1. Nemene la mekuna i eö göne la nyipici?

 EASË itre hlue i Iehova, a hnim la nyipici qa hnine la Tusi Hmitrötr. Nge qa cili hi la easa lapaun. (Roma 10:17) Ka xecie koi së laka, hnei Iehova hna acile la ekalesia matre troa “ikapa me trepen ne la nyipici.” (1 Tim. 3:​15) Easa madrin troa drengethenge “la itre ka elemeken,” ke angatr a qejepengöne koi së la itre nyipici qa hnine la Tusi Hmitrötr, me hamë eamo thenge la aja i Akötresie.​—Heb. 13:17.

2. Thenge la Iakobo 5:​19, nemene la ka troa traqa koi së, ngacama ase hë së kapa la nyipici?

² Ngacama hne së hna kapa la nyipici, nge atre hi së laka, jëne la organizasio, Iehova a hamën la itre hna amekötin, ngo ijije hi tro sa ananyine la nyipici. (E jë la Iakobo 5:​19.) The thëthëhmine kö laka, aja i Satana tro sa nuetrij la Tusi Hmitrötr, me itre hna amekötin hnene la organizasio i Iehova.​—Efe. 4:​14.

3. Pine nemene matre tro sa cile catr ngöne la nyipici? (Efeso 6:​13, 14)

³ E jë la Efeso 6:​13, 14. Jëne la itre trengathoi, easenyi hë tro Satana a aisane la itre nöj, me uku angatr troa icilekeu me Iehova. (Hna Am. 16:​13, 14) Ketre, tro angeic lai a kuca la nöjei pengöne ewekë asë, matre ananyine la itre hlue i Akötresie qaathei Nyidrë. (Hna Am. 12:9) Celë hi matre, nyipiewekë tro sa inin troa atreine wangatrehmekun la nyipici qa ngöne la thoi, me drengethenge la nyipici. (Roma 6:​17; 1 Pet. 1:​22) Emele i easë hi lai elany, la kola traqa la akötr atraqatr!

4. Nemene la hne së hna troa ce wang ngöne la tane mekun celë?

 ⁴ Ame ngöne la tane mekune celë, tro sa ce ithanatan la lue thiina ka troa xatua së troa wangatrehmekune la nyipici qa hnine la Tusi Hmitrötr, memine la itre trengathoi. Tro fe lue ej a xatua së troa kapa la itre eamo me itre hna amekötin hnene la organizasio i Iehova. E thupen, tro fe sa ce wang la köni ewekë nyine tro sa kuca matre tro palahi sa cile catr ngöne la nyipici.

LUE THIINA KA TROA XATUA SË TROA WANGATREHMEKUNE LA NYIPICI

5. Tro la xoue Iehova a xatua së tune kaa troa wangatrehmekune la nyipici qa ngöne la thoi?

⁵ Troa xoue Iehova. Ame la atr ka xoue Iehova, ke tru la ihnimi angeic koi Nyidrë, matre xou i angeic troa akötrë Nyidrë. Pine laka, easa xoue Nyidrë, nge aja së troa amadrinë Nyidrë, matre easa isine troa atreine wangatrehmekun la loi qa ngöne la ngazo, memine la nyipici qa ngöne la thoi. (It. Ed. 2:​3-6; Heb. 5:​14) Ngo thupëne kö, tha tro kö la xoue atr a sawa la ihnimi së koi Iehova, ke ame itre xaa ijin, ame la ka loi koi itre atr, ke ka ngazo koi Nyidrë.

6. Pine nemene matre tha ase kö qaja la nyipici hnene la 10 lao atre alamekëne la nöj?

⁶ Maine tru catre kö la xoue atr the së hune la xoue Akötresie, tro së lai a nyiqane ananyine la nyipici. Tro sa ce wang la hna kuca hnene la 12 lao atre Isaraela hnei Iehova hna up troa alamekëne la nöj. Tha loi kö la itre ithuemacanyi hna traqa fë hnene la ala 10, ke tru catre kö la xoue atr thei angatr hune la ihnimi angatr koi Iehova. Öni angatr kowe la itre xaa angetre Isaraela: ‘Tha ijije kö tro sa cil kowe la nöje cili, ke tru catre kö la trengecatre i angatr hu së.’ (Num. 13:​27-​31) Nyipici laka, tru catre kö la trengecatre ne la angetre Kanana hune la angetre  Isaraela. Ngo ame la itre ka qaja ka hape, tha ijije kö tro la angetre Isaraela a cil kowe la itre ithupëjia ke, thëthëhmi Iehova ha angatr. Maine ju, tro hi la ala 10 a mekun lo aja i Iehova kowe la angetre Isaraela, me lapa mekun la itre hnei Nyidrë hna kuca koi angatr. Nge tro angatr a öhn e cili laka, ka pë pengöne la trengecatre ne la angetre Kanana hune la mene i Iehova. Ngo isapengöne kö Iosua me Kaleba, ke nyidro a thel troa amadrinë Iehova. Öni nyidro kowe la nöj: ‘Maine Iehova a madrine koi së, ke tro kö Nyidrëti a lö sai së kowe la nöj, me hamëne ej koi së.’​—Num. 14:​6-9.

7. Nemene la aqane tro palahi sa xoue Iehova? (Wange ju fe la iatr.)

⁷ Maine easa ajan tro palahi a xoue Iehova, loi e tro sa thel troa amadrinë Nyidrë la easa axecië mekun. (Sal. 16:8) Ame la eö a e Tusi Hmitrötr, hnyinge jë ka hape, ‘Maine eni ju fe e cili, nemene la hnenge hna troa kuca?’ Maine ce eö fe hi lo me angatr, lo kola traqafë la ithuemacanyi ka ngazo hnene lo itre ka alamekëne la nöj, tro kö eö a drei angatr, me xoue atr? Maine tro kö a catr la ihnimi eö koi Iehova, nge tro eö a thel troa amadrinë Nyidrë? Tha ase kö la nöj mejiun kowe la itre trenge nyipici hna qaja hnei Iosua me Kaleba, matre tha lö ju kö angatr kowe la Nöj Hna Thingehnaean.​—Num. 14:​10, 22, 23.

8. Nemene la thiina nyine tro sa huliwan, nge pine nemen?

⁸ Troa ipië. Iehova a amamane la nyipici kowe la itre atr ka ipië. (Mat. 11:25) Itre ka ipië së, ke hne së hna kapa la ixatua matre troa trotrohnine la nyipici qa hnine la Tusi Hmitrötr. (It. Hu. 8:​30, 31) Ngo loi e tro palahi sa thupën, tha tro kö sa pi tru. Maine ka pi tru së, ke tro së lai a mekun ka hape, ka loi kö la mekuna së hune la itre trepene meköt me itre hna amekötin hnene la organizasio i Iehova.

9. Nemene la nyine tro sa kuca matre tro palahi sa ipië?

⁹ Maine easa ajan tro palahi a ipië, tha tro kö sa thëthëhmin laka, wanamamike së, nge ka draië catre kö Iehova. (Sal. 8:​3, 4) Loi e tro fe sa sipo Iehova troa xatua së troa ipië, matre tro sa canga kapa la itre ini. Tro Nyidrëti lai a xatua së troa wangatrune la itre mekuna i Nyidrë ka ej ngöne la Tusi Hmitrötr, nge hna hamën hnene la organizasio, hune la itre sipu mekuna së. Ame la eö a e Tusi Hmitrötr, thele jë la itre ewekë ka amamane laka, Iehova a hnim la itre ka ipië, nge Nyidrëti a xele ma wang la itre ka pi tru, me ka pë metrötr. Maine kola hamë eö la ketre hnëqa ka tru, loi e tro palahi eö a ipië.

AQANE TRO SA LAPA QALE KOWE LA NYIPICI

10. Drei la hnei Iehova hna acil matre troa hamën la itre hna amekötin, me xomiujine la nöje i Nyidrë?

¹⁰ Catre jë mejiune kowe la itre hna amekötin hnene la organizasio i Iehova. Ame ekö e Isaraela, hnei Iehova hna upi Mose me Iosua troa hamën la itre hna amekötin kowe la nöj. (Ios. 1:​16, 17) Ame la angetre Isaraela a metrötrë nyidro ceitu me lue hna up hnei Akötresie, ke hna amanathithi angatr. Itre macatre thupen, lo kola acil la ekalesia, hnene pë hë la 12 lao aposetolo hna tro fë la itre hna amekötin hnei Iehova. (It. Hu. 8:​14, 15) E thupen, hna nyixan la lapa i angetre aposetolo hnene la itre xaa qatre thup ne Ierusalema. Pine laka, itre ekalesia a trongëne la itre hna amekötin hnene la itre trahmanyi cili, itre ej a ‘kökötre  o drai me catre ngöne la lapaun.’ (It. Hu. 16:​4, 5) Ame enehila, ame la easa drengethenge la itre hna amekötin hnene la organizasio i Iehova, ke kola amanathithi së. Nemene jë la mekuna i Iehova e tro sa xele ma dreng la itre atr hnei Nyidrëti hna acil? Tro sa ce wange lai ngöne lo angetre Isaraela a tro kowe la Nöj Hna Thingehnaean.

11. Nemene la ka traqa kowe la angetre Isaraela ka icilekeu memine la atr hnei Iehova hna acil? (Wange ju fe la iatr.)

¹¹ Ame lo angetre Isaraela a tro kowe lo Nöj Hna Thingehnaean, hnene la itre xaa trahmanyi ka hetre hnëqa hna icilekeu me Mose, me qaja angazone la hnëqa hnei Iehova hna hamën koi angeic. Öni angatr: ‘Ka hmitrötr asë hi la icasikeu [ngo tha Mose hmekuje kö], nge Iehova nyipi angatr.’ (Num. 16:​1-3) Ngacama ame koi Iehova ka hmitrötr asë hi la nöj, ngo Mose la hnei Nyidrëti hna acil troa elemekene ej. (Num. 16:28) Ame la angatr a xöjetriji Mose, ke angatre hi lai a xöjetriji Iehova. Tha angatre kö a nyipiewekën la aja i Iehova, ngo itre sipu aja i angatre pe, ene la troa pi draië me pi mama. Hnei Iehova hna apatrene la itre ka icilekeu, memine la itre nekö i Isaraela ka ce xöle me angatr. (Num. 16:​30-​35, 41, 49) Enehila mina fe, tha madrine kö Nyidrë kowe la itre ka tha metrötrëne la itre hna amekötin hnene la organizasio i Nyidrë.

12. Pine nemene matre loi e tro sa mejiun kowe la organizasio i Iehova?

¹² Loi e tro sa mejiune kowe la organizasio i Iehova. Ame la itre ka elemeken a öhne laka, loi e troa saze la aqane trotrohnine së la ketre nyipici qa hnine la Tusi Hmitrötr, maine ketre aqane huliwa së ngöne la organizasio, ke angatr a saze. (It. Ed. 4:​18) Angatre hi lai a kuca tun ke, aja i angatr troa amadrinë Iehova. Angatr a nyitrepene hnei Tusi Hmitrötr  la itre mekun hnei angatr hna axeciën, nge tulu hi lai nyine tro la itre hlue i Iehova a xötrethengen.

13. Nemene “la itre nyipi ini, me itre trengewekë nyine loi,” nge nemene la nyine tro sa kuca?

¹³ “The mano kö xölehuje la itre nyipi ini, me itre trengewekë nyine loi.” (2 Tim. 1:​13) Ame “la itre nyipi ini, me itre trengewekë nyine loi,” ke kola qaja la itre ini hne së hna kapa qa hnine la Tusi Hmitrötr. (Ioa. 17:17) Nge hna nyitrepene la mejiune së hnene la itre ini cili. Organizasio i Iehova a ini së troa wangatrun itre ej. Maine celë hi lai hne së hna kuca, ke tro ha amanathithi së.

14. Tune kaa la aqane wangacone la itre xaa keresiano “la itre nyipi ini, me itre trengewekë nyine loi”?

¹⁴ E tha xölehuje kö së “la itre nyipi ini, me itre trengewekë nyine loi,” nemene la ka troa traqa koi së? Tro sa ce wang la ka traqa ngöne lo ijin ne la itre pane keresiano. Kola qaja agöne hnene la itre xaa keresiano ka hape, traqa ha la drai i Iehova. Maine jë, hnei angatr hna mekun ka hape, qa ngöne hi la ketre tusi Paulo. Tha hnei angatr kö hna xomi ijine troa pane atre la nyipici, matre hnene la itre xaa trejin qa Thesalonika hna dreng, me qaja agön la hna ithanata cili. Maine hnei angatre ju hna mekun lo hna ini angatr hnei Paulo, ke tha tro kö a amenu angatr. (2 Thes. 2:​1-5) Celë hi matre hnei Paulo hna qaja koi angatr ka hape, tha tro kö a canga mejiun kowe la hnei angatr hna dreng. Aja i Paulo troa xatua angatr, matre hnei angeic hna nyipune la hnaaluene tusi angeic koi angetre Thesalonika ka hape: “Eni Paulo a sipu cinyihane koi nyipunie la ibozung, nge hnenge pala hi hna kuca tun ngöne la nöjei tusing, matre xecie hnyawa koi nyipunie ka hape, eni la ka cinyiany.”​—2 Thes. 3:​17.

15. Nemene la nyine tro sa kuca e kola tro fë la itre ithuemacany ka tha ihmeku kö memine la nyipici? Hamëne jë la ketre ceitun. (Goeëne ju fe la itre iatr.)

¹⁵ Nemene la ini nyine tro sa xome qa ngöne la tusi Paulo kowe la angetre Thesalonika? Ame la easa dreng la ketre ewekë ka tha ihmeku kö memine la itre  ini qa hnine la Tusi Hmitrötr maine ketre ithuemacanyi pena, ke loi e tro sa atreine waiewekë. Ame la ketre ijine ngöne Ex-Union Soviétique, hnene la itre ithupëjia hna tro fë la ketre tus, me qaja kowe la itre trejin ka hape, qaathene la organizasio i Iehova. Kola qaja e kuhu hnine la tus ka hape, loi e tro la itre trejin a acil la ketre organizasio me ketre sipu mus. Kösë hnyawa pi kö lo ka hape, tus qaathene la organizasio. Ngo eloine pe, tha ase kö la itre trejin keithenge lai tusi cili, ke tha ka ihmeku kö ej memine la itre hnei angatr hna inin. Ame mina fe enehila, jëne Ëternet me itre réseaux sociaux, itre ithupëjia a thel troa amenu së me thë la casi së. Loi e tro sa waipengö së ka hape, ame la hnei easë hna dreng me e, ke ka ihmeku kö memin la Tusi Hmitrötr. E tro sa kuca lai, ke tha tro kö a canga amenu së.​—2 Thes. 2:2; 1 Ioa. 4:1.

16. Thenge la Roma 16:​17, 18, tro sa ujë tune kaa kowe la itre ka trotrije la nyipici?

¹⁶ Casi jë memine la itre ka mele nyipici koi Iehova. Aja i Iehova tro la itre hlue i Nyidrëti a cas. Tro së lai a cas, e tro sa lapa qale kowe la nyipici. Ame la itre ka trotrije la nyipici, ke angatr a thë la cas ne la ekalesia. Celë hi matre Iehova a upi së troa ‘ananyi’ angatr. E tha drengethenge kö së, ke tro fe së lai a nanyi qa ngöne la nyipici.​—E jë la Roma 16:​17, 18.

17. Nemene la itre eloine hne së hna troa kapa e tro sa atreine wangatrehmekune la nyipici, me lapa qale kowe ej?

¹⁷ Maine tro sa atreine wangatrehmekune la nyipici qa ngöne la thoi, ke tro së lai a cile catr ngöne la nyipici, nge troa catre la imelekeu së me Iehova. (Efe. 4:​15, 16) Ketre, tha tro kö a amenu së hnene la itre ini ka thoi qaathei Satana, nge tro Iehova a thupë së elanyi ngöne la kola traqa la akötr atraqatr. Haawe, lapa hnyawa ju ngöne la nyipici, nge tro kö la “Akötresie ne tingeting” a ce me eö.​—Fil. 4:​8, 9.