1-2. Drei lae Zadoka? (1 Aqane Lapa itre Joxu 12:​22, 26-​28)

 PANE mekune jë la ijine cili. Traqa koi 340 000 lao trahmany ka traqa itrony, troa acili Dravita troa joxu ne Isaraela asë. Köni drai ne lapa angatr ezine la itre hugit ne Heberona, angatr a ihnyima me porotrik me thinge la itre nyima ne atrunyi Iehova. (1 Aq. Jo. 12:39) Ca nekö trahmany nyipine la ka alanyim hna hëne ka hape, Zadoka. Maine jë pëkö ka atre angeic, ngo hnei Iehova hna kuca matre tro sa atre ka hape, Zadoka fe hi me angatr. (E jë la 1 Aqane Lapa itre Joxu 12:​22, 26-​28.) Drei lae Zadoka?

² Zadoka la ketre atre huuj, nge sinee ne la Atre Huuje Ka Sisitria Abiathara. Ketre atre qeje pu angeic, kola qaja la ketre atr ka atreine waipengöne la aja i Akötresie. (2 Sam. 15:27) Angetre Isaraela a wai angeic la angatr a aja ixatua. Nge Zadoka fe hi la ketre atr ka catr. Ame ngöne la tane mekune celë, tro sa ce ithanatan la thiina cili ka eje thei angeic.

3. (a) Pine nemene matre nyipiewekë tro la itre hlue i Iehova a catr? (b) Nemene la nyine tro sa ce wange ngöne la tane mekune celë?

³ Satana palahi a icilekeu memine la nöje i Akötresie. (1 Pet. 5:8) Easa lapa treqen la ijin tro Iehova a apatrenyi Satana memine la fene ka ngazo i angeic, matre nyipiewekë tro sa catre enehila. (Sal. 31:24) Tro sa ce wange la köni aqane tro sa catre tui Zadoka.

 ISIGÖLINE JË LA BASELAIA I AKÖTRESIE

4. Hnauëne laka, loi e tro la itre hlue i Iehova a catre matre isigöline la Baselaia i Akötresie? (Wange ju fe la iatr.)

⁴ Itre hlue i Akötresie a isine troa isigöline la Baselaia i Nyidrë, matre loi e tro angatr a catr. (Mat. 6:​33) Ame ngöne le fen ka ngazo celë, loi e tro sa catr matre tro sa trongëne la itre hnei Iehova hna amekötine me cainöjëne la maca ka loi ne la Baselaia. (1 Thes. 2:2) Ketre, loi e tro fe sa catr, ke easa mel ngöne la fen ka kuci politik. (Ioa. 18:36) Pine laka alanyim la itre hlue i Iehova ka xele ma lö hnine la kuci politik me isi, hna traqa koi angatr la itre jol goi mani, nge hna qanangazon me akalabusi angatr.

5. Pine nemen matre loi e tro Zadoka a catr troa isigöli Dravita?

⁵ Tha Zadoka hmekuje kö a traqa e Heberona matre troa feetën la kola acili Dravita joxu, ngo angeice fe a traqa troa isi. (1 Aq. Jo. 12:38) Aja i angeic troa ce tro me Dravita matre isi me isigöli Isaraela qëmekene la itre ithupëjia. Ngacama thatreine kö angeice isi, ngo ketre trahmany ka catre angeic.

6. Nemene la tulu ne catr hnei Dravita hna amamane koi Zadoka? (Salamo 138:3)

⁶ Drei la itre tulu ne catre koi Zadoka, atre huuj? Ka ce mele angeic memine la itre trahmany ka catr, itre tulu koi angeic. Tui Dravita ka catr elemeken la itre “trongene isi Isaraela.” Celë hi matre kola drengethenge angeic hnene la nöj asë. (1 Aq. Jo. 11:​1, 2) Ame la angeic a cil kowe la itre ithupëjia, ke ka mejiun angeic kowe la trengecatre i Iehova. (Sal. 28:7; E jë la Salamo 138:3.) Hetre xaa trahmany ka catr hnei Zadoka hna atre hnyawa, tui Iehoiada me Benaia nekö i angeic, ketre sooc ka atreine isi,  memine la 22 lao tane lapa ka ce xöle me Dravita. (1 Aq. Jo. 11:​22-​25; 12:​26-​28) Hnei angatr hna catr matre isigöline la hnanyijoxu i Dravita.

7. (a) Drei la itre tulu ne catre hne së hna kapa enehila? (b) Nemen la ini hne së hna xome qaathei trejin Nsilu ngöne la video?

⁷ Tro sa catr me hetre trengecatr, e tro sa lapa mekun la tulu ne la itre hlue i Iehova ka isigöline la Baselaia i Nyidrë. Hnei Iesu Keriso, Joxu së hna cile catr qëmekene la itre ka uku nyidrë troa kuci politik ngöne la fene i Satana. (Mat. 4:​8-​11; Ioa. 6:​14, 15) Nge ka mejiun palahi nyidrë kowe la trengecatre i Iehova. Easë palahi enehila a xomi tulu, qaathene la itre trejin ka isigöline la Baselaia, nge ka xele ma kuci politik. Ijiji easë hi troa tro ngöne jw.org matre troa atre la hnei angatr hna melën. a

XATUANE JË LA ITRE TREJIN

8. Eu la ijine tro la itre qatre thup a catr matre xatuane la itre trejin?

⁸ Ka madrine la itre hlue i Iehova troa xatuane la itre xan. (2 Kor. 8:4) Loi e troa hetre trengecatr matre atreine ixatua. Tune la kola isi, atre hi la itre qatre thup laka, itre trejin a aja ithuecatr, me itre Tusi Hmitrötr me itusi së, me xen, me itre xaa ewekë ju kö. Ihnimi angatr kowe la itre mamoe la ka uku angatr troa nue mel matre hamë ixatua. (Ioa. 15:​12, 13) Nge ame cili, angatr a xötrethengene la tulu ne catre i Zadoka.

9. Ame ngöne 2 Samuela 15:​27-​29, nemene la hnei Dravita hna upi Zadoka troa kuca? (Wange ju fe la iatr.)

⁹ Hnei Abasaloma nekö i Dravita hna mekun troa thapa la hnanyijoxu me humuthi Dravita. (2 Sam. 15:​12, 13) Matre loi e tro Dravita a canga tro qa Ierusalema! Öni Dravita kowe la itre ka huliwa koi angeic: “Öi, mejë jë nge kötre jë së,  wanga pëkö ala casi hna troa nuamelen hnei Abasaloma!” (2 Sam. 15:14) Kolo ha tro la itre hlue i Dravita, ngo hnei Dravita hna mekun laka, tro pë a lapa la itre xan matre troa thuemacanyi angeic la itre hna troa kuca hnei Abasaloma. Matre hnei angeic hna sipo Zadoka me itre xaa atre huuj troa bëeke hmaca, matre hamë ithuemacany koi angeic. (E jë la 2 Samuela 15:​27-​29.) Loi e tro angatr a hmek. Atre hi Dravita laka, tha ka hmaloi kö, ke xou i angeic tro angatr a mec. Maine pane atre ju Abasaloma laka, Zadoka me itre atre huuj a thupë angeic göi Dravita, ke thatre kö së la nyine tro angeic a kuca!

10. Tune kaa la aqane thupë Dravita hnei Zadoka me itre sinee i angeic?

¹⁰ Dravita a mekun la ketre nyine troa kuca, ngo Zadoka me Husai sinee i angeic la ka troa eatrëne lai. (2 Sam. 15:​32-​37) Hnei Abasaloma hna mejiun koi Husai, nge hnei Husai hna qaja koi angeic la ketre aqane isi. Ngo göne hi matre aijijë Dravita troa hnëkë. E thupen, hnei Husai hna qaja lai koi Zadoka me Abiathara. (2 Sam. 17:​8-​16) Matre hnei angatr hna iupifë maca koi Dravita. (2 Sam. 17:17) Jëne la ixatua i Iehova, hnei Zadoka me itre atre huuj hna thupëne hnyawan la mele i Dravita.​—2 Sam. 17:​21, 22.

11. Tune kaa la aqane tro sa nyitipune la itre trejin me easë?

¹¹ Tro sa nyitipune tune kaa la aqane catre i Zadoka, la easa xatuane la itre trejin ka melën la itre ijine jol? (1) Trongëne jë la itre hna amekötin. Ame ngöne la itre ijine cili, nyipiewekë tro sa cas. Drengethenge jë la itre hna amekötin hnei filial. (Heb. 13:17) Loi e tro la itre qatre thup a atre hnyawa la itre hna amekötine hnene la filial la kola traqa la ketre hulö, memine la itre hna amekötin hnene la organizasio matre troa hnëkë së. (1 Kor. 14:​33, 40)  (2) Loi e tro fe sa hmek. (It. Ed. 22:3) Mekune hnyawa jë la nyine tro eö a kuca. Wange palakö eatre pi eö! (3) Qale jë koi Iehova. The thëthëhmine kö laka, Iehova a hnehengazone la itre trejin me eö. Matre tro kö Nyidrë a thupëne la mele i eö, la eö a xatuane la itre trejin.

12-13. Nemene la ini hne së hna xom qa ngöne la hna melën hnei Viktor me Vitalii? (Wange ju fe la iatr.)

¹² Ame e Ukraine, hna upi Viktor me Vitalii, lue qatre thup, troa tro fë xen me tim kowe la itre trejin. Öni Viktor, “Nyio a thele xen, nge ame itre xaa ijin, kola ikuqanyi ezi nyio. Hnene la ketre trejin ka trene magazë hna hamë xen, nge celë hi ka thuane la itre trejin koi nyimu drai. Ame la nyio a nyialiene lai kamio, ke keciqa pi hi la ketre boob ezi nyio. Ame ngöne la drai ka pexej, hnenge hna sipo Iehova troa hamë trengecatreng, matre tro palahi ni a xatuane la itre trejin.”

¹³ Öni Vitalii, “Loi e tro palahi nyio a catr. Ame lo pane tronge i nyio, ke 12 lao hawa ne nyiape nyio ngöne loto. Ame ngöne la ijine cili, tha mano kö ni thith.” Hnei Vitalii hna catr, ngo hnei angeice fe hna hmek. Öni angeic: “Tha cile kö ni troa sipo inamacan me atreine waiewekë koi Iehova. Eni hi a nyiapën la itre gojenyi hna fe hnei mus. Nge ame la eni a öhne la aqane ce huliwa ne la itre trejin, ke kola acatrene la lapauneng. Angatr a nyidrawan la itre gojeny, me xawan la itre xen me atë ngöne kamio. Nge ame la nyio a traqa, ke ase hë hnëkë xen me hnë meköle i nyio.”

MELE NYIPICI JË KOI IEHOVA

14. Tune kaa easë la kola trotriji Iehova hnene la ketre sinee së?

¹⁴ Ketre itupath ka tru la kola trotriji Iehova hnene la ketre atrene la fami, maine ketre sinee së. (Sal. 78:40; It. Ed. 24:10) Maine ka epe catre së kowe la atre cili, ke jole catr troa kapa la hna amekötin. Maine epuni a melën la ewekë cili, tro la tulu ne catre i Zadoka a xatua epun.

15. Pine nemen matre loi e tro Zadoka a catr matre mele nyipici koi Iehova? (1 Itre Joxu 1:​5-8)

¹⁵ Hnei Zadoka hna mele nyipici lo Abiathara, sinee i angeic a xele ma drei Iehova. Hna traqa lai, qëmeken troa mec hnei Dravita. Hnei Adonia nekö i Dravita, hna thel troa thapa la hnanyijoxu, lo hnei Iehova hna hamën koi Solomona. (1 Aq. Jo. 22:​9, 10) Hnei Abiathara hna iën troa nyixöle i Adonia. (E jë la 1 Itre Joxu 1:​5-8.) Ame e cili, Abiathara a icilekeu koi Dravita me koi Iehova fe! Pane mekune jë la akötr me hleuhleu i Zadoka! Hnei nyidro, lue atre huuj, hna ce huliwa koi 40 lao macatre. (2 Sam. 8:​17) Hnei nyidro hna ce kapa “la Pua ne la nyipi Akötresie.” (2 Sam. 15:29) Nge hnei nyidro fe hna isigöline la hnanyijoxu i Dravita, me kuca la itre xaa huliwa ka lolo.​—2 Sam. 19:​11-​14.

16. Nemene la ka xatua Zadoka troa mele nyipici koi Iehova?

¹⁶ Ngacama hnei Abiathara hna tha idrei, ngo ame pe, hnei Zadoka hna mele nyipici koi Iehova. Matre ka mejiune palahi Dravita koi angeic. Ame la kola atre la itre ewekë ka ngazo hna troa kuca hnei Adonia, hnei Dravita hna upi Zadoka, me Nathana, me Benaia troa acili joxu Solomona. (1 It. Jo. 1:​32-​34) Hnei Zadoka hna catr, ke hnei angeic palahi hna ce tro memine la itre ka nyihlue i Iehova, tui Nathana me itre xaa sinexöle i Dravita joxu. (1 It. Jo. 1:​38, 39) Ame hë la  kola acili Solomona troa joxu, hnei nyidrë hna ‘acili Zadoka troa nyihna i Abiathara.’​—1 It. Jo. 2:​35.

17. Tune kaa la aqane tro eö a nyitipu Zadoka la kola trotriji Iehova hnene la ketre sinee i eö?

¹⁷ Tro sa nyitipu Zadoka tune kaa? Maine tro la ketre sinee i eö a iën troa trotriji Iehova, amamane jë ka hape, eö a ië Nyidrë. (Ios. 24:15) Tro kö Iehova a hamë eö la trengecatr ka ijij. Qale jë koi Iehova ngöne la thith, nge catre jë cas memine la itre trejin. Ka tru koi Iehova la aqane mele nyipici eö, nge tro kö Nyidrëti a amanathithi eö.​—2 Sam. 22:26.

18. Nemene la hna ini eö hnene la hna melën hnei Marco me Sidse?

¹⁸ Hnene la lue nekö i Marco me Sidse, hna trotriji Iehova. Öni Marco: “Qane lo kola hnahone la itre nekö i easë, tru la ihnimi easë koi angatr. Easa kuca asë la hne së hna atrein, matre thupë angatr. Matre ame la angatr a iën troa trotriji Iehova, ke tru la akötre së. Ngo ce Iehova me easë. Hnei Nyidrë hna xatua nyio, matre ame la eni a kucakuca, föi eni a catr. Nge ame la angeic a kucakuca, eni pena la ka catr.” Öni Sidse: “Maine patre ju Iehova troa hamë trengecatre koi nyio, ke thatreine kö nyio cil kowe la jole cili. Eni palahi a upezö ni, matre hnenge hna fe la hning koi Iehova ngöne la thith. E thupen, hnenge hna iöhnyi memine la ketre trejin föe, hnenge hna tha iöhnyi memin a ije macatre hë la. Hnei eahlo hna xolouth la lue iapeng, me goeë ni me hape: ‘Sidse, the thëthëhmine kö laka, tha zöi eö kö!’ Jëne la ixatua i Iehova, eni palahi a madrin troa huliwa i Nyidrë.”

19. Nemene hë la nyine tro eö a kuca?

¹⁹ Aja i Iehova tro la itre hlue i Nyidrë a catr tui Zadoka. (2 Tim. 1:7) Ngo tha aja i Nyidrëti kö tro sa mejiun kowe la sipu trengecatre së. Nyidrëti pe a ajan tro sa mejiun koi Nyidrë. Matre ame la eö a cil kowe la ketre jol, sipo trengecatre jë koi Iehova. The luelue kö laka, tro kö Nyidrëti a thue trengecatre i eö tui Zadoka!​—1 Pet. 5:​10.