Hnei Solomona, keme i Reoboama, hna musi koi 40 lao macatre e Isaraela. (1 Ite Joxu 11:42) Thupene la Solomona a mec, hnei Reoboama hna fek qa Ierusalema a tro Sekema, matre troa joxu. (2 Aqane lapa ite Joxu 10:1) Hapeu, hnei angeice kö hna xou troa joxu? Ketre atr ka inamacane Solomona, keme i angeic. Nge nyipiewekë tro Reoboama a amamane ka hape, ka inamacane fe angeic, nge atreine hi angeic nyinyin la itre jol.

Akötre catre la mele ne la angetre Isaraela, matre hnei angatre hna upe la itre qeneqaja koi Reoboama, me hape: “Hnei keme i nyipëti hna ahacene la nyine iothikeu hun, nge enehila tro nyipëti a amaloene la huliwa ne la keme i nyipë ka aköt, memine la nyine iothikeu ka hace hnei nyidëti hna atë hu hun, nge tro huni a nyi jini nyipë.”​—2 Aqane lapa ite Joxu 10:3, 4.

Tha ka hmaloi kö koi Reoboama troa axecië mekun. Maine tro angeic a kei thenge la aja ne la nöj, tro ha paatre la itre mo i angeic memine fe la hnepe lapa i angeic. Ngo maine tro angeic a thipëne la aja ne la nöj, tro hë angatre a icilekeu me angeic. Nemene la hnei Reoboama hna kuca? Hnei angeic hna pane ithanata memine la itre qatr ka xatuane ekö lo keme i angeic. Hnei angatr hna upi angeic troa kuca la aja ne la nöj. Ngo ame e thupen, hnei Reoboama hna ithanata memine la itre thupëtresij, me mekun troa qanangazone la nöj. Öni angeic kowe la nöj: “Hnei kaka hna ahacene la nyine iothikeu nyipunie, nge tro pena ni a nyi xane kowe lai ; hnei kaka hna oteë nyipunie hnei ite wameuc, nge tro pena ni a oteë nyipunie hnei ite sekopio.”​—2 Aqane lapa ite Joxu 10:6-14.

Nemene la ini koi së? Ame enehila, nyimutre la itre trejine ka qatre hë, nge nyimu macatre ne nyihlue i Iehova angatr. Ijiji angatre hi troa xatua së troa axecië mekune hnyawa. Loi e tro sa inamacan me drengethenge angatr.​—Iobu 12:12.

Hnei Reoboama hna hnëkëne la trongene isi angeic matre troa isi memine la itre tribu ka icilekeu. Ngo ame pe, hnei Iehova hna upi Semaia perofeta, troa ithanata me angatr. Öni nyidrë: “The tro kö nyipunie  a ishi memine la ite tejine me nyipunie ite nekö i Isaraela ; isa hmacaju nyipunie kowe la ite uma i nyipunie ; ke qa thenge la ewekë celë.”​—1 Ite Joxu 12:21-24. *—Wange ju la ithuemacany.

Hapeu ka jole kö koi Reoboama troa drengethenge Iehova? Nemene la aqane troa goeë angeic hnene la nöj? Hnei angeice lo hna qaja ka hape, tro angeic a lepi angatr “hnei ite sekopio [pune kau].” Ngo hnei angeice hna hmaca qa ngöne la mekune cili, me drei Iehova. (Wange ju fe la 2 Aqane lapa ite Joxu 13:7.) Haawe ame koi angeic, tha nyipiewekë kö la mekuna ne la nöj. Hnei Reoboama me trongene ne isi angeic “hna denge la wesi ula i Iehova, me hmaca me tro thenge la wesi ula i Iehova.”

Nemene la ini koi së? Ngacama hnyimasai së ju hë hnei itre xan, ngo loi e tro palahi sa inamacane me catre drengethenge Akötresie. Akötresieti a amanathithine la itre ka drengethenge Nyidrë.​—Deuteronomi 28:2.

Hapeu, hnei Reoboama kö hna kepe manathithi qa ngöne la hna drengethenge? Reoboama palahi la joxu ne la lue tribu, Iuda me Beniamina. Ketre, hnei angeic hna acile la itre xa traon e cili, me “nyi göline hnyawa it’ ej.” (2 Aqane lapa ite Joxu 11:5-12) Nyimutre fe la itre macatre ne trongëne angeic la itre wathebo i Iehova. Hna nyiqane thili koi idrola hnene lo 10 lao xa tribu, matre nyimutre la itre ka fek a tro Ierusalema troa sajuëne la nyipi hmi memine la musi Reoboama. (2 Aqane lapa ite Joxu 11:16, 17) Haawe, hna acatrene la baselaia i Reoboama, ke hnei angeic hna drengethenge Iehova.

Ame hë lo kola catrecatre la baselaia i Reoboama, hnei angeic hna kuca la ketre ewekë. Tha trongëne hmaca kö angeic la itre wathebo i Iehova, angeice ha nyihluene la itre xa haze! Nemene la kepin? Hapeu hna ajolë Reoboama kö hnene la thine i angeic, atre Amona? (1 Ite Joxu 14:21) Thatre kö së. Ngo ame pe, hnene la nöj hna xötrethenge la tulu i angeic ka ngazo. Celë hi matre, hnei Iehova hna nue Sisaka, joxu ne Aigupito, troa thapa la itre xa nöj e Iuda hna ekögölithe hnei Reoboama!​—1 Ite Joxu 14:22-24; 2 Aqane lapa ite Joxu 12:1-4.

Ketre, hnei Sisaka me trongene isi angeic hna lepe la traon e Ierusalema, hna nyi joxu i Reoboama. Ame e cili, hnei Semaia perofeta hna qaja la ketre maca i Akötresie koi Reoboama me itre tane i angeic. Öni nyidrë: “Ase hë nyipunie tiji ni, ngöne hi lai kete tro ni a nue tiji nyipunie kowe la iwanakoime i Sisaka.” Nemene la aqane ujë i Reoboama? Hnei angeic hna kapa hnyawa la ihaji! Öni Tusi Hmitrötr: “Hnene la ite tane i Isaraela memine la joxu hna aconyi angate kö, me hape, Meköti Iehova.” Celë hi matre, hna amele Reoboama hnei Iehova , nge tha hna apatrene ju kö la traon e Ierusalema.—2 Aqane lapa ite Joxu 12:5-7, 12.

Ame ngöne la ijine cili, pëkö ka ajolëne la musi Reoboama e Iuda. Qëmekene tro angeic a mec, nyimutre la itre ahnahna hnei angeic hna hamëne kowe la itre nekö i angeic trahmany. Maine jë, angeic a hmekën matre, tha tro kö angatr a icilekeu me Abia, lo trejine me angatr ka troa joxu thupe i angeic. (2 Aqane lapa ite Joxu 11:21-23) Ka inamacane la aqane ujë i Reoboama ngöne la ijine cili.

Ngacama ame itre xa ijin, hnei Reoboama hna kuca la loi, ngo Tusi Hmitrötr a qaja la pengöne la musi angeic, ka hape: “Hnei nyidëti hna kuca la ngazo.” Pine nemen? Pine laka, “tha hnei nyidëti hna hnëkëne la hni nyidë troa thele Iehova.” Celë hi matre, tha madrine kö Iehova koi angeic.​—2 Aqane lapa ite Joxu 12:14.

Nemene la ini hne së hna xom qa ngöne la tulu i Reoboama? Hnei angeic hna drengethenge Akötresie e itre xa ijin. Nge hetre itre ewekë fe ka lolo hnei angeice hna kuca thatraqane la nöje i Iehova. Ngo ame pe, tha ka imelekeu kö angeic me Iehova, nge pëkö aja i angeic troa amadrinë Nyidrë. Celë hi kepine matre, hnei angeice hna hmaca troa kuca loi, me thil kowe la itre haze. Maine jë, epuni a hnying ka hape: ‘Ame lo Reoboama a kapa la ihaji qaathei Iehova, hnei angeice kö hna thele troa ietra me amadrinë Nyidrë? Maine pena angeice hi a dreng la hna qaja hnei itre xan?’ (2 Aqane lapa ite Joxu 11:3, 4; 12:6) Hnei Reoboama hmaca hna kei kowe la ngazo. Eje hi, tha ceitu i angeice kö me Davita joxu, qaqa i angeic! Nyipici laka, hetre itre ngazo hna kuca hnei Davita. Ngo ame pe, hnei nyidrëti hna ietra qa kuhu hni, me amamane ngöne la mele i nyidrë ka hape, ka tru Iehova memine la nyipi hmi.​—1 Ite Joxu 14:8; Salamo 51:1, 17; 63:1.

 Nyimutre la itre ini nyine tro sa xom qa ngöne la tulu i Reoboama. Eje hi laka, nyipiewekë tro la itre atr a thupëne la hnepe lapa i angatr, me kuca la loi koi itre xan. Ngo, maine easa ajane tro Iehova a kepe së, nyipiewekë tro sa nyihlue i Nyidrë thenge la aja i Nyidrë, me acatrene palahi la aqane imelekeu së me Nyidrë.

Ngo ame la ka sisitria, tre, troa jui la ihnimi së koi Iehova. Ka ceitune hi lai memine la eë laka, nyipiewekë troa ipicone matre tro palahi a mel. Ketre tune fe, nyipiewekë tro sa catre inine la Wesi Ula i Akötresie, me lapa mekun ej. Tro fe sa catre thith, matre troa acatrene la ihnimi së koi Iehova. (Salamo 1:2; Roma 12:12) Eje hi, maine ka catr la ihnimi së koi Iehova, tro hë sa atrunyi Nyidrë ngöne la mele së. Ketre, hetre aja së hë troa ietra, me sipo Nyidrë troa nue la itre ngazo së. Haawe, the xötrethenge kö së la tulu i Reoboama, ngo catre pi së mele nyipici koi Iehova.​—Iudra 20, 21.