Itre Hnyinge Ne La Itre Ka e
Drei la “föe” hna qaja ngöne Isaia 60:1, nge tune kaa la aqane “mejë” me “traqa la lai” ne ej?
Easa e ngöne Isaia 60:1 ka hape: “Mejë jë nyipo nge hudrume pi la lai nyipo ke traqa ha la lai nyipo, kola hudrume la lolo i Iehova koi nyipo.” Kola mama ngöne la itre xötre ka tro pa me ka tro pi ka hape, ame la “föe” hna qaja e celë, ke kola qeje Ziona maine Ierusalema, lo traon ka tru ne Iudra ngöne la ijine i Isaia. a (Isa. 60:14; 62:1, 2) Ame la kola qeje Ierusalema, ke kola qaja la nöje Isaraela asë. Tro sa ce sa la lue hninge göne la xötre celë. Ame la pane hnying, ke eu nge tune kaa la aqane “mejë” Ierusalema me nyiqane “traqa la lai” ne ej? Ame la hnaaluene hnying, ke tro kö a eatr la hna qaja hnei Isaia ngöne la hneijine i easë?
Eu nge tune kaa la aqane “mejë” Ierusalema me “traqa la lai” ne ej? Ame ngöne la 70 lao macatre ne othe la angetre Iudra e Babulona, hna thë la traon e Ierusalema memine la uma ne hmi. Thupene la kola thapa la traon e Babulona hnene la angetre Madai me Peresi, hna nue la angetre Isaraela ka mel e Babulona troa bëek kowe la nöje i angatr, me acile hmaca la nyipi hmi. (Ezr 1:1-4) Qane lo macatre 537 M.P.K., hnene la angetre Iudra ka mele nyipici, nge ka fetra qa ngöne la 12 lao tribu ne Isaraela, hna bëek a tro Ierusalema. (Isa. 60:4) Hnei angatr hna nyiqane tro fë huuj koi Iehova, me feetëne la itre feet ne la macatre, me xupe hmaca la uma ne hmi. (Ezr 3:1-4, 7-11; 6:16-22) Hna hudrume hmaca la lolo i Iehova e Ierusalema, ke bëeke hë la nöje i Nyidrë troa hmi koi Nyidrë. Angatr e cili a nyiqane hudrume hune la itre xaa nöj, itre ka thatre Iehova.
Ngo tha eatr asë kö la hna perofetan hnei Isaia ngöne la ijine cili, göne la ijin troa acile hmaca la nyipi hmi. Hnene la itre xaa nekö i Isaraela hna nyiqane tha idrei koi Iehova. (Neh. 13:27; Mala. 1:6-8; 2:13, 14; Mat. 15:7-9) E thupen, hnei angatr hna humuthe la Mesia, Iesu Keriso. (Mat. 27:1, 2) Ame lo macatre 70 M.K., hna thë hmaca la traon e Ierusalema memine la uma ne hmi.
Ase hë Iehova qaja amë ka hape, tro hmaca a apatrene la traon e Ierusalema. (Dan. 9:24-27) Haawe, easa öhne laka, ame koi Iehova, tha tro kö a eatr asë lo hna perofetane hnei Isaia mekene 60 ngöne la traon e Ierusalema.
Tro kö a eatr la hna qaja hnei Isaia ngöne la hneijine i easë? Öö, ngo tro ej a eatr thene la ketre föe hna hëne ka hape, “Ierusalema ne hnengödrai.” Öni Paulo aposetolo göne la föe cili ka hape: “Ceitu i angeic me thine së.” (Gal. 4:26) Ame la Ierusalema ne hnengödrai ke, kola qaja la götran ka tha mama kö ne la organizasio i Iehova, hna nyiatrene hnene la itre angela ka mele nyipici. Ame la ‘itre neköne’ ej, ke Iesu memine la ala 144 000 hna iën hnei uati hmitrötr, tui Paulo ka troa mel e hnengödrai. Angatr la “nöj ka hmitrötr,” ene la “Isaraela i Akötresie.”—1 Pet. 2:9; Gal. 6:16.
Tune kaa la aqane “mejë” la Ierusalema ne hnengödrai, me ahudrumëne la lai ne ej? Jëne la itre hna iën e celë fen. Tro sa ce wang la hnei angatr hna melën, memine la hna perofetan hnei Isaia meken 60.
Hna “mejë” la itre keresiano hna iën, ke kösë angatr ngöne la gaa jidr. Pine laka, qane lo macatre 200 M.K. hnene la itre ka iamenumenu, hna aceitunëne me zizania, hna löthe la ekalesia. (Mat. 13:37-43) Ame e cili, hna musinë angatr hnei Babulona Atraqatr, ene la itre hmi ka thoi. Hnei angatr hna lapa thei Babulona Atraqatr utihë la “hneijine la pun,” hna nyiqane lo 1914. (Mat. 13:39, 40) Thupene lo 1919, hna nue angatr qaathei Babulona Atraqatr, nge hnei angatr hna nyiqane ahudrumene la lai i Iehova jëne la huliwa ne cainöj. b Kola tro la itre macatre, nge kola traqa la nöjei atr qa ngöne la nöjei nöj kowe la lai i Nyidrë, kolo mina fe a qaja la itre xaa hna iën ka nyiatrene la Isaraela i Akötresie, “itre joxu” hna qaja ngöne Isaia 60:3.—Hna Am. 5:9, 10.
Ame elany, troa mama thene la itre keresiano hna iën la lai qaathei Akötresie. Pine nemen? Ame hë la angatr a elë a tro hnengödrai, tro angatre lai a nyiatrene la “Ierusalema ka hnyipixe,” ene lo föi Keriso. Kola qaja lo ala 144 000 lao joxu me atre huuj ka troa ce huliwa me nyidrë.—Hna Am. 14:1; 21:1, 2, 24; 22:3-5.
Tro la Ierusalema ne hnengödrai a eatrën la hna qaja ngöne Isaia 60:1. (Wange ju fe la Isaia 60:1, 3, 5, 11, 19, 20 memine la Hna Amaman 21:2, 9-11, 22-26.) Traon e Ierusalema ekö la ka mus kowe la angetre Isaraela. Nge ame elany, ngöne la fen ka hnyipixe, tro pë hë la Ierusalema ka hnyipixe me Keriso a mus. Kola hapeu la kola qaja ka hape, tro la Ierusalema Ka Hnyipixe a uti “qaa hnengödrai thei Akötresie”? Tro ej a musinëne la itre atr. Tro la itre atr ne la nöjei nöj a xoue Akötresie, nge tro angatr a tro “jëne la lai ne la traon.” Nge troa nuamele angatr qa ngöne la ngazo me mec. (Hna Am. 21:3, 4, 24) Nge ame e cili, troa “ahnyipixene hmaca la nöjei ewekë asë” tune la aqane qaja hnei Isaia me itre xaa perofeta. (It. Hu. 3:21) Hna nyiqane lai, lo kola acili Keriso troa Joxu, nge utihë la pune la 1 000 Lao Macatre.
a Ame ngöne Isaia 60:1, ngöne la Tusi Hmitrötr Fene Ka Hnyipixe Hna Ujën, hna nyihnane la hnëewekë “Ziona” maine “Ierusalema,” hnene la hnaewekë “föe.” Pine nemen? Pine laka, ame ngöne la qene Heberu, ame la hnëewekë “mejë jë” me “traqa ha la lai” ke, kösë kola ithanata kowe la ketre föe. Celë hi ka aijijëne la itre ka e troa trotrohnine laka, kola aceitunëne la traon me ketre föe.
b Hnei Ezekiela 37:1-14 me Hna Amaman 11:7-12, hna hane perofetane la ijine troa acile hmaca la nyipi hmi lo 1919. Ame ngöne la hna perofetan hnei Ezekiela, angeic a qaja la ijine troa bëek la itre hna iën asë thupene la itre macatre ne othi angatr hnei Babulona Atraqatr. Ame pena ngöne la hna perofetane hnei Hna Amaman, kola qaja la ijine tro hmaca a mejë hnene la nekö i gurup ne la itre hna iën, itre ka iujine la organizasio, thupene la hna akalabusi angatr. Ame lo 1919, hna acili angatr troa sine la “hlue ka nyipici me ka inamacan.”—Mat. 24:45; wange ju Le culte pur de Jéhovah enfin rétabli !, g.118.
