus, ma ka loi tro angeic a thith ngöne la pun. Ame hë e cili, atre hë angeic la nyine troa qaja matre ithuecatr kowe la ka ini Tus.

¹⁸ Ijije fe troa sipone kowe la ketre trejin trahmany troa cile fë la thith ngöne la icasikeu koi cainöj, maine ngöne la icasikeu ne la ekalesia. Loi e tro la itre trejine cili a isine matre tro la itre thithi angatr a ihmeku memine la icasikeu. Tha tro pi kö a iameköti la kola thith qëmekene la ekalesia, maine qaja la itre ithuemacany. Ame ngöne la itre xaa icasikeu, tha tro kö la thith me nyima a sasaith la 5 lao menetr. Kolo hi matre tha tro kö la trejin ka thith, a ithanata aqeany. Loi e tro la trejin ka cile fë la thith ne  nyiqan a trongëne la hna amekötine celë.—Mat. 6:7.

19. Nemene la ka troa xatua së troa hmek ngöne la kola traqa la drai i Iehova?

¹⁹ Pine laka, easenyi hë la drai i Iehova, nyipiewekë enehila tro sa xomi ijine troa thith. Celë hi matre öni Iesu: “Catre jë hmek, nge the mano kö xëwe koi Akötresie, matre mele pi nyipunie qa ngöne la itre ewekë cili.” (Luka 21:36) Eje hi, e tro sa thithi lapa, tro ha catr la lapaune së, nge tha tro kö a asesëkötrë së hnene la drai i Iehova.

20. Nemene la aqane tro la itre thithi së a tun la sinöe ka pui loi?

²⁰ Nemene la hne së hna ce wang ngöne la tane mekune celë? Ketre manathith ka tru koi së la thith. Ame la pane ewekë hne së hna troa qaja ngöne la itre thithi së ke, ene la aja i Iehova. Ketre, loi e tro fe sa amamane la hni ne ole së kowe la mele i Iesu, memine la Baselaia. Nge nyipiewekë tro fe sa thithi san la itre trejin. Ijije fe tro sa thith koi easë, memine la imelekeu së me Iehova. Ame la easa mekun hnyawane la itre hne së hna troa qaja ngöne la thith, ke easë hi lai a wangatrune la manathith cili. Ame e cili, tro hë la itre thithi së a tune la sinöe ka pui loi, ka amadrinë Iehova.—Ite edomë 15:8.