1. Pine nemene matre easa madrin?

MADRINE catre së ke, itre hlue i Akötresie a ahudrumene la lai angatr! Ame lo macatre hnapan, hetrenyi la 10 milio lao atr ka ini Tusi Hmitrötr. Nge itre milio lao atr ka xötrei sine la Drai Ne Amekunën. Hnei angatre hna inin laka, ame la thupene mel, tre, hatrene la ihnimi Iehova.​—1 Ioane 4:9.

2, 3. (a) Hapeu, tro kö la itre qene hlapa a sewe së troa hudrume tune la “ite lai ne la fen”? (b) Nemene la hne së hna troa ce wang ngöne la tane mekun celë?

² Nyimutre la itre qene hlapa hna qaja hnene la Itretre Anyipici Iehova e cailo fen. Ngo tha celë kö la ka sewe angatr troa cas me atrunyi Iehova. (Hna Amamane 7:9) Eje hi laka, ngacama isa nöje së kö me qene hlapa, ngo ijije hi tro sa ahudrumene la lai së tune la “ite lai ne la fen.”​—Filipi 2:15.

³ Ame la easa catre cainöj me cas me catre hmek ke, easë hi lai a atrunyi Iehova. Ame ngöne la tane mekun celë, tro sa ce wang la aqane tro sa ahudrumene la lai së, ngöne la easa cainöj  me cas me catre hmek.​—E jë la Mataio 5:14-16.

4, 5. (a) Nemene la aqane tro sa ahudrumene la lai së? (b) Nemene la eloine la troa loi thiina me hni ka menyik? (Wange ju la pane iatr.)

⁴ Ame la easa cainöj me inine la itre atr, easë hi lai a ahudrumene la lai së. (Mataio 28:19, 20) Celë hi hna qaja ngöne la ketre tane mekun hna hape, “Kola Lai Ngöne La Jidr.” Kola hape, thatreine kö tro la ketre atr a lapaun kowe la Joxu ngöne la itre drai hnapin, e tha hnei angeic hna “pane nue troa hudrume la lai i angeic. Nyipiewekë tro angeic a tro fë la itre maca ka lolo e cailo fen, me catre trongëne la itre hna amekötin hnei Iehova ngöne la mele i angeic.” (Ita Ne Thup qene Wiwi ne 1 Juun 1925) Ketre, easa atrunyi Iehova hnene la aqane ujë së ngöne la hna cainöj. Ame la itre atr a öhnyi së e hnyimahnyima, angatre hi lai a qaja aloinyi së memine la Akötresi së.

⁵ Öni Iesu kowe la itretre drei nyidrë: “E löjë nyipunie kowe la kete uma, italofaju me angat.” (Mataio 10:12) Ame ngöne la itre götrane hnei Iesu hna cainöj, hna majemine kapa la itre trenyiwa. Ngo ame hë enehila, xalaithe pe hi la itre atr ka hnimi trenyiwa. Itre xan a elëhni la kola fenafena la qëhnelö i angatr hnene la ketre trenyiwa. Ngo maine tro sa hni ka menyik me loi thiina, tro angatr a kepe së hnyawa. Ame la easa hnyimahnyima me ibozu ngöne la easa cainöj me cainöje fë présentoir, tha xou kö la itre atr troa jea me xomi itus me ithanata!

6. Nemene la ka xatuane la lue trefëne qatr tro palahi nyidroti a cainöj?

⁶ Hane hi la ka traqa kowe la lue trefëne qatr e Agele. Kucakuca ha nyidro, matre thatreine hmaca kö nyidroti cainöje trootro ngöne la itre hnalapa. Pine laka, tha nanyi kö la hnalapa i nyidro qa ngöne la ketre uma ne ini, matre hnei nyidroti hna amë la ketre laulau hnë ami tus qëmekene la hnalapa, me amë la itre itus thatraqane la itre kem me thin. Hnene la itre xan hna xome la itus hna hape, Les jeunes s’interrogent. Réponses pratiques, volumes 1 me 2. Hna traqa hnene la ketre trejine föe ka pionie, troa hane cainöj memine la lue trefën. Öhne hi la itre keme me thin la aqane loi thiina ne la trejine föe, memine la aja ne la lue trefëne troa xatuane la itre xan. Celë hi matre, hna nyiqane ini tusi hnene la ketre kem me thin.

7. Nemene la aqane tro sa xatuane la itre ka kötre mel?

⁷ Ame enehila, nyimutre la itre atr ka kötr qa ngöne la nöje i angatr, troa mele ngöne la itre xa nöj. Nemene la aqane tro sa xatuane la itre ka kötre mel, troa hane atre Iehova? Ame la hnapan, loi e tro sa pane inine troa ibozu ngöne la qene hlapa i angatr. Ketre, jëne la application JW Language, ijije hi tro sa inine la itre xa hnepe hnaewekë nyine nyiqane ithanata. Loi e tro fe sa amamane la itre video me itre itus ngöne la sipu qene hlapa i angatr, hnine la sit jw.org.​—Deuteronomi 10:19.

8, 9. (a) Nemene la aqane xatua së hnene la icasikeu hna hape, Mel Me Huliwa Ne Cainöj Ne La Keresiano? (b) Nemene la aqane tro la itre kem me thin a xatuane la itre nekönatr, troa hamë mekun ngöne la hna icasikeu?

 ⁸ Iehova a xatua së troa maca ngöne la huliwa ne cainöj. Jëne la icasikeu hna hape, Mel Me Huliwa Ne Cainöj Ne La Keresiano, Nyidrëti a ini së me xatua së troa wange hmaca la itre atr, me nyiqane ini Tusi Hmitrötr.

⁹ Kola hain hnene la itre ka xötrei traqa troa icasikeu, la kola hamë mekun hnene la itre nekönatr. Celë hi matre, loi e tro sa inine la itre nekö së troa sipu qaja la mekuna i nyudren. Hnene la itre xan hna kapa la nyipici qa ngöne la hna cainöj koi angatr hnene la itre nekönatr.​—1 Korinito 14:25.

10. Nemene la aqane tro la Hmi Ne Hnepe Lapa a xatuane la itre atrene la hnepe lapa troa caas?

¹⁰ Easa atrunyi Iehova, ngöne la easa inine la hnepe lapa së troa ce huliwa ngöne la cas me tingeting. Drei la ketre ceitun. Maine ketre kem me thin epun, loi e troa kuca e nöjei wiik la Hmi Ne Hnepe Lapa. Nyimutre la itre hnepe lapa ka ce goeëne la JW Broadcasting. Angatr a ce ithanatan me ce thawa la itre ini hna hamën. Thupene lai, angatr pë hë a thele la aqane troa trongëne ngöne la mele i angatr. Tha tro kö a thëthëhmin laka, tha ceitune kö la aja ne la itre nekönatr memine la itre thöth. Haawe, xatuane jë la itre atrene la hnepe lapa i epun, troa kapa la itre eloine la hmi ne hnepe lapa.​—Salamo 148:12, 13.

11-13. Nemene la aqane tro sa acatrene la cas e hnine la ekalesia?

 ¹¹ Nemene la aqane tro la itre thöth a xatuane la itre trejin ne la ekalesia? Maine ketre thöthi epun, loi e tro epuni a thele troa nyi sineene la itre trejine qatr me qatre föe. Sipone jë koi angatr troa qaja la ka aijijë angatr troa catre nyihlue i Iehova ngöne la itre macatre. Ijije hi tro epuni a xomi ini qa ngöne la tulu i angatr. Celë hi ka troa ithuecatre koi angatr, nge koi epuni fe! Qatre ju hë së maine thöth, ngo loi e tro sa kapa hnyawa la itre atr ka traqa kowe la Uma Ne Baselaia. Loi e tro sa ibozu me angatr, me hnyimahnyima, me xatua angatr troa thele göhnë, me ce tro me angatr troa ibozu me itre xan. Loi e tro palahi sa ujë tune lai, matre tro angatr a madrin.

¹² Maine epuni a iujine la huliwa ne cainöj, ijije hi tro epuni a xatuane la itre trejin ka qatre hë troa hudrume tune la lai. Loi e troa hamë nyudren la ketre teritoar ka tha jole kö, me ce ami nyudren memine la itre trejine thöth. Tha ka hmaloi kö kowe la itre trejine ka qatre hë me itre ka kucakuca ke, thatreine hmaca kö nyudren cainöj tun ekö. Celë hi matre, nyipiewekë troa meku nyudren me trotrohnine la jol ka eje thei nyudren. Nyipici laka, qatre hë nyudren nge ekö hë nyudren ngöne la nyipici. Ngo maine tro palahi sa thiina ka menyik, tro hë lai a xatua nyudren troa catre cainöj.​—Levitiko 19:32.

¹³ Atraqatr la madrinene la angetre Isaraela ekö, troa ce atrunyi Iehova. Önine la atre cinyihane la tusi Salamo: “Lolopi hë me sheminge pi hë la kola ce lapa la ange tejin!” (E jë la Salamo 133:1, 2.) Hnei angeice hna aceitunëne la troa cas, memine la kola sië oel nyine amenyikene la ngönetrei. Ketre tune mina fe, ame la easa nyipiewekëne la itre trejine qatr, easë hi lai a ithuecatre koi angatr. E cili, kola acatrene la cas e hnine la ekalesia. Nemene la nyine tro epuni a kuca matre troa imajemikeu memine la itre xa trejin?​—2 Korinito 6:11-13.

14. Nemene la aqane tro sa ahudrumene la lai së ngöne la götrane hne së hna mele ngön?

¹⁴ Ijije hi troa hudrume la lai së, ngöne la götrane hne së hna mele ngön. Tro la aqane ujë së a hamë aja kowe la itre ka lapa ezi së, troa hane atrepengöi Iehova. Loi e tro sa isa hnying, ka hape: ‘Nemene la aqane goeë ni hnei angatr? Hna nyidrawane kö la hnalapang? Ka mingöminge kö ej nyipine la tribu? Eni kö a xatuane la itre ka lapa easenyi ni?’ Sipone jë kowe la itre xa trejin troa qaja la thangan la hnei angatr hna thiina ka loi kowe la itre sinee i angatr. Tune kaa fe la itre ka lapa ezi angatr, me itre sine ce huliwa i angatr me sine ini angatr?​—Efeso 5:9.

15. Pine nemene matre nyipiewekë tro sa hmek?

¹⁵ Eje hi laka, easa ajane tro palahi a hudrume la lai së. Celë hi matre, tha tro pi kö sa thëthëhmine la hneijine së. Hnei Iesu hna anyimua qaja kowe la itretre drei nyidrë, ka  hape: ‘Hmeke jë.’ (Mataio 24:42; 25:13; 26:41) Maine tro sa uthe la drai ne “aköte atraqat,” tha tro hë sa hmek me catre xatuane la itre xan troa hane atre Iehova. (Mataio 24:21) E cili, tha tro hmaca kö a hudrume la lai së, ngo tro pe ej a ae trootro, uti hë la paatre palua.

16, 17. Nemene la aqane tro sa amamane laka, ka hmeke së?

¹⁶ Loi e tro sa catre hmek enehila, ke kola ngazo trootro la fen. Xecie hnyawa koi së laka, troa traqa la pun ngöne la drai hna sa hnei Iehova. (Mataio 24:42-44) Celë hi matre, loi e tro sa catre xomihni me lapa mekune la mele së elany. Ketre, nyipiewekë troa e la Tusi Hmitrötr e nöjei drai, me catre thithi koi Iehova. (1 Peteru 4:7) Xomi ini jë qa ngöne la tulu ne la itre trejin ka mele nyipici koi Iehova, laka itre macatre hë enehila. Hetrenyi la ketre tulu e hnine la Ita Ne Thup ne 15 Eiperem 2012, götrane 18-21, lo hna hape, “Cramponné depuis 70 ans au pan du vêtement d’un Juif.”

¹⁷ Loi e tro sa catre nyihlue i Iehova. Ketre, nyipiewekë tro sa kuca la loi, me mele nyipici memine la itre trejin. E cili, tro hë sa madrin me nyipiewekëne la nöjei ijin, ke easenyi catre hë la pun. (Efeso 5:16) Eje hi laka,  nyimutre la itre huliwa hna kuca ekö hnene la itre hlue i Iehova. Ngo tru catre palakö la huliwa së enehila koi Iehova. Haawe ijije hi tro sa qaja ka hape, kolo palahi a hudrume la lai së!

18, 19. Nemene la aqane xatua së hnene la itre qatre thup, matre tro palahi sa catre nyihlue i Iehova? Qaja jë la ketre hna melën.

¹⁸ Ngacama hne së palahi hna tria, ngo ame pe hnei Iehova hna aijijë së troa nyihlue i Nyidrë. Nyipici laka, tru la aja i Iehova troa xatua së, matre hnei Nyidrëti hna acile la itre qatre thupe ne la ekalesia. Hna hë angatr ka hape, “ite ahnahna kowe la nöjei ate.” (E jë la Efeso 4:8, 11, 12.) Celë hi matre, ame la angatr a iwai trootro, ke, loi e tro sa thele troa xomi ini qa ngöne la aqane waiewekë i angatr, me qa ngöne fe la itre eamo hna hamën.

¹⁹ Hane hi la ketre ceitun. Hnene la lue trefën e Agele hna cile kowe la itre jol e hnine la faipoipo i nyidro. Hnei nyidroti e cili hna sipo ixatua thene la lue qatre thup. Hnene la föe hna qaja ka hape, tha sikusikune kö la föi eahlo la hnëqa i nyidrë ngöne la huliwa i Iehova. Nge önine la trahmany, ka hape, thatreine kö nyidrëti hamë ini hnyawa, matre tha hna kuca lapane kö la Hmi Ne Hnepe Lapa. E cili, hnene la lue qatre thup hna qejepengöne la tulu i Iesu koi nyidro. Hnei nyidroti hna ithuecatre kowe la trahmany, troa nyitipune la aqane xatuane Iesu la itretre drei nyidrë. Hna ithuecatre fe kowe la föe troa nyitipu Iesu, troa xomihni me trotrohnine la föi eahlo. Ketre, hnei nyidroti hna xatuane la lue trefën troa hnëkë hnyawa me eatrëne la Hmi Ne Hnepe Lapa memine la lue nekö i nyidro. (Efeso 5:21-29) Hnene la trahmany hna thele troa catre kuca la hnëqa i nyidrë,, matre troa ketre keme ka lolo. Hnene la lue qatre thup hna ithuecatre koi nyidrë troa cile catr me thith, me sipone la uati hmitrötre i Iehova. Eje hi, hnene la ihnim memine la thiina ka loi ne la lue qatre thup, hna xatuane hnyawa la hnepe lapa celë!

20. Nemene la thangane e tro palahi a hudrume la lai së?

²⁰ “Manathithi angat’ asë angete qoue Iehova, ene itete trongëne la ite jë i nyidë.” (Salamo 128:1) Eje hi, easa madrin, ke kolo palahi a hudrume la lai së. Catre jë së qeje Iehova koi itre xan. Ketre, xatuane jë së la itre atrene la hnepe lapa së memine la ekalesia, troa cas me catre hmek. Haawe, jëne la tulu së ka lolo, easa atrunyi Iehova me xatua itre xan troa hane atrune la Tretretro së.​—Mataio 5:16.