EASA mele ngöne la fene ka ngazo, matre jol troa mele tingeting. Maine jë, tro pena sa hetre tingeting, ngo canga tro hi a paatr. Hapeu, ijije kö tro la Tusi Hmitrötr a xatua së troa hetrenyi la tingeting ka cile hut? Nemene la aqane tro sa xatuane la itre xan troa hetrenyi la tingetinge cili?

Maine easa ajane troa mele tingeting, nyipiewekë tro sa thupëne la mele së. Loi e tro fe sa iëne hnyawa la itre sinee së. Ngo ame la ka sisitria ke, troa imelekeu me Akötresie. Troa tune kaa?

Ka nyipiewekë koi së la itre trepene meköt me itre hna amekötin hnei Iehova. Ame la easa trongëne itre ej, easë hi lai a amamane la mejiune së koi Iehova, memine la aja së troa imelekeu hnyawa me Nyidrë. (Ieremia 17:7, 8; Iakobo 2:22, 23) Ame e cili, tro Iehova a easenyi së, me hamë së la nyipi tingeting. Kola qaja ngöne Isaia 32:17 ka hape: “Nge ame la thangane la thina ka meköt, te, tingeting ; nge ame la tropane la thina ka meköt, te, hnamano, me lapa xetietë epine palua.” Maine tro sa drengethenge Iehova, tro hë sa öhne la nyipi tingeting.—Isaia 48:18, 19.

Iehova a hamëne la ketre ahnahna ka troa xatua së troa öhne la nyipi tingeting. Kola qaja la uati hmitrötr.—Itre Huliwa 9:31.

Hnei Paulo aposetolo hna qaja, ka hape, ame la tingeting, tre, ketre igötranene la “wene la [u]a.” (Galatia 5:22, 23) Haawe, nyipiewekë tro sa nue la uati hmitrötre i Akötresie, troa eatrongë së, ke celë hi ka hamë tingeting. Nemene la aqane tro sa kuca?

Ame la hnapan, ke, nyipiewekë tro sa catre e la Wesi Ula i Akötresie. (Salamo 1:2, 3) Maine tro sa lapa mekune la itre hna e, tro hë la uati hmitrötr a xatua së troa trotrohnine la mekuna i  Iehova. Tune la Nyidrëti a thupëne matre troa tingeting la itre hlue i Nyidrë me Nyidrë. Ketre, kolo fe a qaja koi së la kepin matre ka nyipiewekë la tingeting koi Nyidrë. Maine tro sa trongëne la itre ini qa hnine la Tusi Hmitrötr, tro hë sa mele tingeting.—Ite Edomë 3:1, 2.

Ame la hnaaluen, ke, nyipiewekë troa sipone la uati hmitrötr jëne la thith. (Luka 11:13) Iehova a thingehnaeane ka hape: “Tro ha thupëne la ite hni nyipunie me ite mekune i nyipunie göi Keriso Iesu, hnene la tingetinge ka sisitia qa thei Akötesie hune la nöjei mekun’ asë.” (Filipi 4:6, 7) Maine tro palahi sa qale koi Iehova me mejiune kowe la uati hmitrötre i Nyidrë, tro hë Nyidrëti a hamë së la nyipi tingeting.—Roma 15:13.

Nyimutre la itre atr ka saze hnene la Tusi Hmitrötr. Ame enehila, lolo hë la mele i angatr, ke tingetinge angatr me Iehova, nge tingetinge fe angatr me itre xan. Nemene la ka xatua angatr troa saze?

Qëmekene troa atre la nyipici, nyimutre la itre trejine ekö ka elëhni me iakötrë. Ngo hnei angatr hna isine troa nuetrije la itre thiina ka ngazo. Ame enehila, menyike hë me lolo la itre thiina i angatr, nge tingetinge hë angatr me itre xan. * (Wange ju la ithuemacany.) (Ite Edomë 29:22) Hanawang la tulu i David me Rachel, lue xa trejine ka saze aqane mel.

Qëmekene tro David a atre la nyipici, ka ixöjetriji angeic, nge ka sa akötrëne kowe la itre atrene la fami angeic. Ngo hnei angeic hna trotrohnine e thupen, laka , nyipiewekë troa saze. Nemene la ka xatua angeic troa öhne la nyipi tingeting? Öni David, “Ame la eni a trongëne la itre trepene meköti ne la Tusi Hmitrötr, ke eni a öhne laka, eahuni ha imetrötrekeu e hnine la fami.”

 Ame pena Rachel, ke, öni angeic, “Hna hetru ni hnine la elëhni, matre kösë ka elëhni palahi ni enehila.” Nemene la ka xatua Rachel troa öhne la nyipi tingeting? Öni angeic, “Hnenge hna catre thithi koi Iehova.”

Hetrenyi la itre xa atr ka hane saze tui David me Rachel. Tingetinge hë la mele i nyidro ke, hnei nyidroti hna trongëne la itre trepene meköti ne la Tusi Hmitrötr, me mejiune kowe la uati hmitrötr. Ngacama easa mele ngöne la fene ka ngazo, ngo ame pe, ijije hi tro sa hetre tingeting. E cili, tro ha lolo la aqane imelekeu së memine la itre atrene la hnepe lapa së me itre trejin ne la ekalesia. Ngo Iehova a upi së troa ‘lapa loi me nöjei atr asë.’ (Roma 12:18) Hapeu, ijije kö tro sa lapa loi memine la nöjei atr? Pine nemene matre loi e tro sa thele troa tingeting memine la itre xan?

Ame la easa cainöjëne la Baselaia i Akötresie, easa tro fë la ketre maca ne tingeting kowe la itre atr. (Isaia 9:6, 7; Mataio 24:14) Nyimutre la itre atr ka kapa la maca cili. Celë hi matre, tha hnehengazo menu hmaca kö angatr me elëhni pine la itre ewekë ka traqa e cailo fen. Ngo, hetre mejiune i angatre hë kowe la mel elany, nge celë hi ka upi angatr troa catre ‘thele la tingeting.’—Salamo 34:14.

Nyipici laka, hetre itre xan ka tha canga kapa kö la maca hne së hna tro fë. (Ioane 3:19) Ngo tha nyipiewekë kö ke, Akötresieti a hamëne la uati hmitrötre i Nyidrë. Celë hi ka xatua së tro palahi a tingeting me metrötr ngöne la easa cainöj. Easa xötrethenge la eamo i Iesu, ka hape: “E löjë nyipunie kowe la kete uma, italofaju me angat. Nge maine loi la uma cili, loi e troa traqa la [tingetinge ne] la thithi nyipunie kow’ ej ; ngo maine tha loi kö, loi e hmaca koi nyipunie la [tingeting ne] la thithi nyipunie.” (Mataio 10:11-13) Maine tro sa trongëne la hna qaja ngöne la xötre celë, tro palahi sa hetre tingeting, ngacama qanangazo së ju hë hnei itre xan. Ketre, easa mejiune laka, ijine palakö troa xatua angatr.

Easë fe a thele tingeting ngöne la easa metrötrëne la itre mus, ngacama tha kapa kö angatr la huliwa së. Drei la ketre ceitun. Ame ngöne la ketre nöj e Afrique, hnene la itre mus hna wathebo së troa xupi Uma Ne Baselaia. Xecie hnyawa kowe la itre trejin laka, ijije hi troa cil kowe la jole cili cememine la tingeting. Hnei angatr hna upe la ketre trejine mesinare ekö ngöne la nöje cili, troa wange la Haut-Commissaire e Londres e Agele, troa qaja ka hape, ka tingetinge la huliwa ne la Itretre Anyipici Iehova.

Önine lai trejin: “Ame la eni a traqa e cili, ke eni a öhne jëne la aqane heetre ne la föe ka huliwa laka, ketre atrene la tribu lo hnenge hna inine la qene hlapa. Eni a ibozu jë me eahlo ngöne la sipu qene hlapa i eahlo. Sesëkötre ju hi eahlo, matre eahlo a hnyingë jë ka hape, ‘Hnauëne la nyipëti a traqa e celë?’ Hnenge hna sa ka hape, eni a ajane troa ithanata memine la Haut-Commissaire. Eahlo e cili a hë nyidrë. Ame la nyidrëti a traqa, ke nyidrëti a ibozu me eni ngöne la qene hlapa ne la nöj. Thupene lai, hnei nyidrëti hna drenge la eni a qejepengöne laka, ka tingetinge la huliwa ne la Itretre Anyipici Iehova.”

Ame e cili, trotrohnine hnyawa ha la Haut-Commissaire la pengöne la huliwa së, matre tha methinëne hë nyidrëti la Itretre Anyipici Iehova. Itre drai thupen, hna saze la hna amekötin hnene la mus, nge hna nue hmaca kowe la Itretre Anyipici Iehova troa xupi Uma Ne Baselaia. Atraqatr la madrine ne la itre trejin! Eje hi, maine tro sa metrötrëne la itre xan, tro hë sa tingeting.

Lolo catr la aqane mele ne la itre hlue i Iehova enehila ke, angatr a nyihlue i Nyidrë ngöne la tingeting. Ame la easa isa thele tingeting ngöne la mele së, ke easë fe hi lai a acatrene la tingeting e hnine la nöje i Akötresie. Xecie hnyawa koi së laka, easa amadrinë Iehova. Ketre, tro Nyidrëti a hamëne koi së la tingeting ka epine palua ngöne la fene ka hnyipixe.—2 Peteru 3:13, 14.